శ్రీ యాదాద్రి లక్ష్మీనృసింహ శతకము 36వ పద్యము .... రచన. చింతా రామకృష్ణారావు. గానం. శ్రీ కుమార సూర్యనారాయణ.

 జైశ్రీరామ్.

36. ఓం దైత్యదానవ భంజనాయ నమః.

విద్రుమలతా వృత్త గర్భ సీసము.

నిరుపమ! కొల్చెద నిను నిరతమిలన్ సు - సౌందర్య లహరివి సారసాక్ష!

తరుణము కావఁగ, ధరను ననుఁ గనన్ గ - కలనయినం గని కావుమయ్య!

చరణములందుదు సమయమిది హరీశ! - స్మరణమె ముక్తిని చక్కనిచ్చు.

వరముగనందుమ వరలఁ గన ననున్ వి - వర్ధిలఁ జేయుమ, భవ్య నృహరి!

గీ. విద్రుమలతగర్భ సీసస్థ! వెలసి మదిని - *దైత్యదానవ భంజనా*! తనియనిమ్ము. 

భక్త జన పోష! భవశోష! పాపనాశ! - శ్రితజనోద్భాస! యాదాద్రి శ్రీనృసింహ!

36వ సీస గర్భస్థ విద్రుమలతావృత్తము. (న జ న న వ .. యతి 8)

నిరుపమ! కొల్చెద నిను నిరతమిలన్

తరుణము కావఁగ, ధరను ననుఁ గనన్. 

చరణములందుదు సమయమిది హరీ!

వరముగనందుమ వరలఁ గన ననున్.

భావము.

భక్తులను పోషించువాఁడా! భవమును నశింపఁజేయువాఁడా! పాపమును నశింపఁజేయువాఁడా! ఆశ్రితజనమున

ప్రకాశించువాఁడా! ఓ యాదాద్రివాసుఁడవైన లక్ష్మీ నారసింహా! సాటిలేని వాడా! నిన్ను కొలిచెదను.ఓ సారసాక్షా! నీవు

మంచి సౌందర్యకెరటమే..  భూమిపై నన్ను చూచుటకు కాపాడుటకు ఇదే మంచి సమయము. నా కలలోనైనను నన్ను

చూచి  కాపాడుము. ఓ హరిపరమాత్మా! ఇది మంచి సమయము. నీ పాదములందుకొందును. .నీ స్మరణమె చక్కగా

ముక్తినిచ్చును కదా.నన్ను వరలునట్లు చూచుటకు నీవు నాకు వరముగా లభించుము. ఓ గొప్పవాడవైన నరహరీ నను

ప్రవర్ధిలఁ జేయుమయ్యా. ఓ దైత్య దానవ భంజనా! విదృమ వృత్తగర్భ సీసపద్యమున కలవాడా! నా మనసున వెలసి

నన్ను తృప్తిపడనిమ్ము. 

జైహింద్.

Print this post