గణనీయంబగు భాషలందు తెలుగున్ గాంచంగ మేల్మేలు.. తాన్ విన సొంపై , ప్రకటించు భావ సరళిన్ దృప్తిన్, విశేషించి పల్ ఘన కావ్యామృత సంవిధాన మహిమల్ గాంచంగ నాంధ్రామృతం బను యీ బ్లాగును గొల్పి యుంటి. కనుడీ ! ఆంధ్రామృతం బందుడీ ! .

22, సెప్టెంబర్ 2017, శుక్రవారం

బ్రహ్మచారిణి( గాయత్రి ) రుచిర గర్భ సీసము. .. .. .. చిత్ర బంధ గర్భ కవితాదులు.,

జైశ్రీరామ్.
ఆర్యులారా! శరన్నవరాత్రులలో రెండవ రోజైన నేడు ఆ జగన్మాత బ్రహ్మచారిణి రూపంలో మనలను కటాక్షిస్తుంది.
'బ్రహ్మచారిణి' యనగా తపమాచరించు తల్లి. బ్రహ్మమునందు చరించునది.కుడి చేతియందు జపమాలను, ఎడమచేతియందు కమండలువును ధరించును. పరమేశ్వరుని పతిగా బడయుటకు తీవ్రమైన తపమొనర్చి ఉమ యని ప్రసిద్ధి వహించెను. ఈ దేవి స్వరూపము జ్యోతిర్మయము. మిక్కిలి శుభంకరము. భక్తులకును, సిద్ధులకును అనంత ఫలప్రథము. బ్రహ్మచారిణీ దేవి కృపవలన ఉపాసకులకు నిశ్చలమగు దీక్ష, సర్వత్ర సిద్ధి, విజయము ప్రాప్తించును.
మీ అందరికీ జగ్న్మాత కటాక్షం పూస్ర్తిగా లభించాలని మనసారా కోరుకొంటున్నాను.
బ్రహ్మచారిణి( గాయత్రి )
శ్లో|| దధానా కరపద్మాభ్యాం అక్షమలాకమండలూ |
దేవీ ప్రసీదతు మయి బ్రహ్మచారిణ్యనుత్తమా ||
రుచిర గర్భ సీసము. ( రుచిరము. - జ భ స జ గ .. యతి 9)
శ్రీమాతవు పరాత్పరీ కను నను బ్రహ్మ - చారిణీ! భక్తితో సంస్తుతింతు.
నిన్నే గనితరింతునేన్ మది నిను దాల్చి - భక్తితో నిరతంబు భజన చేతు.
ప్రార్థింతునునిరంతరంబసదృశ నిశ్చ- లాత్మతో నిన్నెంచి యజ్ఞ రూప.
నీరూపునె స్మరింతు నిన్ ననుఁగను మాతృ - దేవతా! వరమీగదే శివాని.
దివ్య నవరాత్రిలోనిద్వితీయ మూర్తి
బ్రహ్మచారిణివైమమ్ము బ్రతుకఁ జేయ
మమ్ము కరుణించి వచ్చితే కమల నయన!
వందనంబులు చేకొమ్ము పావనాఘ్రి!
సీస గర్భస్థ రుచిరవృత్తము. ( రుచిరము. - జ భ స జ గ .. యతి 9)
పరాత్పరీ కను నను బ్రహ్మచారిణీ!
తరింతునేన్ మది నిను దాల్చి భక్తితో
నిరంతరంబసదృశ నిశ్చలాత్మతో

స్మరింతు నిన్ ననుఁ గను మాతృ దేవతా!
నైవేద్యం :  పులిహోర
 జైహింద్.
Print this post

1 comments:

రాజేశ్వరి నేదునూరి చెప్పారు...

నమస్కారములు
జగన్మాతా నమోస్తుతే

కామెంట్‌ను పోస్ట్ చేయండి

ఆంధ్రామృత బ్లాగ్ వీక్షకులకు ధన్యవాదములు.