హరిసేవ ద్వారా దుర్గేశ్వరరావుగారందించినచిత్రాలు విదేశాలలో మన హిందూ దేవాలయాలు.

ప్రయోజన బాహూళ్యమునాశించి " హరిసేవ " బ్లాగులో శ్రీ దుర్గేశ్వరరావుగారు పోష్ట్ చేసిన అపురూప చిత్రాల్ని ఆంధ్రామృత పాఠకులకూ అందేలా ఇందుంచాను. పాఠకుల కానందకరంగా అందించిన దుర్గేశ్వరరావుగారికి ధన్యవాదాలు తెలియఁజేస్తున్నాను.

Arulmigu Sri Raja Kaliamman Temple, Johor Baru, Malaysia - The only Hindu Glass Temple abroad Sri Srinivasa Perumal Temple or Sri Perumal Temple, Little India, Serangoon Road, Singapore Sri Prasanna Venkateswara Swami Temple, Memphis, Tennessee, US Quad City Hindu Temple , Rock Island, IL, US Sri Murugan Temple, London, UK Shiva - Vishnu Temple of Melbourne, Melbourne, Australia Shiva Vishnu Temple of South Florida Inc, FL, US Sri Venkateswara Swami Temple, Pittsburgh, US Sri Lakshmi Temple - Ashland, MA, US Sri Venkateshwara Temple - New Jersey, US Ekta Mandir, Irving, Texas, US Sri Meenakshi Devasthanam - Pearland, Texas, US Velmurugan Gnana Muneeswarar Temple, Rivervale Crescent Sengkang, Singapore Sri Venkateswara Swami Temple, Helensburgh, Sydney, Australia Venkateswara Swami temple, Riverdale near Atlanta, Georgia, US Murugan Temple, Sydney, Australia Mother Temple of Besakih, Bali, Indonesia Sri Venkateswara Temple, Bridgewater, NJ, US Sri Murugan Temple “Batu Caves”, Penang, Malaysia BAPS Shri Swaminarayan Mandir, London (Neasden Temple), United States Sri Siva Vishnu Temple, Washington DC, United States BAPS Shri Swaminarayan Mandir - Toronto, Canada Prambanan Shiva Temple, Central Java, Indonesia Lord Vishnu Temple, Angkor, Cambodia Shiva-Vishnu Temple, Livermore, California, US Malibu Hindu Temple, Malibu, California, US Lord Venkateshwara Temple, Birmingham, United Kingdom

మన దేశంలో హిందూ మతానికి జరుగుతున్న అవమానానికి గుర్తుగా మన గుళ్ళని నాశనం చేస్తూ ఉంటే పాశ్చాత్య దేశాల్లో వాటిని ఎలా వృద్ధి చేస్తున్నారో చూడండి.అందుకే ఆ దేశాలకు పురోగమనం మనకు తిరోగమనం జరుగుతున్నాయేమో అనిపిస్తోంది.

ఒకా ఊరు పాడవడానికి ఆ ఊరి గుడి స్థితిగతులు కారణం అన్న మాట నిజమే అనిపిస్తోంది.

చాలా అపురూపమైనవి కదూ!

జైహింద్.

చెప్పుకోండి చూద్దాం 22.

పాఠక మహాశయులారా!

ఈ క్రింది సీసమునందడిగిన ప్రశ్నలకు సామాధానాలు చెప్పుకోండి చూద్దాం.

సీ:-

అసమాన కోదండుడైన రాజెవ్వడు?

రాజు పేరిట గల రాగ మేది?

రాగంబు సరివచ్చు రాజిత ఋతువేది?

ఋతువు పేరిట గల రుద్రుడెవడు?

రుద్రుని పేరిట రూఢియౌ పక్షేది?

పక్షి పేరిట గల వృక్షమేది?

వృక్షంబు సరివచ్చు వెలయు భూషణ మేది?

భూషమే సరి వచ్చు భూమి యేది?

