అత్యద్భుతంగా నిర్వహింపఁబడిన శ్రీ నల్లాన్ చక్రవర్తుల సాహిత్ ప్రథమశతావధానముపై దర్శనం శర్మగారి హృదయ సాగరంనుండి ఉప్పొంగి వచ్చిన అభిప్రాయామృతం.

 జైశ్రీరామ్

దర్శనం శర్మ మహోదయులు.

హృదయావిషరణ.

🙏🌺 *అక్షరయజ్ఞానికి అండగా నిలిచిన ప్రతి హృదయానికీ కృతజ్ఞతాభివందనం* 🌺🙏

**మూడు రోజులపాటు పద్యం పరవళ్లు తొక్కింది…

పాండిత్యం పరిమళించింది…

భక్తి సంగీతం హృదయాలను పరవశింపజేసింది…

నామసంకీర్తనతో పుష్పగిరి ప్రాంగణం పులకించింది…

వందమంది ప్రాశ్నికుల మేధోమథనంతో అవధాన కళావైభవం శిఖరాగ్రాన్ని తాకింది…

జగద్గురువుల దివ్యసన్నిధిలో అక్షరాలు అర్చనలయ్యాయి…**

పుష్పగిరి జగద్గురు శంకరాచార్య మహాసంస్థానం పవిత్ర ప్రాంగణంలో మూడు రోజులపాటు జరిగిన *‘అవధాన కళా కౌముది’ శ్రీమాన్ నల్లాన్ చక్రవర్తుల సాహిత్ ప్రథమ శతావధానం* నా జీవితంలోనే కాదు, ఈ కార్యక్రమాన్ని ప్రత్యక్షంగా తిలకించిన ప్రతి సాహిత్యాభిమాని హృదయంలో చిరస్థాయిగా నిలిచిపోయే అపూర్వమైన సాహిత్య–సాంస్కృతిక–ఆధ్యాత్మిక మహోత్సవంగా రూపుదిద్దుకుంది.

పుష్పగిరి జగద్గురు శంకరాచార్య మహాసంస్థానం పీఠాధీశ్వరులు *జగద్గురు శ్రీశ్రీశ్రీ అభినవోద్దండ విద్యాశంకర భారతీ మహాస్వామివారి* దివ్యసన్నిధిలో, వారి చాతుర్మాస్య దీక్షా సందర్భంలో, వినాయక నవరాత్రోత్సవాల్లో భాగంగా ఈ మహత్తర శతావధానం జరగడం మనందరికీ లభించిన మహద్భాగ్యంగా భావిస్తున్నాను.

ఇది కేవలం ఒక శతావధాన ప్రదర్శనగా ముగియలేదు. *సాహిత్యం, పాండిత్యం, భక్తి, సంగీతం, సంస్కృతి, సంప్రదాయం, గురుభక్తి — ఇవన్నీ ఒకే వేదికపై సంగమించిన మహా సమారాధనగా* నిలిచింది.

ఈ మూడు రోజుల అక్షరయజ్ఞాన్ని మహోత్సవంగా మలిచిన *ప్రాశ్నికవరేణ్యులు, విద్వత్ కవులు, పండితులు, అవధానులు, సంగీత విద్వాంసులు, కళాకారులు, అతిథులు, నిర్వాహకులు, సేవకులు, ప్రేక్షకులు, ప్రత్యక్షంగా–పరోక్షంగా సహకరించిన ప్రతి ఒక్కరికీ ‘దర్శనం’ ఆధ్యాత్మిక వార్తా మాసపత్రిక పక్షాన, వ్యక్తిగతంగా నా పక్షాన శిరసావహించి హృదయపూర్వక కృతజ్ఞతలు తెలియజేస్తున్నాను.*

### 🌺 ప్రాశ్నికులే ఈ అక్షరయజ్ఞానికి ప్రాణప్రతిష్ఠ

మూడు రోజులపాటు ప్రాశ్నికవరేణ్యులు ఎంతో ఆసక్తితో, శ్రద్ధతో, నిబద్ధతతో పాల్గొన్నారు. తమ పాండిత్యాన్ని, సాహిత్య పరిజ్ఞానాన్ని అవధాన వేదికకు సమర్పించి శతావధాని ప్రతిభను మరింతగా వికసింపజేశారు.

