ఒక్క రోజులో(తే.29 - 3 - 2024న) వ్రాసిన క్షీరాబ్ధిపుత్రీ రమా శతకము. రచన .. చింతా రామకృష్ణారావు.

జైశ్రీరామ్. 

శ్రీరస్తు     శుభమస్తు     శ్రీరామ.

రమా (ఏకప్రాస) శతకము.

రచన ..  చింతా రామకృష్ణారావు.

 

శాII శ్రీమన్మంగళ భారతావని జయశ్రీవై ప్రకాశించుచున్

క్షేమంబున్ జన పాళికిన్ గొలుపుచున్ జెల్వొందు నిన్ గొల్చెదన్

నీమం బొప్పఁగ భక్తితోడ జననీ నిత్యంబు, భవ్యాత్మవౌ

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౧.

 

శాII ప్రేమోదారసుధాస్రవంతివి లసద్విజ్ఞానసర్వస్వమా!

నీ మాహాత్మ్యము నెన్ననాకు వశమా? నీ పాదపద్మమ్ములన్

నీమంబొప్పగఁ గొల్చినన్ సుకవితల్ నీ రూపమై వెల్వడున్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౨.

 

శాII సామాన్యుల్ నిను పూజచేయుటకునై సంసిద్ధులయ్యున్ ధనం

బేమాత్రంబును లేని కారణముచే నేదో విధానంబునన్

నీమంబొప్పఁగఁ గొల్చినంతనె కృపన్ నీ ప్రేమ చూపింతువే?

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౩.

 

శాII శ్రీమన్మార్గ కవిత్వ తత్త్వనిపుణుల్ చిత్రాదులన్ బద్యముల్

నీమంత్రాక్షర బంధన ప్రతిభతో నీ దివ్య తేజంబునే

క్షేమంబున్ గొన వ్రాయఁ గల్గుదు రిలన్ శ్రీదేవి! నీ సత్కృపన్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౪.

 

శాII మా మీదన్ గృపఁ జూపు నీ సుగుణ మేమాత్రంబు మా యూహకే

శ్రీమాతా! కన నందదమ్మ! యిక మా చిత్తంబులన్ నీ పయిన్

నీమంబొప్పఁగ నిల్పుశక్తి నిడు నీ నేర్పున్ గనన్ సాధ్యమా?

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౫.

 

శాII భూమిన్ బుట్టిన నెవ్వరైన బ్రతుకన్ పూజ్యంబుగా నెప్పుడున్

బ్రేమన్ నీ కడగంటి చూపు పడినన్ విఖ్యాతిగా నిల్చుగా,

నామీదన్ గురిపింపుమమ్మ కృప నేనా జ్ఞాన దూరుండ, నో

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౬.

 

శాII ధీమంతుల్, వరపండితాళి, కవులున్, దేదీప్యమానంబుగా

నీ మీదన్ దగు భక్తి నిల్పిన గదా నిత్యంబు లోకంబునన్

క్షేమంబొప్పగ నొప్పియుందురు, శుభశ్రీమూర్తులై, తల్లిరో!

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౭.

 

శాII ఏమా భాగ్యము, శ్రీనివాసుఁడనుచున్ హృద్యంపు సత్ఖ్యాతినే

బ్రేమన్ నిన్ గొనినంత పొందె హరి, నీవే శక్తి వాసామికిన్,

నీ మార్గంబు నృసింహు మార్గమె కనన్, నీవే నృసింహాత్మవున్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౮.

 

శాII సోముండున్ నినుఁ బోలి బుట్టుటనె తా శోభిల్లె శ్రీ శాంభవీ

ప్రేమోదంచిత సాంబు శీర్షముపయిన్ విఖ్యాతినే గాంచె, నా

సోముండొప్పగు తమ్ముఁడై నిలుచుటన్  శోభిల్లె తానెల్లెడన్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౯.

 

శాII శ్రీమాతా! జనరంజనీ! శుభకరీ! చిద్రూపిణీ! కావుమా,

నీ మంత్రార్థము లెన్న నేరని ననున్ నీవే కృపన్ గాంచుమా,

యేమాత్రంబును నీకు దూరమయినన్ బృథ్విన్ మనన్ జాల మో

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౧౦.

 

శాII మామా భాగ్యఫలంబులౌదువటగా? మాతా! కృపాంభోనిధీ!

శ్రీమాతా! జయమమ్మ నీకు, మహదాశీర్వాద మీవే కదా

యేమాత్రంబును సంశయింపక నినున్ హృద్యంబుగా కొల్వనీ!

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౧౧.

 

శాII గోమాతన్ భజియించ నీకు మదిలోఁ గూరున్ గదా కూర్మి? నీ

బ్రేమన్ మాపయి నిల్పుచుందువటగా? వేల్గై మదిన్ నిల్చు నీ

నామంబేకద మాకు రక్ష, జననీ! నారాయణీ! పాహిమామ్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౧౨.

