నమస్కార ప్రియో భానుః

 జైశ్రీరామ్.

జపా కుసుమ సంకాశం కాశ్యపేయం మహా ద్యుతిమ్, 

తమోఘ్నమ్, సర్వ పాపఘ్నం, ప్రణతోస్మి దివాకరమ్.

భారతీయ సహోదరులారా! 

ఆరోగ్యం భాస్కరాదిచ్ఛేత్ అన్నారు పెద్దలు. అటువంటి ఆ భాస్కరుఁడయిన సూర్య భగవానుని మనము ప్రసన్నం చేసుకో కలిగితే ఆరోగ్యవంతులుగా మనం హాయిగా జీవిస్తాం. 

ఐతే ఆ సూరుఅ భగవానుని ప్రసన్నం చేసుకోవడానికి మనకు 

నమస్కార ప్రియో భానుః అన్నారు కదండీ పెద్దలు. అందుకని మనము ఆ కర్మసాక్షిని మనసులో నిలిపి నమస్కార పూర్వ్కముగా ప్రార్థిస్తూ, ఈ క్రింది దండకం చదివితే ప్రయోజన బాహుళ్యముంటుందనడంలో సందేహం లేదు కదండీ! మరైతే ఇంకెందుకు ఆలస్యం? 

చూడండి ఈ క్రింది ప్రఖ్యాతమైన దండకాన్ని.

శ్రీ సూర్యనారాయణ దండకం.

శ్రీ సూర్యనారాయణా,వేదపారాయణా,లోక రక్షామణీ,దైవచూడామణీ,ఆత్మరక్షామణీ, 

నమ:పాప శిక్షా,నమో విశ్వకర్తా,నమో విశ్వభర్తా,నమో దేవతా చక్రవర్తీ,పరబ్రహ్మమూర్తీ, త్రిలోకైకనాధాథినాథా,మహాభూతభేదంబులున్నీవయై బ్రోచునెల్లప్పుడున్,భాస్కరా హస్కరా,పద్మినీవల్లభా, వల్లకీ గానలోలా,త్రిమూర్తిస్వరూపా,విరూపాక్షనేత్రా,మహదివ్యగాత్రా,అచింత్యావతారా,నిరాకారధీరా, పరాకయ్యయోయయ్య, తాపత్రయాభీలదావాగ్నిదుర్ధాంతనిర్దూత,నిస్సారగంభీర సంభావితానేక,నీరంబులన్‌దాకి ఏకాకినై చిక్కి ఏదిక్కులం గానగాలేకయున్నాడ నీవాడనో తండ్రీ,జేగీయమానాయ,కటాక్షంబులన్ నన్ను కృపాదృష్టి వీక్షించి రక్షించి వేగన్ కృపాదృష్టిచేతన్,మునీంద్రాదివంద్యా,జగన్నేత్రమూర్తీ,ప్రచండ స్వరూపుండవైయ్యుండి చండాంశు సారధ్యమున్,గుంటియశ్వంబు, దానొంటి చక్రంబుదాల్చి, మార్తాండరూపుండవై,చండవా రాక్షసాధీశులన్,గాంచి కర్మానుసారంబుగా దోషంబులన్ దృంచి, కీర్తిప్రతాపంబులన్ మించి,నీదాసులన్ గాంచి ఇష్టార్థముల్ కూర్తువో,దృష్టివేల్పా,మహాపాపకర్మాలకు న్నాలయంబైన ఈ దేహహభారంబు భారంబుగానీక,సూర్యోత్తమా,శ్రీ సహస్రాంశుడా పట్టి నీ గతిన్ కీర్తింపనే నేర్తునే,ద్వాదశాత్మా

దయాళుత్వమున్,దత్వమున్ జూపి నా యాత్మ ఖేదంబులన్ బాపి,పోషింప నీ వంతు,నిన్నున్ ప్రశంసింప నా వంతు,నిన్ను శేషభాషాధిపుల్ గానగాలేరు, నీ దివ్యరూపప్రభావంబు గానంగ నేనెంత నెల్లపుడున్,స్వల్పజీవుండనౌచున్,మహాకష్టుడన్,నిష్టయున్ లేదు,నీ పాదపద్మంబులే సాక్షి,దుశ్చిత్తమున్ బాపి నిశ్చింతగన్ చేయవే,కామితార్థప్రదా,ఈ మహిన్ నిన్ను కీర్తించి విన్ననే మహాజన్మాంతర వ్యాధి, దారిద్ర్యముల్ పోయి,కామ్యార్ధముల్ కొంగుబంగారు తంగేడు జున్నయి,ఫలించున్ గదా భాస్కరా...

శ్రీ సూర్యనారాయణా,మహాదేవదేవా,నమస్తే నమస్తే నమ:   

చదివారు కదండీ! మీరు గమనించారో లేదో ! ఈ దండకం అనే ప్రక్రియ పఠించే సమయంలో అందు ఇమిడియున్న ఛందస్సు కారణంగా అది పఠించే టప్పుడు మన శరీరంలీని నాడీమండలాన్ని ఉత్తేజ పరుస్తూ అప్రమత్తం చేస్తుందండి. తత్కారణంగాననుకొంటాను అనారోగ్యాన్ని సమర్థవంతాగ ఎదుర్కొన గలిగి ఆరోగ్యాన్ని కాపాడుకో గలుగుందనిపిస్తుంది. మీరూ గమనించండి.

నమస్తే.

జైహింద్.

ఆంధ్ర భారతి ముద్దు బిడ్డ శ్రీ మిమిక్రీ శ్రీనివాసుకు అభినందనలు

జై శ్రీరామ్.
సహృదయ ఆంధ్రామృతాభిమానులారా! మీ సహృదయతకు నా కై మోడ్పులు.
గీ:-
సార హీన మైన సంసారమందున
కళలు కాస్త మదికి వెలుగు నిచ్చు.
వాఙ్మనోజ్ఞ శ్రీని వాసరావును గూర్చి
తెలుప నుంటినయ్య. తెలియుఁడయ్య.
అంతర్ జాతీయ స్థాయిలో శబ్దానుకరణ (మిమిక్రీ) విద్య అత్యధిక సమయము  ప్రదర్శించి గిన్నీస్ వరల్డ్ రికార్డ్ చరిత్ర పుటలలో ఇంత వరకూ ప్రథమ స్థానమున నిలిచిన అపురూప కళావతంసుఁడయిన శ్రీ శ్రీనివాస్,  ఈ అనుకరణ విద్యతో వినూతన పద్ధతిలో శబ్దానుకరణాష్టావధానమును కూడా ప్రదర్శిస్తూ మన తెలుగు భారతాంబ ముద్దు బిడ్డలకు ఉండే సామర్ధ్యమేమిటో ప్రపంచానికి చాటుతున్నారు.
మానవుఁడు అనుకరణ శీలి. ఐనప్పటికీ తన జీవితావసరానుకూలముగా మాత్రమే అనుకరణము నుండి నేర్చుకొంటూ ఉండడం జగద్వితము.
తన అనుకరణ ద్వారా శబ్దమనే వెన్నెల వర్షమును శ్రోతలపై కురిపించే శబ్దానుకరణ చంద్రుఁడు మన శ్రీనివాస్.
మిమిక్రీ పితామహులు శ్రీ నేరెళ్ళ వేణుమాధవన్ శిష్యులైన మన శ్రీనివాస్ గారు తన ప్రదర్శనల ద్వారా ప్రజలకు ఆనందమును కలిగించడమే కాకుండా వారిలోని అమాయకత్వమును సొమ్ము చేసుకొనే గారడీ విద్యా ప్రదర్శకులు చేసే ప్రదర్శనలలోని మర్మమును విప్పి చెప్పుట ద్వారా వివేకవంతులను చేస్తూ సామాజిక దృక్పథంతో రైల్వే ఉద్యోగిగా జీవనం సాగిస్తున్నారు. 

