అవధానిప్రవరులు1......శ్రీ మద్దూరి రామమూర్తి.

జైశ్రీరామ్.

అ వ ధా ని  ప్ర వ రు లు.1

రచన.

శ్రీ మద్దూరి రామమూర్తి.

మత్తేభ మాలిక.
అవనిన్ మానవ జన్మ దుర్లభము, కావ్యజ్ఞాన సంబంధ సం
భవ మెన్నన్ కడు దుర్లభమ్ము, భువి విద్వద్వంద్యయౌ భారతీ
ప్రవిమత్ దివ్య కృపావలోకనముచే రాజిల్లి గణ్యాత్ములై
నవనీత ప్రతిమాన మానసమునన్ జ్ఞానమ్ము నందించుచున్
భువి శిష్యాళిని సృష్టి చేసిరి మహా మోదమ్మునన్‌ సద్గురు
ప్రవరుల్. జ్ఞాన సరస్వతీ కృపను భ్రాజత్పండితాఖండులై
స్తవమున్ గాంచిరి. వారి వత్సలతచే ధన్యాత్ములై మించుచున్
అవలోకింపగ శిష్య రత్నములు ప్రత్యంగమ్మునన్ మిన్నలై
కవులై,మేటి వధానులై, సరసులై కావ్యమ్ములన్ నిల్పరే
అవనిన్ పుణ్యఫలమ్ము చేత గద గణ్యంబౌచు వర్ధిల్లు నా
కవితాశిల్పము,దానిలో నమరు ప్రాగ్జన్మంపు సంస్కారతన్
అవధాన ప్రవణత్వ లాస్యమును కావ్యానంద సంచారమున్
దివిషద్వాహిని నోలలాడుచు కవుల్ దీవ్యద్దయామూర్తులై
యవధానంబులు జేసి ధన్యతములై యాహ్లాదులై రెంతయో
ధ్రువమీ పల్కు మహానుభూతులకు,చిద్రూపమ్ముగా నిల్చి భ
వ్య విరించిన్ బలె వెల్గు సత్కవికి విద్యాదేవి తోడుండదే.
అవలోకింపగ సాహితీవనిని విద్యరామ పుంస్కోకిలల్
ప్రవణత్వమ్మగు కూజితమ్ముల సదా వాసంతికల్ నింపుచున్
చవులూరించు రసార్ద్ర
భావములతో సాహిత్యమున్ నిల్ప నా
కవితారామ మనోజ్ఞ సీమల రసజ్ఞానీక భృంగమ్ములే
కవితాపుష్ప మరంద బిందువుల తత్కాలాను గుణ్యమ్ముగా
స్తవనీయంబుగ గ్రోలి మత్త తనులై ధాత్రిన్ విరాజిల్లి రా
కవిలోక ప్రముఖాళి నెన్న తరమే? కావ్యమ్ములే కాక వా
రవధానాటవి సంచరించి యట సింహంబుల్ వలెన్ దుష్ట కా
కవి మత్తేభ దురంత కుంభముల రక్తాస్వాదనన్ జేసి సం
స్తవ నీయోజ్జ్వల మూర్తులై ధర యశో ధన్యాత్ములై మించి రా
కవిలోకమ్మున మాడభూషి గురుడై జ్ఞానాత్ముడై వేంకటా
ర్య వధాని ప్రవరుండు నిల్చె, కవులన్ రాడ్వర్యులై ధీరతన్
పవినాన్ తిర్పతి వేంకటేశ్వరులు వాగ్భామామణీ మూర్తులై
స్తవమున్ గాంచిరి.వారి గీరతము విశ్వస్తుత్యమై యొప్పెడిన్
అవలన్ దేవలపల్లి సోదరులు విద్యామూర్తులై యొప్ప స
త్కవియౌ పోకురి వంశ భానుడగు శ్రీ కాశీపతి స్వామి తా
నవధానాగ్రణియై యశమ్ముగనె,సద్యస్ఫూర్తు లొప్పార ధీ
రవి యయ్యెన్ పిసుపాటి వంశమణి విభ్రాజద్యశోధన్యుడై
అవధానంబులు జేయుచున్ గుణ రసజ్ఞాత్మీయ విద్వత్కవి
ప్రవరుల్ మెచ్చెడిరీతి కొప్పరపు సమ్రాట్టుల్ ధరన్ మించగా
కవిగా  మేటి విమర్శకుండుగ దివాకర్లాన్వయుండెన్న
తా
నవలీలన్ బహుళా
వధానములచే ఖ్యాతిన్ గడించెన్ భువిన్
అవధానాంగణ సార్వభౌమ శివరామాఖ్యుండటంచున్ దగన్
కవియౌ వేలురి వంశ సంభవుని నుద్ఘాటింతురా సత్కవి
ప్రవరున్ పాదములంటి మ్రొక్కెదను. సద్భక్తిన్ మనోజ్ఞంపు శ
బ్ద విలాసోజ్జ్వల భావ సద్రస కవిత్వానల్ప శిల్పంబుచే
యవధానాంచిత చంద్రశేఖరుడు తా నయ్యెన్ మహా స్రష్టగా.
శివుడై జ్ఞాన సురాపగన్ నిలిపె  కాశీ కృష్ణమాచార్యుడున్.
సువచోరమ్య మనోజ్ఞ ధీ ప్రవణతల్ శోభిల్లగా జేయుచున్
కవులై పింగళి కాటురీ వరులు విఖ్యాతావధానమ్ములన్
అవలీలన్ ధృతి సల్పి వెల్గిరిల. విద్యామూర్తి డోకూరియున్
ప్రవణుండౌచు వధానమందు నలరెన్. నండూరి శ్రీ రామకృ
ష్ణ వధానమ్మున సూర్యుడై వెలిగె, పాణ్యం శ్రీ నృసింహుండు సం
స్తవమున్ బొందె మహావధాని యనగా సత్కావ్య నిర్మాతయై
పవియై వెల్గెను రాళ్ళబండి కవి శుంభన్మూర్తి మంతమ్ముచే
కవిమూర్ధన్యుని పద్య గద్య రచనా కంజాత సంజాతు శాం
భవి పాదార్చకు సద్వధాన కవి దోమా వేంకటస్వామి గు
ప్త వధానామృత పానచిత్తు నిట సంభావింతు .నారీతి స
త్కవియై,రమ్య వధానియై గురుడునై,జ్ఞాన ప్రసూనమ్ములన్
సు విలాసమ్ముగ నిచ్చుచున్ తత విశుద్ధంబైన చిత్తంబుతో
నవలోకించెడి గౌరిపెద్ది కుల పద్మాదిత్యు నర్చింతు, వా
క్ప్రవరుండై శివభారతాది కృతులన్ వర్ధిల్లగా జేసె నా
యవధానాగ్రణి శేషశాస్త్రి గడియారాఖ్యాత వంశ్యున్ సుధీ
స్తవ పాదాబ్జు నుతింతు భక్తి
మెయి విద్వత్కుంజరున్ మాన్యు , భ
వ్య వచః స్మేరముఖీ కృపాస్రవ దకంప ప్రాజ్య కారుణ్య పూ
ర వియన్నిర్ఝరిణీ నిరంతర విహారాదృష్ట సమ్మోద భా
గ్య విశేషమ్మున దిక్తటిన్ వెలిగె గాడేపలీ కృష్టి, ప
ల్లవ పాణిన్ వర శారదన్ దలచు పుల్లాపంతు లాఖ్యాతునిన్
కవి శ్రీ వేంకటరామశర్మను వధానిన్ జ్ఞాను నర్చింతు. వా
గ్రవి జంధ్యాల కులోత్తమున్ సుకవి సుబ్రహ్మణ్యశాస్త్రిన్ మదిన్
స్తవమున్ జేతును
.జోస్యులాన్వయుని సమ్మాన్యున్ సదానంద ధీ
ప్రవరున్ దివ్య వధాన సింహమును సంభావింతు నిచ్చల్ హృదిన్.

భువి మత్తేభ మహద్వధానివరుడీ పూజ్యుండు మద్దూరి స

త్కవితా వాహిని రామమూర్తి యన తా గణ్యంపు మత్తేభమున్

జవనాశ్వంబన మాలికన్ గొలిచిరా సంస్తుత్యులన్ పూజ్యులౌ

యవధాన్యగ్రణులందరిన్ సరసులాహాయంచు మెచ్చన్. భళీ!
🙏🏻
చింతా రామకృష్ణారావు.

సామూహిక కైలాసగౌరి నోము. 02 . 02 . 2020.

జైశ్రీరామ్.
సామూహిక కైలాస గౌరి నోము

కైలాసములో గౌరీదేవి చేసుకున్న నోము భూలోకంలో మనమందరం సామూహికంగా కలిసి చేసుకుందాము.

ది.01-02-2020 శనివారం రధసప్తమి రోజు.

వాసవి కాలనీ , ఆధ్యాత్మిక కేంద్రం , అష్టలక్ష్మీ దేవాలయం దగ్గర , హైద్రాబాద్.

*7500/-*

మీ యొక్క పేర్లు నమోదు చేసుకోవటానికి చివరితేది: 25-01-2020.


మేము మీకు ఇచ్చే సామగ్రి:

పసుపు - 25 kg.
కుంకుమ - 25 kg.
పండ్లు - 108
తమలపాకులు - 216
వక్కలు -108
గాజులు - 216
5 మంది కి భోజనం

వలాటలు , ముక్కు పుడకలు పెట్టుకుని రావలెను.

సంప్రదించవలసిన ఫోన్ నంబర్స్ : తమ్మన లక్ష్మీ సుజాత   - 8125728881
L manjula 7013479323
V. లక్ష్మీ- 7396555404
కె.ఉమరాణి - 9700406283
ప్రొద్దుటూరి శాంతి - 7675963249
Ch కవిత - 7680922334


నిర్వహించు వారు:
ఐవిఫ్ మహిళా విభాగ్

శంకరాచార్య విరచిత నిర్వాణ షట్కము.భావసహితము

జైశ్రీరామ్.

శంకరాచార్య విరచిత నిర్వాణ షట్కము.