సమస్యలు, దత్తపదులు, , వర్ణనలు, ఆశువులు వివిధ సాహిత్య ప్రక్రియలు — ఇలా ఒక్కో అంశంతో అవధాని మేధస్సుకు సవాల్ విసురుతూ సభికులకు సాహిత్యరసానుభూతిని అందించారు.

ఈ కార్యక్రమంలో పాల్గొన్న *ప్రతి ప్రాశ్నికుడూ ఈ విజయానికి భాగస్వామే.* వారి పాండిత్యం, సమయపాలన, సహనం, శ్రద్ధ, అవధాన కళపై చూపిన అభిమానానికి నా హృదయపూర్వక నమస్కారాలు.

ఈ కార్యక్రమానికి కొన్ని నెలల ముందునుంచే ప్రాశ్నికుల ఎంపిక, సంప్రదింపులు, సమన్వయం వంటి కీలకమైన బాధ్యతను ఎంతో సమర్థంగా నిర్వర్తించిన విదుషీమణి *శ్రీమతి ఆరవల్లి శ్రీదేవి అక్కగారి కృషి అనిర్వచనీయం.*

వందలాది ఫోన్ కాల్స్ చేసి, ఒక్కొక్క విద్వాంసునితో వ్యక్తిగతంగా మాట్లాడి, సమగ్రమైన ప్రాశ్నికుల జాబితాను రూపొందించడంలో ఆమె చూపిన అంకితభావం ప్రశంసనీయం. ఎన్నిసార్లు సంప్రదించినా ఏమాత్రం విసుగు చెందకుండా, కార్యక్రమ విజయాన్ని తన సొంత బాధ్యతగా భావించి పనిచేసిన శ్రీదేవి అక్కగారికి ప్రత్యేక కృతజ్ఞతాభివందనాలు.

### 🌺 సంచాలకత్వానికి సాహిత్య సొబగులు

తమ కుటుంబంలో కుమార్తె వివాహానికి సంబంధించిన ముఖ్యమైన కార్యక్రమాలు ఉన్నప్పటికీ, సాహిత్యం పట్ల అపారమైన వాత్సల్యంతో మూడు రోజులపాటు శతావధానానికి సంచాలకత్వం వహించేందుకు అంగీకరించిన *‘కళారత్న’ శ్రీ అముదాల మురళి గారికి* ఎంత కృతజ్ఞతలు చెప్పినా తక్కువే.

వారి పాండిత్యం, సమయస్ఫూర్తి, సందర్భోచిత వ్యాఖ్యానం, ప్రాశ్నికులు–అవధాని మధ్య సమన్వయం, సభను రక్తికట్టించిన తీరు ఈ మహోత్సవానికి ప్రత్యేక ఆకర్షణగా నిలిచాయి.

### 🌺 నామసంకీర్తనతో మంగళప్రదమైన ఆరంభం

మొదటి రోజు ఉదయం కార్యక్రమానికి భక్తిరసపూరితమైన, మంగళప్రదమైన ప్రారంభాన్ని అందించిన *బ్రహ్మశ్రీ కోడగండ్ల రాధాకృష్ణ శర్మ గారికి* నా ప్రత్యేక కృతజ్ఞతలు.

వారి అద్భుతమైన *నామసంకీర్తన*తో పుష్పగిరి పీఠ ప్రాంగణం భక్తి పరిమళంతో నిండిపోయింది. భగవన్నామ స్మరణతో మొదలైన ఆ పవిత్ర ఉదయం, ఆ తరువాత మూడు రోజులపాటు సాగిన సాహిత్య యజ్ఞానికి దివ్యమైన పూర్వరంగంగా నిలిచింది.

### 🌺 పోతన భక్తి పద్యాల సంగీత రూపకం

అదే రోజు సాయంత్రం *డాక్టర్ చంద్రపాటి శూలపాణి గారి బృందం* పోతన భాగవతంలోని భక్తిరసభరిత పద్యాలను సంగీత రూపకంగా ఆవిష్కరించి సభికులను పరవశింపజేశారు.

పోతన భక్తి సాహిత్యాన్ని సంగీతంతో మేళవించి భక్తి–సాహిత్య–సంగీత త్రివేణీ సంగమాన్ని ఆవిష్కరించిన వారి ప్రదర్శన హృదయాలను హత్తుకుంది. డాక్టర్ శూలపాణి గారికి, వారి బృందంలోని ప్రతి కళాకారుడికీ హృదయపూర్వక కృతజ్ఞతలు.