ఒక్క గొంతు నుండి అనేకమైన వైవిధ్య భరిత ధ్వనులు అనుకరిస్తున్న వీరికి ఒకే ఒక్క సీస పద్యమనే గాత్రము నుండి అనేక ఛందస్సులనే ధ్వనులతో అభినందిస్తున్నాను.

నేను వ్రాసిన ఈ సీసపద్యమునందు సుమారు పదమూడు వైవిధ్య భరిర ఛందోయుత పద్యములు కలవు. 
ప్రాచీన కాలమునుండి జాజ్వల్యమానముగా నొప్పుతున్న ఈ చిత్ర బంధ గర్భ కవితా ప్రక్రియ మన ఆంధ్ర భాషకే స్వంతమైనది.  ఈ ప్రక్రియ మన తెలుగు భాషాభిమానుల అదృష్టముగా భావిస్తున్నాను. ఆ పద్యం తిలకించండి. 

అంతర్జాతీయ సుప్రసిద్ధ మిమిక్రీ కళాకారులు శ్రీమాన్ శ్రీనివాసగారిని మనస్పూర్తిగా అభినందిస్తూ అందిస్తున్న

బహు ఛందో గర్భ సీసము.

రచన:- చింతా రామ కృష్ణా రావు.

1.చంపక - 2.మధ్యాక్కర - 3.నర్కుట - 4.కోకిలక - 5.మణి గణ భూషణ - 6.7.8.9.ద్వివిధ కంద ద్వయ - 10.గీత - 11.ద్రుత విలంబిత 12.చతురంగ బంధ ఆటవెలది, 13. చతురంగ బంధ కంద గర్భ 

సీసము:-

స్వర ఖని భారవీ ప్రతను వర్ధన పద్ధతి ప్రాక్ధరా! నరా! దివ్య భావ!

చెరగని శ్రీ రమన్ క్షితి శుచిం గని, జేర్చిన శ్రీనివాస! జ్ఞాన ప్రకాశ!

వర గనివారమా పతి ప్రవర్ధన ప్రాభవ ప్రాక్ రమా పథా! బవ్య గాత్ర!

స్థిర గుణ ధీరుఁడా! స్థితికి చింతను, తేలవు. శ్రీ పరాయణా! విశ్రుతాత్మ!

గీ:- శ్రవణ సుకర, శుభ కర, స్వర సువిధువువొ ! 

మరవ తరమె! వసుధ మనుమ స్వమునరసి.

నవ స్వధన! నలిన సునయన! నవ రవళి

ధనమున శ్రవణ నయ ధనద వనను మను.

1.సీస గర్భస్థ చంపకమాల:-

స్వర ఖని భారవీ ప్రతను వర్ధన పద్ధతి ప్రాక్ధరా! నరా!

చెరగని శ్రీ రమన్ క్షితి శుచిం గని, జేర్చిన శ్రీనివాస! జ్ఞా

వర గనివారమా పతి ప్రవర్ధన ప్రాభవ ప్రాక్ రమా పథా!

స్థిర గుణ ధీరుఁడా! స్థితికి చింతను, తేలవు. శ్రీ పరాయణా!

2.సీస గర్భస్థ మధ్యాక్కర:-

స్వర ఖని భారవీ ప్రతను వర్ధన పద్ధతి ప్రాక్ధ ! 

చెరగని శ్రీ రమన్ క్షితి శుచిం గని, జేర్చిన శ్రీని !

వర గనివారమా పతి ప్రవర్ధన ప్రాభవ ప్రాక్ ర ! 

స్థిర గుణ ధీరుఁడా! స్థితికి చింతను, తేలవు. శ్రీ ప !

3.సీస గర్భస్థ నర్కుటము:-

స్వర ఖని భారవీ ప్రతను వర్ధన పద్ధతి ప్రా ! 

చెరగని శ్రీ రమన్ క్షితి శుచిం గని, జేర్చిన శ్రీ !

వర గనివారమా పతి ప్రవర్ధన ప్రాభవ ప్రాక్ ! 

స్థిర గుణ ధీరుఁడా! స్థితికి చింతను, తేలవు. శ్రీ !

4.సీస గర్భస్థ కోకిలకము:-

స్వర ఖని భారవీ ప్రతను వర్ధన పద్ధతి ప్రా ! 

చెరగని శ్రీ రమన్ క్షితి శుచిం గని, జేర్చిన శ్రీ !

వర గనివారమా పతి ప్రవర్ధన ప్రాభవ ప్రాక్ ! 

స్థిర గుణ ధీరుఁడా! స్థితికి చింతను, తేలవు. శ్రీ !

5.సీస గర్భస్థ మణి భూషణము:-

భారవీ ప్రతను వర్ధన పద్ధతి ప్రాక్ధరా! 

శ్రీ రమన్ క్షితి శుచిం గని, జేర్చిన శ్రీనివా!

వారమా పతి ప్రవర్ధన ప్రాభవ ప్రాక్ రమా! 

ధీరుఁడా! స్థితికి చింతను, తేలవు. శ్రీ పరా !

6.సీస గర్భస్థ కందము1a:-

ఖని భారవీ ప్రతను వ 

ర్ధన పద్ధతి ప్రాక్ధరా! నరా! చెరగని శ్రీ

గనివారమా పతి ప్రవ 

ర్ధన ప్రాభవ ప్రాక్ రమా పథా! స్థిర గుణ ధీ!

7.సీస గర్భస్థ కందము1b:-

గనివారమా పతి ప్రవ 

ర్ధన ప్రాభవ ప్రాక్ రమా పథా! స్థిర గుణ ధీ!

ఖని భారవీ ప్రతను వ 

ర్ధన పద్ధతి ప్రాక్ధరా! నరా! చెరగని శ్రీ !

8.సీస గర్భస్థ కందము2a:-

గని శ్రీ రమన్ క్షితి శుచిం 

గని, జేర్చిన శ్రీనివాస! జ్ఞా వర గనివా !

గుణ ధీరుఁడా! స్థితికి చిం 

తను, తేలవు. శ్రీ పరాయణా! స్వర ఖని భా !