1.మనోబుధ్యహంకార చిత్తాని నాహం
న చ శ్రోత్ర జిహ్వే న చ ఘ్రాణనేత్త్రే
న చ వ్యోమ భూమి ర్న తేజో న వాయు:
చిదానంద రూప: శివోహం శివోహమ్.
భావము-
మనస్సు,బుద్ధి,చిత్తము,అహంకారము అనేటటువంటివి ఏమీ నేను కాను.చెవి,నాలుక,ముక్కు, నేత్రములు మొదలైన ఇంద్రియాలను నేను అసలు కాను.ఆకాశము,భూమి,అగ్ని,వాయువు,నీరు లాంటి పంచభూతాలను నేను కానే కాను . ఇవేవీ కాకపోతే మరి నేనెవరినీ? చిదానంద రూపము కల శివుడను!శివుడనే తప్ప మరి వేరవరినీ కాను.
2.న చ ప్రాణ సంజ్నో న వై పంచవాయు:
న వా సప్తధాతు ర్న వా పంచకోశ:
న వాక్పాణిపాదౌ న చోపస్థపాయు:
చిదానంద రూప: శివోహం శివోహమ్.
భావము-
ప్రాణమనే పేరు కలవాడను కాను.ఐదు రకములైన వాయువును కాను.సప్తధాతువులను కానే కాను.పంచకోశములను కాను.మాట,చేయి,పాదములను కాను.సహాయపడే ఇంద్రియాలను కానే కాను.ఇవేవీ కాకపోతే మరి నేనెవరినీ? చిదానంద రూపము కల శివుడను!శివుడనే తప్ప మరి వేరవరినీ కాను.
3.న మే ద్వేషరాగౌ న మే లోభమోహౌ
మదోనైవ మే నైవ మాత్సర్యభావ:
న ధర్మో న చార్ధో న కామో న మోక్ష:
చిదానంద రూప: శివోహం శివోహమ్.
భావము-
రాగద్వేషాలంటే నాకు తెలియదు.లోభమోహాలు అంటే అసలు తెలియవు. మద మాత్సర్యములు నాకు లేనే లేవు.ధర్మ,అర్ధ,కామ మోక్షములు నాకు అసలు లేనేలేవు. ఇవేవీ కాకపోతే మరి నేనెవరినీ? చిదానంద రూపము కల శివుడను!శివుడనే తప్ప మరి వేరవరినీ కాను.
4. న పుణ్యం న పాపం న సౌఖ్యం న దు:ఖం
న మంత్రో న తీర్థం న వేదా న యజ్ఞా:
అహం భోజనం నైవ భోజ్యం న భోక్తా
చిదానంద రూప: శివోహం శివోహమ్.
భావము-
పుణ్యపాపాలు,సుఖదు:ఖములు నాకు లేనే లేవు.మంత్రంలేదు,క్షేత్రములు లేవు.వేదములు,యజ్ఞములు అసలు లేనే లేవు.నేను భోజనాన్ని కాను,భోజ్యమును కాను,భోక్తను కూడా కాను.ఇవేవీ కాకపోతే మరి నేనెవరినీ? చిదానంద రూపము కల శివుడను!శివుడనే తప్ప మరి వేరవరినీ కాను.
5.న మృత్యు ర్న శంకా న మే జాతి భేద:
పితో నైవ మే నైవ మాతా న జన్మ
న బంధు ర్నమిత్రం గురుర్నైవ శిష్య:
చిదానంద రూప: శివోహం శివోహమ్.
భావము-
నాకు మరణంలేదు.మృత్యుభయం,సందేహం లేదు.జాతిభేదములు లేనేలేవు.తండ్రిలేడు,తల్లి లేదు.అసలు నాకు పుట్టుకయే లేదు.బంధుమిత్రులు,గురుశిష్యులు లేనేలేరు.ఇవేవీ కాకపోతే మరి నేనెవరినీ? చిదానంద రూపము కల శివుడను!శివుడనే తప్ప మరి వేరవరినీ కాను.
6.అహం నిర్వికల్పో నిరాకార రూపో
విభుత్వాచ్ఛ సర్వత్ర సర్వేంద్రియాణాం
న చా సంగతం నైవ ముక్తి ర్నమేయ:
చిదానంద రూప: శివోహం శివోహమ్.
భావము-
నాకు ఎటువంటి వికల్పములు,బేధములు నాకు లేవు.నేను,నా ఇంద్రియాలు విశ్వమంతా వ్యాపించినట్లు అనిపించుట వలన నాకు సంబంధించని వస్తువులు కానీ,విషయములు కానీ లేనేలేవు.నేను తెలుసుకొన వలసినది మరియూ పొందవలసిన మోక్షమూ లేదు.ఇవేవీ కాకపోతే మరి నేనెవరినీ? చిదానంద రూపము కల శివుడను!శివుడనే తప్ప మరి వేరవరినీ కాను.

జైహింద్.

సరస్వతీ వైభవము. శ్రీ ఆకెళ్ళ విభీషణ శర్మ.

జైశ్రీరామ్

జైహింద్.

శ్రీ సరస్వతీ వైభవమ్. బ్రహ్మశ్రీ సామవేదం షణ్ముఖశర్మ.

జైశ్రీరామ్.

జైహింద్.

సరస్వత్యై నమో నమః

 జైశ్రీరామ్.

జైహింద్.

తెలుఁగు వర్ణమాల ప్రాశస్త్యం దేవతాస్వరూపాలు.వాగ్దేవతలు.

 జైశ్రీరామ్

తెలుఁగు వర్ణమాల ప్రాశస్త్యం దేవతాస్వరూపాలు.

వాగ్దేవతలు.

తెలుఁగు భాషలో  వాగ్దేవతల యొక్క వర్ణమాల దాని అంతర్నిర్మాణము :
అ నుండి అః.వరకు ఉన్న16 అక్షరాల విభాగాన్ని చంద్ర ఖండము అందురు.
ఈ చంద్రఖండములోని అచ్చులైన 16 వర్ణాలకు  అధిదేవత వశిని అంటే వశపరచుకొనే శక్తి కలది అని అర్ధము.

క నుండి భ వరకు ఉన్న24 అక్షరాల విభాగాన్ని  సౌర ఖండము  అంటారు.
మ నుండి  క్ష వరకు ఉన్న10 వర్ణాల విభాగాన్ని  అగ్ని ఖండము అంటారు.
ఈ బీజ శబ్దాలన్నీ జన్యు నిర్మాణాన్ని క్రోమౌజోములను ప్రభావితం చేయగలుగుతాయి.

సౌర ఖండంలోని క నుండి  ఙ వరకు  గల ఐదు అక్షరాల అధిదేవత కామేశ్వరి.
అంటే కోర్కెలను మేలుకొలిపేది అని అర్ధము.
చ నుండి  ఞ వరకు గల ఐదు వర్ణాలకు అధిదేవత మోదిని అంటే సంతోషాన్ని వ్యక్తం చేసేది.
ట నుండి ణ వరకు గల ఐదు అక్షరాల  అధిదేవతా శక్తి విమల అంటే మలినాలను తొలగించే దేవత.
త నుండి న వరకు గల ఐదు అక్షరాలకు అధిదేవత అరుణ  కరుణను మేలుకొలిపేదే అరుణ.
ప నుండి మ వరకు గల ఐదు అక్షరాలకు అధిదేవత జయని జయమును కలుగ చేయునది.
అదే విధముగా అగ్ని ఖండములోని య, ర,ల, వ అనే అక్షరాలకు అధిష్టాన దేవత సర్వేశ్వరి. శాశించే శక్తి కలది సర్వేశ్వరి.
ఆఖరులోని ఐదు అక్షరాలైన శ, ష, స, హ, క్ష లకు అధిదేవత కౌలిని.
ఈ అధిదేవతలనందరినీ వాగ్దేవతలు అంటారు.

అయితే ఈ ఏడుగురే కాకుండా అన్ని వర్ణాలకు ప్రకృతిలో ఒక రూపం, ఒక దేవతాశక్తి ఉంది.ఎందుకంటే శబ్దం బ్రహ్మ నుండి అద్భవించింది.అంటే బ్రహ్మమే శబ్దము. ఆ బ్రహ్మమే నాదము.

మనం నిత్యజీవితములో  సంభాషించేటప్పుడు వెలువడే శబ్దాలు మనపై, ప్రకృతి పై ప్రభావం చూపుతాయి.
అదే మంత్రాలు, వేదం అయితే ఇంకా లోతుగా ప్రభావం చూపుతుంది భూమి మీద పుట్టిన ప్రతి జీవి ఈ శబ్దాల్ని ఉచ్ఛరించి అమ్మవార్లును అర్చిస్తున్నాయి.కాబట్టి మనం స్తోత్రం చదువుతున్నా, వేద మంత్రాలు, సూక్తులు వింటున్నా మనం ఈ విషయం స్ఫురణలో ఉంచుకుంటే అద్భుతాలను చూడవచ్చు.

మనం చదివే స్తోత్రం ఎక్కడో వున్న దేవుడిని/దేవతను  ఉద్దేశించి కాదు,
మనం చదివే స్తోత్రమే ఆ దేవత.మనం చేసే శబ్దమే ఆ దేవత
మన అంతఃచ్ఛేతనలో ఉండి పలికిస్తున్న శక్తియే మన ఉపాస్య దేవత.
ఆ శబ్దం వలన పుట్టిన నాదం దేవత. ఎంత అద్భుతము ఇది సనాతన ధర్మం.ఇది మనకు మాత్రమే పరిమితమైన
అపూర్వ సిద్ధాంతము.

జైహింద్.

అరసున్నా....బండీరా..ఱ......వివిధ వీయస్సెన్ పద్మ

జైశ్రీరామ్.

