30 - 6 - 2023 న నాకు కవికల్పభూజ బిరుదు ప్రదాన సమయమున డా. నలవోలు నరసింహా రెడ్డి జాతీయ తెలుగు సాహితీ పీఠము వారు సమర్పించిన పంచ పద్యసుమాలు.

జైశ్రీరామ్.

చిత్రకవితాసమ్రాట్, కనికల్పభూజ, కవి శిఖామణి 

చింతా రామకృష్ణారావు గారికి 

పంచ పద్యసుమాలు  

డా. నలవోలు నరసింహా రెడ్డి  

జాతీయ తెలుగు సాహితీ పీఠము

ఉ. ఆతడు నిండుకుండ, మరియాదకు తెల్లని మంచు కొండ, ప్ర 

ఖ్యాతికి పూల దండ, గగనంబున నెత్తిన ఝండ పాండితిన్,    

భూతలమంత నిండ విర బూచిన మండ తెలుంగు  పద్యపుం 

రాతల  లోన గండ, తన లాస్యము శిష్యుల కండ,  నుండెడిన్ 

ఉ . మెత్తని వాడవీవు, సుతి మెత్తని భావము నీది, అన్యులన్   

మొత్తగ బోవు , గుండియలు మోసులు వారగ పండితాళురన్    

చిత్తములోన  మెచ్చు కొను చిత్తము  నీది, నీదు సేవయే 

పొత్తము నందు వ్రాసికొన బోలును ఓ కవి రామకృష్ణుడా! 

ఉ. అందరి వాడు, స్నేహమున హద్దులెరుంగని వాడు, కైతలో 

ముందరి వాడు, నెల్లరకు మోదము గూర్చెడు వాడు, చల్లనౌ

డెందము వాడు, నెయ్యెడల టెక్కులు జేయనివాడు, దర్పమున్ 

జెందని వాడు, సాదు గుణ శీలుడు  మాకవి రామకృష్ణుడున్ 

ఉ. మంచికి మారు పేరు, అభి మానుడు పెద్దల పట్ల, యెన్నడున్వం

చన సేయ నేరడు, వివాదము లందున దూరబోడు, దీ  

పించెడు  సౌమ్య శీలుడయి యెల్లరి  గుండెల  కొల్ల గొట్టు ని 

ర్వంచిత  బుద్ధి శీలునకు రంజిల నా యభినందనంబులున్    

మ. చిర కాలంబును గల్గు గావుత ! శుభాశీస్సుల్ సిరుల్ సంపదల్ ! 

కొరతేమాత్రము లేక జీవితమునన్ కొంగ్రొత్త భాగ్యంబులున్ 

వరలున్  గాత! ధరాతలంబునను దివ్యంబై యశో వల్లికల్ 

విరియున్ గాత! నిరంతరంబు మిము దీవించంగ వాగ్దేవి తాన్.

నా స్పందన

ఆర్యా! డా.నలవోలు నరసింహారెడి మహోదయా!🙏🏼 

మీ అభిమానము అమోఘమైనది, 

మీ రచనా వైదుష్యము అంతకన్నను అమోఘము. 

ఉ.  శ్రీ నలవోలు వంశజ! వశీకరచిత్తుఁడ! నారసింహ! వి

జ్ఞానసుధాప్రపూర్ణ! గుణగణ్య! మనోహర పద్యశిక్షణా

జ్ఞాన శశాంక! మీ కవిత కమ్మనితెమ్మెరచాలు, ధన్యుఁడన్

మీ నవనీత పద్యసుమ మేళన నా గళసీమనందుటన్.

మీ పద్యాలు చాలా చాలా బాగున్నాయండి. 

మీకు నాపై ఎంతటి అభిమానం లేకపోతే 

ఇంతటి చక్కని పద్యరత్నాలు నాకు లభిస్తాయి?

 మీ అభిమానమునకు నేను సర్వదా కృతజ్ఞుఁడను.

భవదీయుఁడు

చింతా రామకృష్ణారావు.🙏🏼

Print this post