తే:-

అన్నిటికిఁ జూడ మూడేసి యక్షరములు

ఆదులుడుపంగ తుదలెల్ల నాదులగును.

చెప్పుడయ్యరో మీరలు చేవఁ జూపి.

పేర్మినాంధ్రామృతము గ్రోలు పెద్దలార.

వెంటనే పోష్ట్ చేస్తారు కదూ?

జైహింద్.

శ్లోకాల్ని పోలిన తెలుగు ఛందస్సులు కొన్ని తెలుసుకొందాం.

పాఠక ప్రకాండులారా!

మనం రోజూ వినే దైవ స్తోత్రాలలో ఉండే ఛందస్సులు మన తెలుగులో ఉన్నాయన్న సంగతి మీకు తెలియనిది కాదు. అట్టి వాటిని మీకిక్కడ పరిచయంచేయ దలిచాను.

సావధానంగా వినఁగలిగే మీకు అర్థం కాక మానవని నా నమ్మకం

వసంత తిలక వృత్తము:- { "శ్రీ వేంకటా చలపతే తవ సుప్రభాతం" లో యిమిడియున్న ఛందస్సు.}

{ ఈ వృత్తము " సింహోన్నతము - ఔద్ధర్షిణి - శోభావతి - మధుమాధవి " అని కూడా పిలువఁబడుతుంది.}

" త - భ - జ - జ - గగ." అను గణములు ప్రతి పాదమున వచ్చును.

{ UUI - UII - IUI - IUI - UU.}

యతి 8 వ అక్షరము.

ప్రాస నియమము కలదు.

ఉదాహరణ:-

ఆంధ్రామృతం బవని నాంధ్రుల కల్పకమ్మై

ఆంధ్రేతరుల్ కనుచు నందగ లేక కృంగన్,

ఆంధ్రత్వ మాంధ్ర పలు కద్భుతమై వెలుంగన్.

ఆంధ్రావళిన్ నిలుపు నాకస వీధి లోనన్.

మాలినీ వృత్తము:- { "కర చరణ కృతం వా కర్మ వాక్కాయజం వా --" అనే ప్రార్థనా శ్లోకంలోని ఛందస్సు }

" న - న - మ - య - య." అను గణములు ప్రతి పాదమున వచ్చును.

{ III - III - UUU - IUU - IUU.}

యతి 9 వ అక్షరము.

ప్రాస నియమము కలదు.

ఉదాహరణ:-

భువన విజయమందున్ పూజ్యులౌ సత్ కవీశుల్

కవన విజయమొందన్ కల్పనా శక్తి తోడన్

రవి కననివి కూడన్ రంగుగా గాంచి, చూపున్.

హవణిక లవి. ఈ యాంధ్రామృతంబంది యిచ్చున్.

పంచచామర వృత్తము:- { రావణ కృత శివ తాండవం. ఈ ఛందస్సులోనే వ్రాయబడింది.}

" జ - ర - జ - ర - జ - గ." అను గణములు ప్రతీ పదమున వచ్చును.

{ IUI - UIU - IUI - UIU - IUI - U.}

యతి 10 వ అక్షరము.

ప్రాస నియమము కలదు.

ఉదాహరణ:-

సరస్వతీ ప్రసాద సిద్ధ సత్‍కవీశ్వరుల్ కృపన్

వరాల వర్షమట్లు హృద్య పద్యముల్ పఠింపగా,

విరించి వారి మధ్య నిల్చె వింత కోర్కెఁ జూచుచున్

సరస్వతీ స్వరూపులంచు చంచలించు మేనుతో.

మత్తకోకిల వృత్తము :- { అన్నపూర్ణాష్టకం సుమారు ఈ ఛందస్సుకు దగ్గరగా ఉంటుంది.}

" ర - స - జ - జ - భ - ర." అను గణములు ప్రతీ పాదమున వచ్చును.

{ UIU - IIU - IUI - IUI - UII - UIU.}

యతి 11 వ అక్షరము.

ప్రాస నియమము కలదు.