### 🌺 రెండు ఉదయాలు… భక్తి సంగీతామృత ప్రవాహం

రెండవ రోజు, మూడవ రోజు ఉదయం వేళల్లో దాదాపు గంటన్నరపాటు భక్తి సంగీత కార్యక్రమాలతో సభికులను పరవశింపజేసిన నా సోదరుడు, *విపంచీ నాదనిలయం వ్యవస్థాపకులు శ్రీ మరుమాముల శశిధర శర్మ గారు మరియు వారి కుటుంబ సభ్యులకు* నా ప్రేమపూర్వక ప్రత్యేక కృతజ్ఞతలు.

ఆ ఉదయవేళల్లో వారి గానం పుష్పగిరి ప్రాంగణాన్ని సంగీతమయం చేసింది. అవధాన సభకు ముందే శ్రోతల హృదయాల్లో భక్తిభావాన్ని నింపి, సాహిత్యాస్వాదనకు ప్రశాంతమైన వాతావరణాన్ని కల్పించారు.

అలాగే భక్తి సంగీత విభావరితో చక్కని కచేరీని అందించి సభికులను అలరించిన *శ్రీమతి ఎర్రమిల్లి రమాప్రభ గారు మరియు వారి బృందానికి* హృదయపూర్వక ధన్యవాదాలు.

## 🌺 రాధాష్టమి పర్వదినాన ‘రాసేశ్వరి’ గ్రంథావిష్కరణ — మరో చిరస్మరణీయ సాహిత్య ఘట్టం

ఈ మూడు రోజుల మహోత్సవంలో రెండవ రోజు మరో విశిష్టమైన సాహిత్య ఘట్టానికి వేదికైంది. ఆ రోజు పవిత్రమైన *రాధాష్టమి పర్వదినం* కావడం మరింత విశేషం.

ప్రముఖ రచయిత్రి, ప్రవచనకర్త *డాక్టర్ ఎన్. అనంతలక్ష్మి గారు* రచించిన *‘రాసేశ్వరి’* గ్రంథాన్ని జగద్గురు *శ్రీశ్రీశ్రీ అభినవోద్దండ విద్యాశంకర భారతీ మహాస్వామివారి కరకమలాలతో* ఆవిష్కరించుకోవడం ఎంతో ఆనందాన్ని, ధన్యతను కలిగించింది.

‘రాసేశ్వరి’లోని వ్యాసాలు గతంలో *‘దర్శనమ్’ ఆధ్యాత్మిక వార్తా మాసపత్రికలో ధారావాహికంగా ప్రచురితమయ్యాయి.* పాఠకుల ఆదరణ పొందిన ఆ వ్యాస సంపుటిని ఒక సమగ్ర గ్రంథరూపంలో తీసుకురావాలనే సంకల్పంతో ‘దర్శనం’ ఈ పుస్తకాన్ని ప్రత్యేకంగా ప్రచురించింది.

ఆ వ్యాసాలు ధారావాహిక నుంచి గ్రంథరూపం దాల్చి, అదే రాధాష్టమి పర్వదినాన జగద్గురువుల పవిత్ర హస్తాల మీదుగా ఆవిష్కృతం కావడం నాకు ఒక సంపాదకుడిగా, ప్రచురణకర్తగా అపారమైన సంతృప్తిని ఇచ్చింది.

అదే వేదికపై *డాక్టర్ ఎన్. అనంతలక్ష్మి గారు రామాయణ ఇతివృత్తంపై రచించిన మరో గ్రంథాన్ని కూడా జగద్గురువుల కరకమలాలతో ఆవిష్కరించుకోవడం* కార్యక్రమానికి మరింత సాహిత్య శోభను చేకూర్చింది.

గ్రంథావిష్కరణతో కార్యక్రమం ముగియలేదు. అనంతరం ప్రముఖ అవధాన విద్వాంసులు ఆ రెండు గ్రంథాల సాహిత్య విశిష్టతను సభికులకు పరిచయం చేశారు.

*గురుసహస్రావధాని బ్రహ్మశ్రీ కడిమెళ్ల వరప్రసాద్ గారు, ‘కళారత్న’ శ్రీ అముదాల మురళి గారు, శతావధాని శ్రీ పాలపర్తి శ్యామలానంద ప్రసాద్ గారు* తదితర విద్వాంసులు ఈ గ్రంథాలను సమీక్షిస్తూ, డాక్టర్ ఎన్. అనంతలక్ష్మి గారి సాహిత్య కృషిని, రచనా వైశిష్ట్యాన్ని, ఆధ్యాత్మిక అధ్యయనాన్ని విశదీకరించారు.

