అష్టోత్తరశత సతీ అశ్వధాటి (సతీ శతకము). 80వ పద్యము. రచన. చింతా రామకృష్ణారావు. గానము ... శ్రీ కుమార సూర్యనారాయణ.

 జైశ్రీరామ్.

80. ధర్మానువర్తులిల మర్మంబెఱుంగరుగ ధర్మార్థమే బ్రతుకుచున్.

దుర్మార్గులట్టియెడ దుర్మార్గమున్ నెరపి ధర్మంబునే గెలుతురే 

ధర్మంబె యోడిన యధర్మంబురాజగును ధర్మంబునే నిలుపుమా.

మర్మజ్ఞులన్ దునుమ ధర్మంబునిల్చును సుకర్మల్ వెలుంగును సతీ!

భావము.

ఓ సతీ మాతా! ధర్మమునే అనుసరించువారీ భూమిపై ధర్మతో 

ప్రవర్తించుచు మాయామర్మములెఱుగరుకదా. అట్టి సమయములో 

దుర్మార్గులు దుర్మార్గమున ప్రవర్తించుచు ధర్మముపై విజయము 

సాధించుచుందుకదా. ధర్మమే ఓడిపోయినచో అధర్మమే రాజగును కదా 

జననీ! కావున ధర్మమును కాపాడుమమ్మా. మాయావులను సంహరించినచో 

ధర్మము నిలుచును కదా తల్లీ! అప్పుడు మంచి కర్మలుప్రకాశించును. 

కావున ధర్మమును కాపాడుమమ్మా.

జైహింద్.

Print this post