ఉదాహరణ:-

శ్రీ కృపాంభుధి. భక్త కోటిని చిత్తమందు గణించుచున్

ప్రాకృతంబగు దోష సంహతిఁ బాపుచున్ దయఁ గాంచుఁగా !

ప్రాకృతంబగు దోషముల్ గని పాయుటొప్పగు. సజ్జనుల్

"శ్రీ కృతజ్ఞులఁ గాచుఁ" గావున చిత్త మొప్పుఁగ నుండుతన్.

తరళ వృత్తము:- { మత్తకోకిల వృత్తమే మొదటి గురువు 2 లఘువులవడంతో ఈ తరళం గా రూపు దాల్చింది.}

" న - భ - ర - స - జ - జ - గ." అను గణములు ప్రతీ పాదమున వచ్చును.

{ III - UII - UIU - IIU - IUI - IUI - U.}

యతి 12 వ అక్షరము.

ప్రాస నియమము కలదు.

ఉదాహరణ:-

సిరి కృపాంభుధి. భక్త కోటిని చిత్తమందు గణించుచున్

పర కృతంబగు దోష సంహతిఁ బాపుచున్ దయఁ గాంచుఁగా !

పర కృతంబగు దోషముల్ గని పాయుటొప్పగు. సజ్జనుల్

"సిరి కృతజ్ఞులఁ గాచుఁ" గావున చిత్తమొప్పుఁగ నుండుతన్.

కవిరాజ విరజితము అను వృత్తము:- { అయిగరి నందిని ----- అనే అమ్మవారి ప్రార్థనా స్తోత్రం ఈ వృత్తంలోనే వ్రాయఁబడింది.}

"న - జ - జ - జ - జ - జ - జ - లగ." అను గణములు ప్రతీ పాదమునవచ్చును.

{ III - IUI - IUI - IUI - IUI - IUI - IUI - IU }

యతి 1తో - 8వ - 14వ - 20వ అక్షరములు.

ప్రాస నియమము కలదు.

ఉదాహరణ:-

సమరస భావము, సద్గుణ శీలము, సౌమ్య ప్రవృత్తియు, సంపదలై

యమరిన వారిని హాయిగ చూడగ నద్భుత రీతిని యా కవితల్

సుమధుర రీతిని చొప్పడు, నిక్కము సూక్తుల యట్టుల శోభిలుచున్.

సుమధుర ఛందము సొంపుగ పాడగ శోభిలఁ జేయును సుశ్రూతమై.

చూచారు కదండి. తెలుసుకోవాలనుకొనేవారికి ఎంత చెప్పినా చెప్పాలనే ఉంటుంది. వారికి ఎంత తెలుసుకొన్నా తెలుసుకోవాలనే ఉంటుంది కదండీ? మీరుత్సాహ పడితే మరి కొన్ని విషయాలు సావకాశంగా తెలియఁ జేయఁ గలనని మనవి చేయుచున్నాను.

జైహింద్.

మంత్ర పుష్పాదులు. అత్యద్భుత స్తోత్ర రాజము.

రాజ హంస వృత్తము:-

" త - త - త - త - త - త - త - త - గ." అను గణములు వచ్చును.

"UUI - UUI - UUI - UUI - UUI - UUI - UUI - UUI - U."

{ ఇందు చివర గల 1 లఘువు, 1 గురువు తీసివేస్తే పద్మనాభ వృత్తమౌతుంది.}

యతి 13 వ క్షరము.

ప్రాస నియమము కలదు.

శ్రీ మన్మహాదేవు డీ సృష్టిఁ గావించి శ్రీ దేవితో పాల సంద్రాన నుండెన్గదా!

యీమాయ లోఁ జిక్కియా దేవు భావంబు నెన్నంగ సాధ్యంబె?కానన్ సదా

శ్రీమన్మహామంత్ర రాజంబు నాలించి, చెన్నొందు వారల్ కృతార్థుల్. వినం

ప్రేమన్ పఠింపన్, మదిన్ దేవు గాంచన్ సమీపంబునందుంచితిన్ దీనినిన్.