‘రాసేశ్వరి’లోని భక్తి, తాత్త్వికత, సాహిత్య సౌందర్యం గురించి, అలాగే అనంత లక్ష్మి గారి మరో రచన శ్రీమద్రామాయణ ఉపాఖ్యానాలు, సార్వకాలికత  గ్రంథంలోని విశేషాల గురించి వారు చేసిన సమీక్షలు సభికుల్లో ఆసక్తిని రేకెత్తించాయి.

*ఒకవైపు శతావధాన పద్యధార… మరోవైపు గ్రంథావిష్కరణ… ఇంకోవైపు సాహిత్య సమీక్ష — రాధాష్టమి పర్వదినాన పుష్పగిరి పీఠ ప్రాంగణం నిజమైన సాహిత్య సరస్వతీ నిలయంగా మారింది.*

జగద్గురువుల సన్నిధిలో రచయిత్రికి లభించిన ఈ అపూర్వ గౌరవం, ‘దర్శనమ్’ ద్వారా ధారావాహికగా వెలుగులోకి వచ్చిన రచన గ్రంథరూపం దాల్చి అదే వేదికపై ఆవిష్కృతం కావడం ఈ మూడు రోజుల మహోత్సవంలో నాకు మరపురాని మధురానుభూతిగా నిలిచింది.

### 🌺 మాజీ కేంద్ర మంత్రి శ్రీ అశ్విని కుమార్ చౌబే గారి ఆత్మీయ సాన్నిధ్యం

మొదటి రోజు స్వాగత సభకు విచ్చేసిన *మాజీ కేంద్ర మంత్రి శ్రీ అశ్విని కుమార్ చౌబే గారు* కార్యక్రమానికి ప్రత్యేక శోభను చేకూర్చారు.

వారు కేవలం అతిథిగా వేదికపై ఆసీనులు కావడమే కాకుండా, ఉదయం జరిగిన నామసంకీర్తనలో ఎంతో సహజంగా, భక్తిశ్రద్ధలతో పాల్గొనడం అందరినీ ఆనందింపజేసింది.

అవధాన సంప్రదాయం విశిష్టతను ఆసక్తిగా తెలుసుకొని, ఇటువంటి భారతీయ సాహిత్య–సాంస్కృతిక కార్యక్రమాలను ప్రోత్సహించాల్సిన అవసరాన్ని వ్యక్తం చేయడం మాకు మరింత ఉత్సాహాన్ని ఇచ్చింది.

### 🌺 విద్వత్ సాన్నిధ్యంతో పెరిగిన సభా గాంభీర్యం

ఈ కార్యక్రమానికి *మహామహోపాధ్యాయ బ్రహ్మశ్రీ డా.  దోర్బల ప్రభాకరశర్మ గారు,బ్రహ్మశ్రీ డాక్టర్ శలాక రఘునాథ శర్మ గారు, **శ్రీ మల్లాప్రగడ శ్రీమన్నారాయణమూర్తి గారు* తదితర అనేక మంది మహనీయులు, విద్వాంసులు, కవులు, పండితులు విచ్చేసి తమ సాన్నిధ్యంతో సభకు మరింత గౌరవాన్ని చేకూర్చారు.

ఇలాంటి పాండిత్యమూర్తులు యువ అవధానిని ప్రోత్సహిస్తూ వేదికపై ఆశీర్వదించడం భావితరాలకు గొప్ప స్ఫూర్తి.

### 🌺 అవధాన దిగ్గజాల ఆశీస్సులు

*సహస్రావధాని శ్రీ కడిమెళ్ల వరప్రసాద్ గారు, శతావధాని శ్రీ పాలపర్తి శ్యామలానంద ప్రసాద్ గారు, అష్టావధానులు శ్రీయుతులు ముత్యంపేట గౌరీశంకర శర్మ, ముదిగొండ అమరనాథ శర్మ, బోరెల్లి శ్రీహర్ష,ఎర్రంశెట్టి ఉమామహేశ్వర రావు ప్రభృతులు * ఈ సాహిత్య యజ్ఞానికి విచ్చేసి తమ ఆశీస్సులతో యువ శతావధానిని ప్రోత్సహించడం విశేషం.

