751 - 760 లలిత

 జైశ్రీరామ్.

751. ఓం మహాకాల్యై నమః.

నామ వివరణ.

రుద్రుని  శక్తి స్వరూపిణి అయిన గొప్పదయిన కాళీమాత మన లలితాంబయే.

కం.  కాలము నీవమ్మ! *మహా

కాలీ*! బ్రహ్మమును నీవె, కరుణామయి! న

న్నేలెడి తల్లివి నీవే,

యేల కనన్రావు, శాంభవీ! కృపఁ గనుమా.

ఉ.  నా మది స్వార్థ లోభము లనల్పములౌ మధు కైటభుల్, కృపన్

క్షేమము గొల్ప నాకు నణగింపుము వీటిని రుద్రశక్తి! ని

న్నే మది నిల్పి యుంతు, మహనీయ గుణావళి! కాళి! భూమిపై

ధీమహితాత్ములందరికి దిక్కయి నిల్చెడి నిన్నె కొల్చెదన్.

752. ఓం మహాగ్రాసాయై నమః. 

నామ వివరణ.

జీవకోటికి గొప్ప ఆహార స్వరూపము మన తల్లియే.

కం.  గ్రాసము మూలము ప్రాణికి

నీ సంకల్పముననె గణనీయమ్ముగ నీ

గ్రాసము లభియించు *మహా

గ్రాసా*! జీవులకు నీవె ప్రాపువు భువిపై. 

753. ఓం మహాశనాయై నమః.

నామ వివరణ.

విశ్వానికి ప్రతీక అయిన వైశ్వానరునకు ఈ సృష్టియే ఆహారము. ఆ మహాశనము మన అమ్మయే.

తే.గీ.  సృష్టినన్నియునశనమై చెందు నీకు,

సృష్టి నడుపగ నశనంబు నిష్టముగ, ఘ

నముగఁ గూర్చుదీవె. *మహాశనా*! భవాని!

నిన్ను మనసార పూజింతు నన్ను గనుము.

754. ఓం అపర్ణాయై నమః.

నామ వివరణ.

హైమవతిగా శివునికై కఠోర తపస్సు చేయుచున్నప్పుడు కనీసము పర్ణములనైనను ఆహారముగా 

స్వీకరించక అపర్ణగా ప్రసిద్ధిపొందిన జగన్మాత మన అమ్మయే.

కం.  దీక్షన్ గొని నినుఁ జూచుచు

మోక్షము వడయంగ నాకు పూర్తిగ శక్తిన్

దక్షతతోఁ గల్పించుచు

రక్షింపు *మపర్ణ*! నీవె రక్షణ నాకున్. 

755. ఓం చండికాయై నమః.

నామ వివరణ.

భయంకరమయిన కోపముతో దుష్టులయెడ ఉండు తల్లి మన అమ్మ.

కం.  ఖండించుము దుర్జనులను,

పండిత పామరుల మంచివారి గృహములన్

బండించుము శుభ సంహతి

మెండుగఁ, *జండిక*! సతంబు మేలు నొసఁగుమా. 

756. ఓం చండముండాసుర నిషూదిన్యై నమః.

నామ వివరణ.

చండముండాసురాది రాక్షససంహారము చేసిన చండీ మన లలితామాత.

ఆ.వె.  పూజ్య పాద! *చండ ముండాసుర నిషూది

నీ*! నమస్కరింతు, నిరుపమముగ

మంచివారినెల్ల మన్నించి కాఁపాడు 

కనకదుర్గ! నన్నుఁ గకరుణఁ గనుమ. 

757. ఓం క్షరాక్షరాత్మికాయై నమః.

నామ వివరణ.

క్షర మగు సృష్టికీ, అక్షరస్వరూపమగు వర్ణములకు ఆత్మస్వరూపముగా ఉన్న తల్లి మన అమ్మ.

పంచచామరము.

క్షరాళి నక్షరాళి నీవె కల్గి యాత్మవై తగన్ 

నిరంతరంబు వెల్గుచుండు నిర్మలస్వరూపమా!

నిరంతరాయ భక్తి నిమ్ము నీకు సేవ చేయగన్,

*క్షరాక్షరాత్మికా*! సతీ! యశాంతి బాపుమా! నతుల్.

758. ఓం సర్వలోకేశ్యై నమః.

నామ వివరణ.

అన్ని లోకములకును ప్రభ్వి మన జగదంబ.

కం.  ధ్యానింతు *సర్వలోకే

శీ*!. నిను నా మదిని నిలిపి, శీఘ్రమె నాకున్

జ్ఞానమును గొలుపుమా నినుఁ

గానఁగ నగు నపుడె, నిజము, కారుణ్య నిధీ!

759. ఓం విశ్వధారిణ్యై నమః.

నామ వివరణ.

సృష్టి మొత్తమును ధరించిన తల్లి లలితా మాత.

కం.  ఈ విశ్వము లయమగునపు

డీవే నీ లోన దాచు చీవే మఱలన్

భావించి సృష్టి చేసెద

వీవేకద, *విశ్వ ధారిణీ*! మూలమిటన్. 

760. ఓం త్రివర్గ దాత్ర్యై నమః.

నామ వివరణ.

ధర్మార్థకామములను త్రివర్గములను యిచ్చు తల్లి మన అమ్మ.

కం.  అక్షయ శుభదా! గౌరీ!

దక్షుడనయి ధరణిపైన ధర్మార్థములన్ 

రక్షించు గుణము నొసఁగుము

దాక్షిణ్యముతోఁ *ద్రివర్గ దాత్రీ*! నాకున్. 

జైహింద్.

చమత్కార ప్రార్థన. మామకు మామయైన పరమాత్ముఁడు మాకు బ్రసన్నుఁడయ్యెడున్. సమర్పణ శ్రీ వైద్యంవారు.

జైశ్రీరామ్. 

చమత్కార ప్రార్థన.

ఉ. మామను సంహరించి, యొకమామకు గర్వమడంచి, యన్ని శా

మామను రాజుజేసి, యొకమామతనూజునకాత్మబంధువై

మామకుగన్నులిచ్చి, సుతుమన్మథుపత్నికి దానె మామయై

మామకు మామయైన పరమాత్ముడు మాకు బ్రసన్ను డయ్యెడున్.

ఇందులో 8 మంది మామలున్నారు.

 1. కంసుడనే మామను చంపి,

2.సముద్రుడనే మామకు గర్వమణచి(రామావతారంలో)

3. చందమామను రాత్రికి రాజును చేసి (నానార్థాలలో రాజు అంటే చంద్రుడు అని ఒక అర్థం)

4. ఒకమామకొడుక్కు(అర్జునునికి) ఆత్మబంధవై,

5. ఒకమామకు కన్నులిచ్చి(రాయబారంలో ధృతరాష్ట్రునికి)

6. రతీదేవికి తానే మామయై,

7. సముద్రుడు విష్ణువుకు మామ,

8.ఈయనకు గంగను ఇచ్చినందున మామకు మామయైనాడు,

అటువంటి విష్ణువు ప్రసన్నుడై మాకు అనుగ్రహం కలిగించుగాక.

