శ్రీ యాదాద్రి లక్ష్మీనృసింహ శతకము 25వ పద్యము .... రచన. చింతా రామకృష్ణారావు. గానం. శ్రీ కుమార సూర్యనారాయణ.

 జైశ్రీరామ్.

25. ఓం జ్వాలామాలినే నమః.

మనోజ్ఞ వృత్త గర్భ సీసము.

జయముల నిచ్చుచు సంతసంబున నిల్పి - తే యాదగిరివాస! ధీప్రభాస!

భయమును బాపుచు భక్త బాంధవ ప్రోచి - తే నీదు కృపఁ జూపి దివ్య మూర్తి.

నయ వినయంబులు నాకు నా కృతికిచ్చి -  తే నన్ను దీవించి? దీన బంధు!

ప్రియమున నన్గను విశ్వ వేద్య నృసింహుఁ - డానందసంధాత యనఁగ నిలిచి,

గీ. సన్మనోజ్ఞ యుత వర సీసంబునందు. - నున్నవాఁడ! *జ్వాలామాలి*! నన్ను కనుమ.

భక్త జన పోష! భవశోష! పాపనాశ! - శ్రితజనోద్భాస! యాదాద్రి శ్రీనృసింహ!

25వ సీస గర్భస్థ మనోజ్ఞ వృత్తము. (న జ జ భ ర .. యతి 10)

జయముల నిచ్చుచు సంతసంబున నిల్పితే! - భయమును బాపుచు భక్త బాంధవ ప్రోచితే. 

నయ వినయంబులు నాకు నా కృతికిచ్చితే. - ప్రియమున నన్గను విశ్వ వేద్య నృసింహుఁడా!

భావము.

భక్తులను పోషించువాఁడా! భవమును నశింపఁజేయువాఁడా! పాపమును నశింపఁజేయువాఁడా! ఆశ్రిత జనమున

ప్రకాశించువాఁడా! ఓ యాదాద్రివాసుఁడవైన లక్ష్మీ నారసింహా! నాకు జయములు కలుఁగ జేయుచు నాకు సంతోషమును

నిలిపితివా.  ధీ ప్రభాసుడా యాదగిరీశుడా! ఓ భక్తబాంధవా! నాలోని భయమును పారద్రోలుచు నన్ను కాపాడితివా. ఓ దీన

బంధూ! నాకు, నా కృతికి నయ వినయములు కలుఁగఁజేసితివా. నీవు ఆనంద సంధాతవనునట్లుగా ఓ నృసింహా నిలిచి

ప్రియముతో నన్ను కనుము. మంచి మనోజ్ఞవృత్తముగర్భమునందు కలిగియున్న సీస పద్యమున ఉన్న ఓ జ్వాలామాలి

నన్ను కనిపెట్టుకొని చూచుచుండుము.   

జైహింద్.

Print this post