గణనీయంబగు భాషలందు తెలుగున్ గాంచంగ మేల్మేలు.. తాన్ విన సొంపై , ప్రకటించు భావ సరళిన్ దృప్తిన్, విశేషించి పల్ ఘన కావ్యామృత సంవిధాన మహిమల్ గాంచంగ నాంధ్రామృతం బను యీ బ్లాగును గొల్పి యుంటి. కనుడీ ! ఆంధ్రామృతం బందుడీ ! .

27, ఫిబ్రవరి 2017, సోమవారం

కవయిత్రి పావులూరి సుప్రభగారు శ్రీవల్లభవఝలవారి మార్గంలో చేసిన గర్భకవిత్వము.

జైశ్రీరామ్.
కవయిత్రి పావులూరి సుప్రభ.
శ్రీమాన్ వఝల అప్పల నరసింహమూర్తి చిత్ర కవి బంధ కవితా ప్రభావంతో మరొక కవయిత్రి చేసిన గర్భకవితామృతాస్వాదనాపరులవండి.
రక్షణీ, గతిమా, మహిత గర్భ నటకళా వృత్తము.
నటకళా వృత్తము.
అందించెడి పద్యంబది హరుసంబునుఁ గూర్చకున్న నాపద రాదా
యందంబుగ రాకుండిన నరవిందము లీయవింక నర్మిలి తోడన్‌
వందించవు నన్నెప్పుడుఁ బరమేశిగఁ బల్కుచున్నఁ బ్రత్యహమిట్లే
క్రుందించితి నన్నట్లుగఁ, గొఱఁతేదియొ చేసినట్లు కోపమె నాపై
రక్షణీ
అందించెడి పద్యంబది
యందంబుగ రాకుండిన
వందించవు నన్నెప్పుడుఁ
గ్రుందించితి నన్నట్లుగ
గతిమా
హరుసంబునుఁ గూర్చకున్న
నరవిందము లీయవింక
పరమేశిగఁ బల్కుచున్నఁ
గొఱఁతేదియొ చేసినట్లు
మహిత
అందించెడి పద్యంబది హరుసంబును గూర్చకున్న
నం(అం)దంబుగ రాకుండిన నరవిందము లీయవింక
వందించవు నన్నెప్పుడు పరమేశిగ బల్కుచున్నఁ
గ్రుం(క్రుం)దించితి నన్నట్లుగఁ, గొఱఁతేదియొ చేసినట్లు
సుప్రభ
11:45 AM
02-25-2017

వృత్తము - ఛందస్సు - గణములు - యతి/యతులు
- - - - - - - - - - - - - - - - - - - - - - - - - - - - - -
నటకళా -- ఆకృతి - త,య,న,జ,జ,ర,స,గ --1,9,18
రక్షణీ -- అనుష్టుప్‌ - త,య,లల
గతిమా -- బృహతీ - స,స, జ
మహిత -- అత్యష్టీ - త,య,న,జ,జ,గల -- 9
ఈ రోజు ఉదయము చింతా రామకృష్ణరావు గారు వల్లభ వఝల అప్పల నరసింహమూర్తి గారిచే వ్రాయబడినదని రక్షణీ, గతిమా, మహిత గర్భ నటకళా వృత్తముగా నొక పద్యమును ప్రచురించారు. నడక నచ్చి,తేలికగానే యున్నట్లుందని తోచి, యత్నించాలని యనిపించినది. మనసులోని యూహను తెలిసిన వారు వెంటనే సాయమందించి తమ తలఁపులుగా వ్రాయించినది. ఈ వృత్తమును పరిచయము చేసిన చింతా వారికీ, వల్లభ వఝల వారికీ ధన్యవాదములు. అడుగకున్నా మనసెరిగి, నామీఁదనే దోషారోపణ గావించి :-) యేదో విధముగా కూర్పించిన శక్తికి కూడ వందనములు.
అద్భుతమైన స్పందనతో చక్కని గర్భకవిత వెలయించిన సుప్రభగారిని మనసారా అభినందిస్తూ, శ్రీ వల్లభవఝలవారికి నా అభినందనలు తెలియజేస్తున్నాను.
జైహింద్.
Print this post

1 comments:

రాజేశ్వరి నేదునూరి చెప్పారు...

నమస్కారములు
అందరు పాండితీ స్రష్టలకు శిరసాభి వందనములు.అభినందన మందారములు. చాలా బాగుంది.

వ్యాఖ్యను పోస్ట్ చెయ్యండి

ఆంధ్రామృత బ్లాగ్ వీక్షకులకు ధన్యవాదములు.