అవధాన రాజధాని కార్యక్రమంలో నేను దత్తపది పృచ్ఛకునిగా వ్యవహరించిన తీరు.

జైశ్రీరామ్.

ఆర్యులారా! సభా కల్పతరుం వందే అని నేను సభాముఖంగా సమర్పించిన పద్యాలు చూడండి.

శ్రీ హస్తినాపురములో (తే.02-11-2014 – 08-11-2014)

డా. మాడుగుల నాగఫణి శర్మగారు అవధాన పీఠము తరపున

అవధాన రాజధాని కార్యక్రమము నిర్వహించిన సందర్భముగా

సభాకల్పతరుం వందే.

శా. శ్రీమద్భారత భవ్య ధాత్రి విలసత్ శ్రీవాఙ్మనోజ్ఞాకృతుల్,

ప్రేమోద్భాసిత సత్కవుల్, పురజనుల్, విజ్ఞాన తేజోనిధుల్,

నామీదన్ గృపఁ జూపునట్టి సుజనుల్, నా సోదరీసోదరుల్.

నీమంబొప్పఁగ మిమ్ముఁ గొల్తు, కనుడీ. నే రామకృష్ణాఖ్యుఁడన్.

హస్తినాపుర సంస్తుతి. ద్వివిధ కంద - గీత గర్భ చంపకమాల.

ధర కవితాప్రభారవి వధాన విరాజిత రాజధాని నాన్

నిరుపమవైతివే మహిత నిర్మల సత్కవిమండనంబ! య

క్షర శివకంఠ సత్ ప్రణవ సంభవ హస్తిన! భాగ్యధాత్రి! వా

గ్వరమిడు మాతవీభరతకల్ప వరాక్షయ భవ్యపుత్రికా!

చంపక గర్భస్థ  కందము ౧.

కవితాప్రభారవి వధా - న విరాజిత రాజధాని నాన్, నిరుపమవై

శివకంఠ సత్ ప్రణవ సం - భవ హస్తిన! భాగ్యధాత్రి! వాగ్వరమిడుమా!

చంపక గర్భస్థ  కందము ౨.

శివకంఠ సత్ ప్రణవ సం - భవ హస్తిన! భాగ్యధాత్రి! వాగ్వరమిడుమా!

కవితాప్రభారవి వధా - న విరాజిత రాజధాని నాన్, నిరుపమవై.

చంపక గర్భస్థ  గీతము.

రవివధాన విరాజిత రాజధాని! - మహిత నిర్మల సత్కవిమండనంబ!

ప్రణవ సంభవ హస్తిన! భాగ్యధాత్రి! - భరత కల్ప వరాక్షయ భవ్యపుత్రి!

అవధాన సరస్వతీ ప్రశంస.

ద్వివిధ కంద ద్వయ  – గీత  గర్భ  చంపకమాల.

మహితులలోన తా నెగడు మాడ్గుల నాగఫణిప్రపూజ్యుడున్,

మహి కననౌన్ సుధిన్ సభిక మాన్య నగాధిపు సత్కవీశునన్.

రహి కలుగున్ గనన్ కవన రాజ్య లసద్వర కాంతి రూపు. సత్

స్పృహ మనలోన్ మహా కవిని విజ్ఞునిఁ గాంచినఁ గాంక్ష తీరుచున్!

చంపక గర్భస్థ  కందము ౧.

తులలోన తా నెగడు మా - డ్గుల నాగఫణిప్రపూజ్యుడున్, మహి కననౌన్.

కలుగున్ గనన్ కవన రా - జ్య లసద్వర కాంతి రూపు. సత్స్పృహ మనలో.

చంపక గర్భస్థ  కందము ౨.

కలుగున్ కనన్ కవన రా - జ్య లసద్వర కాంతి రూపు. సత్స్పృహ మనలో.

తులలోన తా నెగడు మా - డ్గుల నాగఫణిప్రపూజ్యుడున్, మహి కననౌన్.

చంపక గర్భస్థ  కందము ౩.