9.సీస గర్భస్థ కందము2b:-

గుణ ధీరుఁడా! స్థితికి చిం 

తను, తేలవు. శ్రీ పరాయణా! స్వర ఖని భా !

గని శ్రీ రమన్ క్షితి శుచిం 

గని, జేర్చిన శ్రీనివాస! జ్ఞా వర గనివా !

10.సీస గర్భస్థ గీతము:-

ప్రతను వర్ధన పద్ధతి ప్రాక్ధరాన !

క్షితి శుచిం గని, జేర్చిన శ్రీనివాస!

పతి ప్రవర్ధన ప్రాభవ ప్రాక్ రమా ప ! 

స్థితికి చింతను, తేలవు. శ్రీ ప! రాయ!

11.సీస గర్భస్థ ద్రుత విలంబితము:-

ప్రతను వర్ధన పద్ధతి ప్రాక్ధరా !

క్షితి శుచిం గని, జేర్చిన శ్రీనివా!

పతి ప్రవర్ధన ప్రాభవ ప్రాక్ రమా!

స్థితికి చింతను, తేలవు. శ్రీపరా!

12.సీస గర్భస్థ చతురంగ బంధ ఆటవెలది:- (స్వరమను - ధనమున - వరలిన - స్వరవిధు!)

శ్రవణ సుకర, శుభ కర, స్వర సువిధువువొ! 

మరవ తరమె! వసుధ మనుమ స్వమున.

నవస్వ ధన! నలిన సు నయన! నవ రవళి 

ధనమున శ్రవణ నయ ధనద వనను.

శ్ర      వ      ణ      సు     క        ర       శు       భ

క        ర       స్వ      ర      సు      వి       ధు     వు
వొ      మ     ర        వ     త       ర       మె       వ
సు      ధ       మ    ను       మ     స్వ    ము      ను
న        వ       స్వ      ధ     న     న         లి      న
సు     న       య      న     న       వ       ర      వ
ళి        ధ       న     ము      న        శ్ర        వ      ణ
న       య      ధ        న      ద       వ        న      ను

13.సీస గర్భస్థ చతురంగ బంధ కందము:- ( స్వరమను - ధనమున - వరలిన - స్వరవిధు! )

శ్రవణ సుకర, శుభ కర, స్వర

సువిధువువొ! మరవ తరమె! వసుధ మనుమ స్వమున్.

నవ స్వధన! నలిన సునయన!

నవ రవళి ధనమున శ్రవణ నయ ధనద వనన్.

శ్ర      వ      ణ      సు     క        ర       శు       భ

క        ర       స్వ      ర      సు      వి       ధు     వు
వొ      మ     ర        వ     త       ర       మె       వ
సు      ధ       మ    ను       మ     స్వ    ము      న్
న        వ       స్వ      ధ     న     న         లి      న
సు     న       య      న     న       వ       ర      వ
ళి        ధ       న     ము      న        శ్ర        వ      ణ
న       య      ధ        న      ద       వ        న      న

మంగళం                            మహత్                           శ్రీశ్రీశ్రీశ్రీశ్రీ

చూచారు కదండీ! ఇక ఆ శ్రీనివాస్ గారి ధ్వన్యానుకరణ ప్రదర్శనకు సంబంధించిన చలన చిత్రం కూడా దర్శించండి.

చూచారు కదా! అంతర్జాతీయంగా భారతీయుల యొక్క, ఆంధ్రుల యొక్క కీర్తిపతాకను ఎగుర వేస్తున్న శబ్దానుకరణఅ ధురీణులగు శ్రీ శ్రీనివాసరావుగారిని మనసారా అభినందిస్తూ, ఇంకా ఇంకా సాధన చేస్తూ దేశ విదేశాలలో నిరంతరాయంగా నిరుపమానంగా  ఈ కళను ప్రదర్శిస్తూ ఉండాలని ఆశిస్తున్నాను.
వీరితో మాటాడాలనుకొంటున్నారా? ఐతే ఆలస్యమెందుకు? ఇదిగో వారి సెల్ నెంబర్: 9848060719
శుభమస్తు.
జైహింద్.

సాహిత్య సోపానం - మొదటి మెట్టు ‘మా నిషాద’ .

జైశ్రీరామ్.

శ్లో:- మా నిషాద ప్రతిష్ఠాం త్వ మగమః శాశ్వతీః సమాః| 

యత్ క్రౌంచమిథునాదేకమ్ అవధీః కామమోహితమ్||

గీ:-

ఓ కిరాతుఁడా! కామ మోహోపజీవి,

క్రౌంచ దంపతులం దొక క్రౌంచము నిటు

చంపి, కొఱగాని యపకీర్తి నింపుకొంటి

వేల? నెందులకయ్య నీ పాడు జన్మ?

భావము:-

ఓ కిరాతుఁడా! క్రౌంచ దంపతులలో కామ మోహితమగు ఒక దానిని చంపి, నీవు శాశ్వితమగు అప కీర్తిని పొందితివి. 

ఆ నాటి ఆ విషాదకర సంఘటనయే అంతటి మహత్తర ఆదికావ్య రామాయణావిర్భావానికి తద్వారా ఈ సాహిత్య సోపానానికీ మూలమయింది.మహాత్ములైనవారు విషాదము పొందినను, సంతోషము పొందినను లోక కల్యాణకర ప్రవృత్తినే కలిగి ఉంటారు.

జైహింద్.

చంచల నేత్రా! సాంబ శివా! నన్నుంచుము నీదరి సదా శివా!

ఓం శంభో మహా దేవా!

శ్రీపార్వతీశా! మహా పాప నాశా!  ప్రభాపూర్ణ  విశ్వేశ! దివ్య ప్రకాశా!  నినుంగూర్చి యాలించి, మమ్ముం గృపం బ్రోచు నీ రూపమే చూచి, నీ పూజలన్ జూచి, నీ కోసమే వేచి,  నీ దివ్య రూపంబు చిత్తంబునం జేర్చి, నీ పాద పద్మాల సంసేవలం జేయు భక్తుండు యోగ్యుండు.నీ దివ్య ధామంబునందుండి, నిన్నుం సదా చూచు భాగ్యుండు.సుజ్ఞాన తేజుండు, దివ్య ప్రభావుండు, శశ్వన్ మహా జ్ఞాన దేదీప్యమానుండు, దివ్య ప్రకాశుండు, భక్తాగ్రగణ్యుండు కాడే!
మహా భక్తుడౌ వాని శ్రీ పాద పద్మాల ధూళిన్ శిరంబందు దాల్చేటి భాగ్యంబు పుణ్యంబుచేఁ గల్గు, నీ వెల్గులం గాంచు గల్గున్ మనో నేత్ర భాగ్యుల్, ప్రభా పూర్ణ  యోగ్యుల్, నినుం గాంచు యోగుల్, లసత్ పుణ్య భాగుల్, సు నిష్కామ భోగుల్, భవానిన్ సదా గొల్చు భక్తాళి భక్తిన్ త్వదీయాంఘ్రి సంసేవనా చిత్తులై, భక్తినున్మత్తులై, ప్రభా పూర్ణ చిత్తంబుతో నీ మహత్వంబునే యెంచుచున్ భక్తితోగొల్చుచున్, లోక సంచారులై  భక్తి మైకంబు నిండార శంభో మహాదేవ! భక్తాళినే కావ నీకన్న దిక్కెవ్వరంచున్ నివేదించు చుండున్గదా! దేవ! రక్షింప రావా! మముంగావ లేవా! మంబుం బ్రోవ గారాదొకో? దేవ దేవా! నమో చంచలాక్షా! నమో ఫాల నేత్రా! నమో భస్మ తేజా!   నమో చంద్ర మౌళీ! 
నమో పాప నాశా! నినున్ భక్తితోఁ గొల్చు నాంధ్రామృతానంత పాన ప్రబుద్ధ ప్రభా దివ్య తేజుల్ మదిన్ నిల్పి నిన్నున్. త్వదీయాంఘ్రి సంసేవనాసక్త భక్తాళినే బ్రోచి, కాపాడుమా దేవ! అనంత ప్రభావా! 
నమస్తే.నమస్తే. నమస్తే నమః .
జైహింద్.

