దారిద్ర్యన్ని రూపు మాప గలిగేదెవరో! ఎప్పుడొస్తారో!

ప్రజా జీవితాలకు చుట్టు ముట్టిన యీ దారిద్ర్యాన్ని మాపే దెవరు?

శ్లో:-

దగ్ధం ఖాండవ మర్జునేనచ వృథా దివ్యౌషధైర్భూషితం!

దగ్ధా వాయు సుతేన హేమ రచితా లంకా పురీ స్వర్గ భూః!

దగ్ధః సర్వ సుఖాస్పదశ్చ మదనో హాహా! వృథా శంభునా!

దారిద్ర్యం ఘన తాప దం భువి నృణాం కేనాపి నో దగ్ధ్యతే!

ఉ:-

దగ్ధము చేసె ఖాండవము దర్పము జూపుచు నర్జునుండు. తా

దగ్ధము చేసె లంక నల దండన జేయుచు నాంజనేయుడున్.

దగ్ధము చేసె మన్మధుని తా పరమేశుడు. ధాత్రిపై నిటన్

దగ్ధము జేయ నేర్వరుగదా! పురి విప్పెడి యీ దరిద్రమున్.

భావము:-

దివ్యౌషధ స్థావరమైన ఖాండవ వనమును అర్జునుడు దగ్ధము చేసెను. భూలోక స్వర్గమైన లంకను హనుమంతుడు దగ్ధము చేసెను. సర్వ సుఖాస్పదుడగు మన్మధుని ఆ పరమేశ్వరుడు దగ్ధము చేసెను. లోకములో అత్యంత బాధాకరమగు దరిద్రమును మాత్రము ఎవ్వరునూ దగ్ధము చేయు జాలకుండిరి కదా!

రోజు రోజుకూ పెరిగి పోతున్న నిత్యావసర వస్తువులు కొన జాలక దరిద్ర దేవత చేజిక్కి బాధ పడుచున్న దీన జన జీవన యానము మిక్కిలి కష్ట తరము. అత్యంత బాధా కరము. ఈ దారిద్ర్యమును బాపగల దైవాంశ సంభూతులు ఎప్పుడు ముందునకు వచ్చి కార్యోన్ముఖులగుదురో యని, తమ దారిద్ర్యమెప్పుడు బాపుదురో యని దీన జనులు ఉపేక్షించుచున్నారు.

జైహింద్.

Print this post