కననౌన్ సుధిన్ సభిక మా - న్య నగాధిపు సత్కవీశునన్. రహి కలుగున్

మనలోన్ మహాకవిని వి - జ్ఞునిఁ గాంచినఁ గాంక్ష తీరుచున్! మహితులలో.

చంపక గర్భస్థ  కందము ౪.

మనలోన్ మహాకవిని వి - జ్ఞునిఁ గాంచినఁ గాంక్ష తీరుచున్! మహితులలో.

కననౌన్ సుధిన్ సభిక మా - న్య నగాధిపు సత్కవీశునన్. రహి కలుగున్.

చంపక గర్భస్థ  గీతము.

నెగడు మాడ్గుల నాగఫణిప్రపూజ్యు - సభిక మాన్య నగాధిపు సత్కవీశు.

కవన రాజ్య లసద్వర కాంతి రూపు. - కవిని విజ్ఞునిఁ గాంచినఁ గాంక్ష తీరు.

శుభమస్తు.

ఇక

అవధాన రాజధాని కార్యక్రమంలో నేనొసగిన దత్తపది చూడండి.

అవధానిశేఖరా! ఈ సభాస్థలి సాక్షాత్ కైలాసంలాగ భాసిస్తోంది.

మీరు

రక్షణ

శిక్షణ

భక్షణ

ప్రోక్షణ

అనే పదాలను స్వీకరించి  ఉత్పలమాలలో కైలాసాన్ని ఆవిష్కరించ వలసినదిగా నా కోరిక.

నేనొసగిన అంశాన్ని నేనిచ్చిన దత్తపదుల అవధాని డా. నాగఫణి శర్మగారుపయోగించి కైలాసగిరిని ఉత్పలమాలలో ఆవిష్కరించినారు. అది చూడండి.

హాసము.పార్వతీ మధుర హాసము. రక్షణ మీకు, మాకు. కై

లాసము నేలపై దిగిన లక్షణ శిక్షణ కల్గె నేడు. అ

భ్యాస పరోపకారి శివుఁడా విష భక్షణఁ జేసె. రాశిగా

పోసిన పుణ్యమై యతఁడు ప్రోక్షణ చేసె శిరస్థ గంగలన్.

అవధానిగారు చేసిన కైలాస ఆవిష్కరణకు పులకరించిన నేను వారిని ప్రశంసించిన విధము చూడండి.

అవధాన రాజధానిని 

నవనీతము పంచినారు నాగ ఫణీంద్రా!

కవితామృత ధార లుమా

ధవు దర్శన భాగ్యమొసగె. ధన్యతఁ గొలిపెన్.

వామభాగమునందు వర్ధిల్లు రేణుకై పార్వతీసతి మీదు ప్రభను పెంచె.

జడలోని గంగమ్మ వడివడిపరుగిడి వాఙ్మయంబుగ నోట వచ్చుచుండె.

నుదుటిపైన విభూతి సుధలు చిందెడి చంద్ర్రరేఖయై మిమ్ములఁ బ్రేమ గొలిచె.

మెడలోని పూదండ మేలగు నాగమై మీకలంకారమై మేలుఁగొల్పె.

నాగఫణినామధారివౌ నాగభూష - ణుఁడవు. సన్మార్గమునమమ్ము నడుపుచుండి

తెలుగు తేజము పెంచెడి దివ్య పురుష! అంజలించెద.కొనుమయ్య ఆది దేవ!

నేను చేసిన ప్రశంసను ఆమోదించి 

అభిమాన పూర్వకంగా అవధానిగారు తన శ్రీమతిగారితో కలిసి నన్ను సత్కరించినారు.

నన్ను సత్కరిస్తున్న దృశ్యం.

