నేటి మేటి పద్యములు.1.

జైశ్రీరామ్.

ప్రియ సహోదరీ సహోదరులారా!  మన ఆంధ్ర మాత కడుపార గన్న ముద్దు బిడ్డ యైన అభినవ వేమన మన నండూరి రామ కృష్ణమాచార్యుల వారు. 

వారి పద్యాలు సజ్జనులకు హృద్యాలు. సత్ కవి జన వేద్యాలు. పిల్లలకివి బోధ్యాలు.

మనం రోజుకొక్క పద్యమైనా చదివి కంఠస్థం చేయగలిగితే లోకజ్ఞానము, వివేకము తప్పక కలుగుతుందికాబట్టి .

మనం రోజూ కొన్ని పద్యాలైనా నేర్చుకుంటే బాగుంటుందని మీముందు  ఉంచే ప్రయత్నం చేస్తున్నాను. నా అభిప్రాయమును మన్నించ గలరని ఆశిస్తున్నాను.

నేటి మేటి పద్యములు.1.

1) అచ్చమైన కవిత ఆచు వేయక ముందె  -  నాట్యమాడు ప్రజల నాల్కలందు.

ఘన కవనము తరచు గ్రంథాలయాలలో  -  గాఢ నిద్ర పోవు కనులు మూసి.

2) అచ్చమైన ప్రతిభ అవకాశములు లేక  -  రక్తి కట్టబోదు బ్రతుకు లోన.

అడవి వెన్నెల సిరి, అబ్దిలో రత్నాలు  -  ఎవరి కుపకరించు అవని లోన.

3) అరసి ఎవడు చేయు ఆర్త రోగికి సేవ?  -  ఎవడు దానమిచ్చు ఎఱిగి పాత్రు?

సత్య మెవడు చాటు సాక్షియై తెగువతో  -  ధరణి మీద అతడు ధార్మికుండు.

4) అరుగుదెంచె సభకు అధిక పాఠము వోలె  -  అతని పేరు లేదు అచ్చులోన.

గ్రంథ కర్తమీద గౌరవంబది హెచ్చె  -  వచ్చె శోభ అతని వలన సభకు.

5) అందగత్తెయైన అమ్మాయి గావచ్చు.  -  అద్దమొక్కటామె కవసరంబు.

తెలివితేటలున్న తేజస్వి కావచ్చు  -  ఉండవలెను స్నేహితుం డొకండు. 

(సశేషం)

జైహింద్.

Print this post