సర్వానుగ్రహ హనుమద్ధ్యానము.

జైశ్రీరామ్. 

ప్రియ భగవద్బంధువులారా! 
భగవద్భక్తులకు భగవంతుని సేవకంటే కూడా భగవద్భక్తుల సేవ అద్భుతమైన ఫలితాన్నిస్తుంది. రాముని సేవ కంటే కూడా రామ భక్తుఁడైన హనుమంతుని సేవ మంచి ఫలితాన్నిస్తుంది. ఆ హనుమంతుని తలచుకొనినంతనే మనకు ఎటువంటి సత్ ఫలితాలు కగుతాయో, ఆ పరమ రామ భక్తుని మనం ఏ విధంగా ప్రార్థించాలో  క్రింది శ్లోకాల ద్వారా తెలుస్తుంది.
శ్లో:-
బుద్ధిర్బలం యశో ధైర్యం, నిర్భయత్వ మరోగతా
అజాఢ్యం వాక్పటుత్వంచ హనుమత్ స్మరణాద్భవేత్.
ఆ.వె:-
బుద్ధి, బలము, కీర్తి, పూజ్యమౌ ధైర్యము,
నిర్భయత, యరోగ నిగ్రహములు,
కన యజాఢ్యతయును, కమనీయ వాగ్ధాటిఁ
గొలుపు హనుమ తలపు, గురు తరముగ.
భావము:- 
హనుమంతుని యొక్క తలంపు మనకు సద్బుద్ధిని, మంచి బలమును, సత్కీర్తిని, ధైర్యమును, నిర్భయత్వమును, రోగ రాహిత్యమును, అజాఢ్యమును, మంచి వాగ్ధాటిని, సంప్రాప్తింప చేస్తుంది.
శ్లో:-
ఆయుః ప్రజ్ఞా యశో లక్ష్మీః శ్రద్ధాః పుత్రా సుశీలతా
ఆరోగ్యం దేహి సౌఖ్యంచ  కపి నాథ నమోస్తు తే.
తే.గీ:-
ఆయువును, ప్రజ్ఞ, కీర్తియు, నమర చేసి,
శ్రద్ధ, పుత్ర సుశీలత లొద్దిక నిడి,
సౌఖ్య మారోగ్యమమరంగ చక్కఁ గనుమ!
ప్రార్థనలుసేతు గనుమయ్య! భక్త హనుమ!
భావము:-
ఓ రామ భక్త హనుమా! నిన్ను ప్రార్థన సేతును. నాకు ఆయుర్దాయమును, మంచి ప్రజ్ఞను, సత్కీర్తిని, శ్రద్ధను, సత్పుత్రులను, సౌశీల్యాది సద్గుణములను, సౌఖ్యమును, ఆరోగ్యమును, అమరునట్లు కరుణతో చూడుము.

చూచారుకదండీ! మీరు ఆ హనుమద్వరసిద్ధులగుదురుగాక.

జైహింద్.

మనం తరచూ దేవాలయాలకు ఎందుకు వెళ్ళాలి - మల్లవజ్జల కిరణ్ కుమార్

జైశ్రీరామ్.

సోదర భారతీయులారా! దేవాలయ నిర్మణములు చేసేటప్పుడు మన పూర్వీకులకున్న ఆలోచనా సరళి యేమిటో అందలి మహత్తరమైన ఆంతర్యమేమిటో, మగవారు చొక్కా వేసుకోకుండా గుడిలోకి రావాలనే నియమం పెట్టడంలో గల ఆంతర్యమేమితో శ్రీ మల్లవజ్జల కిరణ్ కుమార్ గారు చక్కగా వివరించి వ్రాసారు. మీరూ చదవండి.
అందరికి నమస్కారం 
పూర్వకాలం   లో  సాధారణంగా  దేవాలయాన్ని  , ఎక్కడైతే  భూ  అయస్కాంత  రేఖల  తీవ్రత  ఎక్కువ  ఉంటుందో  అక్కడ  నిర్మించేవారు.  అది  ఊరికి  మధ్యలోనైన ,చివరిలోనైన, కొండపైనైనా  ఎక్కడైనా సరే .
ముఖ్యంగా  ఎక్కడైతే  విద్యుత్   మరియు  అయస్కాంత  తరగంగల  శక్తి   అత్యధికంగా  అన్నివైపులా  ప్రసరిస్తుందో  అక్కడ  నిర్మించారు . 
ఎక్కడైతే  భూ  అయస్కాంత  తరంగ  తీవ్రత  అధికంగా  ఉంటుందో  ఆ  స్థానం  లో  మూలవిగ్రహాన్ని  దానితో  పాటు   రాగి  యంత్రాలను  కూడా  ప్రతిష్టిస్తారు . రాగి  యంత్రాలు  భూ  అయస్కాంత  శక్తిని   శోశించుకొని      నలుదిశలా వ్యాప్తి  చేస్తాయి .
గుళ్ళో   చేసే  దీపారాధన  , మ్రోగించే  గంట  అర్చకుల  వేదమంత్రాలు, కర్పూర  హారతి, దూపం, పుష్పాల , సుగంధ ద్రవ్యాల  పరిమళాలు   ఇవన్ని  మనపై  ప్రసరించే  శక్తిని  పెంపొందిస్తాయి.
దేవుడికి   అభిషేకం  చేయడం వల్ల ఆ  అయస్కాంత  శక్తి   జలంలోనికి  ప్రసరిస్తుంది. పచ్చకర్పూరం, కుంకుమపువ్వు , తులసి  మొదలగునవి  దాని  శక్తిని  మరింతగా పెంపొందిస్తాయే (magneto therapy). తులసి  రక్తాన్ని  శుద్ధి  చేస్తుంది .  మూడు  సార్లు  తీర్థాన్ని  తీసుకోవడం  వల్ల  శారీరక  రుగ్మతలు  దూరమై  , ఆరోగ్యాన్ని  పొందగలుగుతాం.
పవిత్రమైన  అబిషేక  జలాని  మనపై  జల్లడం  ద్వారా   శక్తి ప్రసారం    అవుతుంది.  అందుకే  మగవారిని  వంటిపై  చొక్కా  వేసుకొని  గర్భ  గుళ్ళోకి  రావోద్దంటారు .
గుళ్ళో  చేసే  కార్యాలు  అందరూ   సామూహికంగా  చేయడం  వల్ల   వ్యక్తీ గత  బాధలు      మర్చిపోయి  ప్రశాంతంగా  ఉండగలుగుతాం. మన  బాగోగులను  ఎంతగానో  ఆలోచించే  మన  పెద్దలు  మనకు  ఈ  నియమ నిబందనలను  పెట్టారు  . వీలైనన్ని  సార్లు  దేవాలయాలను  సందర్శించుకొందాం.    తద్వారా ఎంతో  గొప్పనైన  మన  సంస్కృతిని  సనాతన  ధర్మాన్ని  కాపాడుకుందాం . 
ధన్యవాదాలు
మల్లవజ్జల కిరణ్ కుమార్.  
చూచారు కదండీ ఎంత చక్కని వివరణో!
జైహింద్.

