శ్రీ యాదాద్రి లక్ష్మీనృసింహ శతకము 104వ పద్యము .... రచన. చింతా రామకృష్ణారావు. గానం. శ్రీ కుమార సూర్యనారాయణ.

 జైశ్రీరామ్.

104. ఓం సచ్చిదానందవిగ్రహాయ నమః  

మత్తహంసిని వృత్త గర్భ సీసము.

ఎన్ని కను మురారి! నిన్నే విభునిగా ను - తింతు రా, మదిలోన శాంతి నిల్ప.

సాకఁగను పరాకు నీకేల ప్రవరుండ! - కావఁగా కష్టమా కరుణఁ జూచి?

పుణ్యులును, నరోత్తముల్ జీవనము నీవె = యందురే! వినవేమి సుందరాంగ!!  

రాక్షసారి! పరాత్పరా! నీవె ప్రభవంబుఁ - గొల్పరా! తీర్చరా కోరికలను.

గీ. మత్తహంసిని గర్భ సన్మహిత సీస - *సచ్చిదానంద విగ్రహా*! సన్నుతులయ!

భక్త జన పోష! భవశోష! పాపనాశ! - శ్రితజనోద్భాస! యాదాద్రి శ్రీనృసింహ!

104వ సీస గర్భస్థ మత్తహంసినీ వృత్తము (జ త స జ గ .. యతి 7)  

మురారి! నిన్నే విభునిగా నుతింతురా. - పరాకు నీకేల ప్రవరుండ! కావఁగా.

నరోత్తముల్ జీవనము నీవె యందురే! - పరాత్పరా! నీవె ప్రభవంబుఁ గొల్పరా!

భావము.

భక్తులను పోషించువాఁడా! భవబంధములను నశింపఁజేయువాఁడా! పాపమును నశింపఁజేయువాఁడా! ఆశ్రిత జనమున

ప్రకాశించువాఁడా! ఓ యాదాద్రివాసుఁడవైన లక్ష్మీ నారసింహా! ఓ మురారీ! నా మనసులో శాంతిని నింపుట కొఱకు

ప్రత్యేకించి విభుఁడుగా నిన్నె ఎన్నుకొని కొలుచుదును. ఓ ప్రవరుఁడా! మమ్ములను సాకుట విషయమున పరాకు

నీకెందులకు? కరుణతో మమ్ము కాపాడుట నీకు కష్టమా? ఓ సుందరాంగా! నరోత్తములు, కృత పుణ్యులు జీవనము నీవే

యని అందురే, వారి పలుకులాలకింపవేమి? రాక్షసారీ! ఓ పరాత్పరా! నీవే మాలో శౌర్యము కొలుపుము. మా కోరికలను

తీర్పుము. మత్తహంసినీ వృత్త గర్భ సీసమున వెలుగొందుచున్న ఓ సచ్చిదానందవిగ్రహా! నీకు నా సన్నుతులు.    

జైహింద్.

Print this post