శ్రీ యాదాద్రి లక్ష్మీనృసింహ శతకము 40వ పద్యము .... రచన. చింతా రామకృష్ణారావు. గానం. శ్రీ కుమార సూర్యనారాయణ.

 జైశ్రీరామ్.

40. ఓం సుభద్రకాయ నమః.

తోటక గర్భ సీసము.

దండించుమా! దురితంబులు చేసెడి - దుర్జనులన్ గాంచి తోయజాక్ష!

ఘోరమౌ దుష్ పరిహారము చేయుమ - భక్త నుతా! నీదు శక్తిఁ జూపి,

వర్ధిల్లుచున్ నిరపాయులు కావలె - నీ జనులున్దేవ! నీవె రక్ష.

యాదుకోరా! పరమాత్మ గణించి కృ - పంగనుమా! దేవ! పరమ పురుష!

గీ. దుర్మదాంధుల దండించి త్రోవఁ జూపు - కర్మసాక్షి *సుభద్రకా*! కరుణఁ గనుమ!

భక్త జన పోష! భవశోష! పాపనాశ! - శ్రితజనోద్భాస! యాదాద్రి శ్రీనృసింహ!

40వ సీస గర్భస్థ తోటకము. (స స స స .. యతి 9)

దురితంబులు చేసెడి దుర్జనులన్.

పరిహారము చేయుమ భక్తనుతా! 

నిరపాయులు కావలె నీ జనులున్.

పరమాత్మ గణించి కృపం గనుమా! 

భావము.

భక్తులను పోషించువాఁడా! భవబంధములను నశింపఁజేయువాఁడా! పాపమును నశింపఁజేయువాఁడా! ఆశ్రిత జనమున

ప్రకాశించువాఁడా! ఓ యాదాద్రివాసుఁడవైన లక్ష్మీ నారసింహా! ఓ తోయజాక్షా! చెడుగా ప్రవర్తించెడి చెడ్డవారిని

దండించుము. నీ శక్తి కొలది ఘోరమైన  చెడును పరిహరించుము. ఓ దేవా నీ జనులు వర్ధిల్లుచూ నిరపాయులు

కావలెనయ్యా. వారికి నీవే రక్షం  ఓ పరమ పురుషా! ఓ దేవా! కృపతో నీవు చూచి ఆదుకొనుమా. దుర్మదాంధులను దండించి

త్రోవ చూపెడికర్మసాక్షివైన ఓ సుభద్రకా! కరుణతో చూడుము.

జైహింద్.

Print this post