జైహింద్.

మా అమ్మగారు 90 ఏళ్ళవయసులో పాడిన పాటలు.

 

జైశ్రీరామ్.

పూజ్యులైన మా అమ్మగారు చింతా వేంకటరత్నమాంబ.

మా అమ్మగారు సంగీత విద్వాంసురాలు. వందలపాటలు చక్కగా పాడేవారు. మాపిన్నిలు ముగ్గురు మా పెద్దమ్మగారు, మా అమ్మగారు కలిసి పాడుతుంటే ఎంత ఆహ్లాదకరంగానో శ్రోత్రపేయంగానో ఉండేవి. ఇది మా చిన్ననాటి అనుభవం. ప్రస్తుతం మా ఆఖరి రాజ్యం పిన్నిగారు మాత్రమే మాకు వారి పాటలతో ఆనందంకలిగిస్తుంటారు. ఐదేళ్ళక్రితం రికార్డుచేసిన రెండు పాటలే నాదగ్గర మా అమ్మగారి జ్ఞాపకంగా మిగిలి యున్నాయి. మా అమ్మగారు పాడే పాటలను మా మేనకోడలు చి.ల.సౌ.లక్ష్మి(పాప)రత్నమాలగా గ్రంథస్థం చేసి ముద్రించి అందరికీ అందజేయుట సంతోషించ తగ్గ విషయము. మూడేళ్ళక్రితం స్వర్గస్థులైన మా అమ్మగారికి భక్తితో అంజలిఘటిస్తున్నాను.

జైహింద్.

741 నుండి 750 లలిత...

 జైశ్రీరామ్.

741. ఓం రంభాదివందితాయై నమః.

నామ వివరణ.

రంభా మున్నగు అప్సరాంగనలచే నమస్కరించఁబడు తల్లి మన అమ్మ.

కం.  కరుణను వనితలఁ గనుమా,

శరణమొసఁగి గురుతరముగ, స్వయముగ నీవే 

నిరతము నిరుపమ రక్షణ

ధరణికి *రంభాదివందితా*! మరువకుమా.

742. ఓం భవ దావ సుధావృష్ట్యై నమః. 

నామ వివరణ.

సంసారమనెడి దవానలమునార్పు అమృతవృష్టి మన అమ్మయే.

కం.  *భవ దావ సుధా వృష్టీ*!

భవదావానలము చేత భయపడుచుంటిన్,

నవనీత హృదయ వీవే

భువి నను గాపాడి ముక్తిఁ బొందగనిమ్మా.,

కం.  అసలగు జ్ఞాన జ్యోతిగ

వసుధంగల జనులలోన వరలుదువీవే,

కొసరుచు కోరుదు *భవదా

వ సుధావృష్టీ*! విముక్తి, వారిజ నయనా!

743. ఓం పాపారణ్య దవానలాయై నమః.

నామ వివరణ.

పాపములు అనే కీకారణ్యములను కాల్చి బూడిద చేయు దావానలము మన అమ్మయే.

శా.  నా పాపంబులనంత మెన్న జననీ! నా భాగ్య మీపాటిదే,

నీ పాదాబ్జములెన్న నేరమిని నే నిత్యంబు దుర్వర్తినై

పాపారణ్యమునందు జిక్కితిని నా పాపంబులన్ గాల్చు మో

*పాపారణ్య దవానలా*! శరణ మీ పాపాత్ము రక్షింపుమా.

744. ఓం దౌర్భాగ్య తూల వాతూలాయై నమః

నామ వివరణ.

దౌర్భాగ్యమనెడి గడ్డిని దూరముగా ఎగురఁగొట్టివేయు వాయువు మన అమ్మ.

కం.  క్షితి నాదౌర్భాగ్యమ్ముల

నతులితగతి తూలఁజేయుమమ్మా! నినునే

మతినిల్పి గొల్తు, *దౌర్భా

గ్యతూలవాతూల*! నన్నుఁ గావుము తల్లీ!

745. ఓం జరాధ్వాంత రవిప్రభాయై నమః.

నామ వివరణ.

ముసలితనము అనెడి చీకటిని నశింపఁ జేయుసూర్యప్రభ మన అమ్మ.

ఉ.  సాంతము నీవె నాకనుచు, సత్యము నీవె యటంచు నా మదిన్,

కాంతును నిన్ను నేను మమకారము నీ పయిఁ గల్గితిన్, జరా

ధ్వాంతము నా మదిన్ మరుపు వర్ధిలఁ జేయుచు నుండె, నో *జరా

ధ్వాంత రవి ప్రభా*! కనుము, వాపి జరన్ నినుఁ గొల్వఁ జేయుమా.

746. ఓం భాగ్యాబ్ధిచంద్రికాయై నమః.

నామ వివరణ.

భాగ్యము అనెడి సముద్రమునకు  వెన్నెల మన అమ్మ.

ఆ.వె.  వరలుచుండ నీవు *భాగ్యాబ్ధి చంద్రికా*!

నేను సాగరమునె, నిత్య శుభము

లందుచుందునమ్మ, సుందరమ్ముగ నీవు

చలువనిచ్చి కావు చక్కగాను.

747. ఓం భక్త చిత్త కేకిఘనాఘనాయై నమః.

నామ వివరణ.

భక్తుల మనసులనెడి నెమళ్ళకు సంతోషము కలిగించెడి చక్కని మేఘము మన్ అమ్మ.

ఆ.వె. చిత్స్వరూప! *భక్త చిత్త కేకి ఘనాఘ

నా*! మదిన్ దలంతు నాదు జనని!

నా మనసను కేకి నర్తించు నినుఁ జూచి,

మేఘము వలె నీవు మేలు కొలుప. 

748. ఓం రోగపర్వత దంభోళ్యై నమః.

నామ వివరణ.

రోగములు అనెడి పర్వతములను నాశనము చేయు వజ్రాయుధము మన అమ్మ.

తే.గీ.  *రోగ పర్వత దంభోళి*! ప్రోవుము నను,

వేగఁ జాలను దుర్యోగ రోగములకు,

సాగఁ జేయుము దుర్యోగ రోగ రహిత

జీవనము నాకు, వర్ధిల్ల జేయుము నను.

749. ఓం మృత్యుదారు కుఠారికాయై నమః.

నామ వివరణ.

మృత్యువు అనెడి కర్రను నరికివేయు గొడ్డలివంటిది మన అమ్మ.

మత్తకోకిల.

మేలుగా నమృతత్వమిచ్చెడి *మృత్యుదారు కుఠారికా*!

కాలగర్భమునందుఁ గల్పక కాపు కాచుచు నిత్యమున్

హేలగా నప మృత్యుహీనుగ నీశ్వరీ యొనరింతువే,

జాలితో ననుఁ గాచు తల్లివి, సన్నుతింతు నినున్ సదా! 