 

శాII మా మాయే ప్రతిబంధకంబు తగ నీ మాయన్ గ్రహింపంగ, మా

కేమాత్రంబొ యొసంగి విజ్ఞత నిలన్ హేమప్రభా! నిల్పితే

యీ మాలో నిరతంబు నిల్చి జయముల్ హృద్యంబుగా కొల్పుమా,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౧౩.

 

శాII నీ మాతృత్వమమేయమమ్మ! తలపన్, నీ ప్రేమతో సాటిగా

నేమాత్రంబును జూపరెవ్వరును, దేహీయన్న మాత్రంబునన్

క్షామంబున్ నశియింపఁజేసి సిరులన్ కల్పింతువే తల్లొరో!

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౧౪.

 

శాII శ్రీమంతుండగు తోపెలాన్వయుఁడు నీ చిచ్ఛక్తికిన్ రూపమా?

యీ మాన్యుండిలపైన నీదు శతకానీకంబు నేర్పించుచున్

బ్రేమన్ పాఠన మొప్పఁ జేయునటులన్ విద్యార్థులన్ జేసె, నో

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౧౫.

 

శాII ఏమమ్మా! కని నీ కుమారుని మదిన్ స్వేచ్ఛన్ ప్రవర్తించి, సం

క్షేమంబొప్పెడి మార్గమందు నడుపన్  జిత్తంబు రాదేలనో?

ధీమంతుండగు భక్తపుంగవునిగా దీపింపగాఁ జేయుమా,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౧౬.

 

శాII రామానందమె బ్రహ్మతత్త్వ మయినన్, రాముండు నీ భర్తయై

యీ మాయన్ రచియించె కోరి యడఁపన్, హేయంబొ? కాదో? కనన్

నీ మార్గంబున మాయ వీడనగు నీ నీడన్ బ్రవర్తించుచున్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౧౭.

 

శాII కామాంధత్వము మూసివేయు కనులన్ గల్యాణి! కాపాడుమా,

శ్రీమన్మంగళ మూర్తులౌ గురువులన్ చేరంగ నీకమ్మ యా

కామోద్దీపన, కావుమమ్మ వర సుజ్ఞానప్రభన్ గొల్పుచున్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౧౮.

 

శాII మోమాటంబది యేలఁ జేయ నడుగన్ బూజల్ సదా నీకు, నో

శ్రీమాతా! శుభ సంహతుల్ గొలుపు నీ చిత్తంబులో నిల్పి నన్

యీమాయల్ తొలగించి నీవు గొనుమా యిష్టంబుతో పూజలన్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౧౯.

 

శాII సామాన్యుల్ తమ కార్య నిర్వహణలో సద్భక్తితో నిన్నె, తా

మేమాత్రంబును భక్తి వీడక యహంబే లేక పూజింతు రా

సామాన్యుల్ కద ధన్య జీవులు ధరన్, సంతోషమున్ గాంతురే,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౨౦.

 

శాII భూమిన్ దున్నెడి రైతు నాగలికిలన్ పూజించు నీ ధ్యాసతోన్,

భూమిన్ బండెడి సస్యమీవె యనుచున్ పూజ్యాళికిన్ బంచుచున్

క్షేమంబున్ సతతంబు కోరు ధరణిన్ శ్రీమంతులా రైతులే,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౨౧.

 

శాII హేమంబీవె, నృసింహురాణి! జననీ! హేమప్రభారాశి! మా

ప్రేమన్ గాంచుమ, హేమమున్ గెలుచు  సద్విశ్వాస సంపత్ప్రభల్

నీమంబొప్పగ నిమ్ము మాకు, కృతులన్ నిన్ గొల్వగా నెంచుచున్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౨౨.

 

శాII రామానందము పొందనెంతుమిల, శ్రీ రామా! హరీ! యంచు మా

కేమాత్రంబును భక్తి వీడని గతిన్  హృద్యంపు తన్నామముల్

ప్రేమన్ బల్కగఁ జేయుమా! కొలుతు నిన్ శ్రీనాథ పత్నీ! కృపన్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౨౩.

 

శాII భూమిన్ గల్గెడి ధాన్యముల్, ధనము, సత్ పూజ్యా! మహద్భాగ్యమున్,

శ్రీమంతంబగు మానసంబు, పలుకుల్, శ్రీదేవి రూపంబుగా

ధీమంతుల్ నిను నన్నిటన్ గనుదురో ధీరూప! లక్ష్మీసతీ!

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౨౪.

 

శాII ధామంబీవె, మహత్వమీవె, శుభ సంతానంబు నీవేకదా?

యేమాత్రంబును శంకలేదు, కన నీవే సర్వమిద్ధాత్రిపై,

శ్రీమద్వర్తన నీదు సత్కృప కనన్, శ్రీమాత! నిన్ గొల్చెదన్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౨౫.

