పరమేశ్వరీ స్తవము (దండకము)
మహాదేవుడున్ నీవు నెల్లప్పుడున్ వాక్కునున్ భావమున్ రీతి నన్యోన్య సంపృక్త గాత్రంబుతో నొప్పు మీ లీల లోకత్రయీ భావ్యమై, సర్వ సంసేవ్యమై, నవ్యమై, దివ్యమై, భవ్య యోగానుసంధాయకంబై విరాజిల్లుచుండున్ జగద్గీతకీర్తీ! సదానందమూర్తీ! మహాభక్తి భావంబుతో నిన్ను సేవించి, నీ నిండు వాత్సల్యమున్ గాంచు పుణ్యాత్ములన్ బ్రోచి, సౌఖ్యంబు చేకూర్చి, శోకంబు పోదీర్చి, నీ పాద పద్మంబులన్ జేర్చు నో యమ్మ! మా చింతలన్ దీర్చుమా, శాంతి సౌఖ్యములన్ గూర్చుమా, నిత్య కళ్యాణ యోగంబు సిద్ధింపగా చేయుమా, శంభు ప్రాణేశ్వరీ!, రాజ రాజేశ్వరీ!, సర్వలోకేశ్వరీ! ప్రేమరూపా!, నమస్తే, నమస్తే, నమస్తే, నమః.
రచన:- పండిత నేమాని.
జైశ్రీరాం.
జైహింద్.
వ్రాసినది
Labels:
4 comments:
ఛందాలలో నాకెంతో ఇష్టమైనది ‘దండకం’. మనోహరమైన లయతో, శబ్దాడంబరంతో మనోల్లాసాన్ని కలిగించే ‘పరమేశ్వరీ స్తవము’ రచించిన నేమాని వారికి ధన్యవాదాలు. వారి దండకాన్ని ప్రకటించే అదృష్టాన్ని దక్కించుకున్న ‘ఆంధ్రామృతం’ బ్లాగును, చింతా వారిని అభినందిస్తున్నాను.
దండకము చాలా ప్రశస్తంగా ఉన్నది గురువుగారు,
పోత అనే పదానికి పడవ అనే అర్థం ఏదైనా ఉన్నదాండీ! నిఘంటువు చూశాను. దొరకలేదు.
మందాకినీ గారికి శుభాశీస్సులు.
పోత అనే సంస్కృత పదమునకు తత్సమము పోతము అవుతుంది. శబ్దరత్నాకరములో ఈ పదమునకు పడవ అనే అర్థము ఇచ్చేరు.
శంకరాచార్యులవారు "భవాబ్ధిపోత" అని శ్రీ లక్ష్మినరసింహ కరావలంబ స్తోత్రములో వాడేరు - ఇక్కడ కూడ "పడవ" అనే అర్థము.
పండిత నేమాని
గురువుగారు,
నమస్కారములు.
ఇప్పుడు తెలిసినది. ధన్యవాదములు.
కామెంట్‌ను పోస్ట్ చేయండి
ఆంధ్రామృత బ్లాగ్ వీక్షకులకు ధన్యవాదములు.