శ్రీ యాదాద్రి లక్ష్మీనృసింహ శతకము 106వ పద్యము .... రచన. చింతా రామకృష్ణారావు. గానం. శ్రీ కుమార సూర్యనారాయణ.

జైశ్రీరామ్.

106. ఓం సర్వాత్మనే నమః.

పంక్తి వృత్త గర్భ సీసము. 

శ్రీనరసింహుఁడ! చిత్తములోపలన్ - చిత్ప్రకాశమ్ముగా చెలఁగుటకును

జ్ఞానముఁ గొల్పగ కల్గుమికన్, నినున్ - భావనఁ జేయుచు పరవశించి

ధ్యానముతోడ నహర్నిశలున్ మధు - రార్ద్రతతోడను నమలినమతిఁ

బ్రాణముగా కని వర్ధిలుదున్. దయ - చూడుమ నా మది శోభిలుమయ.

గీ. పంక్తి గర్భ సుసీసస్థ! పావనాంఘ్రి! - రామ కృష్ణుండ *సర్వాత్మ*! రక్షవీవె.

భక్త జన పోష! భవశోష! పాపనాశ! - శ్రితజనోద్భాస! యాదాద్రి శ్రీనృసింహ!

106వ సీస గర్భస్థ పంక్తి. (భ భ భ గ .. యతి 7)

శ్రీనరసింహుఁడ! చిత్తములో - జ్ఞానముఁ గొల్పగ కల్గుమికన్

ధ్యానముతోడ నహర్నిశలున్ - బ్రాణముగా కని వర్ధిలుదున్.

భావము.

భక్తులను పోషించువాఁడా! భవబంధములను నశింపఁజేయువాఁడా! పాపమును నశింపఁజేయువాఁడా! ఆశ్రిత జనమున

ప్రకాశించువాఁడా! ఓ యాదాద్రివాసుఁడవైన లక్ష్మీ నారసింహా! చిత్తములో చిత్తేజముతో చెలగుట కొఱకుమాకు జ్ఞానము

ప్రసాదించుటకై నీవు మాకు కలుగుము. నిన్ను భావించుచు,  పరవశించుచు, రాత్రింబవళ్ళు ధ్యానముతో తీయనైన

ఆర్ద్రమనస్సుతో నిన్ను ప్రాణప్రదముగా కని వర్ధిల్లుదును. .దయచూడుము!. నా మదిని శోభిల్లుము. పంక్తివృత్తగర్భ

సీసపద్యమునప్రకాశించువాఁడా! ఓ సర్వాత్మా! నేను చింతా రామకృష్ణారావును. నాకు రక్ష నీవే సుమా.

జైహింద్. 

Print this post