శ్రీశ్రీ వర్ధంతి సందర్భంగా నివాళి.

జైశ్రీరామ్.

శ్రీ పూడిపెద్ది వేంకట రమణయ్య అప్పలకొండ దంపతులకు తే.02-01-1910 ని పుఫ్త్తిన మహా కవి శ్రీనివాసరాచు శ్రీరంగం సూర్య నారాయణ దత్తుడైనపిదప శ్రీరంగం శ్రీనివాసరావుగా ప్రసిద్ది పొందారు. మహాప్రస్థానం సంకలన ముద్రణానంతరం రచనలలో భావాలలో విప్లవాత్మకమైన మార్పులకు శ్రీకారం చుట్టబడింది.

అంతటి మహాకవి శ్రీశ్రీ యొక్క షష్టి పూర్తి విశాఖపట్టణంలో తాపీ ధర్మారావుగారి అధ్యక్షతన మున్సిపల్ ష్టేడియం లో జరిగింది.చాలా అధ్బుతంగా జరిగిన ఆ షష్టి పూర్తి మహోత్సవంలో నేనూ పాల్గోవడం జరిగింది. ఆ నాటి ఆ అపురూప సంఘటనకు సంబంధించిన చిత్తరువులను మీరు తిలకించడం కోసం ఈ క్రింద పొందుపరుస్తున్నాను.  చూడండి.

కుర్చీలలో కూర్చున్న వారిలో అడ్డు చారల మఫ్లర్ తో ఉన్నది శ్రీశ్రీ కాగా

అతనికి కుడివైపు ఐదు స్థానాలలో ఉన్నది అధ్యక్షత వహించిన తాపీ ధర్మారావుగారు

వారి వెనుకనున్నది నేనేనని మరే గ్రహింప కలరు.

సభలో ఉపన్యసిస్తున్న శ్రీశ్రీ.

ఈ సందర్భాన్ని పురస్కరించుకొని, "ప్రజారథం" వార పత్రికా సంపాదకులు శ్రీ భాట్టం శ్రీరామమూర్తి గారు శ్రీశ్రీని గూర్చిన "సోవియట్ రష్యాలో మహాకవి శ్రీశ్రీ" అనే శీర్షికతో శ్రీ నినా నికోలయేవా వ్రాసిన ఒక వ్యాసమును తమ పత్రికలో ప్రచురించారు. అవ్యాసాన్ని ఈ క్రింది చిత్తరువులలు పెద్దదిగా చేసుకొని చదవండి.

 పెద్దక్షరాలకోసం పత్రికపై క్లిక్ చెయ్యండి.

చక్కటి విశ్లేషణను చూచారుకదండీ! 

అంతటి మహా కవి శ్రీశ్రీ తన అంతిమ శ్వాసను సరిగ్గా ఇదే రోజు అనగా 15-06-1983 లో విడిచారు.

అట్టి మహా కవికి నివాళులర్పుస్తున్నాను.

జైహింద్.

అహంకారమనే అసురుని జయించగలమా? జి.కన్నయ్య

జైశ్రీరామ్.

పైన పడుతున్న అహంకారాసురుఁడు నిలా జయించాలి.