*ఎవరు రాసారో తెలియదు.  "అరసున్న" ,(బండి ర) "ఱ" గురించి వాట్సాప్ లో ఎవరో షేర్ చేశారు.*

*అరసున్న [ఁ],*
*బండి 'ఱ' లు ఎందుకు?*

*అరసున్న~బండి ‘ఱ‘ లు*
*నేటిభాషలో దాదాపుగా వాడుకలో లేవు.*

*ఐతే ఇవి తెలుగు భాషకి ప్రత్యేకమైనవి.*

*ద్రావిడ భాషా లక్షణాన్ని నిరూపించేవి.*

*అంతేకాదు*
*కావ్యభాషలోను,*
*లక్షణశాస్త్రంలోను*
*వీటి ప్రాముఖ్యం చాలావుంది.*

*వాడకపోతే పరవాలేదు*
*కానీ*
*వీటిగురించి తెలుగువాడు తెలుసుకోవాలిగదా!*

*మన భాషాసంపదలో*
*ఇవీ భాగస్వాములే అని గ్రహించాలి గదా!*

*అరసున్న, ఱ ల వల్ల*
*అర్థభేదం ఏర్పడుతొంది.*

*పదసంపదకి ఇవి తోడ్పడతాయి.*

*ఎలాగో చూడండి:*
*ఉదా*:-

*అరుఁగు*
*= వీది అరుగు*

*అరుగు*
*= వెళ్ళు, పోవు*

*అఱుగు*
*= జీర్ణించు*

*ఏఁడు*
*= సంవత్సరం*

*ఏడు*
*= బాధ~7 సంఖ్య*

*కరి*
*= ఏనుగు*

*కఱి*
*= నల్లని*

*కాఁపు*
*= కులము*

*కాపు*
*= కావలి*

*కాఁచు*
*= వెచ్చచేయు*

*కాచు*
*= రక్షించు*

*కారు*
*= ఋతువుకాలము*

*కాఱు*
*= కారుట (స్రవించు)*
(కారు=వాహనం ఆంగ్ల పదము)

*చీఁకు*
*= చప్పరించు*

*చీకు*
*= నిస్సారము, గ్రుడ్డి*

*తఱుఁగు*
*= తగ్గుట*

*తఱుగు*
*= తరగటం(ఖండించటం)*

*తరి*
*= తరుచు*

*తఱి*
*= తఱచు*

*తీరు*
*= పద్ధతి*

*తీఱు*
*= నశించు*

*దాఁక*
*= వరకు*

*దాక*
*= కుండ, పాత్ర*

*నాఁడు*
*= కాలము*

*నాడు*
*= దేశము, ప్రాంతము*

*నెరి*
*= వక్రత*

*నెఱి*
*= అందమైన*

*నీరు*
*= పానీయం*

*నీఱు*
*= బూడిద*

*పేఁట*
*= నగరములో భాగము*

*పేట*
*= హారంలో వరుస*

*పోఁగు*
*= దారము పోఁగు*

*పోగు*
*= కుప్ప*

*బోటి*
*= స్త్రీ*

*బోఁటి*
*= వంటి [నీబోఁటి]*

*వాఁడి*
*= వాఁడిగాగల*

*వాడి*
*= ఉపయోగించి*

*వేరు*
*= చెట్టు వేరు*

*వేఋ*
*= మరొకవిధము*

*మన తల్లిదండ్రులు*
*మన మాతృభాష*
*ఎంతో విలువైనవి*

*గుర్తుంచుకుందాం*
*గౌరవించుకుందాం*

*ఇవి మన సంపద*
*తెలుసుకుని సంతోషపడదాం*

జైహింద్.

భోగి శుభాకాంక్షలు.

 జైశ్రీరామ్.

ఆర్యులారా! 

 నేడు భోగి పండుగ

మీకందరికీ భోగి పండుగ శుభాకాంషలు..

మీ యింట పౌష్య లక్షి ఆనంద నాట్యము చేయుగాక. మీరంతా సంతోషంతో ఉదారగుణ సంభరితులై దానధర్మాది సచ్చరితములతో వర్ధిల్లుదురు గాక.

జైహింద్.

ఏడువారాల నామసార్ధక్యం.

జైశ్రీరామ్.

వారానికి ఏడు రోజులు 

ఎందుకు 

_రోజుకు 24 గంటలు కదా hour అనే పదం ఎక్కడిది ?_

_ఆదివారం తర్వాత సోమవారం ఎందుకు ? మంగళ వారం రావొచ్చుగా ?

ఈ ప్రశ్నలకి సమాధానం చెప్పే మందు  మనలో కూడా చాలా మందికి తెలియని విషయాలు తెలుసుకోవలసి ఉంది.

ప్రపంచంలో ఏదేశానికి లేని జ్ఞాన సంపద మన సొత్తు.

ఎన్నో వేల లక్షల సంవత్సరాల నుండి
మిగతా దేశాలు వారు గ్రహాలు అంటే ఏంటో తెలియక ముందే నవ గ్రహలను గుర్తించిన ఘనత మనదే.

ఏ రోజు ఎప్పుడు సూర్యోదయం అవుతుంది ?ఎప్పుడు సూర్యాస్తమయం అవుతుంది ?

ఎప్పుడు చంద్రగ్రహణం ? ఎప్పుడు సూర్యగ్రహణం ?

ఏ కార్తెలో ఏ పంట పండించాలి ఇవన్నీ కూడా మన భారతీయులు చేతి వేళ్ళు లెక్కలతో వేసి చెప్పినవే..ఎటువంటి పరికరాలు టెలిస్కోపులు లేకుండా సాధించినవే.

పైన ప్రశ్నకి సమాధానం

మన వాడుకలో ప్రతి రోజుకి ఒక పేరు ఉంది. ఆది వారము, సోమ వారము, మంగళ వారము, బుధ వారము, గురు వారము, శుక్ర వారము, శని వారము. ఇవి ఏడు. ఇలా ఈ ఏడు రోజులకు ఏడు పేర్లు ఎందుకు పెట్టారు ?

ఆ పేర్ల నిర్ణయానికి ఒక శాస్త్రీయమైన పద్ధతి వుంది. నిర్ధిష్టమైన పద్ధతిలో పూర్వ కాలంలో భారత మహర్షులు ఆ పేర్లను నిర్ణయించారు. ఆ పేర్ల నిర్ణయానికి శాస్త్రీయమైన కారణాలున్నందునే ఆ పేర్లే ప్రపంచ వ్యాప్తంగా ఆచరణలో నేటికి ఉన్నాయి.

భారత కాలమానంలో  హోరా అనగా ఒక గంట అని అర్థం. దీని నుండి పుట్టినదే ఇంగ్లీషు HOUR. ఒక రోజుకు 24 గంటలుంటాయి, అంటే 24 హోరాలు. ఒక రోజులో ఉన్న 24 గంటలు (24 హోరాలు) కూడా ఏడు హోరాల చక్రంలో తిరుగుతాయి.. ఆ 7 హోరాలకి ఏడు పేర్లున్నాయి. అవి వరుసగా... (ఈ వరుసలోనే) శని, గురుడు, కుజుడు, రవి, శుక్ర, బుధ, చంద్ర హోరాలు ప్రతి రోజూ వుంటాయి.

ఈ 7 హోరాలే ప్రతి రోజు 24 గంటల్లో ఉంటాయి. 7 గంటల కొకసారి ఈ 7 హోరాలు పూర్తీ అయ్యాక మళ్ళీ మొదటి హోరాకి వస్తుంది.. అంటే శని హోరా నుండి చంద్ర హోరాకి మళ్ళీ శని హోరాకి.

ఉదాహరణకు ఆదివారము రవి హోరాతో ప్రారంభం అయి మూడు సార్లు  పూర్తికాగా (3 సార్లు 7 హోరాలు 3x7 = 21 హోరాలు) 22వ హోరాపేరు మళ్ళీ రవి హోరా వస్తుంది. 23వ హోరా పేరు ఆ వరుసలో శుక్ర హోరా అవుతుంది. 24 వ హోరా బుధ హోర అవుతుంది. దాంతో ఒక రోజు పూర్తవుతుంది.

ఆ తర్వాత హోరా 25వ హోరా. అనగా తరువాతి రోజు మొదటి హోరా దాని పేరు చంద్ర హోరా. అనగా సోమవారము. అనగా చంద్ర హోరాతో ప్రారంభ మౌతుంది. ఏరోజు ఏ హోరాతో ప్రారంభమవుతుందో ఆ రోజుకు ఆ హోరా పేరున దానికి ఆ పేరు వుంటుంది.

చంద్ర హోరాతో ప్రారంభమైనది గాన అది సోమ వారము. ఈ విధంగానే మిగిలిన దినములు కూడా ఆయా హోరాల పేరన పేర్లు ఏర్పడతాయి.

రవి (సూర్యుడు) హోరాతో ప్రారంభం = రవివారం, ఆదిత్య అన్నా కూడా సూర్యుడు పేరే. కావుననే ఆదివారం, భానుడు అన్న కూడా సూర్యుడే భానువారం (కర్ణాటక, తమిళనాడులో భానువారం వాడుతారు) ఇలా ఆయా హోరాలు బట్టి రోజుల పేర్లు వచ్చాయి.

ఆదివారం తరవాత సోమవారం ఎందుకు రావాలి ? మంగళ వారం రాకూడదా ?

రాదు.... ఏందుకంటే ఆదివారం రవి హోరా ప్రారంభం అయ్యింది, తరువాత రోజు అంటే సోమవారం చంద్ర హోరాతో ప్రారంభం అయ్యింది కాబట్టి.

ఇది మన భారతీయుల గొప్పతనం.. ఈ విషయాలు తెలియక మనల్ని మనం చిన్న చూపు చూసుకుంటాం.

ప్రపంచంలో దేశమయినా మన పద్ధతి ఫాలో అవ్వాల్సిందే.. కానీ మనకి మాత్రం మనం అన్నా మన దేశమన్నా లోకువ.

ఇంత నిర్థిష్టమైన పద్ధతిలో వారమునకు పేర్లు పెట్టారు గనుకనే భారతదేశ సంప్రదాయాన్ని ప్రపంచమంతా అనుసరిస్తున్నది.

జైహింద్.

శ్రీశైల మల్లన్నను పాల్కురికి సోమన్న అచ్చులు,హల్లులతో చేసిన స్తుతి.

జైశ్రీరామ్.

శ్రీశైల మల్లన్నను పాల్కురికి సోమన్న అచ్చులు,హల్లులతో చేసిన స్తుతి.