750. ఓం మహేశ్వర్యై నమః.

నామ వివరణ.

అమ్మ గొప్పదయిన సకలమునకు బ్రహ్మ పదార్థముగా ఉన్న ఈశ్వరి.

ఉ.  ఈ జగతిన్ సృజించితె? *మహేశ్వరి*! నీ కరుణా కటాక్షమే

బీజము వేయు సద్గతికి, వేల్పుగ నిన్ మది నిల్పి నిత్యమున్

బూజలు చేయఁ జేయు నిను, పుణ్య ఫలంబుగ పొందనౌనుగా,

రాజిత నేత్రయుగ్మ! కన రమ్ము, నినున్ గననిమ్ము నమ్మికన్. 

జైహింద్.

726 నుండి 740 లలిత...

 జైశ్రీరామ్.

726. ఓం సనకాది సమారాధ్యాయై నమః 

నామ వివరణ.

సనక సనందన సనత్కుమార సనత్సుజాతాదులచే సమారాధింపఁబడు జనని మన అమ్మ.

కం.  *సనకాది సమారాధ్యా*!

కన నేర్పుము నీదు చరణ కమల యుగంబున్,

వినుతిగ మదిఁ గనిపించెడి

నిను నే మదిలోనె నిలిపి నిత్యము గొలుతున్. 

727. ఓం శివ జ్ఞాన ప్రదాయిన్యై నమః.

నామ వివరణ.

శివ సంబంధమయిన జ్ఞానమును  ప్రసాదించునది మన అమ్మ.

కం.  ఎద నున్న *శివ జ్ఞాన 

ప్రదాయినీ*! జయము నీకు. పావన చరితా! 

సదయను దర్శనమిమ్మను

హృదీశుని, శివుని నిరుపమ! హృదయము పొంగన్.

728.  ఓం చిత్కలాయై నమః.

నామ వివరణ.

జీవులందరి చిత్తముల యందు కలిగిన బ్రహ్మ రూపమయిన కళ మన అమ్మ.

ఉ.  ఏల యుపేక్ష చేసెద వనేక విధంబుల  నిన్ను వేడు నా

కేలనొ చిత్కలా ప్రతిభ నిప్పటికైనను నీయకుంటి వీ

వేల ననున్ భవత్సుతుని నేలక చూచుట? మాత! *చిత్కలా*! 

చాలిక నీ యుపేక్ష, మరు జన్మము లేని విధంబుఁ గూర్చుమా.

729.   ఓం ఆనంద కలికాయై నమః.

నామ వివరణ.

మనలో ఆనంద రూపమున ఉండు మహిమాన్విత ఆనందకలిక మన అమ్మయే.

కం.  నిరతము కృపఁ గను జననీ!

పర తత్వముఁ దెలిపి బ్రహ్మ భావన నిడుచున్,

బరమానందముఁ గొలుపుము,

మొర విను *మానంద కలిక*! ముక్తిద! కృపతో. 

730.    ఓం ప్రేమ రూపాయై నమః.

నామ వివరణ.

ప్రేమ స్నేహము భక్తి యొక్క రూపమే ప్రేమరూప మన అమ్మ.

తే.గీ.  ముక్తి రూపిణీ! క్షమియించు, ముక్తి నొసఁగు

శక్తి వీవని, మాలోని భక్తివనియు,

మత్తు లోఁబడి గమనింప మరచినాడ,

వెలుఁగుమా లోనఁ, బ్రీతితోఁ *బ్రేమరూప*!

731.    ఓం ప్రియంకర్యై నమః.

నామ వివరణ.

సాధకులకు ఇష్టమయినది చేకూర్చు తల్లి మన జగన్మాత.

ఉ.  సాధు జనాళి కోరుకొను సన్నుత లోకహితార్థ వాంఛలన్

మోదము గూర్పఁ దీర్చుచుఁ బ్రబోధను గొల్పెద వో *ప్రియంకరీ*!

నీ దరి నుండి నేను గణనీయ కవిత్వము నిన్ను గూర్చి స

మ్మోదమునొంద వ్రాసెదను, పూర్తిగ నాకుఁ బ్రియంబు గూర్చుమా.

732.   ఓం నామపారాయణ ప్రీతాయై నమః.

నామ వివరణ.

నామ సాహస్రాదికమును పారాయణము చేసినచో ప్రీతి చెందు తల్లి మన జనని.

తే.గీ.  నామ పారాయణన్ మాకు జ్ఞాన మమరు

క్షేమ కారణమౌను నీ నామ వితతి,

యట్టి నీ నామముల్ మదిన్ బట్టనిమ్ము,

*నామపారాయణ ప్రీత*! జ్ఞాన తేజ!

733. ఓం నంది విద్యాయై నమః.

నామ వివరణ.

నందికేశ్వరునిచే ఉపాసింపఁబడిన విద్యా స్వరూపిణి మన అమ్మ.

చం.  అల నటరాజ బోధిత మహాద్భుత విద్యయె నందివిద్య, ని

స్తుల గతి నంది పొందె నట శోభిలు తేజము నీవె యెంచగా,

కలుష విదూర! నా మదిని గాంతిని నింపుము నంది విద్యచే 

నిలువుము *నందివిద్య*! మది నిత్య శుభంకరివౌచు పార్వతీ!

734. ఓం నటేశ్వర్యై నమః.

నామ వివరణ.

నాట్యశివునిలోని శక్తి మన అమ్మ.

తే.గీ.  నన్నుఁ గావు *నటేశ్వరీ*! సన్నుతాత్మ!

యీ జగన్నాటకంబున నింత వరకుఁ

బాత్రలో మున్గి నిన్ను నే వదలి యుంటి

నాడలేనింక రక్షించు తోడనుండి.

735. ఓం మిథ్యాజగదధిష్ఠానాయై నమః.

నామ వివరణ.

ఈ సృష్టి అంతయూ మిథ్యయే. అట్టి మిథ్యా జగత్తుకు అధిష్ఠాన దేవత మన తల్లి.

అష్టమూర్తి వృత్తము

గణములు మ న త స ర భ జ య 

యతి.    ౧ – ౯ – ౧౮. 

సన్మాన్యా! జగతి భావించగను మిథ్యాస్వరూపంబు జగదీశ్వరివీవే,

నన్ *మిథ్యాజగదధిష్ఠాన*నడిపించన్ గ నీవే కనవలెన్, మహిమాఢ్యా!

సన్మార్గంబు పరమోత్కృష్ట పరమార్థంబు, నీవే నిజము, చేరెద నిన్నున్,

సన్ముక్తిన్వరముగా గాంచ జగదీశాని! నాకిమ్ము సదయన్ నుతియింతున్.

స్వయం కల్పిత మిథ్యా జగతి వృత్తము.  

గణములు  .  త . స . భ . భ . ర . వ    

యతి  ..  10  .  ప్రాస నియమము కలదు.

