ప్రమితాక్షర వృత్తంలో కందం కూడా వచ్చేలా వ్రాయుట ఇంతసులభమా అని మీరే అంటారు ఇది చూస్తే.

 జైశ్రీరామ్.

ఆర్యులారా! ప్రమితాక్షర వృత్త లక్షణములు పరికింపుడు.

గణములు....స....జ....స....స.

యతిస్థానము....9వ అక్షరము.

ప్రాస నియమము కలదు.

ఉదా....

జననీ! మదంబ! పలుచన్ గనక

మ్మ నవాంబుజాక్షి! కనుమా! కృపతో,

వినుతింతునమ్మ! మనవిన్ వినుమ

మ్మ! నుతప్రవృత్తిఁ బెంచుమ, మదిలో.

చూచారు కదా. ఈ ప్రమితాక్షర పద్యము లోని మొదటి పాదము 

ఆఖరి గణమునురెండవపాదం మొదటి గణంగా 

దించి చూచినచో ఏమగునో గమనింపుడు. 

ప్రమితాక్షర గర్భగత కందము

జననీ! మదంబ! పలుచన్ 

గనకమ్మ నవాంబుజాక్షి! కనుమా! కృపతో,

వినుతింతునమ్మ! మనవిన్ 

వినుమమ్మ! నుతప్రవృత్తిఁ బెంచుమ, మదిలో.

చూచారా? ఇది కందపద్యమయిందని గుర్తించారా?

కాకపోతే మనం ప్రమితాక్షరీ వృత్తం వ్రాయునపుడు 

కొన్ని  ప్రత్యేక నియమాలు పాటిస్తే సరిపోతుంది.  అవి....

ఏఅక్షరమయితే ప్రమితాక్షరలో ప్రాసాక్షరంగా ఉందో 

ఆ హల్లునే 11వ అక్షరంగా వెయ్యాలి.

అదే విధంగా 10వ అక్షరం ఏదైతే ఉంటుందో దానికి

యతిగా రెండవ పాదంలోని 7వ అక్షరము వెయ్యాలి. అంతే. 

అద్భుతమయిన కందంగా కూడా మనకి స్పష్టమౌతుంది.

మీరూ వ్రాసే ప్రయత్నం చేశారో చిత్రకవిత్వం మీకు 

వశమైపోతుంది మెల్లమెల్లగా. మరెందుకు ఆలస్యం? 

ప్రయత్నించండి. శుభమస్తు.

జైహింద్.

Print this post