'అ'ఖిల లోకాధార
'ఆ'నంద పూర
'ఇ'న చంద్ర శిఖి నేత్ర
'ఈ'డితామల గాత్ర
'ఉ'రు లింగ నిజరూప
'ఊ'ర్జితా జలచాప
'ఌ'లిత తాండవకాండ
'ౡ'నికృతా జాండ
'ఏ'కైక వర్యేశ
'ఐ'క్య సౌఖ్యా వేశ
'ఓం' కార దివ్యాంగ
'ఔ'న్నత్య గుణ సంగ
'అం'బికా హృదయేశ
'అః'స్తోక కలనాశ

'క'నద హీనాభరణ
'ఖ'ల జలంధర హరణ
'గ'ల నాయక విధేయ
'ఘ'న భక్తి విజేయ
'జ'శ్చూల కాలధర
'చ'రిత త్రిశూల ధర
'ఛ'ర్మ యాధ్వస్త
'ఞ'న గుణ ధళ ధీర
'ట' త్రయాది విదూర
'ఠ' ప్రభావాకార
'డ'మరుకాది విహార
'ఢ' వ్రాత పరిహార
'ణ' ప్రవాగార
'త'త్త్వ జోనేత
'థ'వి దూర జవ పక్ష
'ద'వన పాలన దీక్ష
'ధ'రణీ థవోల్లీడ
'నంది కేశారూఢ
'ప'ర్వతీశ్వర లింగ
'బ'హుళ భూత విలాస
'భ'క్త్వ హృద్వ నహన
'మం'త్రస్తుతోధార
'య'క్ష రుద్రాకార
'ర'తిరాజ బిన హంస
'ల'లిత గంగోత్తంస
'ళ'మా విదవ్రంశ
'వ'రద శైల విహార
'శ'ర సంభ వాస్ఫార
'ష'ట్తింశ తత్త్వగత
'స'కల సురముని వినుత
'హ'రి నేత్ర పదపద్మ- అంశిత భూధరపద్మ
'క్ష'ర రహిత చరిత్ర - అక్షరాంక స్తోత్ర
శ్రీ పర్వత లింగ
నమస్తే నమస్తే నమస్తే నమః

 జైహింద్.

శ్రీ శివాపరాధక్షమాపణ స్తోత్రమ్.

జైశ్రీరామ్

శివాపరాధ క్షమాపన స్తోత్రమ్ 

ఆదౌ కర్మప్రసంగాత్ కలయతి కలుషం మాతృకుక్షౌ స్థితం మాం 
విణ్మూత్రామేధ్యమధ్యే క్కథయతి నితరాం జాఠరో జాతవేదాః | 
యద్యద్వై తత్ర దుఃఖం వ్యథయతి నితరాం శక్యతే కేన వక్తుం 
క్షన్తవ్యో మేఽపరాధః శివ శివ శివ భోః శ్రీమహాదేవ శంభో ||౧|| 

బాల్యే దుఃఖాతిరేకాన్మలలులితవపుః స్తన్యపానే పిపాసా 
నో శక్తశ్చేన్ద్రియేభ్యో భవగుణజనితా జన్తవో మాం తుదన్తి | 
నానారోగాదిదుఃఖాదుదన పరవశః శంకరం న స్మరామి 
క్షన్తవ్యో మేఽపరాధః శివ శివ శివ భోః శ్రీమహాదేవ శంభో || ౨|| 

ప్రౌఢోఽహం యౌవనస్థో విషయవిషధరైః పంచభిర్మర్మసన్ధౌ
దష్టో నష్టోఽవివేకః సుతధనయువతిస్వాదుసౌఖ్యే నిషణ్ణః | 
శైవీ చిన్తావిహీనం మమ హృదయమహో మానగర్వాధిరూఢం 
క్షన్తవ్యో మేఽపరాధః శివ శివ శివ భోః శ్రీమహాదేవ శంభో || ౩|| 

వార్ధక్యే చేన్ద్రియాణాం విగతగతిమతిశ్చాధిదైవాది తాపైః 
పాపైర్రోగైర్వియోగై-స్త్వనవ సితవపుః ప్రౌఢిహీనం చ దీనమ్ |
మిథ్యామోహాభిలాషైర్భ్రమతి మమ మనో ధూర్జటేర్ధ్యానశూన్యం 
క్షన్తవ్యో మేఽపరాధః శివ శివ శివ భోః శ్రీమహాదేవ శంభో ||౪|| 

నో శక్యం స్మార్తకర్మ ప్రతిపదగహనప్రత్యవాయాకులాఖ్యం 
శ్రౌతే వార్తా కథం మే ద్విజకులవిహితే బ్రహ్మమార్గే సుసారే | 
జ్ఞాతో*ధర్మో విచారైః శ్రవణమననయోః కిం నిదిధ్యాసితవ్యం 
క్షన్తవ్యో మేఽపరాధః శివ శివ శివ భోః శ్రీమహాదేవ శంభో ||౫|| 

స్నాత్వా ప్రత్యూషకాలే స్నపనవిధివిధౌ నాహృతం గాంగతోయం 
పూజార్థం వా కదాచిద్వహు-తరగహనాత్ఖణ్డబిల్వీదలాని | 
నానీతా పద్మమాలా సరసి వికసితా గన్ధపుష్పైస్త్వదర్థం 
క్షన్తవ్యో మేఽపరాధః శివ శివ శివ భోః శ్రీమహాదేవ శంభో ||౬|| 

దుగ్ధైర్మధ్వాజ్య యుక్తైర్దధిసితసహితైః స్నాపితం నైవ లింగం 
నో లిప్తం చన్దనాద్యైః కనక విరచితైః పూజితం న ప్రసూనైః | 
ధూపైః కర్పూరదీపైర్వివిధరసయుతైనైవ భక్ష్యోపహారైః 
క్షన్తవ్యో మేఽపరాధః శివ శివ శివ భోః శ్రీమహాదేవ శంభోll౭|| 

ధ్యాత్వా చిత్తే శివాఖ్యం ప్రచురతరధనం నైవ దత్తం ద్విజేభ్యో 
హవ్యం తే లక్షసంఖ్యైర్హుతవహవదనే నార్పితం బీజమన్త్రైః | 
నో తప్తం గాంగతీరే వ్రతజపనియమై రుద్రజాప్యైర్న వేదైః
క్షన్తవ్యో మేఽపరాధః శివ శివ శివ భోః శ్రీమహాదేవ శంభో ||౮|| 

స్థిత్వా స్థానే సరోజే ప్రణవమయమరుత్కుణ్డలే సూక్ష్మమార్గే 
శాన్తే స్వాన్తే ప్రలీనే ప్రకటితబిభవే జ్యోతిరూపేఽపరాఖ్యే | 
లింగజ్ఞే బ్రహ్మవాక్యే సకలతనుగతం శంకరం న స్మరామి 
క్షన్తవ్యో మేఽపరాధః శివ శివ శివ భోః శ్రీమహాదేవ శంభో ||౯|| 

నగ్నో నిఃసంగశుద్ధస్త్రిగుణవిరహితో ధ్వస్తమోహాన్ధకారో 
నాసాగ్రే న్యస్తద్రుష్టిర్విదితభవగుణో నైవ ద్రుష్టః కదాచిత్ | 
ఉన్మన్యాఽవస్థయా త్వాం విగతకలిమలం శంకరం న స్మరామి 
క్షన్తవ్యో మేఽపరాధః శివ శివ శివ భోః శ్రీమహాదేవ శంభో || ౧౦|| 

చన్ద్రోద్భాసితశేఖరే స్మరహరే గంగాధరే శంకరే 
సర్పైర్భూషిత కణ్ఠకర్ణవివరే నేత్రోత్థవైశ్వానరే | 
దన్తిత్వక్కౄతసున్దరాంబరధరే త్రైలోక్యసారే హరే 
మోక్షార్థం కురు చితవృత్తిమఖిలామన్యైస్తు కిం కర్మభిః || ౧౧|| 

కిం వాఽనేన ధనేన వాజికరిభిః ప్రాప్తేన రాజ్యేన కిం 
కిం వా పుత్రకళత్ర-మిత్రపశుభిర్దేహేన గేహేన కిమ్ 
జ్ఞాత్వైతత్క్షణభఙ్గురం సపదిరే త్యాజ్యం మనో దూరతః 
స్వాత్మార్థం గురువాక్యతో భజ భజ శ్రీపార్వతీవల్లభమ్ || ౧౨|| 

ఆయుర్నశ్యతి పశ్యతాం ప్రతిదినం యాతి క్షయం యౌవనం 
ప్రాత్యాయాన్తి గతాః పునర్న దివసాః కాలో జగద్భక్షకః 
లక్ష్మీస్తోయతరంగభంగచపలా విద్యుచ్చలం జీవితం 
తస్మాన్మాం శరణాగతం శరణద త్వం రక్ష రక్షాధునా || ౧౩|| 

కరచరణకృతం వాక్కాయజం కర్మజం వా 
శ్రవణనయనజం వా మానసం వాఽపరాధమ్ | 
విహితమవిహితం వా సర్వమేతత్క్షమస్వ 
జయ జయ కరుణాబ్ధే శ్రీమహాదేవ శంభో|| ౧౪|| 

ఇతి శ్రీమచ్ఛఙ్కరాచార్యవిరచితం శివాపరాధక్షమాపనస్తోత్రం సంపూర్ణమ్ ||

నక్షత్రముతో....చమత్కారపద్యము.

జైశ్రీరామ్. 

చమత్కారపద్యము.

నక్షత్రము గల చిన్నది
నక్షత్రము చేతబట్టి నక్షత్రప్రభున్
నక్షత్రమునకు రమ్మని
నక్షత్రము పైనవేసి నాథుని పిలిచెను.

ఇందులో నాలుగు నక్షత్రాలు దాగి ఉన్నాయి. పదే పదే చదివితేనే కానీ అంతసులువుగా అర్థమయేవికావు. ఇటువంటి ప్రహేళికలను'ప్రముషితా' ప్రహేళికలని అంటారని కవి దండి తన'కావ్యాదర్శం' లో చెప్పాడు.