*మిథ్యాజగదధిష్ఠాన* ! సమృద్ధిగ నిన్ను గొల్వనీ!

మధ్యాహ్నమిటనీ జీవికి, మాపు సమీపమాయెగా,

బోధ్య మ్మెఱుఁగనైతిన్, సతి! బోధనఁ జేయుమీవిఁకన్,

సాధ్యంబగును నీకే ననుఁ జక్కగ తీర్చి ప్రోవగన్.

736. ఓం ముక్తిదాయై నమః.

నామ వివరణ.

iఐహిక బంధములనుండి విముక్తి కలిగించి ముక్తిని ప్రసాదించు ముక్తిద మన అమ్మ.

కం.  ఎత్తితినెన్నో జన్మలు,

చిత్తంబున నిన్ను నిల్పి చింతించను నేన్,

సత్తును జిత్తును దెలుపుచు

బత్తిని *ముక్తిద*! యొసగెడి బాధ్యత నీదే.

737. ఓం ముక్తి రూపిణ్యై నమః.

నామ వివరణ.

మనము పొంద దలచిన ముక్తిరూపము మన అమ్మయే.

ఉ.  జీవము నీవె, నీ కృపనె జీవుని జీవము ముక్తినొందు, సం

జీవిని నీవు, ముక్తి యన జీవము నిన్ గని యైక్యమొందుటే,

భావమెఱింగి నీవు నను బావనమౌ వర ముక్తినొంద నీ

త్రోవఁ జరింపనిమ్మిఁక సరోజ వరానన! *ముక్తి రూపిణీ*!

738. ఓం లాస్యప్రియాయై నమః 

నామ వివరణ.

నాట్యమునందు ప్రీతికలది జగన్మాత. లాస్యస్వరూపము మన  అమ్మ.

మ.  వర లాస్యంబున రాజశేఖరు సతీ! భాసింతు వీవెప్పుడున్,

పరమేశుండును తాండవంబునను దా భాసించు నీయట్లె, నన్

గరుణించంగను మిమ్ము గోరుదు కృపన్ గారుణ్యమున్ జూపి, యా

పరమున్ గొల్పుడు, లాస్యతాండవములన్ వర్ణింతు, *లాస్యప్రియా*!

739. ఓం లయకర్యై నమః.

నామ వివరణ.

సాధకుని అనుగ్రహించి వారి మనసును పరమాత్మపై లీనమగునట్లు అనుగ్రహించు జనని మన 

అమ్మ.

మ.  దురితాళిన్ గడదేర్చుమో *లయకరీ*! దుర్బుద్ధులన్ బాపుచున్,

నిరపాయంబుగ గావుచుండుము సదా! నీ భక్తులన్ శ్రీకరీ! 

తరణోపాయము నీవె జన్మజలధిన్ దాటంగ ముక్తిప్రదా!

కరుణాసాంద్ర! శుభాంతరంగ! కృపతో గమ్యంబునే చేర్చుమా.

740. ఓం లజ్జాయై నమః.

నామ వివరణ.

ప్రాణులలో నమ్రతగచే  లజ్జారూపమున ఉండు తల్లి మన అమ్మ. స్త్రీలలో ఈ లజ్జయే వారి 

సంస్కారమును చాటును. అట్టి సంస్కారము లజ్జా రూపములో వెలువడునది అమ్మయే.

ఉ.  నీ కృప సత్ కవిత్వమును నిత్యము నేనయి వ్రాయుచుండగా,

లోకము నన్ గవీశుఁగ విలోకనఁ జేయుచునుండ లజ్జతో

లోకులఁ గాంచ లేక, మదిలో నినునెన్ని నమస్కరింతు, *ల

జ్జా*! కని నీవెనేనగు లసన్నుత జీవన భాగ్యమబ్బనీ.

జైహింద్.

కన్దుకో భిత్తినిక్షిప్త . ... మేలిమిబంగారం మన సంస్కృతి.

 జైశ్రీరామ్.

శ్లో. కన్దుకో భిత్తినిక్షిప్త  -  ఇవ ప్రతిఫలన్ముహుః|

ఆపతత్యాత్మని ప్రాయో  -  దోషోఽన్యస్య చికీర్షతః||  (కథా సరిత్సాగరం)

తే.గీ.  బంతి గోడకు కొట్టిన వచ్చు తిరిగి,

యటులె మనమితరులకును హాని చేయ

మనకె యాహాని కలుగును, మరువఁబోకు,

జ్ఞానహీనతన్ వరలకు గర్వమునను.

భావము.  గోడకు కొట్టిన బంతి వెంటనే వేసిన చోటకే తిరిగి వచ్చినట్టు, ఇతరులకు 

చెడు చేద్దామని ప్రయత్నిస్తే, ఆ చెడు మనకే జరుగుతుంది. కావున 

ఇతరులకు చెడు  తలపెట్టకూడదు.

జైహింద్.

ఫ్రెండ్స్ వెల్ఫేర్ అసోసియేషన్ చందానగర్. ఉగాది కవిసమ్మేళనానికి ఆహ్వానము.

జైశ్రీరామ్.

జైహింద్.

 

శ్రీచక్రబంధ సప్తస్వర సర్వమంగళాష్టకం.

 

జైశ్రీరామ్.

జైహింద్.

711 నుండి 725 వరకు లలిత...

జైశ్రీరామ్. 

711. ఓం సాధునే నమః. 

నామ వివరణ.

సాధు స్వభావము కలిగి, పరమపాతివ్రత్యమును కలిగి భర్తతో అవినాభావ సంబంధము కలిగిన సాధ్వి  

సధతిని ప్రసాదించు తల్లి సాధ్వి మన జగన్మాత.

ఆ.వె.  *సాధ్వి*! సుస్వరూప! సరస సద్వరభావ 

సద్గుణంబు లొసఁగి సాఁకు నన్ను!

నిరుపమాన! నేను నిన్నున్ స్మరింతును  

నీదు దయయె నన్ను నాదుకొనును.

712. ఓం (ఈ)యై నమః.

నామ వివరణ.

ఈ తురీయస్వరూప మేకాక్షరము, కామ కలా సంజ్ఞికమయిన నామమిది. 

సాధ సాధ్వీ నామం మరొకచోట సాధ్వీ సద్గతిదాయినీ అనేచోట యున్నందున. 

పునరుక్తి వారించుటకు ఇక్కడ సాధు, ఈ అని రెండు నామాలుగ చేయబడినవి. 