 

శాII ఏ మాతృప్రభలెల్లవారికి శుభంబెంచంగనౌనో సతం

బే మాధుర్య మనోజ్ఞవర్ణచయమే యీ బాధలన్ బాపునో,

యామంత్రాక్షరమీవె చూడ, రమణీయానంద సంధాయినీ!

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౨౬.

 

శాII ఏ మాన్యుండిల నిన్ను సమ్మనమునన్ హృద్యంబుగాఁ గొల్చునో,

యామాన్యుండు కృతార్థుఁడెన్న, ధర తా నాద్యంతమున్ సౌఖ్యముల్

ప్రేమానందము, ముక్తిఁ, గాంచు, జననీ! విశ్వాసమే మూలమై,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౨౭.

 

శాII నామంబుల్ కలవెన్నియో జనని! నీ నామంబె సౌఖ్యప్రదం

బేమా మాధురి! నీదు నామమున, ధ్యానించంగ సద్భాగ్యముల్

మామీదన్ గురిపించునమ్మ! శుభముల్ మాకున్ బ్రసాదించుచున్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౨౮.

 

శాII శ్రీమన్నారదుఁ డెన్ని పాడు సతమున్ శ్రీమంతుఁడౌ నీ పతిన్,

శ్రీమాతా! నిను తాను దాల్చెననుచున్ చింతించి, కాకున్నచో

నేమాత్రంబును చేరకుండును హరిన్ స్వేచ్ఛాప్రవృత్తిన్ గనన్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౨౯.

 

శాII శ్రీమాధుర్య సుధా స్రవంతి కన వాసిన్ గొల్పు నీ నామమే,

యే మాత్రంబు మదిన్ దలంచి కొలువన్ ధ్యేయంబునే చేర్చు, నే

నా మంత్రాక్షరమైన నామము మదిన్ ధ్యానింతు నిత్యంబిలన్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౩౦.

 

శాII వామాంకస్థిత జానకీ సతివిగా వామాక్షి! రామ ప్రభున్

నీమాళిం గని వర్తిలంగ ధరణిన్ నీవేకదా మార్గమున్

బ్రేమన్ జూపి కృతార్థుఁడై మనగ దేవీ! చేసితే? తోడువై,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౩౧.

 

శాII లేమా మేము సతంబు నిన్నె వనమాలిన్ గూడి మా చిత్తమం

దేమాత్రంబును నిల్పగా, హరియుతా! హేమప్రభారాశివై

ధీమాన్యుల్ గని మెచ్చనుండుమిఁకపై దేదీప్యమానంబుగా,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౩౨.

 

శాII క్షేమంబీవె, సుఖంబు నీవె, మదిలోఁ గేళిన్ బ్రవర్తిల్లుచున్

ధీమంతుల్ మది పొంగ నుండునదియున్ ధీరూపిణీ నీవెగా,

మా మీదన్ గురిపింపుమమ్మ శుభ సమ్మానంపు నీ దృక్కులన్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౩౩.

 

శాII కామాయత్త విచిత్ర చిత్త గతి నే కాంక్షింప నోయమ్మ! సు

క్షేమంబున్ పరమందు నైహికమునన్ చిద్రూపిణీ! కొల్పుమా,

యీమాత్రం బిల చాలునమ్మ! జననీ! యీశాని! ప్రార్థింతు నిన్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౩౪.

 

శాII హేమాడంబర మేల నాకు? సతతం బీవే మదిన్ నిల్చినన్?

శ్రీమాతా పదపల్లవ ప్రభలె నా చిత్తంబులో నిండినన్

క్షేమంబే సతతంబుఁ గొల్పు నిల వాసిన్ గొల్పుచున్ దల్లి! యో

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౩౫.

 

శాII క్షామంబన్నదెఱుంగనీవు ధరణిన్  గాంక్షించి నీ సేవలన్

బ్రేమన్ జేసెడి సజ్జనాళికిలపై, నిత్యంబు సంతోషమున్

ధీమంతుల్ గనఁ జేయు నీదు కృపనే దీపింప వర్ణింపనా?

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౩౬.

 

శాII హే మాధుర్య వచోనిధాన జననీ! హేమప్రభారాశి!  మా

క్షేమంబేకద నీవు కోరునది? రాశీభూత ప్రేమప్రభా!

నీ మాటే హరికర్ణపేయ మరయన్, నిన్ గొల్చెదన్ నిత్యమున్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౩౭.

 

శాII గోమూత్రంబున, గోమయంబునను, మాకున్ మేలు చేకూర్చి సు

క్షేమంబున్ గలిగించు దివ్యగుణముల్ చేర్చంగ నీ కెట్లయెన్?

నీ మాతృత్వమహత్వమెన్న నదియే, నిత్యప్రభాపూర్ణ! యో

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౩౮.

 

శాII కామాక్షీ! యని పిల్చినన్ గరుణతో కన్పింతు వీవే కృపన్,

శ్రీమాతా! యనినన్ దయామృతమునే చిందింతు వీ            వెప్పుడున్,

హైమాయన్నను నీవె చూచెదవు, మోహంబున్ విడన్ జేయుచున్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౩౯.

