అష్టోత్తరశత సతీ అశ్వధాటి (సతీ శతకము).1వపద్యము. రచన. చింతా రామకృష్ణారావు. గానము ... శ్రీ కుమార సూర్యనారాయణ.

 జైశ్రీరామ్

అష్టోత్తరశత సతీ అశ్వధాటి

(సతీ శతకము).

రచన. చింతా రామకృష్ణారావు.

1 .శ్రీ శాంభవీ! సుగుణులాశింత్రు నీ కృపకు నీ శక్తినెన్నుచు సదా.

ధీశాలియౌ శివునికాశావహంబువయి నీ శక్తినే గొలిపితే.

నీ శక్తినే బొగఁడ నాశక్తి చాలదుగ ధీశక్తినిమ్ము మిగులన్,

ఆశాంతముల్ వెలుగు ధీశాని నీ ప్రతిభ లేశమ్ము గాంచుదు సతీ!

భావము.

ఓ సతీమాతా! సద్గుణు లయిన మహాత్ములు ఎల్లప్పుడూ నీ శక్తిని గుర్తించుచు

నీ కృపకై ఆశించుచూ ఉందురమ్మా. జ్ఞానపూర్ణుడయిన శివునికి ఆశ

గొలుపు చున్నదాని వయి నీ యొక్క శక్తినే ఆ పరమేశ్వరునిలో

కలుగుచేసితివికదా తల్లీ! నీలో గల శక్తిని ప్రశంసించుటకు నాకు ఉన్న శక్తి

చాలదు కదా మాతా. కావున మిక్కిలిగా నాకు ధీశక్తిని ప్రసాదించుమమ్మా.

దిగంతముల వరకు ప్రకాశించు నీ ధీశక్తిని కొంచెమయినను చూచుదును. 

జైహింద్.

Print this post