సాధు , సాధునే నమః , 

ఈ అను నామము గౌరీ-ఈకారాంత శబ్దంవలె గౌర్యై అయినట్లు యై అయినది( యై నమః) 

తురీయస్వరూపురాలు .అ=విష్ణువు  అస్య=విష్ణవుయొక్క అస్య భగినీ   అనే అర్థంలో కూడా (జ్ఈష్ 

ప్రత్యయం వచ్చును.)ఈ అనే రూపం ఉండును (జయంతుని సోదరి జయంతీ వలె).కావున అమ్మ 

విష్ణు రూపురాలు ఆయన సోదరరూపురాలు. ఒకే బ్రహ్మ ధర్మము ధర్మి ధర్మము పురుష స్త్రీరూపమున 

రెండు విధములు. పురుషుడు విష్ణువు, జగదుపాదాన కారణం. స్త్రీ  పరమశివ మహిషి. ఇట్లు పురుష 

స్త్రీ వాటిధర్మాలు నాల్గింటిలో తురీయము అమమ్మ 

 (ఈకారాద్విశ్వకర్త్రీయం మాయా తుర్యాత్మికా ప్రియా)

ఉ.  *ఈ*! లలితాంబికా!  శరణు. హేయ నిరర్థక జీవితంబు నా

కేల? శుభాస్పదంబగు మహేశ్వరి! నీ పద పంకజంబు నా

కేల  లభింపకుండెఁ? బరమేశ్వరి! నే విడ నీ పదాబ్జముల్,

జాలము సేయకమ్మ, నను చక్కగ నిన్ గని పొంగఁ జేయుమా. 

713. ఓం గురుమండల రూపిణ్యై నమః.

నామ వివరణ.

శ్రీచక్రమున  అష్టకోణము మీద అమ్మవారు పూజలందుకొనుదురు. 

కావున గురుమండలరూపిణి మన అమ్మ.

చం.  గురువుల రూపులందు వెలుగుం గన నీవె జగద్వరేణ్య! నీ

నిరుపమ తేజమౌను మహనీయ మహోత్తమ విద్యలెల్ల, నిన్

గురువుల తేజమందుఁ గని, కోరి భజింతును, బోధఁ గొల్పుచున్

మరుపును బాపుమమ్మ! *గురుమండల రూపిణి*! దేవతా మణీ!  

714. ఓం కులోత్తీర్ణాయై నమః.

నామ వివరణ.

కులము అనగా యింద్రియముల సమూహము, ఈ సమూహమును అధిగమించు గొప్ప కులోత్తీర్ణ 

మన జగన్మాత.

తే.గీ.  నను గులోత్తీర్ణుఁ జేసిన జనని వగుచు,

నిరుపమానందమందించి, వరలఁ జేసి

నిండు మనమున కాఁపాడుచుండు, నీకు

జయము దుర్గా! *కులోత్తీర్ణ*! జయము జయము.

715. ఓం భగారాధ్యాయై నమః. 

నామ వివరణ.

భ గ ము అనగా కాంతిరూపమై గమించు సూర్యమండలము. ఆ సూర్యమండలము మన అమ్మయే, 

భగమండలముననుండి ఆరాధింపఁబడు జనని మన అమ్మ.

మ.  దహరాకాశ విరాజమాన రవి మోదంబొప్పగాఁ గొల్వఁగా

మహిమోపేతముగా చెలంగుదువు సమ్మాన్యా! *భగారాధ్య*! నీ

విహమున్ సత్ పర సౌఖ్యమున్ గొలుపుదే, యీ భక్తునిన్ నిత్యమున్ 

స్పృహలోనుంచి త్వదీయ పాద యుగళిన్ సేవింపఁగాఁ జేయుమా.

716. ఓం మాయాయై నమః.

నామ వివరణ.

పరబ్రహ్మమును ప్రకటించుటకు అనుకూలమయినది మాయ. అది మన అమ్మ లలితాంబయే.

శా.  శ్రీ మాయా! మహిమాన్వితా! జగతియే, చిద్రూపి! నీ మాయచే

శ్రీమంతంబుగఁ గాంచఁ జాలదు నినున్, చిత్తేజమౌ నిన్ను నే

నేమాత్రంబు నెఱుంగఁ జాలను, భవానీ! మాయనుం బాపి, నీ

ప్రేమోద్భాసిత రూపమున్ గనునటుల్ ప్రీతిన్ సదా ! చేయుమా.

717. ఓం మధుమత్యై నమః.

నామ వివరణ.

సూర్యుఁడు దేవతలకు తృప్తి కలిగించువాడై మధువు వంటివాఁడు. సవితృదేవతా శక్తి సావిత్రి

కావున మధుమతి మన జగన్మాత.

తే.గీ.  మధుమతిన్ గృపఁ గూర్చుమా, సుధలు చిందు

పద్యపద్మముల్ నీ పాదపద్మములకు

నర్పణము సేయ వ్రాసెద, నాంధ్రమాత

పొంగునటుల నో  *మధుమతీ*! ముక్తిఁ గనగ.

718. ఓం మహ్యై నమః.

నామ వివరణ.

అమ్మ భూమివలె ప్రకటితమై అన్నింటా వ్యాపించియున్న తల్లి మహి. మన్బ అమ్మయే మహి.

కం.  మహిమోపేత! *మహీ*! నన్

మహిపైఁ గాఁపాడెడి నిను మరువను జననీ!

దహరాకాశ సువర్తీ!

యిహమట్టులె పరము గొలుపు మీశ్వరి! కృపతోన్.

719. ఓం గణాంబాయై నమః.

నామ వివరణ.

అన్ని గణములకూ తల్లి మన అమ్మయే, గణాంబ మన అమ్మ.

ఉ.  జీవగణాంబవీవె, వరసిద్ధిని గొల్పెడి తల్లి వీవె, నిన్

భావనఁ జేసినంతనె స్వభావమె మంచిగ మారునమ్మ,రా

జీవ ముఖాంబుజా! శరణు, సేవలు నీకు నొనర్చు భాగ్యమున్ 

నీవె యొసంగుమమ్మ, మది నీవె వసించి *గణాంబ*! సత్కృపన్..

720. ఓం గుహ్యకారాధ్యాయై నమః. 

నామ వివరణ.

దేవతలలో వివిధ విభాగములకు చెందినవారు గుహ్యకులు. వారిచే ఆరాధింపఁబడు తల్లి మన 

అమ్మ.

తే.గీ.  భక్తినారాధనను జేయ ముక్తినొసఁగు

తల్లివీవమ్మ! కరుణించు చల్లనమ్మ!

జన్మ రాహిత్యమును గొల్పి శాంతినిచ్చు

*గుహ్యకారాధ్య*! నిన్ను నేఁ గొలుతునమ్మ! 

721. ఓం కోమలాంగ్యై నమః. 

నామ వివరణ.

వేద స్వరూపిణి అమ్మ, కోమలవేదాంగి మన అమ్మయే.

కం.  ధర నిహ పరములనిడ, నీ 

దరిఁ జ్చగ మార్గ మీవె దయచేయఁ గదే,

భరియింపఁ జాల బాధలు,

కరుణింపుము *కోమలాంగి*! కలుష విదారీ! 

722.  ఓం గురుప్రియాయై నమః.

నామ వివరణ.

జగద్గురువు ఆది శంకరుఁడు. వారియందు ప్రీతి కలిగి యున్న మన అమ్మ గురుప్రియ.