సుహృద్బాంధవులారా! మనం ఔన్నత్యము పొందుతున్న సందర్భంలో అహంకారమనే అసురుఁడు మనలనాశ్రయిస్తాఁడు. అంతే అది మొదలు పతనం ప్రారంభమౌతుంది. అందుకే మనం అహంకారాసురుని జయించాలి. ఈ విషయాన్ని తెలిపే ఒక చక్కని కథను శ్రీ జి. కన్నయ్య గారు ఏం చెప్పారో మీరే చూడండి.
అహంకారసురుఁడు జి.కన్నయ్య.
అనాదినుండి తమ ప్రవృత్తుల ద్వారా దేవాసురుల మధ్య సంగ్రామములు జరుగుచుండెడివి.  ఒకమారు దేవాసురుల మధ్య ఒక దారుణ యుద్దము జరిగెను. దెవేంద్రుడు అగ్ని వాయు దేవుల సహకారముతో యుద్దము చేసెను. ఇంచుమించుగా దానవులు అందరు మరణించారు. హతసేషులు  పారిపోయారు. ఆ యుద్ధములో అగ్ని వాయువుల పరాక్రమము అందరికి ఆశ్చర్యము కలిగించెను. సర్వే సర్వత్ర అందరు వారి పరాక్రమమునే పొగడసాగిరి. దేవతలకు  గొప్ప కీర్తి లభించెను. ఆ కారణముగనే ప్రజలు ప్రలోభపడి సర్వేశ్వరుని విస్మరించి దేవతలనే పుజింప నారంభించిరి. దానితో దేవతలకు గర్వమెక్కువాయెను. లోకము అంతయు మనలనే పూజించుచుండగా  మనము ఇంకొకరిని పూజించనేల అని అహంకరించిరి. పరమేశ్వరుఁడు సర్వ శక్తి సంపన్నుఁడు అన్న విషయమే మరచిరి. కరుణాసముద్రుడైన పరమెశ్వరుడు అమరుల అహంకారమునకు జాలిపడి ఘనులు విజయశ్రీ సముపేతులైనచో మరింత వినయశీలురు   అగుదురుకానీ గర్వింపరు. అందువల్ల వారు పతనము చెందకుండా గర్వమును సమూలముగా నాశనము చేయ తలెచను.
ఒకనాడు నందనోద్యానమందు అమరేంద్రుని  సభ యేర్పాటు చేయఁబడినది. దేవతలు తమతమ ఘనతలను ప్రశంసించుకొనుచు ఘర్షన  పడుతుండగా సమీపమున  కన్నులు మిరుముట్లు కొలుపు కాంతితో ఒక యక్షుడు ఆకాశమునుండి దిగెను. ఆ తెజస్సు   ముందు అగ్ని కాంతి హీనుఁడయ్యెను.  దేవతలందరికీ యక్షుని గాంచినంతనే వదనములు పాలిపొయెను.  గడచిన యుద్ధములో ప్రతాప శ్రేష్టుఁడైన  వ్రేతిహొత్రుని కడకు  వళ్ళి ఆ యక్షుని సమాచారమును తెలుసుకొని రమ్మని కోరిరి. అతనిని సమేపించుటకు  అగ్నికి అడుగులు తడబడ సాగెను. యక్షుని తేజస్సుకు అగ్ని కన్నులు మూతబడెను. ఎట్టకేలకు అతనిని సమేపించి మాటలాడు ధైర్యము లేక ఊరకుండెను. యక్షుడు అతనిని గాంచి  నాయన నీవెవరవు? అని ప్రశ్నించెను. నా పేరు అగ్ని నన్ను జాతవేదుడు అనికూడ అంటారు.   తమరు యెవ్వరో తెలుసుకొను ఉద్దేశముతో వచ్చినాడఁను అని పలికెను. ఆందుకు యక్షుడు  ఓ అగ్నీ! నీవు చేయు పని యెట్టిదో చెప్పగలవా? అనెను. అగ్ని దుఃఖముతొ  ఓ తేజోవంతా మీరు అగ్ని చేయు  కార్యమునే ఎఱుఁగరా? క్షణ మాత్రములో ఈ ప్రపంచమునంతను భస్మము చేయఁగల శక్తి నాకు కలదు. ఆకాశమండలి నక్షత్రములు కూడా నా శక్తి వల్లనే వెలుగొందుతూ ఉన్నది అని పలికెను. అగ్ని అహంకారము నసించలేదని  గ్రహించిన    యక్షుడు ఒక గడ్డి  పరకను ముందుంచి  అగ్ని దేవా నీ  శక్తిని నేను ఎఱుఁగుదును.   ఈ గడ్డిని దగ్ధము చేసి నీ పరక్రమమును చూపుమనెను. మరియు అగ్ని తేజస్సును హరించెను. అగ్ని శత విధముల ప్రయత్నించి విపఫలుడయ్యేను. సిగ్గు పడి పాలిన ముఖముతో దేవేంద్రుని చేరెను.
పిదప దేవతలు వాయు దేవుని  పంపిరి ఆ తెజోవంతుని సమీపించుటతో వాయువుకు అతనిని చూచుటకు కుడా కష్టమాయెను. యక్షుడు సోదరా నీవెవరవు ఏ  నిమిత్తమై వచ్చితివి? అనెను. వాయువు కొంత ధైర్యము తెచ్చుకొని మహాపురుషా! నన్నే ఎఱుఁగరా? నన్ను వాయుదేవుడు అంటారు .సకల జీవనాధారము నా యందే ఉన్నది. నిరాటంకముగా చరించు శక్తి గలవాఁడనగుటచే వారంతా నన్ను మాతరిశ్వుఁడు అని కుడా పిలచెదరు. అనెను యక్షుడు గర్వముతోకుడిన వాయు దేవుని ముఖమును  కనినతోనే  వాయువు ధైర్యము నశించి శక్తి హీనుఁడాయెను. యక్షుడు సోదరా! నీవేమి చేయుదువు అనిన  నా శక్తితో ఈ బ్రహ్మాండమునంతను ఊపి వేయఁగలను  అనిన, యక్షుఁడు సోదరా! నీ ఎదుట గల తృణమును ఎగురఁగొట్టి నీ బలమును చూపుమనెను. అంత వాయువు  సర్వ విధముల ప్రయత్నించి గడ్డిపరకను కదప లేక సిగ్గుతో తల వంచుకొని దేవేంద్రుని చేరెను.
అగ్ని వాయువులు పరాభూతులు కాగా దేవేంద్రుడు బృహస్పతిని గాంచి మార్గమేమి? అనెను. బృహస్పతి దేవేంద్రునితో అమరేంద్రా ఆ తెజోవంతుని సమాచారము తెలుసుకోన నీకు వినా మరొకరికి సాధ్యముకాదు. స్వయముగా నీవే వెళ్ళ వలసినదే, నేను దేవేంద్రుఁడు ఆ యక్షుని సమీపించుసరికి అతని తేజస్సు వల్ల మా కన్నులు మూసుకొనెను. అంతలో యక్షుఁడు అంతర్ధానమయ్యెను దేవేంద్రునికి ఈ కార్యము భగవంతునికి కాక వేరేవారికి సాధ్యము కాదు అని భావము కలుఁగ జగన్మాతను ధ్యానించెను.దివ్య తేజస్సుతో జగన్మాత అవతరించెను. దేవేంద్రుఁడు జగన్మాతను స్తుతించి యక్షుని గురించి ప్రశ్నించెను. జగజ్జనని వత్సా యక్షుఁడు సామాన్యుఁడు కాడు. సాక్షాత్తు బ్రహ్మదేవుఁడే. అతనిని గుర్తించ గలవారు ఈ ప్రపంచమందు లేరు. దుష్కృత్యములోనరించు వారికి ఆతఁడు  పరమ శత్రువు. రాక్షస సంహారమందు మీరు నిమిత్తమాత్రులు. నిజానికి వారిని సంహరించినది అతనే అతని అండ లేక మీరు కాలు కూడా కదపలేరు. అందు వలననే అగ్ని వాయు దేవులు  నిస్తేజులయ్యిరి. మేమే దానవులను సంహరించామని మీరు ఆహంకరించుతున్నారు. ఆ అహంకారము వలననే అగ్ని వాయువులు పరాజయము పొందిరి. ఆహంకారాసురుని జయించినచో మీరు నిజముగా దేవతలై పరాత్పరునికి ప్రీతిపాత్రులు కాగలరు అని అంతర్ధానమయ్యెను. జగన్మాత ఉపదేసమును దేవేంద్రుడు దేవతలకు చెప్పగా  వారి గర్వాహంకారములు వీడి విజయమును పొందిరి.
మనము కూడా అహంకారాసురుని జయించిననాడే విజయమును పొందగలమనేది నీతి. 
సమర్పణ. జి.కన్నయ్య.
చూచారు కదా! ఐతే శుభమస్తు.
జైహింద్.

తులసీ మాహాత్మ్యమ్. - భాస్కరానందనాథ.

జైశ్రీరామ్.

సాహితీ ప్రియ మిత్రులారా ! ముఖే ముఖే సరస్వతీ అన్నారు పెద్దలు. అది అక్షర సత్యము. యావత్ హైందవ జాతీ ఎంతో భక్తి భావంతో దైవంగా ఆరాధించే తులసి ప్ర్ర్శస్త్యమును గూర్చి ప్రతీ ఒక్కరికీ తెలుసుకోవలసిన ఆవశ్యకత ఉన్నది. పూజ్య భాస్కరానందనాథ గారు తులసి వైశిష్ట్యాన్ని వివరించి యున్నారు. అది మీరూ చదివి ప్రకృతిలో గల నగ్న సత్యాన్ని పదిమందికీ తెలియజేయండి ప్రయోజన బాహుళ్యాన్ని సమకూర్చండి.  ఇక చదవండి.