ఎన్నో పనులు ఉన్నప్పటికీ చివరి రోజు ప్రత్యేకంగా విచ్చేసి విజయోత్సవ సభ నిర్వహణలో కీలక పాత్ర పోషించిన *అవధాన తిలక శ్రీ ఉప్పలధడియం భరత్ శర్మ గారికి* ప్రత్యేక కృతజ్ఞతలు.

అలాగే మా హితవరి *డాక్టర్ జి.ఎం. రామశర్మ గారు, పి.టి.జి.వి. రంగాచార్యులు గారు, డాక్టర్ ఎన్. అనంతలక్ష్మి గారు* తదితర అనేక మంది విద్వాంసులు, పెద్దలు, సాహిత్యాభిమానులు ఈ కార్యక్రమంలో పాల్గొని ఆశీస్సులు అందించారు.

## 🌺 విజయోత్సవ సభలో అపూర్వ ఘట్టం — మహాసహస్రావధాని డాక్టర్ గరికపాటి నరసింహారావు గారి వాత్సల్యాభినందనం

ఈ మూడు రోజుల మహోత్సవంలో అత్యంత హృదయస్పర్శిగా, సభికులందరినీ పరవశింపజేసిన ఘట్టాలలో ఒకటి — *మహాసహస్రావధాని, పద్మశ్రీ పురస్కృతులు బ్రహ్మశ్రీ డాక్టర్ గరికపాటి నరసింహారావు గారి ఆగమనం.*

ఎన్నో కార్యక్రమాలతో బిజీగా ఉన్నప్పటికీ విజయోత్సవ సభకు ముఖ్య అతిథిగా విచ్చేసి, శతావధానంలోని అత్యంత కీలకమైన *ధారణా ఘట్టాన్ని స్వయంగా తిలకించడం* మాకు ఎంతో ఆనందాన్ని కలిగించింది.

సాహిత్ గారి అసాధారణ ధారణాశక్తిని, పద్యప్రతిభను ప్రత్యక్షంగా చూసిన డాక్టర్ గరికపాటి నరసింహారావు గారు పరవశించిపోయారు.

ఆ క్షణంలో ఆయన ఒక ప్రముఖ అతిథిగా కాకుండా — *ఒక మహాసహస్రావధాని యువ ప్రతిభను చూసి పొంగిపోయిన వాత్సల్యమూర్తిగా* కనిపించారు.

శ్రీమాన్ నల్లాన్ చక్రవర్తుల సాహిత్ గారిని ప్రేమగా ఆలింగనం చేసుకొని, ఆప్యాయంగా ముద్దాడి తన ప్రేమాభిమానాలను వ్యక్తం చేసిన దృశ్యం సభికులందరినీ కదిలించింది.

అంతటితో ఆగకుండా, తన చేతికి ఉన్న *ఉంగరాన్ని స్వయంగా తీసి సాహిత్ గారి వేలికి తొడిగి ఆశీర్వదించడం* విజయోత్సవ సభలో చిరస్మరణీయమైన అపూర్వ ఘట్టంగా నిలిచిపోయింది.

ఆ కానుకలోని విలువ కేవలం ఒక ఉంగరం విలువ కాదు.

**అది ఒక మహాసహస్రావధాని నుంచి యువ శతావధానికి అందిన ప్రేమముద్ర…

ఒక తరం నుంచి మరో తరానికి అందిన అవధాన ఆశీర్వాదం…

ఒక మహావిద్వాంసుడు యువ ప్రతిభకు అందించిన ఆత్మీయ ప్రశంస…**

ఆ దృశ్యాన్ని ప్రత్యక్షంగా చూసిన ప్రతి ఒక్కరి హృదయంలో అది చిరకాలం నిలిచే మధుర జ్ఞాపకం.

## 🌺 జగద్గురువుల సమక్షంలో నేత్రపర్వంగా శతావధాని మహాసన్మానం

విజయోత్సవ సభలో మరో వైభవోపేతమైన ఘట్టం — *జగద్గురు శ్రీశ్రీశ్రీ అభినవోద్దండ విద్యాశంకర భారతీ మహాస్వామివారి దివ్యసన్నిధిలో శ్రీమాన్ నల్లాన్ చక్రవర్తుల సాహిత్ గారికి నిర్వహించిన విశిష్ట సన్మానం.*

‘దర్శనమ్’ ఆధ్యాత్మిక వార్తా మాసపత్రిక ఆధ్వర్యంలో శతావధానిని అత్యంత ఘనంగా సత్కరించడం కన్నులపండువగా జరిగింది.