కం.  జగదీశుండగు శివునకు

నిగమాంత సువేద్య! ప్రియవు నీవే కద? యీ

జగముల నేలెడి జననీ!

యగణిత శుభదా! *గురుప్రియా*! వందనముల్.

723.ఓం స్వతంత్రాయై నమః.

నామ వివరణ.

సృష్టి మొత్తమును నడిపే స్వతంత్ర మన అమ్మ.

శా.  సౌమ్యోద్భాస ముఖారవింద! గుణ పోషా! సత్య సద్రూప! నా

గమ్యంబున్ గన నేర, నీవె కరుణన్ గమ్యంబు నన్ జేర్చుమా.

సామ్యం బెన్నగ లేని నిన్ను గనెదన్స్వాతంత్ర్యమే యున్నచోన్,

రమ్యా! నీవిడు నిన్ గనంగను *స్వతంత్రా*! నాకు స్వాతంత్ర్యమున్.

724. ఓం సర్వతంత్రేశ్యై నమః.

నామ వివరణ.

అరువదినాలుగు తంత్రములకూ ఈశ్వరి మన అమ్మ.

కం.  పలుపలు రీతులఁ బొగడుచుఁ

దలచెద నిను నేను *సర్వ తంత్రేశీ*! ని

స్తుల భక్తియు, నేకాగ్రత,

సలలిత పద పద్య రచన చక్కగనిమ్మా.

725. ఓం దక్షిణామూర్తిరూపిణ్యై నమః. 

నామ వివరణ.

సగుణ నిర్గుణ స్వరూపిణి యైన దక్షిణా మూర్తి రూపిణి మన అమ్మయే.

తే.గీ. జ్ఞాన శూన్యుండ, నెఱుఁగ నిన్, మౌనముగనె

సన్మహా జ్ఞాన దాతవై సత్ సుదర్శ

నమ్ము నిమ్ము, నా మది నిలు నమ్మకముగ,

*దక్షిణామూర్తి రూపిణీ*! దయను కనుమ.

జైహింద్.

679 వ లలితా నామ పద్యగానము.Lalitha Sahasra Namalu -2 | Chintha Ramakrishna Rao | Kumara Suryanaraya...

జైశ్రీరామ్.

679. ఓం బృహత్సేనాయై నమః.

నామ వివరణ.

అపారమయిన సేనా సమూహము కలది మన అమ్మ.

శా.  శ్రీమన్మంజుల వేద శాస్త్రములునా చిద్బోధనా గ్రంథముల్,

నీమంబొప్పగ నీకు సేన, మదిలోనే నిల్చునీ దుష్టులౌ

కామాది ప్రతి వీర శత్రుగణమున్ ఖండింప నీవుంటివే,

శ్రీమన్మంగళ కార్య శోభిత *బృహత్ సేనా!* నమో వాకముల్. 

జైహింద్.

మా SRVD ఎలైట్ సమూహ సభ్యులు.

 జైశ్రీరామ్.

 SRVD ఎలైట్ సమూహ సభ్యులు.

మొదటి వరుసలో మనకు ఎడమ నుండి కుడికి కూర్చున్న వారి పేర్లు.

శ్రీయుతులు

1. ఏ.ఆర్.హెచ్.ప్రసాద్ 2. యస్. సుభాష్ చంద్రబోస్. 

3. సుబ్బారావు. 4. యం.సతీష్

5. పీ.నరహరిరావు 6. చింతా రామకృష్ణారావు.

రెండవ వరుసలో మనకు ఎడమ నుండి కుడికి కూర్చున్న వారి పేర్లు.

శ్రీయుతులు

1. బీ. రాములు 2. కోటయ్య. 3. ఆర్. జాన్సన్. 

4. జీ.వాసుదేవరావు. 5. కే.ఎం.రమేశ్ బాబు

మూడవ వరుసలో మనకు ఎడమ నుండి కుడికి నించున్న వారి పేర్లు.

శ్రీయుతులు

1. జీ.రామకృష్ణ. 2. పీ.మురళీమోహనరావు. 3. ప్రవీణ్ (అతిథి)  

4. మురళీధర్ రెడ్డి. 5. కే.జే.రెడ్డి.

6. అశోక్ కుమార్. 7. ప్రమోద్ జోషి. 8. ఎన్.వీ.శరభరాజు. 

9. జీ.విజయకుమార్. 10. టీ.రామకృష్ణ.

11. సీ.మదన్ మోహన్. 12. కే.శ్రీనివాసరావు. 

13. బీ.వీ.నారాయణ. 14. కే.విజయకుమార్.

వీరే కాక మా మిత్రులు ప్రేమాభిమానాలకు పెట్టింది పేరు.. శ్రీ బీ జనార్దన్ గారు 

గ్రామాంతరం లోయున్నందున ఈ కార్యక్రమానికి హాజరు కాలేదు.  

ఉ.  వీరి యమోఘ ప్రేమ నను వీరికి మధ్యను నిల్పె గొప్పగా,

నారసి నాకవిత్వముననంత మహత్ కవికల్పభూజ యన్

తీరయినట్టిదౌ బిరుదు తృప్తిగ నిచ్చిరి పొంగిపోవుచున్,

వీరలకేను వందనము ప్రీతిగ చేయుచు పొంగుచుంటినే.

జైహింద్.

శ్రీ కడయింటి కృష్ణమూర్తిగారు కారణంగా వెలసిన 12రామాయణాలు చక్కగా ఒక్కసారే ఆవిష్కరింపఁజేసిన ప్రజ - పద్యం సమూహ నిర్వాహకులు.

జైశ్రీరామ్.

ఇంత చక్కగా నిర్వహించిన శ్రీ అనంతకృష్ణగారికి, గణపతిగారికి, పటువర్ధన్ గారికి, మూలకారకులయిన కృష్నమూర్తిగారికి, కవులకు నా అభినందనలు.

జైహింద్.

కుమారస్వామి ప్రభవాభివర్ణనము. శ్రీ క్రొవ్విడి వేంకట రాజారావు.

జైశ్రీరామ్.

జైహింద్.

ఉగాది రోజున చేయాల్సిన 7 ముఖ్యమైన పనులు #Hindudharmakshetram #SantoshGhan...

జైశ్రీరామ్.

జైహింద్.

అనభ్యాసే విషం శాస్త్రమ్ ... మేలిమిబంగారం మన సంస్కృతి.

 జైశ్రీరామ్.

శ్లో.  అనభ్యాసే విషం శాస్త్ర మజీర్ణే భోజనం విషమ్ । 

మూర్ఖస్య చ విషం గోష్ఠీ వృద్ధస్య తరుణీ విషమ్ ॥ 

తే.గీ.  విద్య విషమిల నభ్యాసవిహితునకును,

అగ్నిమాంద్యునకన్నమే యగును విషము,

మూర్ఖునకు గోష్టి విషమిలన్ బూజ్యులార!

యువతి విషమగు ముదిమికి నోపలేక.

