శ్రీ యాదాద్రి లక్ష్మీనృసింహ శతకము 102వ పద్యము .... రచన. చింతా రామకృష్ణారావు. గానం. శ్రీ కుమార సూర్యనారాయణ.

జైశ్రీరామ్.

102. ఓం పరతత్త్వాయ నమః.

నవమాలిని వృత్త గర్భ సీసము.

నరహరి! చూచితే నరుల బాధల్? మదిన్ - కలిచివేయును కన్న కమల నయన!

మురహర! తీర్చవే భువిని క్షోభల్. సదా - శోభిలం జేయవే సుందరాంగ.

నిరుపమ! నిత్యమై నిలుతువీవే మదిన్ - శోభిల్లఁ జేసినన్ సుజనులందు

చరణము పట్టనీ సదయ నన్నున్. నీదు - పద ధూళి కైవల్య పథము చేర్చు. 

గీ. విదిత నవమాలినీ గర్భ వినుత సీస - దీప్త *పరతత్వ*! నిన్ గొల్తు దేవదేవ!

భక్త జన పోష! భవశోష! పాపనాశ! - శ్రితజనోద్భాస! యాదాద్రి శ్రీనృసింహ!

102వ సీస గర్భస్థ నవమాలిని. (న జ భ య .. యతి 8)

నరహరి! చూచితే నరుల బాధల్?

మురహర! తీర్చవే భువిని క్షోభల్.

నిరుపమ! నిత్యమై నిలుతువీవే.

చరణము పట్టనీ సదయ నన్నున్.

భావము.

భక్తులను పోషించువాఁడా! భవబంధములను నశింపఁజేయువాఁడా! పాపమును నశింపఁజేయువాఁడా! ఆశ్రిత జనమున

ప్రకాశించువాఁడా! ఓ యాదాద్రివాసుఁడవైన లక్ష్మీ నారసింహా! ఓ కమల నయనా! నరుల బాధలు చూచినచో మనసును

కలిచివేయును. నీవు చూడుము. ఓ మురహరా! ఓ సుందరాంగా! మమ్ములను శోభిల్లఁ జేయుటకు నీవు ఈ క్షోభలను

నశింపఁ జేయుము. ఓ నిరుపమా! నీ వావిధముగ చేసినచో సుజనుల మనస్సులలో నీవే శోభిల్లుచుందువు కదా.నీ

పదములను నన్ను పట్టనీ, నీ పాద ధూళి కైవల్య పథమును చేర్చును.నవమాలినీ వృత్త గర్భ సీసమున ప్రకాశించు ఓ

పరతత్వమా! ఓ దేవదేవా! నిన్ను నేను కొలిచెదను.   

జైహింద్. 

Print this post