అవధాన రాజధానిలో ఎందరో, ఎందరెందరో మహానుభావులు ఆదరణతో ఆప్యాయంగా నన్ను చూచి, తమ అవ్యాజానురాగం చూపించి, నన్ను ఆనంద పరవశునిగా చేసియున్నారు. వారందరికీ నేను హృదయ పూర్వకంగా పేరు పేరునా నా కృతజ్ఞతాపూర్వక నమస్కృతులు తెలియజేసుకొంటున్నాను.
ఈ విషయాలను మీముందుంచుచున్నందుకు ఆనందంగా ఉంది. ఎది చదివి, మీ అభిమానాన్ని చూపుతున్న మీకు కూడా నా ధన్యవాదములు.
జైహింద్.

అగ్నిహోత్రం గృహక్షేత్రే ... మేలిమి బంగారం మన సంస్కృతి,

జైశ్రీరామ్.

శ్లో. అగ్నిహోత్రం గృహక్షేత్రే గర్భిణీం వృద్ధ బాలకౌ,  
రిక్తహస్తేన నోపేయా ద్రాజానం దైవతం గురుమ్.
గీ. యజ్ఞవాటిక కింటికి,అఖిల పుణ్య
క్షేత్రములకు,వృద్ధులు, గురు, శిశుల, గర్భ
వతుల, రాజుల దేవులన్ వట్టి చేతు
లనిల గనగ పోరాదంద్రు వినయ మతులు.

భావము. హోమం జరిగే చోటుకు, ఇంటికి, పుణ్యక్షేత్రానికి, వృద్ధులు, శిశువులు, గర్భవతులు వీరి దగ్గరికి, గురువు, దేవుడు, రాజు వీరి దగ్గరికి దర్శనార్థం వెళ్ళినప్పుడు వట్టిచేతులతో పోరాదు. అంటే పూలు, పళ్లు లాంటి వేవైనా తీసుకొని వెళ్లాలన్నమాట.                                                                                                                

                                                                            జైహింద్.

                                                                                        

అరిష్టాని ప్రణశ్యన్తు ... మేలిమి బంగారం మన సంస్కృతి,

జైశ్రీరామ్.

శ్లో. అరిష్టాని ప్రణశ్యన్తు దురితాని భయాని చ |
శాన్తిరస్తు శుభం మేస్తు గ్రహా: కుర్వన్తు మంగళం ||
గీ. అశుభములు నాశనంబౌత, యఖిల దురిత
భయములిల నాకు నశియించి. పరమ శాంతి
కలుగ చేయుత గ్రహములు కరుణ జూచి,
మంగళంబులు కూర్చుత మహితముగను.
భావము. అరిష్టములు నశించు గాక. పాపములు, భయములు తొలగు గాక, నాకు శాంతి, శుభము కలుగు గాక, గ్రహముల యనుగ్రహము నాకు కలుగు గాక. గ్రహములు నాకు మంగళప్రదులగుదురు గాక.

జైహింద్.

మన దేశ రాజధానిలో అత్యంత విజయవంతమైన అవధాన రాజధాని కార్యక్రమము.

జైశ్రీరామ్.

ఆర్యులారా! ఈ నెల రెండవ తేదీ నుండి తొమ్మిదవ తేదీ వరకు మన దేశ రాజధాని హస్తినాపురం(ఢిల్లీ)లో శ్రీమాన్ డా.మాడుగుల నాగఫణి శర్మ గారు తలపెట్టిన అవధాన రాజధానీ కార్యక్రమము అత్యంత విజయవంతమైనది. లబ్ధప్రతిష్ఠులనేకులు ఈ కార్యక్రమమున పాల్గొని,విజయవంతం చేశారు. శ్రీమాన్ బలదేవానంద సాగర  శ్రీమాన్ శంకర్నారాయణ, మున్నగు మహనీయులు ఈ కార్యక్రమమునాఅద్యంతము ఉండి శుభప్రదం చేశారు.

ముగింపుదినోత్సవమునాడు శ్రీశ్రీశ్రీ గణపతి సచ్చినాదంద మహర్షి కూడా సభకు విచ్చేసి తమ అనుగ్రహ భాషణం చేసి, అందరికీ తమ ఆశీస్సులందజేశారు.