ఓం బృందా ! బృందావనీ విశ్వ పూజితా ! విశ్వ పావనా ! 

పుష్పసారా, నందినీ చ ! తులసీ కృష్ణ జీవనీ !

ఈ తులసీ దేవి నామములు స్మరిస్తేనే చాలు జీవన్ముక్తి కలుగుతుందని, అశ్వమేధ యజ్ఞ ఫలం లభిస్తుందని దేవిభాగవతం చెపుతోంది. తులసీ దేవి గురించి చాలా విసృతమైన వర్ణన అందులో నారద మహర్షి చెప్పారు.తులసి మొక్క క్షీర సాగరమధనంలో కామధేనువు,కల్పతరువులు, అమృతంతో బాటు ఉద్భవించిందని పద్మ పురాణంలో ఉంది. ఇంత విశిష్టమైన తులసి ఎవరు? ఒక మొక్కకి ప్రపంచమంతటా పవిత్రంగా భావించే శక్తి ఎలావచ్చింది అని ఆశ్చ్ర్యం వేస్తుంది. ఇంటంటా ఉంటూ,అనుదినం అర్చించబడుతూ, మూలికగా ప్రశిద్ధిగాంచి,మౌలిక దేవతగా అపురూప దివ్యశక్తిగా కీర్తించబడే తులసీ దేవి అసలు ఎవరు? అనే ప్రశ్న ఉదయిస్తోంది.
తులసి ని స్త్రీ పురుషులు,బాలురు, వృద్ధులు ఎవరైనాపూజిస్తారు.దివ్య మహద్భుత రామ గాధను "రామాయణం" గా అందించిన మహర్షుల్లో "తులసీ దాసు" మహన్వితులు. దీన్ని బట్టి తులసీ అర్చన అనేక కాలాల్లోంచి వస్తోందనీ తెలుస్తోంది. తులసి అసలు "జలంధరుడు" అనే రాక్షసుని భార్య అని ఆమె పాతివ్రత్య మహిమతోనూ, అతను తనబలంతోనూ శక్తివంతుడై అందరిని క్షోభింపచేశేవాడుట. ఇప్పటికి పంజాబ్ లో "జలంధర్" ఈయనపేరుమీదే వచ్చింది.దీన్నే "జాలంధర పీఠం" అని అష్టాదశ శక్తిపీఠముల్లో ఒకటిగా కొలుస్తారు (ఇది సిక్కు మతపుణ్యక్షేత్రమైన అమృతసర్ కి కూడా దగ్గరగా ఉంది).
కాత్యాయనీ చోఢ్యాణె కామాఖ్యా కామరూపకే పూర్ణేశ్వరీ పూర్ణగిరౌ చండి జలంధరే స్మృతా (కాళీ పురాణం)
అతన్ని క్షీణింపచేయడానికి సాక్షాత్తూ శ్రీ కృష్ణుడే జలంధర రూపంలో వచ్చి తులసితో ఉన్నాడని అందువల్ల ఆమె కోపించి శ్రీ కృష్ణుణ్ణే శపించిందని ఆవిధముగా అనేక అవతర విశేషాలు సంభవించాయని చెపుతారు. ఇక్కడ గోప్యమైన సూచన యేదో ఉందనిపిస్తుంది. జలమును ధరించిన వాడుజలంధరుడు, "తుల" కు కారణమైనది తులసి. తుల్ అనే ధాతువుకు సంస్కృతార్ధం "పైకి లేపునది, ఉచ్ఛ స్థితికి తీసుకు వెళ్ళేది" అని అర్ధం వస్తోంది. ఈ కధని సూక్ష్మ దృష్టితో పండితులు అర్ధం చేసుకో వలసి ఉంది. ఏది ఏమైన కార్తీక మాసం లో, శుక్ల పక్షంలో ద్వాదశి నాడు విష్ణువుకు,తులసికి కల్యాణం జరుపుకుంటారు. ఇకసాలగ్రామ సాధన ఒక మహాశాస్త్రం. తులసిని సాలగ్రామ శిలలని కలిపి అర్చిస్తారు. తంత్రం (ఉడ్డీశ, యక్షిణి,రుద్రయామళ) లో తులసీ యక్షిణి అనే దేవతారధన కూడా ఉంది. 
శ్లోకం:
తులసి మూల మారూఢో జపేదేకాగ్రమానసః 
అకస్మాద్రాజ్యమాప్నోతి నాన్యధాశంకరోదితం.
తులసిచెట్టు మొదట కూర్చుండి ఏకాగ్రచిత్తుడై నిశీధి సమయమున విడవకుండా ప్రతినిత్యం రోజు ఐదు వేలు చొప్పున 40 రోజులు జపము చేసిన తులసి (యక్షిణి) అనుగ్రహము కలుగును. విజయమును ప్రసాదించును. 
మంత్ర సిద్ధికి మౌలికంగా మూడు ముఖ్యమని మంత్ర శాస్త్రము, సనాతన ఆయుర్వేదము చెపుతున్నాయి. అవి మణి, మంత్రము, ఔషధము. మణి అనేది జాతి రత్నము. మంత్రము దేవతా శక్తి యుతము. ఔషధములు మూలికలతో ఆరోగ్యాన్నే కాదు మానవాతీత తేజస్సుని కూడా ఇస్తారని వేల సంవత్సరాలుగా ప్రపంచమంతా నమ్మారు. రక రకాల మతాలు, మతల్లో కూడా వివిధమైన నమ్మకాలూ ఉన్నా కూడా ఈ అన్వేషణ నిలచిపోయింది - ఏ మొక్కలో ఏ శక్తి ఉంది అనేది !
"సీక్రెట్ లైఫ్ ఆఫ్ ప్లాంట్స్" అన్న గ్రంధాన్ని చదివితేమహాశ్చర్యంగా ఉంటుంది. మనం పెంచే మొక్క మనతో మనో సంకేతాలని అందుకుంటుందని అందులో వైజ్ఞానికంగా ఎన్నో విషయాలు చెప్పారు. మనంఆనాందంగా ఉన్నామో, బాధగా ఉన్నామో కూడా మొక్కలకి, చెట్లకు తెలుస్తుందిట. అసలు ప్రపంచానికి మొక్కల్లో ప్రాణం ఉందని చెప్పి నిరూపించినది సర్ జగదీష్ చంద్ర బోస్ మన భారతీయులే! 
