అష్టోత్తరశత సతీ అశ్వధాటి (సతీ శతకము). 75వ పద్యము. రచన. చింతా రామకృష్ణారావు. గానము ... శ్రీ కుమార సూర్యనారాయణ.

 జైశ్రీరామ్.

75. ఓ పార్వతీ. ప్రతిభనే పంచి పద్యములు దీపించ వ్రాయు పటువున్

నాపైద యన్ గొలిపి శ్రీపాదముల్ మదిని స్థాపించినిల్పితివిలన్.

కాపాడు తల్లివికదా. పాపముల్ తుడిచి దీపించ మంచి నిడుమా.

నా పుణ్య సత్ఫలమ నాపాలి దైవతమ.దీపాకృతిన్గల సతీ!

భావము.

దీపస్వరూపమున నున్న ఓ సతీ మాతా! ఓ పార్వతీ జననీ! ప్రతిభను నాకు 

పంచి, ప్రకాశించునట్లు పద్యములు వ్రాయు శక్తిని నాకునీకు నాపై ఉన్న 

దయతో కొలిపి, నీ మంగళప్రదమయిన పాదములు నాహృదయములో 

స్థాపించితివమ్మా. నాపుణ్యమువలన లభించిన మంచిఫలితంవమ్మా నాకు 

నువ్వు. నాపాలిటి దేవతవు. కాపాడే స్వభావము గల తల్లివికదా, అట్టి నీవు 

మంచి దీపించుటకు గాను నాలోని పాప పంకిలమును తుడిచివేయుమమ్మా.

జైహింద్.

Print this post