గణనీయంబగు భాషలందు తెలుగున్ గాంచంగ మేల్మేలు.. తాన్ విన సొంపై , ప్రకటించు భావ సరళిన్ దృప్తిన్, విశేషించి పల్ ఘన కావ్యామృత సంవిధాన మహిమల్ గాంచంగ నాంధ్రామృతం బను యీ బ్లాగును గొల్పి యుంటి. కనుడీ ! ఆంధ్రామృతం బందుడీ ! .

17, ఫిబ్రవరి 2012, శుక్రవారం

రామ కృష్ణ విలోమ కావ్యంలో గల పాద భ్రమక శ్లోకము.

జైశ్రీరామ్
ఆంధ్రామృతం ఎంత గ్రోలినా ఇంకా గ్రోలాలనే ఉత్కంఠతో ఉన్న సాహితీ బంధువులారా! ఆంధ్రామృత మహా సాగరంలో వెతికిన కొద్దీ అద్భుతమైన ఆణి ముత్యాలు దొరుకుతూనే ఉంటాయి. 
ఇప్పుడు  క్రీ.శ.14. వాడైన దైవజ్ఞ సూర్య తన రామ కృష్ణ విలోమ కావ్యంలో వ్రాయఁబడిన ఒక అద్భుతమైన పాద భ్రమక శ్లోకం చూద్దాము.

తాం భూసుతా ముక్తిముదార హాసం.
వందే యతో లవ్య భవం దయా శ్రీ.
భావము:-
చిఱు నవ్వులు చిందించే లవుని ప్రేమించే దయ గల లక్ష్మి ఐన ఆ సీతా మాతకు నమస్కరించు చున్నాను.
అదే శ్లోకం చివరి నుండి మొదటి వరకు చదివితే అది గీతా ప్రాశస్త్యాన్ని తెలియ జేసే శ్లోకమైంది. ఇది ఎంత అద్భుత సాహితీ ప్రక్రియో చూడండి.
 శ్రీ యాదవం భవ్య లతోయదేవం 
సంహార దా ముక్తి ముతా సుభూతాం.
భావము:-
మంగళప్రదమైన ఆకర్షణ గలవాడైన  శ్రీ కృష్ణుని గీతా బోధ చెడుని సంహరిస్తూ ప్రాణప్రదమైనది.
చూచారా! దైవజ్ఞ సూర్య కవి తన రామ కృష్ణ విలోమ కావ్యంలో తన మేథాశక్తి నెంతగా ఉపయోగించి, అనంత భావనా సాహితీ విను వీధుల్లో మనలను విహరింప జేసాడో! ఆలోచించే మనసు, తెలుసుకోవాలనే జిజ్ఞాస ఉండాలే కాని, ఎన్ని లేవండి మనం తెలుసుకోవడానికి!ఇతర భాషలలో ఊహకు కూడా అందని సాహితీ సంపద అచ్చంగా  
మన సొంతం.  
అన్నట్టు ఈ శ్లోకాన్ని ముందునుండి వెనుకకు, వెనుక నుండి ముందుకి చదవడమే కాదండోయ్! కంఠస్థము చేసెయ్యాలన్న మాట మరువకండీ? 
మనమిత్రులు శంకరయ్య గారు శంకరాభరణం బ్లాగులో వేంకటాధ్వరి రచించిన శ్రీ రాఘవ యాదవీయమ్ విలోమ కావ్యాన్ని ప్రచురిస్తున్నారు.చూడకపోతే అక్కడ చూడవచ్చును.
నమస్తే. 
జైహింద్.
Print this post

3 comments:

Zilebi చెప్పారు...

శ్రీ చింతా వారు,

చాలా చక్కటి చిక్కటి విలోమాన్ని ఇచ్చారు!

పాద భ్రమకం ఈ పదం మరీ బావుంది విన సొంపుగా!

ఈ పూర్తి విలోమ శ్లోకానికీ ఒక్కోరోజు ఒక్కొకటి తెనుగీకరించండి!

మా మనవడికి నేర్పుతాను రోజు కొక్కటి చొప్పున !

జిలేబి.

పరుచూరి వంశీ కృష్ణ . చెప్పారు...

మంచి పద్యం అందచేసినందుకు ధన్యవాదములు ...

Pandita Nemani చెప్పారు...

శ్రీరామకృష్ణ రాయా!
శ్రీరస్తు జయోస్తు మీ సుకృతులకును యశ
శ్శ్రీరస్తని దీవింతును
సారోదార గుణసాంద్ర! సరస కవీంద్రా!

కామెంట్‌ను పోస్ట్ చేయండి

ఆంధ్రామృత బ్లాగ్ వీక్షకులకు ధన్యవాదములు.