 

శాII లేమిన్ బాపెడి నిత్యపూజ్య జననీ! లేరెన్న నీసాటి, ని

న్నేమంచు న్వివరింప నాకునగు? భావింపంగ నీ రూపమే

ధీమంతుల్ కను సృష్టి మొత్త మరయన్, ధీరూపిణీ! సంస్తుతుల్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౪౦.

 

శాII నా మాటల్ మహనీయమంత్రచయమౌన్, నారూపమే దివ్యమౌన్,

నా మాన్యోజ్వల వృత్తి నిత్యశుభమౌన్, నా భావనల్ నీవెయౌన్,

నామేనన్ గన నీవె యుందువిఁక నీ నా భేదమున్ బాపినన్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౪౧.

 

శాII ఏమమ్మా! కన రావు నన్ను గృపతోన్ ఏనేమి దోషంబులన్

బ్రేమన్ వీడి యొనర్చితో? యెఱుఁగ నీవే జ్ఞానమున్ గొల్పి నా

కామాదుల్ విడి నిన్నె గొల్చునటులన్ గల్పింపుమా నిత్యమున్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౪౨.

 

శాII ధూమంబట్టుల పాపముల్ ముసురుచున్ దోపంగనీవమ్మ నీ

శ్రీమంతంబగు సుస్వరూపము మదిన్, చేఁ బట్టి నన్ గావుమా,

ధీమంతుల్ చను మార్గమున్ నడుపుమా! ధీమార్గమీవౌచు, నో

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౪౩.

 

శాII వేమారుల్ నినుఁ గోరనేల జననీ! ప్రీతిన్ గ్రియాశక్తివై

ప్రేమన్ జేయఁగఁ జేయుచుందువుకదా విశ్వంబునన్ గార్యముల్,

నామాటల్ క్రియలెన్న నీవె కనఁగా నా భావనల్ నీవె యో

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౪౪.

 

శాII ఏమాత్రంబు పరాకు నొందక మదిన్ హేమా!  మహావిద్య! నీ

వే మాన్యంబుగ నుండి కాచుకొనుమా, యిష్టంబుతో నెప్పుడున్,

నా మీదన్ గల తల్లి ప్రేమ కననీ నన్నున్, మహామాత! యో

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౪౫.

 

శాII సామాన్యుల్ మదిలోన నిన్ను నిలుపన్ సాక్ష్యంబుగా వారిలో

శ్రీమాతా! రహియింతు వీవె కృపతో, చెన్నార రక్షించుచున్,

నీమాహాత్మ్యము నెన్న నేరికగు నో నిత్యోజ్వలా! చంద్రికా!

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౪౬.

 

శాII సోమేశుండును వాని పత్నియు నినున్ శుద్ధాత్ములై కొల్తు రా

ప్రేమోద్భాసిత మూర్తులందు జననీ! విశ్వాసమై నిల్చితే,

యే మానీ మహనీయశక్తి? గనలేమే మేము సావిత్రి! యో

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౪౭.

 

శాII ఏమాత్రంబును నీకు దూరమయినన్ హేయంబు, శ్రీవైష్ణవీ!

మే మీ ధాత్రిని యుంటయే, నిరుపమంబే నీదు ప్రేమద్యుతుల్,

మా మీదన్ దయఁ జూపి నిల్పుము మమున్  మాతల్లి! నీ సన్నిధిన్,

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౪౮.

 

శాII హే మందస్మిత సుందరీ! వినుత బ్రాహ్మీ! నీకృపాదృష్టియే

మా మీదన్ గురిపించ కున్న జయముల్ మమ్మేలునా? కాలికా!

ప్రేమన్ బద్యశతంబు నొక్కదినమున్ వేలార్చితీవెట్లిటుల్?

శ్రీమన్మంగళ భాగ్యదాయిని! మహా క్షీరాబ్ధి పుత్రీ! రమా! ౪౯.

 

శాII హే మందస్మిత సుందరీ! విజయతే, హేమాంబరాడంబరీ!

హైమారాధ్య! సుపూజితా! శుభకరీ! యానంద సంధాయినీ!

క్షేమంబొప్పగ నిన్ను గొల్చునటులన్ కీర్తిప్రదా! చేయుమా,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౫౦.

 

శాII మేమా మానవ జన్మనెత్తితిమి, భూమిన్ బాప కార్యంబులన్

కామాదుల్ మముఁ జుట్టిముట్టుటను లోకంబందునన్ దౌష్ట్యముల్

శ్రీమాతా! యొనరించినాము, కృపతో ఛేదించు మా పాపముల్,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౫౧.

 

శాII వేమారుల్ నిను వేడనేల జననీ! భీతిల్లు చున్నట్టి నన్

బ్రేమన్ గాచెడి తల్లివీవగుటచేఁ, బ్రీతిన్ నినున్ గొల్వ, నా

కేమాత్రంబును భీతి కల్గదు, నిజంబీవేకదా రక్ష ణో

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౫౨.

