శ్రీ యాదాద్రి లక్ష్మీనృసింహ శతకము 45వ పద్యము .... రచన. చింతా రామకృష్ణారావు. గానం. శ్రీ కుమార సూర్యనారాయణ.

 జైశ్రీరామ్.

45. ఓం శింశుమారాయ నమః.

రుచిర వృత్త గర్భ సీసము.

ఆత్మస్థుఁడ! దయామయా! కరుణను దారిఁ - జూపవా? మాకిల ప్రాపు నీవె.

శ్రీకరుఁడ! ప్రయాసనే కనవొకొ? ప్రాణ - నాథుఁడా! మాకిట్టి బాధలేల?

నా దేవుఁడ! ప్రియంబునన్ గన నిను వేడు - కొందునే. నన్ను నీవందలేవ?

దీనబంధు! జయాన్వితా! నరహరి! సత్య - శోభితా! కొలుపుమా ప్రాభవంబు.

గీ. చిత్తహీనులనణచెడి *శింశుమార*! - భక్తపాళిని మదిఁగాంచి శక్తినిడుము.

భక్త జన పోష! భవశోష! పాపనాశ! - శ్రితజనోద్భాస! యాదాద్రి శ్రీనృసింహ!

45వ సీస గర్భస్థ రుచిరవృత్తము. (జ భ స జ గ .. యతి 9)

దయామయా! కరుణను దారిఁ జూపవా?

ప్రయాసనే కనవొకొ? ప్రాణ నాథుఁడా!

ప్రియంబునన్ గన నిను వేడుకొందునే.

జయాన్వితా! నరహరి సత్య శోభితా!

భావము.

భక్తులను పోషించువాఁడా! భవబంధములను నశింపఁజేయువాఁడా! పాపమును నశింపఁజేయువాఁడా! ఆశ్రిత జనమున

ప్రకాశించువాఁడా! ఓ యాదాద్రివాసుఁడవైన లక్ష్మీ నారసింహా! ఆత్మలో నున్నవాడా! ఓ దయాపూర్ణుఁడా! ఇలలో నీవే

మాకు దిక్కు. దారి చూపుము..ఓ ప్రాణనాథుఁడా! ఓ శ్రీకరా! మా శ్రమను గమనింపవేల? మాకీ బాధలెందులకు? ఓ నా

దైవమా! నన్ను ప్రేమతో చూడుమని వేడుకొనుచున్నాను. నన్ను నీవు అందుకొనలేవా? ఓ దీనబాంధవా! జయాన్వితా! ఓ

నరహరీ! సత్యమునందు ప్రకాశించువాడా!మాకు ప్రాభవమును కొలుపుము. హృదయము లేనివారినణచెడి ఓ

శింశుమారా! భక్తులను నీ మనసునందు చూచి శక్తిని ప్రసాదించుము.

జైహింద్.

Print this post