లక్ష్మీసహస్రం. 11వ శ్లోకం. 77 - 87. పద్య రచన చింతా రామకృష్ణారావు. పద్య గానం శ్రీమతి సుశీలాదేవి భాగవతారిణి.

  జైశ్రీరామ్.

॥ శ్రీలక్ష్మీసహస్రనామావలిః ॥

శ్రీ లక్ష్మీ సహస్ర నామాంచిత పద్యసహస్ర దళపద్మము.

రచన.   చింతా రామకృష్ణారావు.

గానం. శ్రీమతి సుశీలాదేవి భాగవతారిణి.

శ్లో.  కాలి మా పంచికా వాఙ్మీ హవిఃప్రత్యధిదేవతా ।

దేవమాతా సురేశానా దేవగర్భాఽంబికా ధృతిః ॥ 11 ॥

77. ఓం *కాల్యై* నమః

నామ వివరణ.

కాలస్వరూపిణి అయిన తల్లి కాలిమాత.

తే.గీ.  *కాలి*! మా! నీదు కృపచేత మేలుఁ గనెద,

నీదు సద్రూపమున్ జూతు నిత్యము మది,

కల్మషంబులు వీడుదు కవితలల్లి

నిన్ను మురిపింపఁ జేయుదున్ నేర్పు తనర.

78. ఓం *మా*యై నమః.

నామ వివరణ.

లోకములకే తల్లి మన మాత.

తే.గీ.  కాలి! *మా!* నుతమౌ దయాశాలివమ్మ,

కాల గమనంబు నీవే, ప్రకాశమీవె,

లిప్తలిప్తయున్ సత్ఫల ప్రాప్తికగుచు

నిన్ను జేర్చుత నన్నునాపన్న రక్ష!

 

ఓం *కాలిమ్న్యై* నమః ।

నామ వివరణ.

కాలస్వరూపిణి అయిన తల్లి కాలిమాత.

తే.గీ.  కాలి! *మా*! నీదు కృపచేత మేలుఁ గనెద,

నీదు సద్రూపమున్ జూతు నిత్యము మది,

కల్మషంబులు వీడుదు కవితలల్లి

నిన్ను మురిపింపఁ జేయుదున్ నేర్పు తలర.

79. ఓం *పఞ్చికా*యై నమః ।

నామ వివరణ.

పంచ భూతములచే వ్యాప్తమయి యున్న జనని పంచిక.

తే.గీ.  *పఞ్చికా!* నీవు వెలుఁగు భావాఞ్చితముగ

నాదువాక్కులన్ సతతంబు నవ్యగతుల,

నిన్ను ప్రాప్తింపఁ జేసెడి నిరుపమాన

వాగ్భవంబగు దైవంబు ప్రాప్తమగుత.

80. ఓం *వాఙ్మ్యై* నమః ।

నామ వివరణ.

వాఙ్నైపుణ్యము కల తల్లి వాఙ్మి

తే.గీ.  *వాఙ్మి!* దివ్య ప్రభాన్విత బంధ గర్భ

చిత్ర కవితలన్ జేయంగఁ జేయుమమ్మ,

దివ్య వాగ్ధాటి నొసగుచు భవ్యమయిన

నీదు చరితంబు పలికించు నేర్పుఁ గొలిపి.

81. ఓం *హవిషే* నమః ।

నామ వివరణ.

యజ్ఞమున హవిస్సు అమ్మయే. అటువంటి హవిస్సుకు నమస్కారము.

తే.గీ.  ఓ *హవీ!* యజ్ఞఫలముల నొప్పునొసగ

హవిగ రూపొంది నీ కృపనందఁజేసి

మమ్ము కాపాడు చున్న మా మాతృ దేవి!

వందనంబులు చేసెద నందుకొనుము.

82. ఓం *ప్రత్యధిదేవతా*యై నమః

నామ వివరణ.

దేవతలు అధిదేవతలతో పాటు దేహమానసములకు శక్తిని పెంచు

ప్రత్యధిదేవత మన జనయిత్రి.

తే.గీ.  దేహ మానస శక్తుల దీప్తిఁ బెంచు

సౌమ్య *ప్రత్యధిదేవతా!* సంస్తుతింతు,

నిరుపమాధిక శక్తి సునిశ్చితముగ

నీదు కృపచేత లభియించు  నిరుపమాన!

83. ఓం *దేవమాత్రే* నమః ।

నామ వివరణ.

దేవతలకు తల్లి మన అమ్మ దేవతామాత. మాతృప్రేమను పంచి చూచుటలో తల్లివంటి దేవత.

తే.గీ.  దీప్తమౌ తల్లి వీవమ్మ *దేవమాత!*

దేవతా వర తత్వమౌ దీప్తివీవు,

నీవు కృపతోడఁ గాంచుమా నిరుపమాన!

నీదు కృపకంజలించెద మోదమునను.

84. ఓం *సురేశానా*యై నమః ।

నామ వివరణ.

సురలకు దేవత సురేశాన.

తే.గీ.  ఓ *సురేశాన!* నీలోననున్న మహిమ

వర్ణనంబును చేయగ పదము లేవి?

నీ పదంబులు పట్టిన నిర్ణయముగ

పదములందును, గొల్తు నీ పదయుగంబు.

85. ఓం *వేదగర్భా*యై నమః ।

నామ వివరణ.

వేదములను తన గర్భమునందే కలిగియున్న జనని వేద గర్భ.

తే.గీ.  *వేదగర్భా!*  సువిదితమౌ  వేదమీవె,

వేద గర్భాననిండి యవేద్యవైన

నీ ప్రభావంబు  నెఱిగింప నేరనమ్మ.

విదితముగ నాదు మదిలోన వెలుగుమమ్మ.

86. ఓం *అమ్బికా*యై నమః ।

నామ వివరణ.

అంబికామాత సృష్టికే తల్లి కావుననే అంబికగా లోకరక్షణ చేయుచున్నది.

తే.గీ.  *అంబికా!* కన  నీవే కృపాంబుధివిగ,,

తల్లిగా మమ్ము కాపాడి తనియుదీవు,

నిన్ను గౌరవింపగ లేని నిరుపయోగ

జన్మమీయకుమెవరికిన్, జయనిధాన!

87. ఓం *ధృత*యే నమః ।/ ఓం *ధృత్యై నమః ।

నామ వివరణ.

ధైర్య సంతోష సౌఖ్యప్రద ధృతి మాత.

తే.గీ.  మహితవగు *ధృతీ!* ధరియించి మమ్ము సతము

కంటి పాపగా  చూచుచు కాతువీవు,

కనులకున్నట్టి  ఫలమును కలుగఁ జేసి

నిన్ను దర్శించుకోనిమ్ము  కన్న తల్లి!

జైహింద్.

Print this post