మహనీయుల ఔదార్య ఫలమే నాకు జరిగిన సత్కృతి.

12, డిసెంబర్ 2017, మంగళవారం

మహనీయుల ఔదార్య ఫలమే నాకు జరిగిన సత్కృతి.

జైశ్రీరామ్.

ఆర్యులకు శుభోదయమ్.

వివేకానందనగర్,కూకట్పల్లిలో 9-12-2017న జరిగిన అష్టావధాన కార్యక్రమ్ంలో జరిగిన సత్కృతి

మహనీయులారా! నా మనసు నన్ను అడుగుతోంది.

ఈ సత్కారము పొందుటకు నీవు అర్హుఁడవనే అనుకొంటున్నావా? అని.

ఔను నిజమే. పాపం అంతరాత్మ ఎప్పుడూ ఇలాగే చైతన్యపరుస్తూ ఉండే

ప్రయత్నమైతే చేస్తూనే ఉంటుంది కాని,అరిషడ్వర్గాల ప్రేరణా ప్రభావం ఆ

అంతరాత్మ మాటను చెల్లకుండా చేస్తూనే ఉంటుంది.

జితేంద్రియులైన మహనీయులైతే దానిని గ్రహించి,

అరిషడ్వర్గములనదుపులో పెట్టి అంతరాత్మ ప్రబోధను పాటిస్తుంటారు.

సరే నేను ఆత్మ పరిశీలన చేసుకొన్నాను.

నిజమే సత్కారింపఁబడుటకు నాకున్న అర్హత శూన్యమే.

ఐనే నెవరిని స్వీకరించుటకైనా తిరస్కరించుటకైనా?

ఆ పరమేశ్వరీ అనుగ్రహ ప్రాప్త ఫలములు అనివార్య గ్రాహ్యములు కదా.

అదీ కాక

ఇది సత్కరించే వారిలో ఉన్న ఔదార్యము, ఔన్నత్యము, సంస్కారము,

ఏవైతే ఉన్నవో అవి మాత్రమే నాకు జరిగిన యీ సత్కృతికి హేతువులు.

సీ. నిజభక్తి గరిమతో నిత్యుని జగమెల్లఁ గనుచు సేవించెడి ఘనులు కాన,

ప్రజలలో పరమాత్మ నిజరూపమును గాంచు సరససద్వర్తనాపరులు కాన,

భజియింప దేవునిన్ పద్యమే ఘనమంచు మదినెంచఁగల్గిన బుధులు కాన,

ప్రజ - పద్య సత్కృతుల్ భావించి యున్నట్టి హృద్యమై వెలుగొందు హితులు

కాన,

తే.గీ. దైవ భావంబు మదినెంచి తత్పరులయి

సత్కృతులు చేయు శిలకైన సజ్జన తతి.

వారి సంస్కారమౌనిది, మీరరాదు.

ధన్యవాదముల్ పల్కెద మాన్యులకును.

ఉ. దేహము తల్లిదండ్రులిడ, దీనికి ప్రాణము దైవమీయ, సం

దేహ నివృత్తి చేయు గురుదేవులు విద్యననుగ్రహింప, స

మ్మోహనివృత్తి సజ్జనుల బోధలు కల్గఁగఁ జేయ, సత్కృతుల్

దేహము పొందు. సత్కృతులు దేహికి చెందును. నాకు కాదయా.

నాపై అవ్యాజానురాగమును చూపెడి మహనీయుల మనోహర భావనాచయము
ముఖ పుస్తకమున ప్రకటితమైనవి వారి ఔదార్యప్రకటనకై ఇచ్చట ప్రచురించుచున్నాను.

ఆర్యులకు శుభోదయమ్. మహనీయులారా! నా మనసు నన్ను అడుగుతోంది.

ఈ సత్కారము పొందుటకు నీవు అర్హుఁడవనే అనుకొంటున్నావా? అని.