ఇప్పుడు వివరణ చూద్దాం!
మహాభారతంలో విరాటపర్వం చదువనివారుండరు. విరాటరాజు కుమార్తె "ఉత్తర" (నక్షత్రం పేరు ) ఆమె అభిమన్యుని భార్య.
నక్షత్రము చేతబట్టి అంటే కుంకుమ పాత్ర "భరణిని" ( నక్షత్రం పేరు ) చేతిలో పట్టుకొని ; నక్షత్రప్రభున్ నక్షత్రాలకు ప్రభువైన చంద్రుని వంశపు ( చంద్రవంశము ) అభిమన్యుని; నక్షత్రమునకు రమ్మని అంటే ఒక "మూల" ( నక్షత్రం పేరు ) కు రమ్మని పిలిచి;
నక్షత్రము పైనవేసి అంటే "హస్త" (నక్షత్రం పేరు ) మును అతని మీదవేసి; నాథుని పిలిచెన్ అంటే పతియైన అభిమన్యుని ప్రేమగా పిలిచిందట.

అమ్మో! ఈ పద్యం అర్థంకాకుంటే మీకు నిజంగానే నక్షత్రాలు కనిపించేవి కదూ! అదీ మరి కవి చమత్కారమంటే!

జైహింద్.

చమత్కారం.

జైశ్రీరామ్.
ఒక మహా కవి మరో మహాకవిని పొగిడితే ?
చ: మతి , ప్రభ , నీగి, పేర్మి , సిరి , మానము పెంపున ;భీమునిన్ ;బృహ
స్పతి , రవి ,కర్ణు , నర్జును , కపర్ది , సుయోధను , బోల్పఁబూన ; నా
మతకరి , తైక్ష్ణు , దుష్కులు , నమానుషు , భిక్షు , ఖలాత్ము నెంచ; వా
క్సతిపు , శశిన్ , శిబిన్ , గొమరుసామిని , మేరువు , నబ్ధి , బోల్చెదన్ !
----- చాటు పద్యము;

ఈపద్యంతో ఒకమహాకవి మరియొక మహాకవిగారికి వాక్సన్మానం జేస్తున్నారు. ఎంత గొప్పగా చెప్పారో గమనించండి. అర్ధం గావటం కొద్దిగా కష్టం. మనసు జేసికొని చదవాలి.
"ఈమహాకవి మతిలో బృహస్పతి, కాంతికి సూర్యుడు , దానంలో కర్ణుడు ,పేర్మి (గొప్పతనం) లో అర్జునుడు, సంపదలతో శంకరునివంటివాడు , అభిమానపుపెంపున సుయోధనుడు'- అని (యీభీమకవిని ) నేను చెప్పదలచుటలేదు. ఎందుకంటే?
ఆబృహస్పతి మొదలగువారిలో కొన్ని దోషాలున్నాయి. ఎలాగంటారా?
బుధ్ధికి బృహస్పతి యందామంటే అతడు వట్టి మాటకారిమాత్రమే తెలివి సున్న.తెలివైన వాడైతే పెళ్ళాన్ని చంద్రున కప్పగిస్తాడా? అందుచేత సాక్షాత్తు బ్రహ్మకు సమానుడనేయంటాను. తేజస్సులో సూర్యుని వంటివాడని నేను చెప్పను.సూర్యనికాంతిలో వేడిమి ఉంటుంది. అందుచేత యితనిని చల్లని వెన్నెలగురిసే చంద్రుడనే యంటాను. దానంలో యితనిని
కర్ణుడని నేననను. కర్ణుడు హీనకులజుడు. అందుచేత యితనిని శిబిగా భావిస్తాను. పరాక్రమంలో యితనిని క్రీడితో నేపోల్చను. ఎందుకంటే , అతడు నపుంసకుడు. కాబట్టి కుమారస్వామితో నే పోలిక చెపుతాను. సంపదదల పెంపులో నితనిని శంకరునితో పోల్చను.ఎందుకంటే యెంతున్నా అతడు బిచ్చగాడే! అందువలన నేనితనిని మేరుపర్వతముతో సమానుడంటాను. అభిమానాధిక్యంలో నేనితనిని సుయోధనునకు సరియనను. ఎందుకంటే అతడు దుశ్చింతనాపరుడు(ఖలుడు) అందువలన నేనితనిని మహా గంభీరుడైన సముద్రునితో సమానుడంటాను.
' అని నన్నయ భట్టుగారు తనకు సమకాలికుడైన వేములవాడ భీమకవిని పొగడినారట! నిజమెంతో తెలియదుగాని, పద్యము మాత్రము పసందుగ నున్నది.
" క్రమాలంకారము"
స్వస్తి.
జైహింద్.

"అనన్తరత్నప్రభవస్య యస్య......మేలిమి బంగారం మన సంస్కృతి,

జైశ్రీరామ్.
"అనన్తరత్నప్రభవస్య యస్య,
హిమం న సౌభాగ్యవిలోపి జాతమ్‌,
ఏకో హి దోషో గుణసన్నిపాతే,
నిమజ్జతీందోః కిరణే ష్వివాంకః" (కుమారసంభవము.)
క. గుణ సంహతినొకదోషము
కనఁబడు. గుణంబు చెడదు. ఘనతనె యొప్పున్.
కనఁబడు వెన్నెలె. యందన
కనుమరుగగు గాదె మచ్చ? కాంచఁగ మనకున్.
భావము.
సుగుణములు కుప్పలు కుప్పలుగా నున్నపుడు ఒకదోషమున్నను అది వానిలో మునిగి కలిసిపోవును గాని వస్తువునకు కళంకము తెచ్చిపెట్టనేఱదు. ఉదా- సుధాకరుని కిరణములయందు నల్లనిమచ్చ.
జైహింద్.

ఒక్క దినముననే వ్రాసిన శ్రీ చంద్రమౌళీశ్వర శతకము. రచన. చింతా రామకృష్ణారావు. తే. ౧౬ - ౧౧ - ౨౦౧౯

జైశ్రీరామ్.

జైహింద్.

నరాల రామారెడ్డి

జైశ్రీరామ్.
నరాల వారి సాహిత్యం.
వ్యాస రచన అజ్ఞాత మహనీయుఁడు
హాలునికి తెలుఁగు మౌక్తికహారం
నరాల రామారెడ్డి అనువాదం.

ఆధునిక సాహిత్యంలో స్రవంతులైన అభ్యుదయ, దళితవాద మొదలైన సాహిత్యాలకు మూలం వర్గ చైతన్యం. సమాజంలోని ప్రజలను ఆర్థిక, సామాజిక అంశాల ప్రాతిపదికన  ఊహించుకుని వర్గాలు చేసి ఆయా జనసమూహాల ప్రయోజనాలను కాపాడేందుకు వారిని అప్రమత్తంగా ఉంచేది వర్గ చైతన్యం. దానికంటే ముందుగా పుట్టవలసినది  సామాజిక స్పృహ, అనగా వర్గాలకతీతంగా సమాజంలో ప్రాథమికంగా ఉండవలసిన మానవీయ విలువలు, సంబంధాలు. అటువంటి అంశాలను ప్రకటించే సాహిత్యాన్ని వేలయేళ్ళ భారతీయ కావ్య జగత్తులో మొదటగా ఎవరు సృశించారు? ఆ ప్రశ్నకు సమాధానం వెదుక్కుంటూ వెనక్కుపోతే కనబడేది శాలివాహనుడు సంకలనం చేసిన గాథా సప్తశతి. శాలివాహనునికి హాలుడు అనే పేరు కూడా ఉన్నది. ఎప్పుడో 1వ శతాబ్దంలో సాహిత్యయుగం సంధ్యాసమయంలో వెలుగుచూసినదీ  గాథా సంకలనం. గీర్వాణభాష ( దేవ భాషైన సంస్కృతం) కు సమాంతరంగా ప్రయాణించి అధికారంలో ఉన్న వారి గురించే కాక సమాజంలోని లోతులను తెరచి చూపయత్నించింది ప్రాకృత భాషా సాహిత్యం. సంస్కృతం పురుషుడి గొంతుక వలె పరుషంగా ఉంటే, ప్రాకృతం స్త్రీ కంఠంలా కోమలంగా ఉంటుందని ప్రాకృతకవులు గర్వంగా చెప్పుకొంటారు. ఆ భాషలో రాయబడిందీ గాథా సప్తశతి.

మరి సామాజిక స్పృహకు చెందిన అంశాలున్న ప్రాచీన సాహిత్యం కావడం వల్లనే ఆ గాథలు  ప్రముఖావధాని, విద్వత్కవి, ఆశుకవనరచనాచతురుడు నరాల రామారెడ్డి గారిని ఆకర్షించాయి. మొదటినుండీ అవధానక్రీడలో భావుకత, వీలైనచోటల్లా సరళతను కనబరుస్తూ అవధాన కళను సమాజానికి మరింత చేరువగా తీసుకొని పోవడానికి ప్రయత్నించి,  నేటి కాలపు అవధాన జగత్తులో ప్రత్యేక స్థానం చాటుతూవచ్చిన రామారెడ్డి గారు సహజంగానే ప్రాకృతకవిత్వం పై అభిమానం పెంచుకున్నారు. ఏడువందల పద్యాలను తీసుకుని ఆనాటి సాంఘిక జీవనానికద్దం పట్టే మూడువందల ప్రాకృత గాథలను ఎంచుకొని తెలుగు చేశారు. మూలాన్ని ప్రాకృతం నుండి కాక సంస్కృతానువాదమైన “ఛాయ” ను తీసుకుని, వాటిలోని శ్లోకాలను తెలుగుదనం ఉట్టిపడే విధంగా తేటగీతి ఛందస్సునెంచుకొని అనువాదం చేశారు.

శృంగార, కరుణ, హాస్య రసాలు ప్రధానంగా కలిగిన ఈ గాథలలో రామారెడ్డి గారు తన అవధానవిద్యలో వారు ప్రదర్శించిన పాండిత్యం, ప్రతిభ తోపాటు భావుకతను కూడా జోడించి స్వతంత్ర రచనలాగా వెలువరించారు. పదులఏళ్ళుగా పద్యాలతో గాలిలో బంతులాడిన అనుభవం వారిది, అనువాద పద్యాలు చెక్కినట్టుగా వచ్చాయి.