భావము. అభ్యసము చేయని వానికి శాస్త్రము విషతుల్యము. అజీర్ణముగా 

ఉన్నవానికి భోజనం విషతుల్యము. మూర్ఖునికి విద్యాగోష్ఠి విషతుల్యము. 

ముసలివానికి యువతి విషతుల్యము.

జైహింద్.

అమృతం సద్గుణా భార్యా ... మేలిమిబంగారం మన సంస్కృతి.

 జైశ్రీరామ్.

శ్లో.  అమృతం సద్గుణా భార్యా   -  అమృతం బాలభాషితం

అమృతం రాజసమ్మానం   -  అమృతం మానభోజనమ్. 

తే.గీ.  భార్య గుణవతి యమృతంబు భర్తకెపుడు,

బాలభాషణమృతంబు పద్మనాభ!

రాజ సన్మానమమృతంబు పూజ్యులకును,

పరిమితాహారమమృతము భక్తవరద!

భావము.  మంచిగుణం గలదైన భార్య అమృతం వంటిది. చిన్నపిల్లల 

ముద్దుమాటలు అమృతసమాన మైనవి. రాజు వల్ల గౌరవం పొందడం 

అమృతంతో సమానం. కొలత ప్రకారం పరిమితంగా చేసే భోజనం 

అమృతం వంటిది.

జైహింద్.

ఆశ్రుతస్య ప్రదానేన ... మేలిమి బంగారం మన సంస్కృతి.

జైశ్రీరామ్.

శ్లో. ఆశ్రుతస్య ప్రదానేన   -  దత్తస్య హరణేన చ।

జన్మప్రభృతి యద్ దత్తం   -  తత్ సర్వం తు వినశ్యతి॥

తే.గీ.  ఇచ్చెదనటంచు చెప్పియు నీయకున్న,

నిచ్చినది లాగుకొన్నను, నిహమునందు

పూర్వందున చేసిన పుణ్యమెల్ల

 గ్రహియించు నరుఁడ! నీవు.

భావము.  "ఇస్తాను" అని చెప్పిన వస్తువును దానం చేయకపోవడంచేత, ఇచ్చిన 

దానాన్ని తిరిగి తీసుకోవడంచేత జన్మించిన నాటినుండి చేసిన దానాల ఫలితం 

అంతా నశిస్తుంది.

జైహింద్. 

యయోరేవ సమం విత్తం - ... మేలిమి బంగారం మన సంస్కృతి.

 జైశ్రీరామ్.

శ్లో.  యయోరేవ సమం విత్తం  -  యయోరేవ సమం శ్రుతం |

తయోర్వివాహః సఖ్యం చ  -  న తు పుష్టవిపుష్టయోః ||   (మహాభారతం)

తే.గీ.  ధనము విద్యయు సమముగా ధరణిఁ గలుగు

వారి మధ్యనే స్నేహ వివాహములును,

హెచ్చు తగ్గులు గలవారికెన్నటికిని 

శ్రేయముగనొప్పఁబోవవి శ్రీనృసింహ!     

భావము.  ఎవరికి ధనం మరియు విద్య సమానంగా ఉన్నాయో, వారి మధ్య 

మాత్రమే వివాహం మరియు స్నేహం ఉత్తమం. హెచ్చుతగ్గులు ఉన్నవారిలో 

ఇది శ్రేయస్కరం కాదు.

జైహింద్.

చిన్న జీయర్ స్వామి అసత్య ప్రచారం! ప్రశ్నించిన హిందూ ధర్మ రక్షా సమితి.

జైశ్రీరామ్.

జైహింద్.

అనవద్య,పనిగొను,మనసా,వచసా.అమేయ,వాదన,మాథురి,దశదిశ,వ్యాపక.మలుపు,పలికించు,సతతము,వరదమము,అలవాటు,గర్భ"-తొలికిస లాడు,"-వృత్తము,రచన:-వల్లభవఝల అప్పల నరసింహ మూర్తి,

జైశ్రీరామ్. 

అనవద్యము పద్యమునే!ఆదరమున గొల్వగన్! అలవాటయె!చిన నాటన్!

పని గొంచు !నమేయముగన్!పాదగు సురలమ్మ యున్!పలికించు వరదమాలన్!

మనసా!వచసా!మెదలన్!మాథురి జన మోద మౌ!మలుపుం తొలికిస లాడన్!

తనువే!పులకించె సుమా!తా దశ దిశ నిండుగా!తలతుం!సతతము నీశున్!

సృజనాత్మక గర్భ కవితా స్రవంతి యందలి,అనిరుద్ఛందాంతర్గత"-ఉత్కృతి"

ఛందము లోనిది,ప్రాస నియమము కలదు,పాదమునకు"26"అక్షరము లుండును,

యతులు,10,18,అక్షరములకు చెల్లును,

1.గర్భగత"-అనవద్య"-వృత్తము,

అన వద్యము పద్యము నే!

పని గొందు నమేయముగన్!

మనసా!వచసా!మెదలన్

తనువే!పులకించు సుమా! 

అభిజ్ఞా ఛందము నందలి"బృహతి"-ఛందము లోనిది,

ప్రాస నియమము కలదు,పాదమునకు"9"అక్షరము లుండును,

2.గర్భగత"-పని గొను"-వృత్తము,

ఆదరమున గొల్వగన్!

పాదగు!సురలమ్మ యున్!

మాథురి జన మోదమౌ!

తా దశ దిశ నిండుగా!

అభిజ్ఞా ఛందము నందలి"-అనుష్దుప్"-ఛందము లోనిది,,

ప్రాస నియమము కలదు,పాదమునకు8"అక్షరము లుండును,

3"-గర్భగత"-మనసా"-వృత్తము,

అలవాటయె!చిన నాటన్!

పలికించు వర దమాలన్!

మలపుం తొలికిస లాడన్!

తలతుం సతతము నీశున్!

అభిజ్ఞా ఛందము నందలి"బృహతి"-ఛందము లోనిది,

ప్రాస నియమము కలదు,పాదమునకు"9"అక్షరము లుండును,

4.గర్భగత"-వచసా"-వృత్తము,

అన వద్యము పద్యము నే!ఆదరమున గొల్వగన్!!

పనిగొందు నమేయముగన్!పాదగు!సుర లమ్మయున్!

మనసా!వచసా!మెదలన్!మాథురి!జన మోదమౌ!

తనువే!పులకించచు సుమా!తా దశ దిశ!నిండుగా!

అణిమా ఛందము నందలి'"అత్యష్టి"-ఛందము లోనిది

ప్రాస నియమము కలదు,పాదమునకు"17,అక్షరము లుండును,

యతి;10,వ యక్షరమునకు చెల్లును,

5.గర్భగత"-అమేయ"-వృత్తము,

ఆదరమున గొల్వగన్!అన వద్యము పద్యమునే!

పాదగు!సురలమ్మ యున్!పనిగొందు నమేయముగన్!

మాథురి జన మోదమౌ!!మనసా!వచసా!మెదలన్!

