శ్రీ యాదాద్రి లక్ష్మీనృసింహ శతకము 5వ పద్యము .... రచన. చింతా రామకృష్ణారావు. గానం. శ్రీ కుమార సూర్యనారాయణ.

 జైశ్రీరామ్.

5. ఓం ఉగ్రసింహాయ నమః.

పణవ వృత్త గర్భ సీసము.

మహిత! గుణాభిరామా! రావయ. రమణీ - యాక్షాక్షయా! నరహరి! నుతింతు.

నో దేవ! సత్య ప్రేమోద్భాసుఁడ! శ్రియముల్ - కొల్పన్ గ నన్నెంచి, నిల్ప రమ్ము.

మాన్యుఁడా! వినుము. నీమంబొప్పఁగ నిను నేఁ - గొల్తున్ హృదిన్నీవు కొలువు తీరు.

మాతల్లి యైన శ్రీమాతాశ్రయ! శ్రిత స - త్పోషా! మదిన్ నిత్య తుష్టినిమ్ము.

గీ. నీవు కాకున్న మాకింక నేతలేరి? -  యుర్వి దౌష్ట్యంబులణచెడి  *ఉగ్రసింహ*!

భక్త జన పోష! భవశోష! పాపనాశ! - శ్రితజనోద్భాస! యాదాద్రి శ్రీనృసింహ!

5వ సీస గర్భస్థ పణవ వృత్తము. (మ న య గ .. యతి 6)

రామా! రావయ. రమణీయాక్షా! - ప్రేమోద్భాసుఁడ! శ్రియముల్ కొల్పన్.

నీమంబొప్పఁగ నిను నేఁ గొల్తున్ - శ్రీమాతాశ్రయ! శ్రిత సత్పోషా!

భావము.

భక్తులను పోషించువాఁడా! భవబంధములను నశింపఁజేయువాఁడా! పాపమును నశింపఁజేయువాఁడా! ఆశ్రిత జనమున

ప్రకాశించువాఁడా! ఓ యాదాద్రివాసుఁడవైన లక్ష్మీ నారసింహా! ఓ గొప్పవాఁడా! మంచిగుణములచే అందముగ

శోభించువాఁడా! రమణీయమైన నాశ రహితుఁడా! ఓ నరహరీ! నిన్ను నుతింతును నీవు రమ్ము. ఓ దేవా! సత్యములోను,

ప్రేమలోను ప్రకాశించువాఁడా! నన్ను నీవు గుర్తించి నాకు శ్రేయములు కొలుపుచు నిలబెట్టుటకు రమ్ము. ఓ

మాననీయుఁడా!  నామాట వినుము. నేను నిన్ను నియమముతో కొలుచుదును. నా మనసులో నీవు కొలువు తీరుము. మా

తల్లి శ్రీమాతను ఆశ్రయించినవాఁడా! ఆశ్రయించిన మంచి వారిని పోషించువాఁడా! నా మనసుల నిత్యసంతుష్టిని

కల్పింపుము. భూమిపై దుర్మాగములనణచెడి ఓ ఉగ్రసింహా! నీవు కాకున్నచో ఇంక మాకు నాయకులేరి?

జైహింద్.

Print this post