తే॥
అమృతధామ! నిశాతిలకాభిరామ!
చల్లచల్లని మామ! ఓ చందమామ!
ధవునిరమణీయగాత్రమ్ము తాకినట్టి
శీతకరముల నన్ను స్పృశించుమోయి!

భావము = ఓ అమృతనిలయా! రాత్రి అనే రమణి ముఖానికి రమ్యమైన తిలకం వంటి వాడవు నీవు.చల్ల చల్లని మామవు. చందమామవు. నీవు నా ప్రాణ వల్లభుని స్పృశించిన కిరణాలతో నన్ను కూడా స్పృశించు.

విశేషము = మూలంలో లేని “చల్లచల్లని మామ ఓ చందమామ” పదాలను జోడించి తెలుగు వెన్నెల చల్లదనాన్ని కురిపించారు నరాల గారు.

తే॥
‘ఎన్ని మాఱులు నన్ను మర్దింతువోయి!
ఇంక చాలును నను విసర్జింపవోయీ’
అంచు జీర్ణవస్త్రము విలపించినట్లు
అంబుకణములు స్రవియించెనంచులందు.

అంచు = అనుచు

భావము = “ఎన్నిసార్లు నన్ను బండకేసి బాదుతావయ్యా! ఇప్పటికైనా నన్ను వదలి పెట్టవయ్యా!” అని ఒక బీదవాని చినిగిపోయిన పాతపంచె ఏడుస్తున్నదేమో అన్నట్లు చిరుగుపాత అంచుల నుండి నీటిబొట్లు కారుతున్నాయి.

విశేషము = ఆ నాటి సమాజంలోని ఒక పేదవాడి పాత పంచె ఏ స్థితి లో ఉందో హాలుడు చెప్పకపోతే మనకిప్పుడు తెలిసేదా! మనకు కూడా అంబు కణాలు జీరగా నిండలేదూ ?! ఎంతటి సామాజిక స్పృహ కవిది.

తే॥
మొదటిసారి గర్భిణియైన ముగ్దగాంచి
ఇంతి! యేవి వస్తువులు నీకిష్టమనుచు
సుదతులందఱు ప్రశ్నించ చుట్టుముట్టి
నాతిచూపులు ప్రసరించె నాథువైపు

భావము =మొదటి సారి గర్భవతియైన ఒక ముగ్దురాలిని చుట్టుముట్టిన సకియలు ‘ఏఏ వస్తువులు నీకు ఇష్టమో’ చెప్పమన్నారు. సిగ్గలుమొగ్గ అయిన ఆ ముగ్దచూపులు ఆమె ప్రాణవల్లభుని వైపు ప్రసరించినాయి

విశేషము = మగనికన్నా రుచికరమైన, ఇష్టమైన వస్తువు ప్రపంచంలో ఇంకేముందని ఆ ముగ్ద చూపులిచ్చిన ప్రౌఢసమాధానం. గర్భిణి చుట్టూ చేరిన అమ్మలక్కలు, వారడిగే ప్రశ్నలు, ఆ అనురాగాలు, ఆ మెత్తటి భావనలు, ఆ కాలం నుండే ఉన్నాయా అని ఆశ్చర్యపడడం ఇక పాఠకుడి వంతు.

తే॥
గగనలక్ష్మి కంఠము నుండి గళితమైన
పద్మరాగగారుత్మతభాసమాన
కంఠహారము కైవడి కాంచుమోయి!
రామచిలుకలు బారుగా వ్రాలుచుండె

భావము = గగనలక్ష్మి కంఠసీమనుండి కెంపులు, గరుడపచ్చలు చెక్కిన కంఠహారం నింగినుండి జారిపడుతున్నట్లు రామచిలుకల బారు నేలమీద వ్రాలుతున్నది చూడు

విశేషం = చిలుకల ముక్కులు పద్మరాగ మణుల్లా, చిలుకల శరీరాలు మరకత మణుల్లా భాసిస్తున్నాయని భావం. ‘బారుగా వ్రాలుచుండె’ - ‘బారుగా’ అన్న తెలుగు నుడికారం ఈ చిత్రానికి స్పష్టతనూ, విస్తృతినీ ఇచ్చిందంటారు పి. రామకృష్ణ గారు నరాల వారి అనువాదం ముందు మాటలో. కృష్ణ శాస్త్రికి సైతం భావుకతను నేర్పిన భావనలా లేదూ భావన !! ఎంతటి గొప్ప సమాజమో అది, అంత భావనలు పోయారు.

ఈరీతిలో రామచిలుకలు బారులుగా వ్రాలినట్లు,  ముత్యాల్లాంటి పద్యాలు బారులుగా పేర్చబడి హారం రూపం దాల్చాయా అన్నట్లుగా ఉంది. అందుకేనేమో సినారే గారు ముందు మాటలో “రామారెడ్డి గారు అనువాద రూపంలో తెలుగు వారికి మరో కవితామౌక్తికహారం అందించారు” అన్నది. అందుకేనేమో అంతగా పలవరించి సినారే గారన్నది “ప్రతిభా వ్వుత్పత్తులను అతులిత రూపంలో మేళవించుకొన్న కవితాశిల్పి రామారెడ్డి గారు” .

నరాల రామారెడ్డి గారందించిన ఆ మౌక్తికహారం రచన పేరు “ గాథా త్రిశతి - శాలివాహనప్రాకృత గాథలకు ఆంధ్రానువాదం”.
జైహింద్.

ఆత్మచెప్పిన కథ....శ్రీ రంగావజ్ఝల మురళీధరరావు.

జైశ్రీరామ్.
ఆత్మకథ. శ్రీ రంగావజ్ఝల మురళీధరరావు.
          దేహం నేను కాకపోతే "నేను ఎవరు?" అంటే ఆత్మ చెప్పిన కథ విందాం అందరం.
           నీ కథ - నా కథ - మన కథ
 నీవు అచంచలాత్ముడవు. నిత్యుడవు. సత్యమిదే. నీలో ఉన్న సత్యమిది. నీ యథార్థస్థితి ఇది. ఈ శాశ్వతత్త్వం నీలో ఉంది. అవినాభావంగా ఉంది. అంటుకోకుండ ఉండి, నిన్ను, నడిపిస్తున్న చైతన్యమే నీవు. నీవు లేని మేను ఉండదు. నీవు ఉంటే మేను ఉంటుంది. మేనును నమ్మకండి. దానిపై అహంకార, మమకారాలు పెంచుకోకండి. మేను అశాశ్వతం. అశాశ్వతాన్ని వదలండి. బయట మేను. లోపల నీవు. లోపలకు చూడండి. మనసు ఆలోచనలన్నింటినీ ఆత్మపై ఉంచండి. నిర్మలం, నిశ్శబ్దంగా మీ లోని ఆత్మను చూడండి.
           "లోకంబులు లోకేశులు
             లోకస్థులుఁ దెగిన తుది నలోకంబగు పెం
             జీకటి కవ్వల నెవ్వం
             డేకాకృతి వెలుంగు నతని నే సేవింతున్" అని భాగవతం చెప్పింది. లోకాలు మూడు..మెళకువ, కల, నిద్ర..లోకేశులు..దేవతలు. వాటికి ఆధారమైన చైతన్య పరిధులు మూడు..విశ్వుడు, తైజసుడు , ప్రాజ్ఞుడు.. లోకస్థులు..మూడు లోకాలను అనుభవించేవి=ఇంద్రియాలు అంతఃకరణము , అహంకారం మొదలగునవి . తెగిన తుది అనగా నశించాక. అంటే ఇవేవీ అందుకోలేని .. అలోకంబగు పెన్జీకటికవ్వల..శూన్యావస్థను కూడా మించి ఎవ్వండు..ఎవడైతే ఉన్నాడో.. ఏకాకృతి వెలుగు..అంటే..నిర్వికల్ప నిశ్చల స్థితిలో, ఈ మూడు లోకాలను కూడా అంతర్యామి యై వ్యాపించిన ఏకాకృతిలో.. వెలుగు.. అంటే.. జ్యోతిగా కనిపిస్తాడో .. అంతర్ముఖులై ..వెదకి చూచిన..కనిపిస్తాడు. అటువంటి పరమాత్ముడైన శ్రీమహా విష్ణు మూర్తి నే.. సేవింతున్. .ప్రార్ధిస్తాను ! అని గజేంద్రుడు మొరపెట్టుకుంటాడు. అలా  అందరూ, అంతా నశించాక, గాఢాంథకారానికి , విశ్వానికి అవతల అఖండంగా, ఏకంగా వెలుగుతున్న పరమాత్మ
 వెలుగును చూడండి.  అదే ఆత్మ జ్యోతి. అదే నీవు. అదే నేను. "తత్త్వమసి - అహంబ్రహ్మాస్మి" అదే. "అయమాత్మా బ్రహ్మ" అదే. "సర్వంఖల్విదం బ్రహ్మ " అదే. చంద్రునిలో చల్లదనం, ఆహ్లాదం నీవే.. సూర్యునిలో తేజస్సు నీవే. అగ్నిలో వేడివి నీవే. ఈ విశ్వాన్నే నడిపే చైతన్యమే నీవే. నీవో చైతన్యం. చైతన్యమంటే ఆత్మయే. నీలో ఉంది. నాలో ఉంది. మనలో అందరిలో ఎంత దగ్గరలో ఉందో! కదా! "చంకలో పిల్లను పెట్టుకొని, ఊరంతా వెతికినట్లు వెదుకకండి."  శాశ్వతమైన ఆత్మను చూడండి.  ఆత్మ చెప్పే మాటలు నమ్మండి. శాశ్వతులు కండి.  శాశ్వతుడను. నీలోని ఆత్మను. ఇది నీ కథ. నాకథ. మనకథ. మనలోని ఆత్మ కథ. ఆరు శ్లోకాలలో  ఆత్మలమైన  మన కథ. ఆరు శ్లోకాలలో విడమరచి, చెప్పాను. నిన్ను అంశాలవారిగా నీవు దేహానివికాదు. అని సుస్పష్టంగా వివరించాను. నేను ఆత్మను. నీవూ ఆత్మవే. ఆరులో నేనూ, నీవూ ఉన్నాం. ఆరు గుణాలతో భాసించే ఆత్మను. పరమాత్మను. ఆరు వికారాలూ లేని ఆత్మషట్క కథ. తాపత్రయాదిదుఃఖాలు అంటని నిర్వాణ షట్క గాథ ఇది. మోక్షకథ. అని ఆత్మ, అహంపొర కమ్మిన దేహానికి చెప్పిన కమ్మని కథ. మేను ఎవరో! నేను ఎవరో! నీవు ఎవరో! అద్దె ఇంటిని అందంగా, భద్రంగా చూస్తారో! సొంత ఇల్లనే మణిద్వీపాన్ని చూసుకుంటారో! ఇది మన కథ. నాకథ. నీకథ, మన కథ అంతా ఉపనిషద్విజ్ఞానమే.
జైహింద్.

