అష్టోత్తరశత సతీ అశ్వధాటి (సతీ శతకము). 69వ పద్యము. రచన. చింతా రామకృష్ణారావు. గానము ... శ్రీ కుమార సూర్యనారాయణ.

 జైశ్రీరామ్.

69. కాదంబ సద్వన ప్రమోద ప్రవాసినివి మా దారి నీవె శుభదా!

రాదేల నీకు కృప మోదంబుతో నిలిపి బాధల్ విడన్ గొలుపఁగా.

సాధింతుమమ్మ  వరబోధన్ వరంబునిడ నీ దివ్య తేజసముచే

బాధా నివారిణివి సాధింపఁ జేయుమిది మోదంబుతోడను సతీ!

భావము.

ఓ సతీ మాతా! కదంబ వనమున ప్రమోదముతో నివసించు జగన్మాతవు. ఓ 

శుభప్రదవైన తల్లీ! మా మార్గము నీవే నమ్మా. ప్రమోదముతో మమ్ములను 

నిలిపి, బాధలను వీడిపోవునట్లు చేయుటకు నీకు మాపై కృప ఎందులకు 

రాకున్నదమ్మా? శ్రేష్ఠమయిన బోధను నీవు మాకు వరముగా 

ప్రసాదించినచో నీ యొక్క దివ్యమయిన తేజమనెడి ఫలితమును 

సాధించుదుముకదా తల్లీ!బాధనను పోగొట్టుదానవు. ఈ విధమయిన 

ఫలితమును సాధించునట్లు నీవే ఇష్టముతో చేయుమమ్మా.

జైహింద్.

Print this post