నమోఽస్తు తే జగన్మాతా! శార్దూల వృత్త మాలిక..... రచన .. చింతా రామకృష్ణారావు.

జైశ్రీరామ్. 

నమోస్తు తే జగన్మాతా!

శార్దూల వృత్త మాలిక.

అమ్మా! నిన్ గనుచుందు సర్వమున నాహా! పొంగుచున్ సర్వదా. 

సమ్మాన్యంబగు సుస్వరూపముగ, భాషా మందిరోద్భాస! వే 

దమ్మున్ గల్గిన తేజ మీవె, మహిళా తత్వార్ధ సంభాసితా! 

ఇమ్మున్ భారత నారిగా ప్రబలితే! ఈశాని! నీ తేజసం 

బెమ్మిన్ దాల్చిన కాంతలే శుభములన్ హృష్టాత్ములై పంచుచున్, 

దమ్ముం జూపఁగఁ జాలువారు, కవితా దర్పంబునన్ వెల్గుచున్ 

సమ్మానంబుల నందువారు, విలసత్ సత్కార్యముల్ చేయువా 

రమ్ముల్ బట్టి రణంబు చేయుప్రతిభుల్ హర్మ్యాది నిర్మాణముల్, 

సమ్మోదంబుగఁ జేయఁ గల్లు మహితల్, సత్కార్య నిష్ణాతులున్, 

కమ్మందేనియ పల్కులన్ సుజనులన్ కారుణ్యముం జూచువా 

రమ్మా యంచును బిల్చినంతనె మదిన్ హర్షించి ప్రేమామృతం 

బమ్మై పంచెడి వార లక్షయ కృష్ణన్ త్యాగాకృతిన్ వెల్లువా 

రమ్మోహాదులు గెల్చినట్టి ఘనులున్, యత్నించి దైవంబునే 

రమ్మంచున్ బిలువంగ జాలు ప్రతిభల్, ప్రాణంబులన్ నిల్పు ద్రో 

చమ్మల్, సంతత సన్నుతాత్ములు, కృపా సామ్రాజ్య రాజ్ఞీమణుల్, 

నమ్మన్ వారిని వమ్ము చేయక కృపాణమ్మై సదా కాచువా 

రమ్మా! నీ ప్రతి రూపులై వెలుగు మాయందున్ సదా, దైవ కా 

ర్యముల్ చేయగ జేతురమ్మ గని సౌర్యంబిచ్చి సత్ప్రేరణన్. 

తమ్ముం దాము తలంచుచాత్మనిను మాతా గాంచి పూజ్యంబుగా 

సొమ్ముల్లాలురు ప్రేమతోడ మదిలో శోభిల్ల నీరూపు వే 

దమ్మున్ వెల్గెడి దేవదేవి! కృపతో, తత్వార్థ పూర్ణాకృతిన్ 

మమ్మున్ గానగ నీవె వీరగుచు ప్రేమన్ మాకు గన్పింతు వో 

యమ్మా! నీవె కృపాంతరంగవయి మోహాదుల్ విడంజూడుమా,

నమ్మంజాలని దుష్టసంస్కృతులచే నశ్వంబగున్ సర్వమున్. 

క్రమ్మున్ వేగమె మానవాళిని, మహత్కాఠిన్య గాఢాంధమున్

క్రమ్మంజేయును. పాపభీతి నణచున్, బ్రఖ్యాతి పోకార్పుచున్ 

వమ్ముంజేయు మహత్వ సంస్కృతి గతిన్ వర్ధిల్లు కాంతాళిపై 

క్రమ్మున్, దుర్గతిపాలు సేయు నవతన్ గాంక్షింపగా చేయుచున్ 

నమ్మంజాలని ధర్మహీనగతులన్ నర్తింపంగా చేయు, మౌ 

నమ్ముందాల్పగ జేయు శిష్టజనులన్, నక్షత్ర వారాశినాన్ 

క్రమ్మంజేయును దూరదర్శనములన్ గానంగ సిగ్గనట్లుల్. 

మమ్ముం జూడుడటంచురేగునటులన్ మౌనంబుగా చేయు, మా 

యమ్మా గాంచగరాని తీరునను మోహాంధంబునే గొల్పుచున్ 

సమ్మోహమ్మును గొల్పి దుష్ట గతులన్ చాంచల్యతన్ గ్రాలు, హే 

యమ్మౌ దుర్గతి పాలు సేయుచును మాయన్ గొల్పు. పూబోడులన్ 

సమ్మోదమ్మున కాచుమమ్మ  కరుణన్. సంధించు బాణమ్ములన్. 

సమ్మాన్యుల్ ధీమహిళామణుల్ ధరణిపై శశ్వన్నయోపాసకుల్. 

క్రమ్మం జేయకు మమ్ము దుర్గుణ తతిని కాపాడుతూ వారలన్. 

నెమ్మిన్ దుర్మద దూర సంస్కృతిని క్షీణింపన్ గృపం జేయుమా,

కొమ్మా! వందన మాచరింతు జననీ! కూర్మిన్. భవానీ సతీ! 

ఇట్లు . 

చింతా రామకృష్ణారావు.

జైహింద్.

Print this post