 

శాII సామాన్యంబగునట్టిదా? జనని! నీ సామీప్యమున్ సద్గతిన్,

భూమిన్ బొందుట యన్నచో, గొలుపుమో పూజ్యా! ననున్ గావగా,

నీమాళిన్ గని దాటబోను, జగతిన్ నీ పజ్జనన్ మెల్గెదన్,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౫౩.

 

శాII ఓ మాతా! పరమంబుగా నిలుపు మోహోయంచు మెచ్చన్ బుధుల్

నా మాన్యంబగు మానసంబుననె, సన్నామా! స్వతంత్రేచ్ఛ! నీ

వేమా చిద్వర తేజమై వెలుగుమా, వెశ్వాసినై గొల్చెదన్,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౫౪.

 

శాII శ్రీ మందారము, కామధేనువు, తగన్ శ్రీమాత! నిన్ బోలవే

ప్రేమన్ గోర్కెలనిచ్చుటందనుదురే  విఖ్యాత సత్ పండితుల్,

నా మందారము నీవె కాంచ భువిపై నా తల్లివీవేకదా,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౫౫.

 

శాII ఏమమ్మా! గుణదోషముల్ కవితలో నెంచంగ నే నేర్వనే,

శ్రీమన్మంగళ సత్కవిత్వఝరినే శీఘ్రంబుగా కొల్పుదీ

వే  మాకంచును నెంచి వ్రాసితిని, నీవే చూచుకొమ్మింకపై

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౫౬.

 

శాII ఏమో, నేనె భవత్పదాబ్జ రజమేనేమో? తలంపంగ, నీ

వే మాన్యాద్భుత సత్కవిత్వముగ సద్వేగంబుగా నేడిటుల్

ప్రేమన్ వెల్వడుచుంటివేమొ? జననీ విఖ్యాతినే గొల్పగా,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౫౭.

 

శాII నా మంచిన్ గననేరరెవ్వ రదియున్ నాలోన లేకుండుటన్,

నీ మంచిన్ గన నేర్తురమ్మ కృతి రాణింపున్ మదిన్ గాంచుచున్,

లేమా! వేరుగ నీవు నేను జగతిన్ లేమమ్మ, నిక్కంబిదే,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౫౮.

 

శాII లేమల్ సన్నుతసద్గుణప్రభలతో లీలావినోదంబుగా

క్షేమంబే కలిగింపఁ జేసెదరు వాసిన్ గార్యముల్ సర్వమున్,

భామల్ నీ ప్రతి రూపులా? తెలుపుమా, భావింతు నే నట్టులే,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౫౯.

 

శాII హేమంబేకద ముఖ్యభాగ్యముగ దేవీ! నేడు లోకంబునన్

శ్రీమంతంబుగ వెల్గుచుండె నిజమా శ్రీమాత నీవే యిటన్

హేమంబట్టుల వెల్గుచుంటివొ?నిజంబే వేరుగానుండెనా?

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౬౦.

 

శాII ప్రేమన్ జూపి, విషంబు చిందు కుజనుల్ విశ్వంబునన్ గల్గిరే,

నా మంచిన్ గని వారు మారగలరా? నా మాట మన్నింతురా?

శ్రీమాతా! మరలించు వారి గుణముల్, చిత్తంబులన్ వెల్గుచున్,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౬౧.

 

శాII శ్రీమన్మంగళధాత్రికిన్ శుభములన్ జేకూర్చుమా తల్లి! నీ

ప్రేమన్ భక్తజనాళికిన్ జయములన్ విఖ్యాతిగా నీయుమా,

యేమాత్రంబును దోషమెన్నకుమ, నీవే కావగా రామ్ము, మా

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౬౨.

 

శాII నీ మాటల్ మహనీయమంత్రచయమై, నీ పద్యముల్ హృద్యమై

ప్రేమన్ లోకులకంద వ్రాయుదువుగా విఖ్యాతిగా నీవె యో

శ్రీమాతా! నను నిల్పి వ్రాసితివి, నే చింతింప నిన్ నిత్యమున్,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౬౩.

 

శాII ప్రేమానందము మాయయా? జగతిలో విఖ్యాతితోవెల్గు నే

ప్రేమో నే నెఱుగంగ సాధ్యమగునా? వెల్గొందు నీ ప్రేమయే

ప్రేమంచున్ మది నెంచెదన్ నిజముకావే చూడగా నన్యముల్,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౬౪.

 

శాII హోమాదుల్ పచరింపఁ గల్గు ఫల మోహో! వచ్చు నిన్ దల్చినన్,

హేమా! మాతృక బీజరూపిణివి! దేహీ యంచు నే గోరెదన్,

నీమాదుల్ గలవారి కందు మిఁకపై నెన్వేడినన్ గుర్తుగా,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౬౫.