ఉత్తరద్వారదర్శన ప్రత్యేకత.

జైశ్రీరామ్.
ఉత్తర ద్వార దర్శనం'లో ప్రత్యేకత ఏమిటి..?

అసుర(రాక్షసుల) బాధలు భరించలేక దేవతలు బ్రహ్మతో సహా వైకుంఠం వెళ్తారు. అక్కడ ఉత్తర ద్వారం దాటి శ్రీమన్నారాయణుని దర్శించి తమ బాధలను విన్నవించుకుంటారు. దీంతో స్వామి అనుగ్రహించి రాక్షస పీడ వదిలిస్తాడు.

ఉత్తరద్వారం గుండా వెళ్లి వైకుంఠ దర్శనం చేసుకోవడం వల్ల వైకుంఠ ఏకాదశిగాను, దివి నుంచి భువికి దిగి వచ్చిన మూడు కోట్ల దేవతలకు గరుడ వాహనరూఢుడైన మహావిష్ణువు దర్శనానుగ్రహం ప్రాప్తించడం వల్ల ముక్కోటి ఏకాదశిగాను ఈ పర్వదినం ప్రాముఖ్యాన్ని సంతరించుకుంది. దీన్నే 'హరివాసరమ'ని, 'హరిదినమ'ని, 'వైకుంఠ దినమ'ని అంటారు.

ఈ ఒక్క ఏకాదశి 'మూడు కోట్ల ఏకాదశుల'తో సమానమంటున్నారు పండితులు. ధనుర్మాసంలో వచ్చే ఈ ఏకాదశే సంవత్సరంలోని ఇరవై నాలుగు ఏకాదశులలో శ్రీ మహావిష్ణువుకు అత్యంత ప్రీతికరమైనది. ఈ వైకుంఠ ఏకాదశి నాడు "వైకుంఠ ఏకాదశి వ్రతం" ఆచరించిన వారికి శుభ ఫలితాలుంటాయి. పర్వత సలహా మేరకు వైఖానసుడనే రాజు ఈ వ్రతాన్ని ఆచరించి నరక బాధలు అనుభవిస్తున్న పితృదేవతలకు విముక్తి కలిగించాడని పురాణాలు చెబుతున్నాయి.

అలాగే కృత యుగంలో "ముర" అనే రాక్షసుడు దేవతులను, సాధువులను క్రూరంగా హింసించే వాడు. ముర అక్రమాలను భరించలేక దేవతలు నారాయణ స్వామి వద్ద మొరపెట్టుకుంటారు. దీంతో స్వామి మురాసురుడి మీదికి దండెత్తి అతన్ని వధించాలని చూస్తాడు. ముర వెళ్లి సాగర గర్భంలోకి వెళ్లి దాక్కుంటే, అతన్ని బయటికి రప్పించేందుకు ఉపాయం పన్ని గోవిందుడు గుహలోకి వెళ్లి నిద్రపోతున్నట్లు నటిస్తూ పడుకుంటాడు. అదే అదననుకున్న మురాసురుడు గుహలోకి వచ్చి, విష్ణువును వధించేందుకు కత్తి ఎత్తగానే, మహాలక్ష్మి దుర్గ రూపంలో ప్రత్యక్షమై మురను సంహరించగా, ప్రసన్నుడైన పరమాత్మ ఆమెకు 'ఏకాదశి' అన్న బిరుదు ప్రసాదించాడు. నాటి నుంచి ఏకాదశీ వ్రతం పేరుతో అమ్మవారిని అర్చిస్తామని అంటారు.

వైష్ణవ ఆళ్వారుల్లో శ్రీనమ్మాళ్వారులు ఈ రోజున పరమపదించడం వల్ల శ్రీ వైష్ణవులు అత్యంత భక్తి శ్రద్ధలతో ఏకాదశీ వ్రత మాచరిస్తారు. ప్రసిద్ధ వైష్ణవ దేవాలయాలతో సహా శ్రీ తిరుమల వేంకటేశ్వరుని ఆలయంలోను ఉదయం నుంచీ ప్రత్యేక ఉత్తర ద్వార దర్శనం కలుగుతుంది. దీనికి వైకుంఠ ద్వారమని ప్రతీతి. సూర్యుడు ఉత్తరాయణ పుణ్యకాల ప్రవేశానికి ఉత్తర ద్వారం శుభ సంకేతం.

 దక్షిణాయనంలో మరణించిన పుణ్యాత్ములందరూ వైకుంఠ ద్వారం తెరిచినప్పుడు దాని గుండా స్వర్గంలోనికి ప్రవేశిస్తారని పురాణాలు చెబుతున్నాయి.

అందుకే ఈ పర్వదినాన ఉపవాసముండి లక్ష్మీ సమేతుడైన శ్రీ మహావిష్ణువును షోడశోపచార విధితో ఆరాధించాలి. నిష్ఠతో దీక్షను ఆచరించి రాత్రి జాగరణ చేయాలి. ద్వాదశి రోజున మళ్లీ భగవదారాధన ముగించుకుని పారాయణ చేసి బ్రాహ్మణులను దక్షిణ తాంబూలాదులతో సత్కరించాలి.

ఉపవసించలేని వారు నెయ్యి, నీరు, పాలు, నువ్వులు, పండ్లు భుజించి ఉండవచ్చును.

ముక్కోటి ఏకాదశి నాడు చేసే విష్ణు పూజ, గీతా పారాయణం, గోవింద నామ స్మరణం, పురాణ శ్రవణం మోక్ష ప్రాప్తి కలిగిస్తాయి. ఇంకా ఏకాదశి వ్రతముండే వారికి మరో జన్మంటూ ఉండదని అంటారు.
జైహింద్.

సైనిక్ పురిలో అష్టావధానం నేడే. మీకు స్వగతమ్.

జైశ్రీరామ్.

3వతేదీ సాయంత్రం సైనిక్ పురి శృంగేరీ శంకరమఠంలో లలిత్ ఆదిత్య అష్టావధానం

రాజమండ్రిలో అద్భుతంగా శతావధానాన్ని చేసి 25 నిముషాల్లోనే 75 పద్యాలు ధారణ చేసి ఉద్దండులయిన సంస్కృతాంధ్ర పండితులను అబ్బురపరిచి భళా అని ప్రశంసలు పొందిన అమెరికా వాసి యువ శతావధాన శిరోమణి శతావధాన శరచ్చంద్ర తెలుగింటి ముద్దుబిడ్డ లలిత్ ఆదిత్య మరో అద్భుత అవధానం చేయబోతున్నారు..అత్యంత వేగంగా మహాపండితులు పృచ్ఛకులుగా.. మహా సహస్రావధాని డా.గరికిపాటి నరసింహారావు గారి సమక్షంలో లలిత్ అవధాన విన్యాసం 3వతేదీ శుక్రవారం జరగబోతోంది.ఒకరకంగా రాజమహేంద్రవరం శతావధానం విజయోత్సవంగా ఈ అద్భుత అష్టావధానం సాహితీ ప్రియులను ఓలలాడించనుంది. *దర్శనమ్* ఆధ్యాత్మిక వార్తా మాసపత్రిక ఆధ్వర్యంలో సికింద్రాబాద్ సైనిక్ పురిలోని హై టెన్షన్ రోడ్ లోని శ్రీ విజయగణపతి దేవాలయం ,శ్రీ శృంగేరీ శంకరమఠంలో 3వతేదీ శుక్రవారం సాయంత్రం 5 గంటలకు నవయువ అవధాని లలిత్ అష్టావధానం జరుగుతుంది.. సాహితీ ప్రియులందరికీ సాదర స్వాగతం

*మరుమాముల వెంకటరమణ శర్మ* *దర్శనమ్ మాసపత్రిక* *9441015469*

*రాజమండ్రి లో జరిగిన లలిత్ శతావధానం విశేషాలు*
*రాజమండ్రి అద్భుతంగా లలిత్ ఆదిత్య శతావధానం*
*25 నిమిషాల్లో 75 పద్యాలు ధారణ*

*విజయతీరాలకు చేరుకున్న లలిత్‌ ఆదిత్య* 

*పులకించిన గోదావరి* 

*పద్యాల పండగకు తరలివచ్చిన సాహితీలోకం*

*ముగిసిన శతావధానం*

 లలితాదిత్యుడు మధ్యందిన మార్తాండుడిలా జాజ్వల్యమానంగా ప్రకాశించాడు. పృచ్ఛకవరేణ్యుల అక్షర అస్త్రశ్రస్తాలను అతి లాఘవంగా ఎదుర్కొన్నాడు. పద్యాలను ఛందోబద్ధంగా మాత్రమే కాదు, రసరమ్య గీతాలుగా, భావస్ఫోరకంగా చెప్పి పండితుల ఆమోదాన్ని, ఆశీస్సులను అందుకున్నాడు. ఆదికవి నన్నయ భట్టారకుడు, తిరుపతి వేంకట కవులు, కవిసార్వభౌముడు శ్రీపాద కృష్ణమూర్తిశాస్త్రి వంటి హేమాహేమీలు నడయాడిన గడ్డ మీద.. అమెరికాలో జన్మించి, అక్కడే చదువు‘సంధ్య’లు సాగిస్తున్న ఈ నూనూగు మీసాల నూత్నయౌవనంలో ఉన్న కుర్రాడు మంగళవారం శతావధానం విజయవంతంగా పూర్తి చేశాడు. ఈ మహత్తర ఘటన తెలుగు సాహితీ జగత్తుకు గర్వకారణంగా నిలిచిపోతుందని పలువురు సాహితీవేత్తలు ఈ సందర్భంగా ముక్తకంఠంతో పేర్కొన్నారు.. ఆంధ్ర యువతీ సంస్కృత కళాశాల, శుభోదయం ఇన్‌ఫ్రా సంయుక్త ఆధ్వర్యాన కళాశాలలో ఆదివారం ప్రారంభమైన శతావధానం నిర్వాహకుల అంచనాలకంటే ముందుగానే ఉదయం 11.43 గంటలకు ముగిసింది.