శ్రీమాన్ నాగఫణి శర్మగారికి సచ్చిదానంద మహర్షి అవధానసమ్రాట్ అనే బిరుదును కూడా ప్రదానం చేశారు.

ఈ అవధాన కార్యక్రమమున ఆద్యంతము అత్యంత మహనీయంగా నిరుపమానంగా తన మహనీయతను శ్రీ నాగఫణిశర్మగారు ప్రదర్శించుట ద్వారా అందరినీ అబ్బురపరిచారు.

ఈ కార్యక్రమమున దత్తపది ఇచ్చుట ద్వారా నేను కూడా పృచ్ఛకుడుగా బాధ్యత నిర్వహించాను.

అవధాన రాజధానీ కార్యక్రమము.

 పృచ్ఛకులుగా పాల్గొనిన మన సుప్రీమ్ కోర్ట్ జడ్జ్, మరికొందరు ప్రముఖులు.

 సభనలంకరించిన డా.మంగళంపల్లి బాలమురళీకృష్ణ మున్నగువారు.

 పృచ్ఛకులుగా పాల్గొని అవధానిపై ప్రశ్నను సంధిస్తున్న మన మాన్య మంత్రివర్యులు శ్రీమాన్ హరీష్ రావుగారు.

 హరీష్ రావుగారి ప్రశ్నకు సమాధానంగా పద్యం చెప్పుచున్న అవధానిగారు.

కార్యక్రమమునకు విచ్చేసిన అవధానిగారిని ప్రశ్నిస్తున్న ఆంధ్రప్రదేశ్ మంత్రి శ్రీమతి పరిటాల సునీత గారు.

శ్రీమతి పరిటాల సునీతగారి ప్రశ్నకు మాడుగులవారి సమాధానం.

సభకు విచ్చేయుచున్న కేంద్ర మంత్రివర్యులు శ్రీమాన్ భండారు దత్తాత్రేయ.

సభనలంకరించిన సి.యమ్.రమేష్. మరియు మరొక ప్రముఖులు.

సభనలంకరించిన ప్రముఖ చలన చిత్ర కళాకారుడు శ్రీమాన్ దీక్షితులు

స్వరపది ప్రక్రియలో ప్రముఖ సంగీతవిద్వాసులైన సహోదరుల రాగాలాపన.

 ప్రముఖ సంగీతవిద్వాసులైన సహోదరుల రాగాలాపనననుసరించి ఆశువుగా పాడుచున్న అవధానిగారు.

 ఆ గానామృత సాగరంలో మునిగి పారవశ్యంతో బ్రతుకమ్మ నుద్దేశించి నృత్యము చేస్తున్న మహిళామణులు.

 ఆ ఆనంద పారవ్శ్యంలో అవధానిగారిని ఆకాశానికెత్తి అభినందిస్తున్న ప్రేక్షకావళి.

 అవధానంలో అప్రస్తుతప్రసంగం చేస్తూ అత్యద్భుతంగా అందరినీ అలరిస్తున్న శ్రీమాన్  శంకర నారాయణ గారు.

అవధాని గారిని ప్రశంసిద్తున్న మాన్య మంత్రివర్యులు శ్రీ వెంకయ్య నాయుడు గారు.

అవధానినిపై ప్రశ్నను సంధిస్తున్న కేంద్ర ప్రసారాల శాఖామాత్యులు

సభనలంకరించిన శ్రీమాన్ గొల్లపూడి మారుతీరావు గారు.

అపారమైన అనుగ్రహంతో సభకు విచ్చేసిన శ్రీశ్రీశ్రీ గణపతి సచ్చిదానందమహర్షి.

అవధానిని ప్రశ్నిస్తున్న సచ్చిదానందమహర్షి.

తన ప్రశ్నకు అవధానిగారి సమాధానమును విని అతనిని ప్రశంసిస్తున్న సచ్చిదానందులు.

