లక్ష్మీసహస్రం. 49వ శ్లోకం. 373 - 379. పద్య రచన చింతా రామకృష్ణారావు. పద్య గానం శ్రీమతి సుశీలాదేవి భాగవతారిణి.

 జైశ్రీరామ్.

శ్లో.  వాసవీ వారుణీసేనా కులికా మంత్రరంజనీ ।

జితప్రాణస్వరూపా చ కాంతా కామ్యవరప్రదా ॥ 49 ॥ 

373. ఓం *వాసవ్యై* నమః.

నామ వివరణ.

ఇంద్రుని యొక్క శక్తి స్వరూపిణి అమ్మ.

తే.గీ.  *వాసవీ!* ఘన నుతిభాస! భాగ్యమగుచు

నా మనంబున కొలువుండి ప్రేమ మీర

సద్గుణంబులఁ గొల్పుమా సరస మతిని,

వందనంబులు చేసెద నందుకొనుము.

374. ఓం *వారుణీసేనా*యై నమః.

నామ వివరణ.

పడమటదిక్కున భయంకరమైన సైన్యమును కలిగియున్న జనని మన అమ్మ.

తే.గీ.  *వారుణీసేన!* దుష్టులన్ బ్రబలనీక

కట్టడినిచేయుమమ్మరో! కరుణ చూపి,

దుష్టభావనల్ పాపుమ శిష్టపోష!

వందనంబులు చేసెదనందుకొనుము.

375. ఓం *కులికా*యై నమః.

నామ వివరణ.

ఉత్తమ కులీన అమ్మ.

కం.  *కులికా!*  చింతావంశజ

మలినరహిత భక్తుఁడనని మన్నించుము, నా 

యిలవేల్పు వీవె, కనుచున్

వెలయింపుము భక్తి కవిత వెల్లువ కాగన్.

376. ఓం *మన్త్రరఞ్జన్యై* నమః .

నామ వివరణ.

మంత్రముచే రంజించు తల్లి మన అమ్మ.

తే.గీ.  *మన్త్రరఞ్జనీ! *  నీ నామ మంత్రములను

మనసునందున భావించి మనన జేసి

నీకునర్పింతునమ్మ! గణించి నన్ను,

వందనంబులు చేసెద నందుకొనుము.

377. ఓం *జితప్రాణస్వరూపా*యై నమః.

నామ వివరణ.

జయించఁబడిన ప్రాణ స్వరూపము కలది అమ్మ.

కం.  పరమాత్మవె నీవమ్మా!

కరుణామయివమ్మ మమ్ము కాపాడుమిలన్,

నిరతము నిన్నే గొలిచెద

వర *జితప్రాణస్వరూప!* వందనమమ్మా!

378. ఓం *కాన్తా*యై నమః.

నామ వివరణ.

తేజస్స్వరూపిణి మనఅమ్మ.

కం.  అంతా నిన్నే కొలుతురు,

*కాంతా!* మనసార, శుభము కాదనకిమ్మా,

సంతోష మొసగు తల్లివి,

సాంతము నను కావుమమ్మ సజ్జన భాసా!

379. ఓం *కామ్యవరప్రదా*యై నమః.

నామ వివరణ.

కోరిన కోరికలను ప్రసాదించు జనని మన అమ్మ.

తే.గీ.  గౌరవంబుగ నిను మదిన్ గలయఁ జూచి

యాత్మలో సేవ చేయగ నాశపడుదు,

 కనుచు *కామ్యవరప్రదా!* కనికరించు,,

వందనంబులు చేసెద నందుకొనుమ.

జైహింద్.

Print this post