 

శాII మోమాటం బది యేల నమ్మ! పలుకన్ ముద్దార నిన్ బిల్చితిన్,

శ్రీమాతా! మది వెల్గు తల్లి వనుచున్ శ్రీమత్కవిత్వాకృతిన్

బ్రేప్రేమన్ గన్బడుమందు నంతె కద? నీవే చిత్తమందుండుటన్,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౬౬.

 

శాII ఏమాత్రంబును లెక్కచేయ నిల నీవే కల్గ నన్యంబులన్,

ధీమాహాత్మ్యము నీవె యౌచు మదిలో దేదీప్యమానంబుగా

ప్రేమోదారసువాక్కులై వెలువడన్ విఖ్యాతిగా వెల్గెదన్

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౬౭.

 

శాII ధీమంతుల్ నిను నిత్యమున్ గొలుతురే, ధీశక్తి నాశించుచున్,

నీమంబొప్పగ నిన్నెనమ్మి, జగతిన్ నీ మంత్రభాష్యంబులన్

క్షేమంబున్ గన సాధనన్ నిలుతురే, సేవల్ గొనన్ లేవొ? మా

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౬౮.

 

శాII ధామంబేలను మాకు నీదు కృప నిత్యా! బోధనే గొల్పఁగాఁ

బ్రేమన్ నిల్చి రహింపఁ జేయుచు నహంబే లేని నిత్యాకృతిన్

క్షేమంబున్ గలిగింప నిచ్చుటను, భాసింపంగఁ జేయన్ మమున్,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౬౯.

 

శాII శ్రీమన్మంగళ వార్ధి పుణ్యఫలమై చెల్వొంది సత్పుత్రిగా,

శ్రీమంతుండగు శ్రీహరిన్ పతిగ వాసిన్ గొల్పఁ జేఁబట్టి, సు

క్షేమంబున్ వరసృష్టికిన్ గొలుపగా శ్రీదేవివై యుంటివా?

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౭౦.

 

శాII ఏమా పుణ్యఫలంబు నా కమరె నే డీరీతి నీ సద్గుణ

స్తోమంబున్ శతకంబుగా జగతిలో శోభిల్ల వ్రాయించెనే,

నీ మాతృత్వము నెన్నపుత్రకునిగా నే నేరనమ్మా! నతుల్,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౭౧.

 

శాII ఓ మాతా! నను రామకృష్ణ కవిగా నొప్పంచు గుర్తించి రా

ధీమంతుల్ కవి పుంగవుల్, వరగుణుల్, దివ్యాత్ములౌ పండితుల్,

ప్రేమన్ జూపుచు నంతె కాని, నిజ మీవే చూడ కావ్యాత్మ వో

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౭౨.

 

శాII ఏమాత్రంబును చెప్పలేను కవినంచెవ్వారికిన్ ధాత్రిపై,

నీ మాతృప్రభ సత్కవీశునిగ నన్ నేర్పారగా నిల్పె నం

తే మాతా! నిను వీడినట్టి కృతులన్ దేజంబు లేకుండుటన్,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౭౩.

 

శాII కామాదుల్ నను వంచలేవు కద నీ కారుణ్యమున్ జేసి యో

శ్రీమాతా! కరుణాసమేత! సుగుణశ్రేయంబులన్ గొల్పుటన్,

నే మంచిన్ గన నీవె కారణముగా నిత్యం బిలన్ మాధవీ!

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౭౪.

 

శాII హేమాద్రీసుత వీవెయందురు కవుల్, హృద్యంపులక్ష్యంబులన్,

మేమా నిన్నిల లక్ష్మిగానె మదిలో మేల్గాంచఁగాఁ జూతుమో

శ్రీమాతా! జయమమ్మ నీకు సతమున్, జేకొమ్ము నా సంస్తుతుల్,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౭౫.

 

శాII ఏమమ్మా! జయముల్ పరాజయములున్ హృద్యంబుగా నెవ్వరున్

బ్రేమన్ జేకొన లేమదేలనొ ధరిత్రిన్ మంచినే యెంచుటన్,

నీమీదన్ మది నిల్పినన్ జయములే నిత్యంబు మాకబ్బు నో

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౭౬.

 

శాII క్షేమంబేది తలంప? నీ సుగుణముల్ కీర్తించుటే యౌనుగా,

క్షామంబున్ దొలగించునెద్ది? జననీ సద్భావనా వృష్టుయే,

క్షేమంబిచ్చుచు క్షామమున్ డులుచు నీ శ్రీశక్తికిన్ సన్నుతుల్,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౭౭.

 

శాII శ్రీమద్వేంకట వీర రాఘవవరుల్ శ్రీమద్గురుల్ నాకు స

త్ప్రేమన్ విద్యను నేర్పినారు కృపతో వీక్షించి నన్ బుత్రుగా,

నీ మాత్రంబు కవిత్వమా గురులదే, యెంతున్ మదిన్ వారలన్,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౭౮.