శ్రీమాన్ నాగఫణి శర్మ గారికి అవధాన సమ్రాట్ బిరుదుతో సత్కరిస్తున్న ప్రముఖులు.

 పుంభావ సరస్వతీ మూర్తియైన యతీశ్వరులు అవధానిపై ప్రశ్నలవర్షం కురిపిస్తున్న దృశ్యం.

వారి ప్రశ్నకు అవధానిగారి  శ్లోకరూపంలో సమాధానం విని తన ఆనందాన్ని తెలియజేస్తున్న స్వామివారు.

అవధానిగారికి దత్తపదిని ఇచ్చిప్రశ్నిస్తున్న నేను.

సభలో నన్ను సత్కరిస్తున్న డా. నాగఫణిశర్మ దంపతులు.

ఆకాశవాణిలో ప్రతీరోజు సంస్కృత  వార్తలు చదివే శ్రీమాన్ బలదేవానంద సాగర్ గారితో నేను.

ఈ కార్యక్రమమునకు సంబంధించిన మరికొన్ని ఛాయా చిత్రములు క్రమముగా ప్రచురించుటకు ప్రయత్నింతును.

జైహింద్.

అవిధేయో భృత్యజనః ... మేలిమి బంగారం మన సంస్కృతి,

జైశ్రీరామ్.

శ్లో. అవిధేయో భృత్యజనః
శఠాని మిత్రాణి నిర్దయః స్వామీ
వినయరహితా చ భార్యా
మస్తకశూలాని చత్వారి.
గీ. మాట విననట్టి పనివాడు, మదిని మెలగి
మోసగించెడి మిత్రుఁడు, భూమిపైన
దయయె లేనట్టి యజమాని, ప్రియము లేని
మాట విననట్టి భార్యయు మదికి బాధ.  
భావము. మాట వినని పనివాళ్ళు, మోసం చేసే మిత్రులు, దయలేని యజమాని, వినయం లేని భార్య - ఇవి నాలుగు తలనొప్పులు.

జైహింద్.

స్నేహో హివరమఘటితో ... మేలిమి బంగారం మన సంస్కృతి,

జైశ్రీరామ్.

శ్లో. స్నేహో హివరమఘటితో 
నవరం సంజాత విఘటితః స్నేహః
హృతనయనోహి విషాదీ 
నవిషాదీ భవతి సఖలు జాత్యంధః
గీ. మైత్రి చేయక పోవుటే మహిని మేలు.
మిత్రుడై, తుది విడుచుట మేలు కాదు.
పుట్టు గ్రుడ్డియే మేలుగా పుడమిపైన
కోలుపోయిన కనులున్న గ్రుడ్డికన్న.
భావము. మైత్రి చేయకుండుటే మేలు. స్నేహం చేసి వదిలేయడం విడిపోవడం మంచిది కాదు. 
కళ్ళుపోయిన వానికి బాధ. కానీ పుట్టుగుడ్డికి అంత బాధ ఉండదు కదా!

జైహింద్..

తత్క్లిష్టం యద్విద్వాన్ ... మేలిమి బంగారం మన సంస్కృతి,

జైశ్రీరామ్.

శ్లో. తత్క్లిష్టం యద్విద్వాన్
విద్యాపాఙ్గతోऽపి యత్నేన
విజ్ఞాతారం అవిన్దన్
భవతి సమః ప్రాకృతజనేన. 
గీ. ప్రజల గుర్తింపు లేనట్టి పండితులిల
బ్రతుకవలయును సామాన్య ప్రజల వోలె.
కుందనపుపళ్ళెమునకైన గోడ చేర్పు
తప్పదిలలోన యను సూక్తి తలప నిజము.
భావము. ఎంతో శ్రమపడి సకల విద్యలలోను పండితుఁడైన విద్వాంసుఁడైనా సరే తనను గుర్తించేవారు లేక అందరిలోను సామాన్యులతో బాటుగానే సామాన్యజీవనం గడుపుతూ ఉండవలసినదే. బంగారు పళ్ళేమునకైనా గోడ చేర్పు కావాలంటారు.అదే ఇది.