అధ్యాత్మ భావ తత్పరుల కందుబాటుగా ఉపయుక్తంగా ఉంటుందని భావిస్తున్నాను.

వారికి ఇది ఏమాత్రము సంతృప్తిని కలిగించఁ గలిగినా, పరమాత్మానుభూతి కలిగించఁగలిగినా ఈ నా కృషి సఫలీకృతమైనట్టే. జై శ్రీరామ్.

జైహింద్.

మేలిమి బంగారం మన సంస్కృతి 66.

శ్లోll
అద్రోహః సర్వ భూతేషు కర్మణా మనసా గిరా.
అనుగ్రహశ్చ దానంచ సతాం ధర్మః సనాతనః.౮౭
(మహా భారతము - వన పర్వము - ౨౯౭ - ౩౫.)
తే.గీll
త్రికరణముల చేతను ప్రాణులకు నపకృతి
చేయకుండుట; ప్రేమతో చేర్చుకొనుట;
తనకు కలిగిన దానిని దాన మిడుట;
మన సనాతన ధర్మంబు. మఱవఁ దగదు.
భవము:-
మనోవాక్కాయములచే యే ప్రాణి పట్లను ద్రోహమును చేయ కుండుటయే కాక; అందరి యెడలను ప్రేమాదరములను కలిగి యుండుట; తనకు కలిగిన దానిని యెల్లరకు దానమిచ్చుచుండుట; అనునవి సనాతనమైన ధర్మములు.

ఆర్యులారా! ఈ క్రింది శ్లోకాదులు మేలిమి బంగారం మన సంస్కృతి3 లో ఉన్నవి పునరుక్తమైనవి.

మిత్రులారా! మీరు నమ్మినా నమ్మకపోయినా మన పెద్దలు చెప్పినవన్నీ కూడా నగ్న సత్యాలు. సత్ఫలదాయకాలు.

ఔనో కాదో ఈ క్రింది విషయాన్ని చూసి మీరే చెప్పండి.

శ్లో:-

సంతోష స్త్రిషు కర్తవ్యః " కళత్రే - భోజనే - ధనే."

త్రిషు చైవ న కర్తవ్యః " దానే - తపసి - పాఠనే."

ఆ:-

భార్య - భుక్తి - ధనము ప్రాప్తించునవి గాంచి

సంతసింప వలయు సమ్మతించి.

తపము - దాన - పఠన తాదాత్మ్యు లయ్యును

సంతసింప రాదు సరస మతులు.

భావము:-

భార్య విషయమున, భోజనము విషయమున, ధనము విషయమున మనకు లభించిన దానితోనే మనము సంతోషము పొందవలెను.

దానము చేయు విషయమున, తపస్సు చేయు విషయమున, చదువుట విషయమున ఎంత ఎక్కువైననూ అది తక్కువ గానే భావించి సంతోషపడిపో కూడదు.

ఇప్పుడు నా అభిప్రాయంతో మీరూ ఏకీభవించకుండా ఉండలేరు కదూ!

జైహింద్.

మేలిమి బంగారం మన సంస్కృతి 65.

ఋగ్వేద వాగమృతము:-

మహనీయులైన మన పూర్వీకులు మానవ మనుగడ సుఖతరం కావాలని, సమాజం శాంతి భద్రతలకాలవాలవాలమవాలని, అలా ఉండాలంటే కోప తాపాలకు దారివ్వ కూడదని, అలా దారివ్వకూడదూ అంటే కోపతాపాలు కలిగించేవి చూడకూడదని, మాటాడకూడదని, విన కూడదని, చెప్పారు. అలాచెప్పడంలో గాంధీ మహాత్ముడు మూడుకోతుల్ని చూపించాడు. ఆవిషయం మనకు తెలిసినదే. ఐతే అంతకు ముందే మన పూర్వీకులు ఈ విషయంలో చేసిన ప్రార్థన చూడండి.