**పట్టు వస్త్రాలు…

దుశ్శాలువా…

సంప్రదాయ తలపాగా…

గజమాల…

నగదు ప్రోత్సాహకం…

ప్రత్యేక అభినందన పత్రం…**

వీటితో శతావధానిని సత్కరించి, ప్రత్యేకంగా *“శతావధాన కళాధర”* బిరుదుతో అభినందించడం ఈ సాహిత్య మహోత్సవానికి సార్థకతను చేకూర్చింది.

జగద్గురువుల ఆశీస్సుల మధ్య యువ శతావధాని ఆ సత్కారాన్ని స్వీకరిస్తున్న దృశ్యం సభికులందరికీ ఒక *నేత్రపర్వంగా* నిలిచింది.

ఈ విశిష్ట ఘట్టంలో జగద్గురువుల సమక్షంలో *డాక్టర్ గరికపాటి నరసింహారావు గారు, డాక్టర్ కె.వి. రమణాచారి గారు, శ్రీ ఎల్.వి. సుబ్రహ్మణ్యం గారు, శ్రీ మల్లాప్రగడ శ్రీమన్నారాయణమూర్తి గారు, డాక్టర్ కె. అరవిందరావు గారు, శ్రీ తనికెళ్ల భరణి గారు, శ్రీ వనం జ్వాలా నరసింహారావు గారు, సహస్రావధాని శ్రీ కడిమెళ్ల వరప్రసాద్ గారు, శతావధాని శ్రీ పాలపర్తి శ్యామలానంద ప్రసాద్ గారు, శ్రీ మరుమాముల దత్తాత్రేయ శర్మ గారు, శ్రీ ఐతగోని వెంకటేశ్వర్లు గారు* తదితర ప్రముఖులు పాల్గొనడం విజయోత్సవ సభకు మరింత గాంభీర్యాన్ని తీసుకొచ్చింది.

### 🌺 ధారణా సభ — మంత్రముగ్ధులను చేసిన మేధో వైభవం

మూడు రోజుల శతావధానంలో శిఖరాయమానమైన ఘట్టం *ధారణా సభ*.

శ్రీమాన్ నల్లాన్ చక్రవర్తుల సాహిత్ గారి అసాధారణ ధారణాశక్తి, ఆశుకవిత్వ సామర్థ్యం, పద్య నిర్మాణ చాతుర్యం, సాహిత్య స్ఫూర్తి, సందర్భోచిత సమాధానాలు, గంభీరమైన పద్యాలాపన సభికులను మంత్రముగ్ధులను చేశాయి.

మూడు రోజులపాటు వందమంది ప్రాశ్నికులు సంధించిన అంశాలను మేధస్సులో పదిలపరచుకొని, వాటిని క్రమపద్ధతిలో స్మరించి పునరుద్ఘాటించిన తీరు యువ అవధాని అసాధారణ ప్రతిభకు నిదర్శనం.

### 🌺 జగద్గురువుల మూడు గంటల సాన్నిధ్యం — మహోత్సవానికి పరిపూర్ణత

విజయోత్సవ సభలో పుష్పగిరి జగద్గురువులు దాదాపు మూడు గంటలపాటు ఆసీనులై కార్యక్రమాన్ని ఆసాంతం తిలకించడం మనందరికీ లభించిన గొప్ప ఆశీర్వాదం.

సభ ముగింపులో స్వామివారు చేసిన అనుగ్రహభాషణం అవధాన విద్యా వైశిష్ట్యాన్ని, సాహిత్య సంప్రదాయ పరిరక్షణ అవసరాన్ని మరింతగా చాటిచెప్పింది.

జగద్గురువుల సమక్షం, పండితుల సాన్నిధ్యం, అవధాన దిగ్గజాల ఆశీస్సులు, యువ శతావధాని ప్రతిభ — అన్నీ కలిసిన ఆ విజయోత్సవ సభ నిజంగా *కన్నులపండువగా, నేత్రపర్వంగా, చిరస్మరణీయంగా* సాగింది.