జైహింద్.

పరవాదే దశవదనః ... మేలిమి బంగారం మన సంస్కృతి,

జైశ్రీరామ్. 

శ్లో. పరవాదే దశవదనః
పరరంధ్రనిరీక్షణే సహస్రాక్షః
సద్వృత్త విత్తహరణే
బాహుసహస్రార్జునో నీచః. 
గీ. పరుల నైచ్యంబులాడను పదియు నోర్లు.
పరుల దోషముల్ వెదుకను వంద కనులు,
పరుల ధనమునపహరింప పాలసులకు
వేయి చేతులు నిజమిది విశ్వమందు.
భావము. ఇతరుల దోషాలు వెతుకునప్పుడు పది ముఖములు, ఇతరుల లోపములను చూచుటలో వేయి కళ్ళు. మంచివారి మంచిని, డబ్బు దొంగిలించడంలో వేయి చేతులు కలిగినట్లుందురు - ఇది నీచుని స్వభావము. 

జైహింద్.

ప్రతివాదినీ చ భార్యా ... మేలిమి బంగారం మన సంస్కృతి,

జైశ్రీరామ్.

శ్లో. ప్రతివాదినీ చ భార్యా
పరసేవా పరగృహే సదా భుక్తిః
క్షిప్రం జరయతి పురుషం
నీచైర్వాసః ప్రవాసశ్చ. 
గీ. పత్ని ప్రతికూలవతియౌట, పరుల సేవ, 
పర గృహంబున భుక్తియు, పాలసులగు
వారితోబ్రతుకుగడుపువారిలిలను
వృద్ధులగుదురు పిననాడె వింతగాను.
భావము. ప్రతి మాటకూ అడ్డుచెప్పే భార్య ఉన్నను, పరులను సేవించుచు జీవనము సాగించుచున్నను, పరుల యింట నిత్యము భోజనము చేయుచు జీవించుచున్నను,  నీచులతో సహవాసము చేయుచున్నను, వాసమూ, అట్టివారిని చిన్న వయసులోనే ముసలితనము ఆవరించును. 

జైహింద్.

అల్పాక్షరరమణీయం ... మేలిమి బంగారం మన సంస్కృతి,

జైశ్రీరామ్.

శ్లో.  అల్పాక్షరరమణీయం
యః కథయతి నిశ్చితం స వై వాగ్మీ
బహువచనమల్పసారం
యః కథయతి విప్రలాపీ సః
క. తక్కువ పలుకుచు భావము 
నెక్కువ కనఁజేయు మహితుఁడెచ్చటనైనన్.
ఎక్కువ పలుకుచు భావము
తక్కువ కనఁజేయు వదరు ధరణిని కనగా.
భావము. ఎవడైతే తక్కువ అక్షరాలలో, రమణీయంగా మాటలాడతాడో నిశ్చయంగా వాడే చక్కని వక్త. ఎవడైతే అల్పమైన సరుకున్న సారంలేని మాటలను చెబుతూ ఉంటాడో వాడు ఒక వదరుబోతు.

జైహింద్.

గర్జతి శరది న వర్షతి ... మేలిమి బంగారం మన సంస్కృతి,

జైశ్రీరామ్.

శ్లో. గర్జతి శరది న వర్షతి
వర్షతి వర్షాసు నిస్స్వనో మేఘః
నీచో వదతి న కురుతే
న వదతి సుజనః కరోత్యేవ.
గీ. ఉరుము మేఘము వర్షము కురియఁబోవు.
ఉరుమకుండనె వర్షంబు కురియు కొన్ని.
పలుకులాడెడి నీచులు పనికి రారు.
పనిని చేతురు మహితులు, పలుకబోరు. 
భావము. శరత్కాలంలో మేఘం ఊరికే గర్జిస్తుంది. వర్షాకాలంలో చప్పుడు చేయకున్నా వర్షిస్తుంది. నీచుడు మాటలు చెప్తాడు కానీ పని చెయ్యడు. సుజనుడు మాటలు చెప్పడు, చేసి చూపుతాడు.