మంత్రము:-
భద్రం కర్ణేభిః శృణుయామ దేవాః
భద్రం పశ్యే మాక్షభి ర్యజత్రాః
స్థిరై రంగై స్తుష్టువాగ్ంసస్తనూభిః

తే:-
చెవులు భద్రంబె విను గాక జీవితమున.
కనులు కను గాక కల్యాణ కరము లెపుడు.
సాంగ మంత్రంబులను గొల్చి సకల దైవ
తములను, సుఖము లను పొంది తనియు గాక.

భావము:-
మనము మన చెవులతో భద్రమును గొలిపెడి మాటలనే వినుదుము గాక.
మన కనులతో మంగల ప్రదము లగునవియే చూచెదము గాక.
సాంగోపాంగముగా మంత్రములతో దేవతలను స్తుతించి సమస్త సుఖములను పొందుదుము గాక.

వ్యశేషు దేవహితం యదాయుః
స్వస్తిన యింద్రో వృద్ధశ్రవాః

తే:-
దేవతాళిని గొల్చుచు తేజరిలగ
తగిన ఆయువునొందుత. తాను గురుని
నుండి పొందిన యింద్రుడు నిండు గాను
ఆయువునొసంగి మనలను కాయు గాక.

భావము:-
ప్రస్తావింప బడిన దేవతా సమూహమును స్తుతించుటకు తగిన ఆయుర్దాయమును మనము పొందుదుము గాక.
బృహస్పతి యొద్ద గ్రహించిన యింద్రుడు మనకు పరి పూర్ణమైన ఆయువును ప్రసాదించి కాపాడును గాక.

స్వస్తినః పూషా విశ్వ వేదాః
స్వస్తినస్తార్క్ష్యో అరిష్ఠ నేమిః
స్వస్తినో బృహస్పతిర్ దదాతు.

తే:-
రవి యుపాసనాశయమును రగులఁ గొల్పు.
గరుడుఁ డొసఁగుత పూజ యోగ్యతను మనకు.
దేవుడగు గురుఁడొసఁగుత దివ్య శుభము.
మంచి నెన్ని మనకు కలిగించుగాక.

భావము:-
సకల దేవతా స్వరూపుడగు సూర్యుడు మనకు స్వస్తిని అనగా ఉపాసన యొక్క ఆశయము ప్రసాదించును గాక.
వజ్రాయుధముచే కొట్టబడిన గరుత్మంతుడు మనకు స్వస్తిని అనగా పూజించుటకు తగిన యోగ్యతను ప్రసాదించును గాక.
భగవంతుడగు బృహస్పతి మనకు స్వస్తిని అనగా శుభములను ప్రసాదించును గాక.

చూచారు కదా ఋగ్వేదంలో భగవంతుని మనము ప్రార్థించే అంశాన్ని. మనమెప్పుడూ మంచినే చూడాలి. చెడ్డ జోలికి పోకూడదు.
మంచినే వినాలి. చెడ్డ జోలికి పోకూడదు అనే విషయం చెప్పడంలో కూడా ఎక్కడా చెడ్డ అనే పదప్రయోగం కూడా చేయలేదంటే చెడ్డ అనే పదమే మన జీవిత నిఘంటువులో ఉండ కూడదనే భావం మనకు స్ఫురించకుండా వుంటుందా.
దీనిలో యిమిడియున్న విషయాన్ని గ్రహించి మనం నిరంతరం మంచిమార్గంలోనే పయనిద్దామామరి?

జైహింద్.

మేలిమి బంగారం మన సంస్కృతి 64.

శీల మహా ధన మహిమ:-

మన భారత మాత గర్భాన పుట్టిన మహనీయుల మహద్వచనము లమోఘములు, నిత్యమూ అనుసరణీయములు. మన సంస్కృతికి అద్దం పట్టే ఈ క్రింది శ్లోకాన్ని చూద్దాం.

శ్లో:-
మాతృవత్ పర దారేషు
పర ద్రవ్యేషు లోష్ఠవత్
ఆత్మవత్ సర్వ భూతేషు
యః పశ్యతి స పండితః.

