తాత్పర్యసహిత సౌందర్య లహరి - 44 || రత్నాదేవి. .. పద్యానువాదము చింతా రామకృష్ణారావు.

ఓం శ్రీమాత్రే నమః.

ఉ.  నీ ముఖ శోభ నుండి గణనీయముగా ప్రవహించుచున్న  యా

శ్రీమహిమంపు పాపటి  ప్రసిద్ధ మహత్కర కుంకుమ ప్రభల్

రోమతమిస్రశత్రుతతిలోపలఁ చిక్కినబాలసూర్యుఁడే,

క్షేమము సంపదల్ మరియు శ్రీకర యోగము మాకుఁ గొల్పుతన్, ॥ 44 ॥

భావము.
ఓ దేవీ ! నీ పాపటయందు సిందూరపు రేఖ యున్నది
సిందూరముతో నున్న నీ సీమంత మార్గము (పాపట దారి ) నీముఖసౌందర్యము పొంగులు పొంగి ప్రవహించే ప్రవాహము నుండి, చీలి పైకి ప్రవహించేనీటి పాయ యొక్క ప్రవాహపు దారి ఏమో అన్నట్లు ఉన్నది . అంతేకాదు దట్టము లయిన నీ కేశపాశములు , సాంద్రములైన చీకట్లవలె ఉన్నవి. చీకట్లకు సూర్యునికి విరోధము. కాబట్టి చీకట్లు అనే బలమైన శత్రువు ల చేత చెర బట్టబడిన బాల సూర్యుని కిరణమేమో యన్నట్లు నీనల్లని కురుల మధ్య సిందూర పరాగమును ధరించిన పాపట కనిపిస్తున్నది. ఇటువంటి నీ పాపటరేఖ మాకు యోగక్షేమములను అభివృద్ధి ని పొందించును గాక.

జైహింద్.

Print this post