### 🌺 ‘అవధాన కులపతి’ — నాకు వ్యక్తిగతంగా అత్యంత ఆనందాన్నిచ్చిన ఘట్టం

ఈ మొత్తం కార్యక్రమంలో నాకు వ్యక్తిగతంగా అత్యంత ఆనందాన్ని కలిగించిన మరో అపూర్వ ఘట్టం — నా అన్నయ్య *శ్రీ మరుమాముల దత్తాత్రేయ శర్మ గారు, *అవధాన విద్యా వికాస పరిషత్*ను స్థాపించి చిన్నారులు, యువతలో అవధాన విద్యను పెంపొందించడానికి చేస్తున్న విశేష కృషిని గుర్తించి పుష్పగిరి జగద్గురువులు వారికి *“అవధాన కులపతి”** బిరుదును అనుగ్రహించి సత్కరించడం.

ఇది ఒక వ్యక్తికి దక్కిన సత్కారం మాత్రమే కాదు.

*అవధాన విద్యను భావితరాలకు అందించాలనే సంకల్పానికి జగద్గురువులు అందించిన ఆశీర్వాద ముద్ర*గా నేను భావిస్తున్నాను.

### 🌺 మూడు రోజులు… ఒక సాహిత్య మహాక్రతువు

ఈ మూడు రోజుల అనుభూతిని ఒక్క మాటలో చెప్పడం సాధ్యం కాదు.

**ఇది కేవలం ఒక శతావధానం కాదు — ఒక సాహిత్య యజ్ఞం.

ఇది కేవలం ఒక సభ కాదు — ఒక అక్షర సమారాధన.

ఇది కేవలం ఒక కళాప్రదర్శన కాదు — మన తెలుగు మేధోసంపదకు జీవంతమైన ప్రతిబింబం.

ఇది కేవలం మూడు రోజుల కార్యక్రమం కాదు — జీవితాంతం గుర్తుండిపోయే మధురానుభూతి.**

వినాయక నవరాత్రోత్సవాల సందర్భంగా విఘ్నేశ్వరుని పాదపద్మాలకు సమర్పించిన *“అక్షర నీరాజనం — అవధాన అర్చన”*గా ఈ మహోత్సవం నిలిచిపోయింది.

నా విజ్ఞప్తిని మన్నించి ప్రాశ్నికులు, విద్వాంసులు, అతిథులు సంప్రదాయ వస్త్రధారణతో విచ్చేయడం వల్ల పుష్పగిరి పీఠ ప్రాంగణమంతా భారతీయ సంస్కృతి సౌరభంతో కళకళలాడింది.

**ఒకవైపు నామసంకీర్తన…

మరోవైపు భక్తి సంగీతం…

మధ్యలో పద్య ప్రవాహం…

గ్రంథావిష్కరణల సాహిత్య వైభవం…

విద్వాంసుల మేధోమథనం…

జగద్గురువుల దివ్యసాన్నిధ్యం…**

ఇవన్నీ కలసి పుష్పగిరి ప్రాంగణాన్ని *భారతీయ సనాతన సంస్కృతికి సజీవ ప్రతిరూపంగా* మార్చాయి.

### 🌺 ‘దర్శనమ్’ 22వ వార్షికోత్సవానికి చిరస్మరణీయ సాహిత్య సమర్పణ

*దర్శనమ్ ఆధ్యాత్మిక వార్తా మాసపత్రిక 22వ వార్షికోత్సవ సందర్భంగా* నిర్వహించిన ఈ మహత్తర సాహిత్య సమార్చన నాకు అపారమైన ఆనందాన్ని, ఆత్మసంతృప్తిని కలిగించింది.

గతంలో *సువర్ణ భారతి  సందర్భంగా శ్రీ గన్నవరం లలితాదిత్య గారి శతావధానాన్ని శృంగేరిలో ఉభయ జగద్గురువుల దివ్యసన్నిధిలో నిర్వహించినప్పుడు* నాకు కలిగిన ఆనందం…

*వజ్రోత్సవ భారతి సందర్భంగా కాశీలోని శంకరమఠంలో శ్రీ వద్దిపర్తి పద్మాకర్ గారి శతావధానాన్ని నిర్వహించినప్పుడు* కలిగిన ధన్యత…

ఇప్పుడు పుష్పగిరి జగద్గురు మహాసంస్థానంలో *శ్రీమాన్ నల్లాన్ చక్రవర్తుల సాహిత్ గారి ప్రథమ శతావధానాన్ని* ఇంతటి వైభవంగా నిర్వహించినప్పుడు కూడా అదే స్థాయిలో ఆనందం, తృప్తి, ధన్యత కలిగాయి.

