అష్టోత్తరశత సతీ అశ్వధాటి (సతీ శతకము). 85వ పద్యము. రచన. చింతా రామకృష్ణారావు. గానము ... శ్రీ కుమార సూర్యనారాయణ.

 జైశ్రీరామ్.

85. శ్రీచక్ర వాసినివి  శౌచంబుతోడ నిను యాచింప ముక్తిఁ గొలువన్

నీచత్వమున్ దరిమి శౌచంబునే కొలిపి యోచించి ముక్తి నిడుదే,

ప్రాచీన సత్కవులు నీ చిత్స్వరూపమును శ్రీచిత్రపద్యకృతులన్

యోచించి వ్రాసిరి మహాచోద్యమై వరల, మాచింతఁ బాపెడి సతీ!

భావము.

మా యొక్క విచారములను పోఁగొట్టెడి ఓ సతీ మాతా! నీవు శ్రీచక్రమున 

వసియించు తల్లివి. శారీరకముగా మానసికముగా శుచిగా ఉండి నిన్ను ముక్తి 

ప్రసాదింపమని కోరుచూ సేవించినచో మాలోఉండే నీచస్వభావమును 

నశింపఁజేసి,శారీరక మానసిక శుచిత్వమును ప్రసాదించి, మమ్ములను 

కాపాడుటకు నీవుంటివికదా తల్లీ! గొప్పవారయిన పూర్వ కవులు నీయొక్క 

చిత్స్వరూపమును మంగళప్రదమయిన చిత్రకవిత్వములతోనొప్ప 

కృతులలో గొప్ప ఆశ్చర్యకరమై వరలు విధముగా ఎంతగనో ఆలోచిచించి 

వ్రాసి యుండిరమ్మా. 

జైహింద్.

Print this post