అష్టోత్తరశత సతీ అశ్వధాటి (సతీ శతకము).28వ పద్యము. రచన. చింతా రామకృష్ణారావు. గానము ... శ్రీ కుమార సూర్యనారాయణ.

  జైశ్రీరామ్. 

28. చిత్తంబులో గల మహత్తైన శక్తివి, ప్రవృత్తిన్ సదా మెలుఁగుమా. 

మత్తున్ మదిన్ విడిచి చిత్తంబు నీ పయి మహోత్తుంగ భక్తి నిలుపన్ 

సత్తెంబుగాఁ గొలిపి యెత్తీరునైనను లసత్తేజమున్ గొలుపుమా. 

హత్తన్ మదిన్ నిజము లెత్తీరుఁ గొల్పెదవొ, చిత్తేజమై కల సతీ!  

భావము.

నా మనసులో చిత్తేజమై నిలిచి యున్న ఓ సతీమాతా! నా మనసులో ఉన్న 

గొప్ప మాహాత్మ్యముగల శక్తిస్వరూపిణివి. నా ప్రవృత్తిలో నీ వెల్ల వేళలా 

నిలిచియుండుమమ్మా. నాలోని మత్తును విడిచిపెట్టి, నీ మీద మనస్సును 

గొప్ప ఉన్నతమగు  భక్తితో నిలుపునట్లుగా నిజముగా నీవు చేసి,ఏ 

విధానముచేతనైనను గొప్పదైన నీ తేజమును నాలో కొలుము తల్లీ నా 

మనసున సత్యము నాటుకొని పోవునట్లుగా ఏ విధముగా చేసెదవో కదా.

జైహింద్.

Print this post