మత్తేభ - కంద - గర్భ సీసము {అంశము - వివాహ వ్యవస్థ}

ఆర్యులారా!
నిన్నటి దినమున అంతర్ జాతీయ వివాహితుల దినోత్సవమని తెలిపి " వివాహ వ్యవస్థ " అంశంపై కవులను పద్య రచన చేయమని విశాఖ పట్టణం జిల్లా పద్య కవితా సదస్సు వారు కవుల నాహ్వానించారు.

చోడవరం గ్రామంలో ప్రసన్న భారతి అనే సుప్రసిద్ధ సాహితీ సంస్థ ఆధ్వర్యవంలో సాహితీ గోష్టి నిర్వహించారు.
జిల్లా పద్య కవితా సదస్సు అధ్యక్షులు శ్రీ కె.కోటా రావు అధ్యక్షతలో డా. యెం.వెంకటేశ్వర రావు - కవులచే స్వీయ పద్య పఠనం చేయించారు. కార్యక్రమంలో పాల్గొనిన అనేకమంది కవులతో పాటు నేనుకూడా పాల్గొన్నాను.

నా స్వీయ రచన కూడా అక్కడ వినిపించాను.
సహృదయులైన మీరు ఆ రచన చూచి తగు సూచనలు చేస్తారని, గుణదోషాలు తెలుసుకొని తగిన మార్పులు చేర్పులు చేయడం ద్వారా నా కవితా పాటవాన్ని పెంచుకోవాలనే కుతూహలంతో ఈ రచన మీ ముందుంచుతున్నాను.
శ్రమ అనుకోకుండా తప్పక మీ కామెంట్స్ పంపగలరని ఆశిస్తున్నాను. తప్పైతే మన్నించే మహనీయ మనస్కులు మీరు. కాబట్టే యీ సాహసం చేస్తున్నాను.

ఇక చూడండి నా రచన.
వివాహ వ్యవస్థ అంశముపై నా కవిత:-

మత్తేభ కంద గర్భ సీసము:-
సు మహనీయం బగు సూత్ర బంధ మిది యౌన్ - మాన్యత్వమౌన్, ధామమౌన్, సతంబు
సు మహనీయం బగు శుక్ర సాక్ష్యమిది యౌన్, - మంత్రాత్మికా యుక్తమౌన్, నిజంబు.
సు మహనీయం బగు శోభనీయమిది యౌన్, - మర్యాద యౌన్, మన్ననౌన్, ఘనంబు.
సు వహనీయం బిది, సుందరంపు భవితన్ - వర్ధిల్ల జేయున్ కృపన్. వివాహ

తేటగీతి:-
సు రుచిర విధాన మంతయు - కరి వరదుని
భావ మహిమ కానగ నగు ! భాసుర గతి
పరిణయ విధి చూపరు లెల్ల పరవశ మవ
గ వరలును వసుధన్ కడు గౌరవముగ.

గర్భ మత్తేభము:-
మహనీయం బగు సూత్ర బంధ మిది యౌన్ - మాన్యత్వమౌన్, ధామమౌన్,
మహనీయం బగు శుక్ర సాక్ష్యమిది యౌన్, - మంత్రాత్మికా యుక్తమౌన్,
మహనీయం బగు శోభనీయమిది యౌన్, - మర్యాద యౌన్, మన్ననౌన్,
వహనీయం బిది, సుందరంపు భవితన్ - వర్ధిల్ల జేయున్ కృపన్.

గర్భ కందము:-
సు రుచిర విధాన మంతయు -
కరి వరదుని భావ మహిమ కానగ నగు ! భా
సుర గతి పరిణయ విధి చూ
పరు లెల్ల పరవశ మవగ వరలును వసుధన్.

ఈ సాహితీ కార్యక్రమాంలో భాగంగా శ్రీ వి.అప్పల నరసిమ్హమూర్తి రచించిన " జుత్తాడ స్రీరామచంద్ర శతకము, మనీషా పంచకము " అనేరచనలను శ్రీ కోటారావు, డా.మెరుగుమిల్లి వెంకటేశ్వరరావులు ఆవిష్కరించారు.
పండిత నేమాని రామజోగి సన్యాసిరావు గారు చాటు పద్యాలను వివరిస్తూ ప్రసంగించారు.
ప్రముఖ గాంధేయవాది, స్వాతంత్ర్య సమర యోధులు శ్రీ దేవరపల్లి సన్యాసి రవు, శ్రీ పి.వి.రమణమూర్తి, శ్రీ రేపాక కన్నయ్య శెట్టి.డా,రాజశేఖర్మున్నగువారు యీ కార్య క్రమాన్ని చక్కగా నిర్వహించడంలో శ్రమించారు.

ఇంతకీ నా సీసాన్ని మీరాపోసన పట్టే సమర్ధులు. కాబట్టి మరొక్కసారి పైనున్న మత్తేభ - కంద - గర్భిత సీస పద్యాన్ని చదివి మీసూచనలనందించ వలసినదిగా నా విన్నపము.
జైహింద్. Print this post