శ్రీ యాదాద్రి లక్ష్మీనృసింహ శతకము 16వ పద్యము మరియు 17వ పద్యము .... రచన. చింతా రామకృష్ణారావు. గానం. శ్రీ కుమార సూర్యనారాయణ.

 జైశ్రీరామ్.

16. ఓం చక్రిణే నమః. 

శార్దూల వృత్త గర్భ సీసము. 

పగ వాని ప్రార్థన భారమంచనకనే - ప్రహ్లాదు రక్షింపవా మహాత్మ!

యిల మానప్రాణములెల్లఁ గాచితివిగా! - మాన్యుండ! రక్షింపుమా ధరిత్రి.

మది జ్ఞాన శ్రేయ సుమాధురుల్ గొలుపుచున్ - గర్తవ్యమున్ జూపఁ గామ్యదాత!

శ్రితమౌని ప్రార్థిత శ్రీయుతుండ! కనుమా - మమ్మున్, మదిన్ నిల్పుమా ముకుంద!

గీ. వక్రతను బాపు *చక్రి*! ప్రవర్తనమున - సత్య జీవనగతినిమ్ము శాశ్వతముగ.    

భక్త జన పోష! భవశోష! పాపనాశ! - శ్రితజనోద్భాస! యాదాద్రి శ్రీనృసింహ!

16వ సీస గర్భస్థ శార్దూల వృత్తము. (మ స జ స త త గ .. యతి 13)  

వాని ప్రార్థన భారమంచనకనే ప్రహ్లాదు రక్షింపవా! 

మానప్రాణములెల్లఁ గాచితివిగా! మాన్యుండ! రక్షింపుమా.

జ్ఞాన శ్రేయ సుమాధురుల్ గొలుపుచున్ గర్తవ్యమున్ జూపఁగా,

మౌని ప్రార్థిత శ్రీయుతుండ! కనుమా మమ్మున్, మదిన్ నిల్పుమా!   

భావము. 

భక్తులను పోషించువాఁడా! భవబంధములను నశింపఁజేయువాఁడా! పాపమును నశింపఁజేయువాఁడా! ఆశ్రిత జనమున ప్రకాశించువాఁడా! ఓ యాదాద్రివాసుఁడవైన లక్ష్మీ నారసింహా! పగతురకు సంబంధించిన వాని ప్రార్థన బరువని పలుకక ప్రహ్లాదుని రక్షించితివి కదా. భూమిపై వాని మానప్రాణములను రక్షించితివి.కదా. ఓ మాన్యుడా! కామితములనొసగువాడా! మనసులలో జ్ఞానము శ్రేయము సుమాధురిని కల్పించి కర్తవ్యమును చూపుచు ఈ భూమిని కాపాడుము. ఆశ్రయింపఁబడిన మునులచే ప్రార్థింపబడు లక్ష్మీ సమన్వితుఁడా! ఓ ముకుందా. మమ్ములను కనుము. నీ మదిలో నిలుపుము. ఓ చక్రీ! మా ప్రవర్తనలో వంకరను పోఁగొట్టుము. సత్యమైన జీవన గతిని శాశ్వతముగా మాకిమ్ము. 

17. ఓం విజయాయ నమః.

బంభరగాన వృత్త గర్భ సీసము.

సుజన వరద! జయము జయము కేశవ! - శాశ్వితుఁడా! గుణసాంద్ర వినుత!

పూజితుఁడా! ప్రియము గొలుపు నీవిక - మాకిలలో శుభమార్గదర్శి!

పొంగుచు నీ నయమును కననీ. నవ - నీత ప్రియా! ఫలదాత! నృహరి!

వెతలనిడే భయము తొలఁగనీ వర - భక్తి సుధన్! భవబంధ నాశ! 

గీ. నిత్య కల్యాణ యాదాద్రి నిలయ శ్రీశ! - స్తుత్య విజయాఖ్య సర్వేశ! సుప్రకాశ!  

భక్త జన పోష! భవశోష! పాపనాశ! - శ్రితజనోద్భాస! యాదాద్రి శ్రీనృసింహ!

17వ సీస గర్భస్థ బంభర గాన వృత్తము. (న న భ భ గ .. యతి 8)

జయము జయము కేశవ! శాశ్వితుఁడా! - ప్రియము గొలుపు నీవిక మాకిలలో.

నయమును కననీ. నవనీత ప్రియా! - భయము తొలఁగనీ వర భక్తి సుధన్.

భావము.

నిత్యకల్యాణ యాదగిరివాసా! ఓ శ్రీపతీ! పొగడఁబడే విజయనామకా! సర్వేశ్వరా! ఓ సుప్రకాశా

భక్తులను పోషించువాఁడా! చెడును నశింపఁజేయువాఁడా! భవమును నశింపఁజేయువాఁడా!  సుగుణములచే

పొగడఁబడువాడా! శాశ్వితుఁడా! ఆశ్రితులయందు ప్రకాశించువాఁడా! ఓ యాదాద్రివాసుఁడవైన లక్ష్మీ నారసింహా!

మంచివారి కోరికలు తీర్చెడి ఓ కేశవా! నీకు జయము. పూజింపఁబడువాడా! ఇలలో మాకు శుభమార్గదర్శివి. ఇక మాకు నీవు

ప్రియమునే లభింపఁజేయుము. నవనీత ప్రియుడా! ఫలితములొసగు నరహరీ! నీ న్యాయమార్గమును పొంగిపోవుచూ

మమ్ములను చూడనిమ్ము. భవబంధనాశకా! భయమును గొలిపే బాధలను నీవొసగు శ్రేష్టమైన భక్త్యమృతముచేత

తొలగునట్లు చేయుము.

జైహింద్.

Print this post