శ్రీ యాదాద్రి లక్ష్మీనృసింహ శతకము 76వ పద్యము .... రచన. చింతా రామకృష్ణారావు. గానం. శ్రీ కుమార సూర్యనారాయణ.

 జైశ్రీరామ్.

76. ఓం సర్వయంత్రవిదారణాయ నమః.

ఉపజాతి వృత్త గర్భ సీసము.

తేజోమయుండ! నీ తేజముం జూచి పు - నీతునౌదున్ బ్రభూ! నిర్వికల్ప!

ధర్మస్వరూపా! సతంబు నిన్  గాంతుఁ బ్ర - శాంతమొప్పన్. మహేశా! మనోజ్ఞ!

దాక్షిణ్యమునను చైతన్యముం గొల్పుము - సామ వేద్యా! సత్య శాంతరూప!

ధర్మంబు నందు నితాంత సంతో షిగ - నిన్నె కందున్. హరీ! నిష్కళంక.

గీ. ఉందువుపజాతులందునో సుందరాంగ. - *సర్వయంత్రవిదారణా*! సౌమ్య రూప!

భక్త జన పోష! భవశోష! పాపనాశ! - శ్రితజనోద్భాస! యాదాద్రి శ్రీనృసింహ!

76వ సీస గర్భస్థ ఉపజాతి. (1. 3పాదాలు త త జ గగ {ఇంద్రవజ్ర}

                               2. 4పాదాలు జ త జ గగ {ఉపేంద్రవజ్ర} .. యతి 8) 

నీ తేజముం జూచి పునీతునౌదున్. - సతంబు నిన్ గాంతుఁ బ్రశాంతమొప్పన్. 

చైతన్యముం గొల్పుము సామ వేద్యా! - నితాంత సంతో షిగ నిన్నె కందున్.

భావము.

భక్తులను పోషించువాఁడా! భవబంధములను నశింపఁజేయువాఁడా! పాపమును నశింపఁజేయువాఁడా! ఆశ్రిత జనమున

ప్రకాశించువాఁడా! ఓ యాదాద్రివాసుఁడవైన లక్ష్మీ నారసింహా! ఓ నిర్వికల్పా! తేజోమయా! నీ ప్రకాశమును చూచి

పునీతునగుదును. ఓ ధర్మ స్వరూపా! ప్రశాంతిగా ఉండుటకు ఎల్లప్పుడూ నిన్ను చూచెదను. ఓ సామ వేద్యా! నాలో

చైతన్యమును కొల్పుము. నిష్కళంకుఁడవైన ఓ హరీ! ఉపజాతివృత్త గర్భ సీసమందున్న సుందరాంగా!

సర్వయంత్రవిదారణా! ఓ సౌమ్య రూపా! ధర్మమునందు ఎనలేని సంతోష స్వరూపునిగా నిన్నే చూతును..

జైహింద్.

Print this post