శ్రీ యాదాద్రి లక్ష్మీనృసింహ శతకము 77వ పద్యము .... రచన. చింతా రామకృష్ణారావు. గానం. శ్రీ కుమార సూర్యనారాయణ.

జైశ్రీరామ్.

77. ఓం సర్వతంత్రాత్మకాయ నమః.

కలరవ వృత్త గర్భ సీసము.

సుందరాంగుఁడ నినుఁజూచుచును మనిన - ప్రభ పెఱుగున్ గదా! వారిజాక్ష!

కాంచుచు మముఁ గనిపించుమిఁకను కరు - ణను శుభదాక్షరా! నయ విభాస!

చిత్తమున్ గని మనఁ జేయుమయ సుమ శ - ర జనకుఁడా! నాకు రక్షఁ గొల్పు.

నా చిత్తమున నిను నమ్మితినయ నిరు - పమ నృహరీ! మహత్ పావనాంఘ్రి!

గీ. కలరవంబయి వినిపించు కన్న తండ్రి! - కనుమ *సర్వతంత్రాత్మకా*! గారవమున.

భక్త జన పోష! భవశోష! పాపనాశ! - శ్రితజనోద్భాస! యాదాద్రి శ్రీనృసింహ!

77వ సీస గర్భస్థ కలరవ వృత్తము. (స న న న లగ .. యతి 8)

నినుఁ జూచుచును మనిన ప్రభ పెఱుగున్. - గనిపించుమికను కరుణను శుభదా! 

మనఁ జేయుమయ సుమశర జనకుఁడా! - నిను నమ్మితినయ నిరుపమ నృహరీ! 

భావము.

భక్తులను పోషించువాఁడా! భవబంధములను నశింపఁజేయువాఁడా! పాపమును నశింపఁజేయువాఁడా! ఆశ్రిత జనమున

ప్రకాశించువాఁడా! ఓ యాదాద్రివాసుఁడవైన లక్ష్మీ నారసింహా! ఓ వారిజాక్షుఁడా! ఓ సుందరాంగుఁడా! నిన్ను చూచుచు

బ్రతుకుచున్నచో మాలో ప్రభ పెరుగును. శుభములనొసగు అక్షరుఁడా! ఓ నయ విభాసా! మమ్ములను నీవు చూచుచు

మాకు కనిపించుము. ఓ మన్మధ జనకా! నా మనసు చూచి నన్ను మనఁ జేయుము. నాకు రక్ష నీవే కదా. మహత్

పావనాంఘ్రివైన ఓ నృహరీ! నా మనసున నిన్నే నమ్మితిని. కలరవమయి వినిపించెడి ఓ కన్న తండ్రీ! ఓ సర్వ

తంత్రాత్మకా! నన్ను గారవమున చూడుము.

జైహింద్. 

Print this post