శ్రీ యాదాద్రి లక్ష్మీనృసింహ శతకము 56వ పద్యము .... రచన. చింతా రామకృష్ణారావు. గానం. శ్రీ కుమార సూర్యనారాయణ.

 జైశ్రీరామ్.

56. ఓం శర్వాయ నమః.

ఫలసదన వృత్త గర్భ సీసము.

కుమదము నణచు సుగుణ మహితుఁడవు నీ - వే దేవ! నీవె మా వేల్పువయ్య.  

సుమధుర వచన కుసుమ మహతిఁ గొనుమీ - వే, పూజ నేఁ జేయు వేళలందు.  

కుముదమున నిను మిగులఁ బొలయఁగను, గొ - ల్తున్ సదా, మహనీయ! తోయజాక్ష!      

సహృదయమునఁ గను, జయహిత సుఫల దా - తా! హరీ! నిల్చి చిత్తంబులోన.

గీ. ఫలసదనవృత్త గర్భిత లలిత సీస - సరస సంభాస *శర్వా*! ప్రశాంతమిమ్ము.

భక్త జన పోష! భవశోష! పాపనాశ! - శ్రితజనోద్భాస! యాదాద్రి శ్రీనృసింహ!

56వ సీసగర్భస్థ ఫలసదనవృత్తము. (న న న న స గ  ..  యతి 10)

మదము నణచు సుగుణ మహితుఁడవు నీవే. - మధుర వచన కుసుమ మహతిఁ గొనుమీవే.  

ముదమున నిను మిగులఁ బొలయఁగను గొల్తున్. - హృదయమునఁ గను జయ హిత సుఫల దాతా!

భావము.  

భక్తులను పోషించువాఁడా! భవబంధములను నశింపఁజేయువాఁడా! పాపమును నశింపఁజేయువాఁడా! ఆశ్రిత

జనమున ప్రకాశించువాఁడా! ఓ యాదాద్రివాసుఁడవైన లక్ష్మీ నారసింహా! కుత్సిత మదమును అణచెడి

మంచిగుణములతో ప్రకాశించు గొప్పవాఁడవు నీవే. ఓ దేవా ! నీవే మా దైవము.మేము పూజనాచరించే వేళలలో.మిక్కిలి

మధురమయిన మా వాక్కులనెడిపూల గొప్పదనమును స్వీకరించు. మహనీయుఁడవయిన ఓ పద్మనేత్రా! భూమిపై నీవు

మిక్కిలి ప్రకాశించు విధముగా నేను నిన్ను కొలిచెదను..జయమును హితముని కలిగించు మంచి ఫలమునొసగు ఓ హరీ!

నా హృదయమున నిలిచి నామన్సులోనుండియే నన్ను చూడుము.ఫలసదన వృత్తగర్భిత సీసమున సరసముగా

సంభాసించువాఁడా! ఓ శర్వా! మాకు మిక్కిలి శాంతిని కలుగఁజేయుము..

జైహింద్.

Print this post