బుద్ధుడికి జ్ఞానోదయం రావి చెట్టుకింద అయ్యిందిట. అందుకే దాన్ని "మహా బోధి" అన్నారు. అంతే కాదు వాటి ప్రతీ ఆకుని అతి భద్రం గా దాస్తారు. "ఫికస్ రెలిజియోసా" అని రావిని లాటిన్ లో పిలుస్తారు. ఆ చెట్లమీద బ్రహ్మ రాక్షసులుంటారని కధల్లో చెపితే, వట యక్షిణి లాంటి శక్తులుంటాయని కొందరు నమ్ముతారు. కొన్ని రాగాలకి మందార మొక్కలు త్వరగా పెరుగుతాయిట. మొక్కల్లో ప్రాణం దివ్యత్వం ఎంత ఉంటాయంటే "ద్విజవల్లి" అనే ఒక ఓషధి మొక్క గురించి వేదకాలం నించి ఇప్పటికి మంత్రవేత్తలు వెతుకుతూనే ఉన్నారు. "అమృతవల్లి" అనికూడ పిలిచే ఈ ఓషధి ఒక ఆకు తింటే ఒక రోజంతా ఆకలి ఉండదని కొందరు మహాత్ములంటారు. ఇది రోజుకో ఆకు వచ్చి పౌర్ణమి కల్లా 15 ఆకులు వస్తాయి చంద్రకళతో బాటు. అందుకే దాన్ని "సోమలత" అని కూడా చెప్పారు. అధర్వణ వేదం కూడా ఇది ఉందనే చెపుతుంది. మనుషులు చిరంజీవులు కావడానికి కావల్సిన "కాయకల్ప చికిత్స" కి ఈ సోమలత ముఖ్యమైనదిట. ఇది చూసిన వాళ్ళనెవరని మనమెవరం చూడలేదు ఇంకా!!
ఒక్కో దేవతకి ఒక్కో మూలిక అంటే ఇష్టంట. బిల్వపత్రాలుశివుడికి,మందారాలు కాళికి, గులాబీలు చండికి,ఔదుంబరం దత్తాత్రేయులకి, ఇలా చెప్పుకుంటూ పోతే అనేక వృక్షాల విశిష్టతలు వాటి పురాణ ప్రమాణాలు చెప్పొచ్చు. 
పూర్ణావతారములలో ఒక విశిష్ట గురు తత్వం ఉన్న అవతారం గీతాకారుడైన శ్రీ కృష్ణభగవానుణ్ణి సైతం సరితూగ గలిగిన "పవిత్రత" తులసికి ఉందని పురాణాల్లో చెప్పారు. సచ్చిదానంద రూపుడైన గోవిందునితో "తుల"తూగ గల మొక్కకనుక "తులసి" అన్నారమే తెలియదు!
భారతదేశం అంతా "తులసి" ని పవిత్రంగా ఇంటిలో "తులసికోట" పెట్టుకుని మరీ పూజిస్తారు. తులసి ఆకులు వేసిన నీళ్ళని దేవాలయాల్లో తీర్ధంగా ఇస్తారు. విష్ణువుకి అత్యంత ప్రియమైన తులసిమాలని పర్వదినాల్లోను,అర్చనల్లోనూ వేస్తారు. కృష్ణునికి తులసి ఉన్న అవినాభావ సంబంధం దివ్యమైనదిగా కొనియాడతారు. ఆ తులసియే రాధగా జన్మించినట్టు కూడా పురాణాల్లో ఉందిట. జీవన్ముక్తి మూలమైన తులసి తీర్ధాన్ని అంత్యకాలంలో జీవునికి ఇవ్వడం తులసి ఆధ్యాత్మిక మహత్మ్యాన్ని తెలియజేస్తుంది.
తులసి దళాలు అనిర్వచనీయ దివ్యశక్తి కలిగున్నాయనిమంత్రశాస్త్రం,తంత్రం కూడా ఘంటాపధం గా చెపుతున్నాయి. అసలు ఒక్క తులసిదళంతో ఎంత పెద్దవైన దుష్ట ప్రయోగాలని,క్షుద్రశక్తులని,చేతబళ్ళని,బాణామతి లాంటి వాటిని ఒక్క తులసిదళంతో ఎదుర్కో వచ్చునని వేదవిదులు చెపుతున్నారు.
ఇక విష్ణు మంత్ర సాధనల్లో తులసి మాలని వాడమని మేరు తంత్రం, మంత్రమహో దధి, మంత్రమహార్ణవం అన్నిటా చెప్పారు. గాయత్రి స్వరూపాల్లో "తులసి" ఒకటని గాయత్రి పరివార్ వారి దివ్య రచనల్లో కూడా అన్నారు. 
ఇస్కాన్ కు చెందిన అనేక పాశ్చాత్యులు కూడా తులసిమాలలు ధరించడం ఆనందాన్ని కలిగిస్తుంది. అనేక థాయ్,మాలేషియన్ వంటల్లోనూ,ఇటాలియన్ వంటల్లోనూ "బేసిల్" తులసి కుటుంబానికి చెందిన మొక్కగా శాస్త్రవేత్తలు చెపుతున్నారు. ఆశ్చర్యమేమంటేప్రపంచమంతటా "బేసిల్" కి పవిత్రమైన మూలికగా పేరుంది. ఏసుప్రభువు సమాధిపై పెరిగిన మొక్క తులసి అని కొందరు చరిత్రకారులు చెపుతున్నారు. "బేసిల్" అనే పేరు రూపాంతరంగా "ఇసాబెల్" అని పేరు పెట్టుకుంటారుట పాశ్చాత్యులు. 
మంత్రాలయం రాఘవేంద్ర స్వామి దేవస్థానం లో లక్ష్మినరసింహ స్వరూపంగా తులసినే అర్చిస్తారు. దేవీ భాగవతంలో తులసీ మంత్రం ఈ విధంగా ఎల్లరకు సత్ఫలితములకై చెప్పవచ్చును. ఇది బుధవారము నాడుజపించినచో జ్ఞానము,ఆరోగ్యము అన్నిటిని మించి ఆనందము కలుగుతాయి. 
...........ఈ మంత్రాన్ని తులసి మాలతో జపం చేయవచ్చును. తులసి మొక్కను పూజించి, జలంతో అర్చించి,ప్రదక్షిణగావించి ఈ మంత్రం చెయ్యవచ్చును. 
గోవాలోని శాంత దుర్గదేవాలయం బయట ఉన్న తులసి మొక్క శక్తివంతమైనదిగా కీర్తిస్తారు. బృందావనము లో తులసికున్న ప్రాముఖ్యత ఎంతో ఎక్కువ. ఆమె స్వయంగా రాధారూపమే. గోవర్ధనగిరిని తులసి ఆకులతో పూజిస్తారు. అక్కడ ప్రతి మొక్క, కుంజ్ అన్నీ మహాత్ముల స్వరూపమే అని ప్రేమగా ఆరాధిస్తారు. 
అందరికి అభినందనలు అందిస్తూ, అవ్యక్త అగోచర ,  అతీంద్రియ దివ్య తత్వం మనందరికి అవగాన కావాలని, అన్నిటికి కన్నా అపురూపమైన ప్రేమ, కరుణ, మానవతా వృద్ధి చెందాలని ఆకాంక్షిస్తునాను.
ఓం నమో తులసి మాతాయై నమః

మీ

భాస్కరానందనాథ.

చూచారు కదా భాస్కరానందనాథ గారి అభిప్రాయం? ఇక మీరుగ్రహించిన మంచి విషయాన్ని పదిమందికీ పంచండి. నమస్తే.

జైహింద్.