క:-
పరసతులను తన తల్లిగ
పర ధనమును మట్టివోలె పరికించుచు తా
పరులను తన వలె తలచుచు
చరియించెడి వాడె భువిని సత్ పండితుడోయ్.

భావము:-
భూమిపై యెవరయితే పర కాంతలను తన కన్న తల్లిగాను, పరుల ధనాదులను మట్టి వలెను, చూచే జ్ఞానం కలిగి ప్రవర్తిస్తూ అన్ని ప్రాణులను తనవలె భావిస్తూ అత్యద్భుతమైన సత్ప్రవర్తన కలిగి వుంటారో వారే నిజమయిన పండితులు.

మనకు ఎంత పాండిత్యమున్నా సచ్ఛీలమనే సంపద లేనట్లయితే మన పాండిత్యము బూడిదలో పోసిన పన్నీరే సుమా. మనవద్ద శీల సంపద వున్నట్లయితే అంతకుమించిన గౌరవప్రదమైన ధనము వేరే లేదుకదా!
పోతన ప్రహ్లాదుని గూర్చి చెప్పుతూ
" కన్నుదోయికి నన్య కాంత లడ్డంబైన మాతృ భావము జేసి మసలువాడు "
అని చెప్పాడు.

అర్ధ రహితమైన ఆలోచనలతో అంతరాత్మ చెప్పుతున్నా వినకుండా అన్య కాంతలను పొందాలని ప్రయత్నిస్తూ, అన్యుల ధనాదులు అయాచితంగా తనకే సంప్రాప్తమవాలని నిరంతరం కాంక్షిస్తూ, ఆ కారణంగా నిత్యం పరుల ఉసురు పోసుకొంటూ పాప కూపంలోకి కూరుకుపోవడం మంచిదంటారా? లేక మహాత్ముల మహనీయ వచనములననుసరించడం ద్వారా అనంతమైన అత్మానందాన్ని పొందుతూ అందరి మన్ననలనూ అందుకోవడం మంచిదంటారా? మనం బాగా ఆలోచించుకొంటే మనమెలా ప్రవర్తించాలో మనకు తెలియకపోతుందా? కర్తవ్యం మన చేతుల్లోనే వుంది . మరి ఆలోచన గలిగి ప్రవర్తిద్దామా?

జైహింద్.

మేలిమి బంగారం మన సంస్కృతి 63.

సుజనులారా!

మనమెంత మంచిగా ఉన్నను మనకెదురయే దుస్థితులు మన కాందోళన కలిగిస్తున్నప్పుడు బాధపడుతూ ఆభగవంతుణ్ణి ప్రార్థిస్తాము.

పూర్వ జన్మమునకాని, ఈజన్మలోనే కాని మనము చేసుకొన్న కర్మఫలములే మన సంపాదనగా మన వెంట నంటి ఉంటాయి. దానినే పెద్దలు నుదుటి వ్రాత అంటారు. దానినెవరో మనకివ్వలేదు.మనం సంపాదించుకొన్నదే. దానిని ఎవ్వరూ మార్చలేరు. అనుభవింప వలసినదే అనే విషయాన్నే ఈ క్రింది శ్లోకం మనకు తెలియఁ జేస్తుంది. గమనించండి.

శ్లో:-

హరిణాపి హరేణాపి బ్రహ్మణాపి సురైరపి

లలాట లిఖితా రేఖా పరిమార్ష్టుం నశక్యతే.

క:-

హరియును హరుడును బ్రహ్మయు

సురగణములు కూడ తగరు చుట్టిన కర్మల్

చెరుపగ. కర్మ ఫలంబులు

నరు నుదుటను గలుగు వ్రాత, నడపును సతమున్.

భావము:-

నుదుట వ్రాయఁబడిన వ్రాతను చెరుపుట హరి హర బ్రహ్మలకు గాని, దేవతలకు గాని సాధ్యము కాదు కదా !

మీరు నమ్మినా నమ్మకపోయినా ఇది మాత్రం సత్యమనే అనిపిస్తోంది.

