అనుద్వేగకరం వాక్యం సత్యం - ...17 - 15...//...మనః ప్రసాదః సౌమ్యత్వం - ...17 - 16,,,//.....సప్తదశోధ్యాయము - శ్రద్ధాత్రయవిభాగయోగము

 జైశ్రీరామ్.

శ్లో.  అనుద్వేగకరం వాక్యం సత్యం ప్రియహితం చ యత్|

స్వాధ్యాయాభ్యసనం చైవ వాఙ్మయం తప ఉచ్యతే. || 17-15 ||

తే.గీ.  వాక్కులుద్వేగరహితమై, వరలుచు, ప్రియ,

సత్య, హిత యుక్తమై, పరులకు చక్కనొప్పు

నట్లుపలుకుట, స్వాధ్యాయ మరసి నేర్వ,

వాచికంబగు తపమది, పార్థ! వినుమ.

భావము.

ఇతరులను బాధింపనిదీ, సత్యమూ, ప్రియమూ, హితమూ అయిన వాక్కు, స్వాధ్యాయాన్ని అభ్యసించడమూ ఇది వాచికమైన తపస్సు.

శ్లో.  మనః ప్రసాదః సౌమ్యత్వం మౌనమాత్మవినిగ్రహః|

భావసంశుద్ధిరిత్యేతత్తపో మానసముచ్యతే.  || 17-16 ||

తే.గీ.  సుప్రసన్నచిత్తము,మంచి సుగుణచయము,

మౌనమును, నిగ్రహంబును, మహితభావ

శుద్ధి, మానసికతపస్సు, చూడ ఘనము.

నీవు గ్రహియింపుమర్జునా! నేర్పు మీర.

భావము.

ప్రసన్నమైన మనస్సూ, మంచితనమూ, మౌనమూ, మనోనిగ్రహమూ, శుద్ధమైన భావాలూ-ఇవి మానసిక తపస్సు.

జైహింద్.

Print this post