*నల్లాన్ చక్రవర్తుల సాహిత్ ప్రథమ శతావధానం పుష్పగిరి జగద్గురు మహాసంస్థానం చరిత్రలో ఒక అపూర్వ సాహిత్య ఘట్టంగా, తెలుగు అవధాన ప్రపంచంలో ఒక మధుర జ్ఞాపకంగా నిలిచిపోతుందని నా ప్రగాఢ విశ్వాసం.*

### 🌺 తెరవెనుక ఉన్న ప్రతి చేయికీ నమస్సుమాంజలి

ఇంతటి మహాకార్యక్రమం విజయవంతం కావడం ఒక్కరి వల్ల సాధ్యం కాదు.

ప్రాశ్నికులను సంప్రదించిన వారు…

అతిథులను ఆహ్వానించిన వారు…

వేదిక ఏర్పాట్లు చేసిన వారు…

వసతి, భోజనం, రవాణా చూసిన వారు…

ప్రచార బాధ్యతలు నిర్వహించిన వారు…

ఫొటోలు, వీడియోలు తీసిన వారు…

సాంకేతిక సహకారం అందించిన వారు…

వాలంటీర్లుగా సేవలందించిన వారు…

సభలకు హాజరై కళాకారులను, అవధానిని ప్రోత్సహించిన వారు…

**ప్రతి ఒక్కరి చేయి ఈ విజయానికి ఆధారం.

ప్రతి ఒక్కరి ఆశీస్సు ఈ విజయానికి బలం.

ప్రతి ఒక్కరి ప్రేమ ఈ కార్యక్రమానికి ప్రాణం.**

ఎవరి పేరైనా ఈ కృతజ్ఞతా సందేశంలో అనుకోకుండా ప్రస్తావించలేకపోయి ఉంటే సహృదయంతో మన్నించగలరు.

పుష్పగిరి జగద్గురు శంకరాచార్య మహా సంస్థానం ఆస్థాన పండితులు శ్రీయుతులు ముత్యంపేట గౌరీశంకర శర్మ గారు, ముదిగొండ అమరనాథ శర్మ గారు, మేడూరి సూర్యనారాయణ శర్మ గారు, పీఠం ధర్మాధికారి శ్రీ రాయదుర్గం పవన్ గార్ల సహకారం ఇనలేనిది. శతావధానం  విజయానికి 

**నా కలంలో ఒక పేరు మిస్సయి ఉండవచ్చు…

కానీ నా హృదయంలో ఎవరి సేవా మిస్సవలేదు.**

ఈ మహోత్సవానికి ప్రత్యక్షంగా, పరోక్షంగా సహకరించిన ప్రతి ఒక్కరికీ నా హృదయంలో ప్రత్యేకమైన స్థానం ఉంది.

భవిష్యత్తులోనూ *తెలుగు భాష, సాహిత్యం, అవధాన విద్య, భారతీయ సంస్కృతి, సనాతన ధర్మ పరిరక్షణ–ప్రచారం* కోసం ఇలాంటి మరెన్నో మహత్తర కార్యక్రమాలను నిర్వహించే శక్తిని జగద్గురువులు ప్రసాదించాలని ప్రార్థిస్తున్నాను.

మీ అందరి ఆశీస్సులు, ప్రోత్సాహం, సహకారం ఎల్లవేళలా మాకు ఉండాలని మనసారా కోరుకుంటున్నాను.

🙏 *ఈ మూడు రోజుల సాహిత్య–సంగీత–ఆధ్యాత్మిక అక్షరయజ్ఞాన్ని అపూర్వ విజయంగా మలిచిన ప్రతి ఒక్కరికీ మరోమారు శిరసావహించి నమస్కరిస్తూ… హృదయపూర్వక కృతజ్ఞతాభివందనాలు.* 🙏

**సాహిత్యమే మన సంస్కృతికి శ్వాస…

అవధానమే మన మేధోసంపదకు ప్రతీక…

ఆ మహోన్నత సంప్రదాయాన్ని భావితరాలకు అందించడం మనందరి బాధ్యత.**

*— మరుమాముల వెంకటరమణ శర్మ*

*సంపాదకులు*

*దర్శనం ఆధ్యాత్మిక వార్తా మాసపత్రిక*

జైహింద్.

Print this post