ఘంటానాదం చేస్తున్న ధూళిపాళ

శతావధానంలోని అంశాలు
మూడు నిషిద్ధాక్షరులు, 24 సమస్యలు, 24 దత్తపదులు, 24 వర్ణనలు, 19 ఆశువులు, నాలుగు ఘంటావధానాలు, మూడు అప్రస్తుత ప్రసంగాలు వెరసి.. 101 అంశాలపై పృచ్ఛకులు సంధించిన ప్రశ్నలకు యతిప్రాసలు చెడకుండా, రసాత్మకంగా లలిత్‌ ఆదిత్య పద్యాలను అలవోకగా అందించాడు. ‘శ్చి’, స్త్వం’ వంటి ప్రాసలతో పద్యాలు చెప్పవలసివచ్చినా అదరలేదు.. బెదరలేదు. ‘శిష్యవాత్సల్యము చెలువుమీర’ అవధాన ప్రాచార్య డాక్టర్‌ ధూళిపాళ మహాదేవమణి అవధానిని ప్రోత్సహిస్తూ, పృచ్ఛకులను కవ్విస్తూ, రసజ్ఞులను మెప్పిస్తూ అంతటా తానే అయి, అన్నీ తానే అయి అవధాన క్రతువు నిర్వహించారు. అవధానిని ‘అవధాన శరచ్చంద్ర’ బిరుదుతో సత్కరించారు.

25 నిమిషాల్లో 75 పద్యాలు
మూడు రోజులుగా పృచ్ఛకులు అడిగిన ప్రశ్నలకు తాను పద్యరూపంగా ఇచ్చిన సమాధానాలను సాయంత్రం జరిగిన మహాధారణలో లలిత్‌ ఆదిత్య 25 నిమిషాలలో చదివాడు. ‘గురువులయ్యె గురువుల దీవెనల్, లఘువులయ్యె నాదు శ్రమల్‌’ అని గురువులను స్తోత్రం చేశాడు. ఇది సరికొత్త రికార్డు అని మహాదేవమణి శిష్యుని ఆలింగనం చేసుకున్నారు. మహామహోపాధ్యాయులు, సంస్కృత శతావధానులు కొలువు తీరిన సభలో ఆదిత్య మహాధారణకు కరతాళధ్వనులు ఆగకుండా మోగాయి.

పూరి, గారె, వడ, దోసెలతో వాతావరణ కాలుష్యంపై పద్యం చెప్పమని సరసకవి డాక్టర్‌ ఎస్‌వీ రాఘవేంద్రరావు కోరగా.. అవధాని ఇలా చెప్పారు.
‘పూరి’త మయ్యె ముజ్జగము భూస్థితి భంగ రసాయనంబులన్‌
దూరినభ్యాదతన్‌గొనగ ‘దోసి’ళు లొగ్గిన వారు లేరు పొం
‘గారె’ను బాష్పముల్‌ కువలయాంగనకున్‌ కలుషమ్ము మీరగా
ఆరయచిత్తకంధి ‘వడ’వాగ్నిగ రేగెను దిర్నివారమై.. 

పండితుల ప్రశంసలు
ధార, ధారణ, పూరణ అవధానానకి ప్రాణాలు. శీలసంపద లేని పాండిత్యం, హారతి లేని పూజ, పూలు తలలో లేని మగువ కొప్పు, ధారణ లేని అవధానం వ్యర్థం. ధారణలో లలిత్‌ సందీప్‌ అసామాన్యమైన ప్రతిభ చూపాడు.
– ప్రవచన రాజహంస డాక్టర్‌ ధూళిపాళ మహాదేవమణి

అత్యద్భుత ప్రతిభ
లలిత్‌ ఆదిత్యుని ప్రతిభ అద్భుతం. దేవీదత్తం, ఉపాసనాసిద్ధి పొందిన లక్షణాలు అవధానిలో కనిపిస్తున్నాయి.
– మహామహోపాధ్యాయ

శలాక రఘునాథశర్మ పురాకృత సుకృతం
పద్యవిద్యలో లలిత్‌ ఆదిత్య సాధించిన ప్రతిభ పురాకృత సుకృతం. గురువుల ఆశీస్సులను మెండుగా అందుకున్న లలిత్‌ ఆదిత్య భవిష్యత్తులో మరిన్ని విజయాలు సాధించాలని కోరుతున్నాను.
– చింతలపాటి శర్మ, రాష్ట్రపతి పురస్కార గ్రహీత

*లలిత్ ఆదిత్య గురించి...*
సంస్కృతాంధ్రావధాని గన్నవరం లలిత్ ఆదిత్య

తండ్రి: గన్నవరం మారుతి శశిధర్
తల్లి: గన్నవరం శైలజ
జన్మదినము: 23 సెప్,2000

విద్యార్థి - Aerospace Engineering 2nd year
ప్రవృత్తి:
సంస్కృతాంధ్రసాహిత్యపఠనకవనములు, ప్రవచనాలు, అవధానములు, సంగీతము, టెన్నీస్

బిరుదులు:
అవధానయువశిరోమణి, అవధానశరచ్చంద్ర, అవధానయువకిశోరము
సంస్కృతగురువులు
శ్రీరాయప్రోలు కామేశ్వరశర్మగారు - ప్రారంభము
శ్రీధూళిపాళమహాదేవమణిగారు - వ్యాకరణము,అవధానవిద్య
శ్రీచిఱ్ఱావూరి పద్మనాభశర్మగారు - వ్యాకరణము - శృంగేరికి వెళ్ళి ఈ సెలవులలో వారి వద్ద చదువుకున్నాను

శ్రీవెంపటి కుటుంబశాస్త్రిగారు - అద్వైతవేదాంతము,అలంకారశాస్త్రము
శ్రీమల్లాప్రగడ శ్రీనివాస్ గారు - వేదము

11 అవధానాలు - రవీంద్రభారతి, నల్లుకుంట శంకరమఠము(హైదరాబాద్), రామకోటి శంకరమఠము(విజయవాడ), రాజమహేంద్రి, ఇత్యాది ప్రాంగణాలలో జరిగాయి in USA India and Canada
రవీంద్రభారతిలో సంస్కృతాంధ్ర ద్విగుణిత అష్టావధానం
రాజమండ్రిలో శతావధానం

రచనలు:
నారసింహనమశ్శతం (సంస్కృతం)
నఖశతకం (సంస్క్రతము - నృసింహుని నఖములను 108 శ్లోకాలలో కీర్తిస్తూ)
హనుమద్దోర్దండశతకము (తెలుగు)
ఆవిర్భావము,పర్యావరణావనము, ఇత్యాది ఆంధ్రఖండకావ్యాలు
సంస్కృతములో వివిధదేవతాస్తోత్రములు

శతావధానములో 24 సమస్యలు 24 దత్తపదులు, 24 వర్ణనలు 3 నిషిద్ధాలు, 4 ఘంటావధానాలు, 18 ఆశువులు, 3 అప్రస్తుతాలు

75 పద్యాలు ధారణ - సమస్యాదత్తపదివర్ణననిషిద్ధాలు

శతావధానము ముందు శృంగేరివళ్ళి జగద్గురువులను దర్శించుకున్నాను. వారు సంతోషముతో దయతో అనుగ్రహించి ‘అవిఘ్నమస్తు...జయముగా చేసిరా’ అని ఆశీస్సులను కురిపించారు
*************************

 *శతావధాన శరచ్చంద్ర*
*లలితాదిత్య అష్టావధానం*

నూతన ఆంగ్ల సంవత్సర, సంక్రాంతి  శుభాకాంక్షలు
నమస్కారం 
దర్శనమ్ ఆధ్యాత్మిక వార్తా మాసపత్రిక ఆధ్వర్యంలో 
అమెరికా వాసి, తెలుగు ముద్దుబిడ్డ  18 ఏళ్ల ,యువ శతావధాన శిరోమణి
శ్రీలలిత్ ఆదిత్య అష్టావధానం
తేదీ సమయం:  2020 జనవరి 3 వతేదీ శుక్రవారం సాయంత్రం 5 గంటలకు
వేదిక:  సైనిక్ పురి హై టెన్షన్ రోడ్ లోని శ్రీ విజయగణపతి దేవాలయం , శృంగేరీ శంకర మఠం
 శ్రీ భారతీతీర్థ కల్యాణ మండపంలో 
ముఖ్య అతిథి : మహాసహస్రావధాని డా. శ్రీ గరికిపాటి నరసింహారావు
అవధాన సమన్వయం : శ్రీ మరుమాముల దత్తాత్రేయ శర్మ
సాహితీ మిత్రులందరికీ సాదర స్వాగతం

భవదీయుడు
మరుమాముల వెంకటరమణ శర్మ
సంపాదకులు
దర్శనమ్ ,
ఆధ్యాత్మిక వార్తా మాసపత్రిక 9441015469

 *పృచ్ఛకులు-అంశాలు*

నిషిద్ధాక్షరి ...మావుడూరి సూర్యనారాయణ మూర్తి

సమస్య... కంది శంకరయ్య

దత్తపది... కె.చంద్రశేఖరరావు

వర్ణన... చింతా రామకృష్ణారావు

న్యస్తాక్షరి... ముత్యంపేట గౌరీశంకరశర్మ

అనువాదం... ముదిగొండ అమరనాథశర్మ

ఆశువు... సాధన నరసింహాచార్య

అప్రస్తుత ప్రసంగం..రంగి సత్యనారాయణ శాస్త్రి
జైహింద్.