శ్రీ యాదాద్రి లక్ష్మీనృసింహ శతకము 94వ పద్యము .... రచన. చింతా రామకృష్ణారావు. గానం. శ్రీ కుమార సూర్యనారాయణ.

జైశ్రీరామ్

94. ఓం జగత్పాలాయ నమః.

భూతిలక వృత్త గర్భ సీసము.

నీవట నేనిట నిత్యముండుట నీకు - సమ్మతమా? హరీ! సత్వ భాస!

భావన చేసిన నీవ నేనను భావ - భాగ్యమె భాగ్యమౌన్ భక్తకల్ప!

నీ వర తేజము నేర్పునే మహనీయ - తత్వము మాకిలన్ ధర్మతేజ! 

నీవిక నన్ విడ నేరవెన్నఁగ, నిత్య - సత్యము నీవెగా! సౌమ్య నృహరి!  

గీ. వినుత భూతిలక సువృత్త వేద్య! నిన్నుఁ - గవితనెంతు *జగత్పాల*! కావ్యమగుము.

భక్త జన పోష! భవశోష! పాపనాశ! - శ్రితజనోద్భాస! యాదాద్రి శ్రీనృసింహ!

94వ సీస గర్భస్థ భూతిలక వృత్తము. (భ భ ర స జ జ గ .. యతి 12)

నీవట నేనిట నిత్యముండుట నీకు సమ్మతమా హరీ!

భావన చేసిన నీవనేనను భావ భాగ్యమె భాగ్యమౌన్ 

నీ వర తేజము నేర్పునే మహనీయ తత్వము మాకిలన్ 

నీవిక నన్ విడ నేరవెన్నఁగ నిత్య సత్యము నీవెగా! 

భావము.

భక్తులను పోషించువాఁడా! భవబంధములను నశింపఁజేయువాఁడా! పాపమును నశింపఁజేయువాఁడా! ఆశ్రిత జనమున

ప్రకాశించువాఁడా! ఓ యాదాద్రివాసుఁడవైన లక్ష్మీ నారసింహా! ఓ  సత్వగుణమున భాసించువాఁడా! నీవక్కడ, నే నిక్కడ

నిత్యమూ ఉండుట నీకు సమ్మతమా? ఓ భక్తకల్పకమా! భావన చేసినచో నేవే నేను అనెడి భావ భాగ్యమే భాగ్యముకదా. ఓ

ధర్మతేజా! మాకు నీ తేజస్సే మహనీయ తత్వబోధ చేయును.  సౌమ్యస్వరూపా! నీవిక నను వీడి చనలేవు. మాయనిదగు

సత్యమున్నచో అది నీవే సుమా. భూతిలకవృత్త పద్యమున తెలియబడు జగత్పాలా! నిన్ను కవితలో భావింతును

కావ్యముగా రూపు దాల్చుము.

జైహింద్. 

Print this post