 

శాII సామాదుల్, వరవేదముల్, నిధులు, సంసారంబులో మున్గుచో

నీ మార్గంబును జూపునవ్వి జననీ! నీతేజమన్ బెన్నిధిన్

బ్రేమన్ మాకు నొసంగు నేర్చుకొనినన్, విశ్వంబునన్ వెల్గు మా

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౭౯.

 

శాII కామారిన్ కదిలించినన్ దెలుపు నీ కామ్యార్థ దాతృత్వమున్,

శ్రీమాతా! సుగుణాకరంబనగ నన్ జేయంగదే నిత్యమున్?

నీ మాన్యంబులు పోవునా? తరుగునా? నీవింక నన్ బ్రోవుమా!

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౮౦.

 

శాII నా మీదన్ దయ వీడి బ్రహ్మ నుదుటన్ నాకున్ లిఖించెన్ గదా

యేమాత్రంబును నోర్వరాని గతులన్, హే మాధవీ! నన్నిలన్

బ్రేమన్ గావగ నిన్నె వేడెదను నా విశ్వాసమున్ నిల్పి, యో

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౮౧.

 

శాII మేమా మాయల మున్గియుందుమిల, మా మీదన్ దయన్ వీడి యా

కామాదుల్ మదులందు చేరు మము నేకంబై క్షితిన్ గొల్పుఁగా,

మా మీదన్ దయఁ జూపి శాత్రవతతిన్  మానుండి పోఁ ద్రోలుమో

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౮౨.

 

శాII ఏమీ నిన్ననలేముగా జననివై యే మార్గమున్ జూపినన్,

నీ మార్గంబదె మాకుఁ బ్రీతి జననీ! నిష్టన్ నినున్ జేర్చు నా

శ్రీమార్గంబునె మమ్మిలన్ నడుపుమా, చేరంగ నిన్ వేగమే,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౮౩.

 

శాII క్షేమంబున్ గృషిఁ జేయు భక్తులకు సత్కీర్తిప్రదా! కొల్పుచున్,

నీ మాధుర్య గుణంబుఁ జూపుమ దయన్  నిత్యోత్సవోద్భాసినీ!

భూమిన్ గార్మిక వర్గమెంచు నిను సత్పూజ్యప్రభా రాశిగా,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౮౪.

 

శాII శ్రీమత్తోపెల సోదరుండడుగగా శ్రీదా! శతాధిక్యమౌ

శ్రీమార్గంబున పద్యముల్ గొలిపి యాశీర్వాదమందించితే?

ధీమంతుల్ గన నొక్క రోజుననె, ఖ్యాతిన్ గొల్పగా నెంచియా?

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౮౫.

 

శాII శ్రీమాతా! యభిమానమే ధనముగా చెల్వొందు నీ భక్తులన్

నీమార్గంబున నీవిలన్ నడుపుమా, నిన్ జేరనిమ్మా కృపన్,

నీ మార్గంబది మోక్షదాయకముగా నే నెన్నుదున్ నిత్యమున్,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౮౬.

 

శాII మా మీదన్ దయఁ జూపునట్టి నిను సమ్మాన్యంబుగా పల్కగా

నేమాత్రంబును నేర్వమమ్మ! మనమందేతీరునన్ గొల్చినన్

నీమంబొప్పగ నిన్ను దెల్పవలెగా, నిత్యప్రభారాశి! యో

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౮౭.

 

శాII రా మాతోనని నిన్ను కోరకనె చేరన్ వచ్చి కాపాడు నీ

ప్రేమన్ దల్లియుఁ జూపనేర్వదనినన్ విద్వన్నుతుల్ పొంగరే?

నీ మాన్యత్వము నెంచకుందురె? శుభానీకంబులన్ గొల్పు మా

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౮౮.

 

శాII మామా చంద్రుఁడ! మమ్ము చూడుమనినన్ మాసోదరిన్ జూడుమం

చేమాత్రంబును శంకలేక తెలుపున్,హృష్టాత్ముఁడై యొప్పుచున్,

శ్రీమాతా! తమ సోదరుండె తెలిపెన్, చిద్రూపిణీ! కావుమా,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౮౯.

 

శాII రాముండిక్కఁడె రావణున్ దునుముచున్ రాజిల్లడంచెంచి నీ

ప్రేమన్ జూపుచు సీతవై చనితివా వెంటన్ దయన్ బోడుకున్?

నీ మార్గంబది నిర్వివాదముకదా, నీకున్ నమస్కారముల్,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౯౦.

 

శాII నీ మందస్మిత మందఁజేయు శుభముల్, నీ మార్గమున్ జేర్చు మ

మ్మో మాతా! నినుఁ గొల్తుమమ్మ! విజయమ్మో? స్వర్గమో? గొల్పుమా,

మా మర్యాదను కావుమా, శుభములన్ మాకిమ్మ, నీ సత్ కృపన్,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౯౧.