తా దశ దిశ!నిండుగా!తనువే!పులకించె!సుమా!

అణిమా ఛందమునందలి"అత్యష్టి"ఛందము లోనిది,

ప్రాస నియమము కలదు,పాదమునకు"17"అక్షరము లుండును,

యతి"9"వ యక్షరమునకు చెల్లును,

6.గర్భగత"-వాదన"-వృత్తము,

అన వద్యము పద్యము నే!అలవాటయె!చిన నాటన్!

పనిగొందు నమేయముగన్!పలికించు వరదమాలన్!

మనసా!వచసా!మెదలన్!మలపుం తొలికిస లాడున్!

తనువే!పులకించు!సుమా!తలతుం సతతము నీశున్!

అణిమా ఛందము నందలి"ధృతి"-ఛందము లోనిది,

ప్రాస నియమము కలదు,పాదమునకు"18"అక్షరము లుండును,

యతి"10"వ యక్షరమునకు చెల్లును,

7.గర్భగత"-మాథురీ"-వృత్తము,

అలవాటయె!చిన నాటన్!అనవద్యము పద్యము నే!

పలికించు వర దమాలన్!పనిగొందు నమేయముగన్!

మలపుం తొలికిస లాడున్!మనసా!వచసా!మెదలున్!

తలతుం సతతము నీశున్!తనువే!పులకించె!సుమా!

అణిమా ఛందము నందలి"ధృతి"ఛందము లోనిది,

ప్రాస నియమము కలదు,పాదమునకు"18"అక్షరము లుండును,

యతి"10"వ యకషరమునకుచెల్లును

8,గర్భగత"-దశ దిశ"-వృత్తము,

ఆదరమున గొల్వగన్!అలవాటయె!చిన నాటన్!

పాదగు!సురలమ్మయున్ !పలికించు వరదమాలన్!

మాథురి జన మోదమౌ!మలపుం తొలికిస లాడున్!

తా దశ దిశ నిండుగా!తలతుం!సతతము!నీశున్!

అణిమా ఛందము నందలి"అత్యష్టి"-ఛందము లోనిది,

ప్రాస నియమము కలదు,పాదమునకు"17"అక్షరము లుండును,

యతి"9"వ యక్షరమునకు దెల్లును,

9,గర్భగత"-వ్యాపక"-వృత్తము,

అలవాటయె!చిన నాటన్!ఆదరమున గొల్వగన్!

పలికించు వరదమాలన్!పాదగు సురలమ్మయున్!

మలుపుం తొలికిస లాడున్!మాథురి జన మోదమౌ!

తలతుం సతతము నీశున్!తా దశ దిశ నిండుగా!

అణిమా ఛందము నందలి"అత్యష్టి"-ఛందము లోనిది,

ప్రాస నియమము కలదు,పాదమునకు"17"అక్షరము లుండును,

యతి"10,వ యక్షరమునకు ఛెల్లును,

10,గర్భగత"-మలుపు"-వృత్తము,

ఆదరమున గొల్వగన్!అనవద్యము పద్యము నే!అలవాటయె!చిన నాటన్!

పాదగు సురలమ్మయున్!పనిగొందు నమేయముగన్!పలికించు వరదమాలన్!

మాథురి జన మోదమౌ!మనసా!వచసా!మెదలున్!మలుపుం తొలికిస లాడున్!

తా దశ దిశ నిండుగా!తనువే!పులకించు సుమా!తలతుం! సతతము నీశున్!

అనిరుద్ఛందము నందలి"ఉత్కృతి"ఛందము లోనిది,

ప్రాస నియమము కలదు పాదమునకు"26"అక్షరము లుండును,

యతులు,9,18,అక్షరములకు చెల్లును,

11.గర్భగత"-పలికించు"-వృత్తము,

అనవద్యము పద్యము నే!అలవాటయె!చిన నాటన్!ఆదరమున గొల్వగన్

పనిగొందు నమేయముగన్!పలికించు వర దమాలన్.పాదగు సురలమ్మ యున్!

మనసా!వచసా!మెదలున్!మలుపుం తొలికిస లాడున్!మాథురి జన మోదమౌ!

తనువే!పులకించు సుమా!తలతుం! సతతము నీశున్!తా దశ దిశ నిండుగా!

అనిరుద్ఛందము నందలి"ఉత్కృతి"ఛందము లోనిది,

ప్రాస నియమము కలదు,పాదమునకు"26"అక్షరము లుండును,

యతులు,10,19,అక్షరములకు చెల్లును,

12.గర్భగత:సతతము"-వృత్తము,

అలవాటయె!చిన నాటన్!అనవద్యము పద్యము నే!ఆదరమున గొల్వగన్!

పలికించు వర దమాలన్!పని గొందు నమేయముగన్!పాదగు!సుర లమ్మ యున్!

మలుపుం తొలికిస లాడన్!మనసా!వచసా!మెదలున్!మాథురి జనమోద మౌ!

తలతుం సతతము నీశున్!తనువే!పులకించు సుమా!తా దశ దిశ నిండుగా!

అనిరుద్ఛందము నందలి"ఉత్కృతి"ఛందము లోనిది,

 ప్రాస నియమము కలదు,పాదమునకు26"అక్షరము లుండును,

యతులు.10.19.అక్షరములకు చెల్లును,

13.గర్భగత"-వరదమము"-వృత్తము,

ఆదరమున గొల్వగన్!అలవాటయె చిన నాటన్!అనవద్యము పద్యము నే!

పాదగు సుర లమ్మయున్!పలికించు వరదమాలన్!పనిగొందు నమేయముగన్!

మాథురి జన మోదమౌ!మలుపుం తొలికిస లాడన్!మనసా!వచసా!మెదలున్!

తా దశ దిశ నిండుగా!తలతుం!సతతము నీశున్!తనువే!పులకించు సుమా!

అనిరుద్ఛందము నందలి"ఉత్కృతి"ఛందము లోనిది,

ప్రాస నియమము కలదు,పాదమునకు"26"అక్షరము లుండును,

యతులు.9.18.అక్షరములకు చెల్లును,

14.గర్భగత"-అలవాటు"-వృత్తము,

అలవాటయె!చిన నాటన్!ఆదరమున గొల్వగన్!అన వద్యము పద్యము నే!

పలికించు వరదమాలన్!పాదగు సుర లమ్మయున్!పనిగొందు నమేయముగన్!

మలుపుం తొలికిస లాడున్!మాథురి జన మోదమౌ!మనసా!వచసా!మెదలున్!

తలతుం!సతతము నీశున్!తా దశ దిశ వ్యాప్త మౌగా!తనువే!పులకించు సుమా!

అనిరుద్ఛందము నందలి"ఉత్కృతి"-ఛందము లోనిది,

ప్రాస నియమము కలదు,పాదమునకు"26"అక్షరము లుండును,

యతులు.10,18!,అక్షరములకు చెల్లును,

జైహింద్.