అష్టోత్తరశత సతీ అశ్వధాటి (సతీ శతకము).38వ పద్యము. రచన. చింతా రామకృష్ణారావు. గానము ... శ్రీ కుమార సూర్యనారాయణ.

  జైశ్రీరామ్. 

38. ఓ పార్వతీ! సుగుణమే పంచుచున్ జనుల తాపంబు మాన్పునటులన్

దీపించు సత్ కృతికి సోపానమై నిలుము పాపంబులార్పు జననీ! 

నీ పాపలౌ జనుల పాపంబులన్ గనక కాపాడుమమ్మ జననీ! 

శ్రీపాదముల్ కొలిచి నే పావనుండగుదు నో పాప హారిణి సతీ! 

భావము.

పాపములను హరించెడి ఓ సతీ మాతా! ఓ పార్వతీ మాతా! మంచి గుణములనే 

నా కవిత్వముద్వారా పంచుచు జనుల మానసికమయిన తాపమును 

పరిహరించు విధముగా ప్రకాశించు నా కృతికి సోపానముగా నీవు నిలిచి 

పాపపరిహారము చేయు మమ్మా.  నీ సంతానమయిన ప్రజల పాపములను 

గణింపక కాపాడుము తల్లీ! నీ మంగళప్రదమయిన పాదములను సేవించి 

నేను పావనుడనగుదునమ్మా.

జైహింద్.

Print this post