జైహింద్.

మేలిమి బంగారం మన సంస్కృతి 62.

సంసారిక మైన ఈతి బాధలతో సతమతమయే మనకు సుఖాన్నందించఁ గలిగిన వాటిని గూర్చి తెలుసుకొందాం.

శ్లో:-
సంసార విష వృక్షస్య ద్వే ఫలే అమృతోపమే.

కావ్యామృత రసాస్వాదః, సంగమస్సజ్జనైస్సహ.

తే:-

అరయ సంసార విష వృక్ష మందు గలవు

రెండు ఫలములు సుధలొల్కు నిండుగాను.

కావ్య సుధఁ గ్రోలు టొక్కటి ఘనతరముగ.

సజ్జనుల సంగ తొక్కటి చక్క నొప్పు.

భావము:-

సంసారమనే యీ విష వృక్షమున రెండే రెండు అమృత ఫలము లున్నవి.

మొదటిది కావ్యామృత రసాస్వాదనమున్నూ, రెండవది సత్ పూరుష సహ వాసమున్నూ.

కావున చక్కని కావ్య పఠనము, సాజ్జన సాంగత్యము తప్పక చేయుట మనకు యుక్తము.

జైహింద్.

చెప్పుకోండి చూద్దాం 21.

సద్గుణ సంపన్నులారా!

మన పూర్వీకులు తమ మేధా సంపత్తితో అనేకానేక ప్రక్రియలలో మన ఆలోచనా పటిమను పెంవగలిగే విధంగా ప్రశ్నల రూపంలోను, కథల రూపంలోను, పెక్కువిధాలైన సాహితీ ప్రక్రియల ద్వారా అనేక అంశాలు మన ముందుంచారు.

మనం వాటిని మన కళ్ళ ముందే పెట్టుకొని, కనీసం వాటి విషయమై ఆలోచించడానుకైనా సమయం చిక్కక పేటికాంతర్గతరత్నాలలాగా వాటిని వదిలేస్తున్న మాట వాస్తవం కాదంటారా?

మన ముందు తరాల వారికి మనం స్వంతంగా ఇవ్వ గలిగే సాహితీ సంపద మనం గడింప లేకున్నా పూర్వీకులొసగిన దైనా వారికందే విధంగా చేయక పోవడం సోచనీయమౌతుందని భావించి, చదివేవారున్నా లేకున్నా స్పందించే హృదయాలున్నా లేకున్నా నేను మాత్రం ఈ ఆంధ్రామృతం లో నాకు లభించినవన్నీ నిక్షిప్తం చేస్తున్నాను. మీకు సమాధానాలు తెలియకపోయినా సమాధానాలనా లాలోచించగలిగేందుకు భావితరాలవారి కొఱకు భద్రపరచ వలసిన అవసరం ఉందనుకొంటున్నాను. ఆతరువాత మీ యిష్టం.

ఈ టపాద్వారా మీ ముందుకొస్తున్న సీసాన్ని చదవండి.

సీ:-

ఆద్యంత మధ్యమాంతాది వర్ణంబుల - తేటి రక్కసిరాజు తెలియ తల్లి.

ఆద్యంత మధ్యమాంతాది వర్ణంబుల - శివునిల్లు వరిచేను క్షీర ధార.

ఆద్యంత మధ్యమాంతాది వర్ణంబుల - భార్యయు ఖడ్గంబు పాదపంబు.

ఆద్యంత మధ్యమాంతాది వర్ణంబుల - మార్వన్నె యీటె ధూమంబు తనరు.

తే:-

అన్నిటికిఁ జూడ మూడేసి యక్షరములు

మొదలు తుదలును, నడి తుది, మొదలు నడుము,

ప్రాణ రక్షను, లతలను, పాదపముల

పరికరము లంద నిలుపుడు పదములన్ని.

చూచారు కదా? ఇక సమాధానం మీరు పంప గలరని ఆశిస్తూ ఎదురు చూస్తున్నాను.

జైహింద్.