లక్ష్మీసహస్రం. 54వ శ్లోకం. 410 - 414. పద్య రచన చింతా రామకృష్ణారావు. పద్య గానం శ్రీమతి సుశీలాదేవి భాగవతారిణి.

 జైశ్రీరామ్.

శ్లో.  వాయుమండలమధ్యస్థా వ్యోమమండలసంస్థితా ।

చక్రికా చక్రమధ్యస్థా చక్రమార్గప్రవర్తినీ ॥ 54 ॥ 

410. ఓం *వాయుమణ్డలమధ్యస్థా*యై నమః.

నామ వివరణ.

వాయుమండల మధ్యమున ఉండు జనని లక్ష్మీదేవి.

తే.గీ.  *వాయుమణ్డలమధ్యస్థ! * పాయక నను

నాత్మలోనుండి నడిపించు మహరహంబు,

ప్రాణవాయువై జగతికి ప్రభను పెంచు,

వందనంబులందించెద నందుకొనుము.

411. ఓం *వ్యోమమణ్డలసంస్థితా*యై నమః.

నామ వివరణ.

ఆకాశమండలమున ఉండు తల్లి మన అమ్మ.

తే.గీ.  *వ్యోమ మండల సంస్థితా*!వ్యోమమదియు

కలిగె నాలోన నీ వట వెలుగుమమ్మ,

కవితవై ప్రభవించి యాకాశమంత

జ్ఞానసంపత్తి నొసగుమా కమల నయన!

412. ఓం *చక్రికా*యై నమః.

నామ వివరణ.

దివ్యమయిన చక్రము కలిగిన తల్లి, శ్రీచక్రస్వరూపిణి అమ్మ.

తే.గీ.  *చక్రికా! * గనుమమ్మ సంసార చక్ర

మధ్యమున నేను నలుగుచు మహితవయిన

నిన్ను సేవింప లేకుంటి సన్నుతముగ,

నన్ను గాపాడుమా కృపన్ మిన్నగాను.

413. ఓం *చక్రమధ్యస్థా*యై నమః.

నామ వివరణ.

శ్రీచక్ర మధ్యభాగమున ఉండు జనని.

తే.గీ.  చక్రమధ్యస్థ! యీ కాల చక్రమునను

నలుగు సామాన్య జనులకు వెలుఁగుఁ జూపి

నీవె కాపాడుమమ్మరో భావగమ్య!

వందనంబులు చేసెద నందుకొనుము.

414. ఓం *చక్రమార్గప్రవర్తిన్యై* నమః.

నామ వివరణ.

శరీర చక్రముల మధ్య ప్రయాణించు తల్లి.

తే.గీ.  *చక్రమార్గ ప్రవర్తినీ! * వక్రగతిని

మాపి,  నాలోన కృపతోడ మసలుమమ్మ,

నిత్యమాత్మన్ బ్రకాశించు స్తుత్యవనఁగ,

వందనంబులందించెద నందుకొనుము. 

జైహింద్.

Print this post