జైహింద్.

జీవంతం మృతవన్మన్యే ... మేలిమి బంగారం మన సంస్కృతి,

జైశ్రీరామ్.

శ్లో. జీవంతం మృతవన్మన్యే దేహినం ధర్మ వర్జితం
మృతో ధర్మేణ సంయుక్తో దీర్ఘజీవీ న సంశయః.
గీ. భువినధర్ముఁడు నడయాడు,  శవము తలప.
ధర్మ సద్వర్తి మృతుఁడయ్యు తలప జీవి.
ధర్మ మార్గంబు వీడని ధన్య జీవి
మృతియె లేనట్టి దైవమై క్షితిని నిలుచు.
భావము. ధర్మాన్ని త్యజించిన వ్యక్తి జీవించి ఉన్నా మృతునిగా పరిగణింప బడుతాడు. ధర్మాన్ని పాటించిన వాడు మృతుడైనా చిరంజీవి అనటంలో సందేహంలేదు.

జైహింద్.

శ్లోకార్ధేన ప్రవక్ష్యామి ... మేలిమి బంగారం మన సంస్కృతి,

జైశ్రీరామ్.

శ్లో. శ్లోకార్ధేన ప్రవక్ష్యామి యదుక్తం గ్రంథ కోటిభిః,
పరోపకారః పుణ్యాయ పాపాయ పరపీడనం.
గీ. కోటి గ్రంథంబులు వచించు గొప్ప గుణము
అర్థ పద్యంబునందుండె నరయుడయ్య.
పరులకుపకృతి పుణ్యంబు, వరలఁ జేయు
పరుల కపకారమును జేయ పాపమగును.
భావము. కోటి గ్రంధాలలో చెప్పబడిన దానిని అర్థ శ్లోకంలో (అర్థ పద్యములో) చెపుతాను :
"పరోప కారమే పుణ్యం ; ఇతరులను బాధ పెట్టడమే పాపం".

జైహింద్.

రజనికరః ఖలు శీతో ... మేలిమి బంగారం మన సంస్కృతి,

జైశ్రీరామ్.

శ్లో. రజనికరః ఖలు శీతో
రజనికరాచ్ఛన్దనో మహాశీతః
రజనికరచ్చన్దనాభ్యాం
సజ్జనవచనాని శీతాని.
క. వెన్నెల చల్లగ నుండును.
వెన్నెలకన్నమలయజము విన చల్లనిదౌన్.
మన్నిక గలిగిన సుజనుల
మిన్నగు వాగ్ఝరి చలువయె మిన్న కనంగన్.
భావము. వెన్నెల చల్లగా నుఇండును, మంచిగంధము వెన్నెలకన్నను చల్లగ నుండును. మహనీయుల మాటలు వెన్నెలకన్నను, మంచిగంధము కన్నను కూడా చల్లగా ఉందును కదా! 

జైహింద్.

సులభాః పురుషాలోకే ... మేలిమి బంగారం మన సంస్కృతి,

జైశ్రీరామ్.

శ్లో. సులభాః పురుషాలోకే సతతం ప్రియవాదినః
అప్రియస్య చ పధ్యస్య వక్తాశ్రోతా చదుర్లభః
గీ. జగతి ప్రియవాదులనునొప్పు నగణితముగ.
అప్రియంబయ్యు మేల్గూర్చు నద్భుతోక్తి
సత్యయుక్తంబు పలికెడి సరస సుమతు
లరుదు, వినువారలరుదుగ ధరణి నుంద్రు.
భావము. కమ్మని కబుర్లు చెప్పేవారు ఎక్కడ పడితే అక్కడ ఉంటారు. అయితే చెప్పేటప్పుడు కష్టంగా ఉన్నా తరువాత మేలుకూర్చే మాటలు చెప్పేవాడు. దాన్ని వినేవారు దొరకడం కష్టం. 

జైహింద్.