 

శాII ప్రేమన్ జూపెడి యమ్మవీవె జననీ! విజ్ఞానమందించు సత్

ప్రేమోద్భాసిత తండ్రివీవె కనగా విశ్వాసమొప్పారగా

మేమున్ నిన్ భజియింతుమమ్మ! దయతో మేలున్ సదా కూర్చుమా,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౯౨.

 

శాII శ్రీమంతుండగు నారసింహునెదలో శ్రీదేవివై వెల్గు నిన్

ధీమంతుల్ కని వర్ణనప్రతిభతో దీపించు పద్యాళినే

బ్రేమన్ వ్రాయగ నేర్తురమ్మ! నిను నే విఖ్యాతిగా వ్రాయనా?

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౯౩.

 

శాII ఏమాత్రంబును దోషముల్ గనను, నా కేమాత్రమందింతువో

యామాత్రంబె రచించుదున్ శతకమై యానందమున్ గూర్పగా,

శ్రీమాతా యొకరోజులో శతకమే చెన్నార వ్రాయించితే?

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౯౪.

 

శాII భూమిన్ గల్గినవెల్ల నీదు ప్రతులే పూజ్యంబులే చూడగా,

నేమా భాగ్యము? నిన్నె యన్నిటఁ గనన్ హృద్యంబుగా సాధ్యమై

క్షేమంబొప్పరహింపఁ సాధ్యమయె నో  సీమంతినీ! సంస్తుతుల్,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౯౫.

 

శాII రామారత్నమ! నిన్నె పోలుదురుగా రాజీవనేత్రుల్ భువిన్,

నీమార్గంబున నీ వలెన్ మెలగుచున్ నీవే యనన్ వెల్గుచున్

క్షేమంబున్గనువారికిన్ నతులు, రాశీభూత చేతోనిధీ!

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౯౬.

 

శాII శ్రీమన్మంగళ రూపులౌ మహిళలన్  జిత్తంబునన్ గొల్తు నే

నీమంబొప్పగ నీదురూపులనుచున్, నీ ధ్యాసతో వెల్గుచున్,

శ్రీమాతాద్భుత శక్తి వారె కద వాక్ఛ్రీనొప్పుచున్ నిల్తురే,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౯౭.

 

శాII నా మార్గంబున నీవె నిల్చి పదముల్ నాలోన గుంభించి యీ

శ్రీమన్మంగళ పూర్ణమౌ శతకమున్ చిద్రూపిణీ! వ్రాయగా

నీమంబొప్పఁగఁ జేసితీవె కద! నిన్ నేర్పార నన్ జేరనీ,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౯౮.

 

శాII శ్రీమన్మంగళ కార్యకర్తవగుచున్ జేతన్ ననున్ బట్టి నీ

వే మార్గంబయి జీవితాంతమిటులే విశ్వాసమొప్పారగాఁ

బ్రేమన్ దోడ్కొని పోవు నీకు నతులన్ బ్రీతిన్ భువిన్ జేసెదన్,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౯౯.

 

శాII ఏమేమీ! జననీ పదాబ్జ యుగళిన్ హృద్యంపు పద్యాళిలోఁ

బ్రేమన్ వ్రాయఁగఁ బూనినంతనె శతంబే కాదు పైనింకనున్

శ్రీమంతంబుగ నొక్కరోజుననె వచ్చెన్? నాకు వ్రాయంగ నో

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౧౦౦.

 

శాII శ్రీమాతా! మది నెంచు మింక నను, నే చింతాన్వయుండన్, ధరన్,

ప్రేమన్ నన్ గనె రత్నమాంబ, సుతునై వెల్గొందుటన్ గాంచి తా

శ్రీమంతంబుగ నన్నుఁ జూచి మురిసెన్, చిత్తంబులోనిల్చియే,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౧౦౧.

 

శాII శ్రీమాతా! వరలక్ష్మి! శ్రీరమ! కృపన్ జేకొమ్మ యీ గ్రంథమున్,

నీమంబొప్పఁగ నీవె వ్రాయునటులన్ నేర్పార చేయించి నీ

ప్రేమన్ జూపితివమ్మ నాపయిని, నీవే ప్రేమఁ జేకొమ్ము, మా

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౧౦౨.

 

శాII ప్రేమన్ మంగళముల్ రచింపుమిలపై విజ్ఞానులౌ వారికిన్,

నీమంబొప్పగ కావు మీవె కృపతోన్ వీక్షించి భక్తాళినే,

నా మీదన్ దయఁ జూపి మంగళములన్ నాకున్ బ్రసాదింపుమా,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౧౦౩.

 

శాII ఏమేమో రచియింపఁ జేసితివి నీవేనమ్మ నా తల్లివై,

నీ మాటల్ వర పద్యపాదములుగా నిల్చెన్ గనన్ పాఠకుల్,

క్షేమంబందఁగఁ జేయుమా చదివినన్ సేవించినన్ దీని నో

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౧౦౪.

 

శాII శ్రీమన్మంగళ! మంగళంబగుత నీ చిద్రూపమున్ గాంచినన్,

శ్రీమంతుండగు శ్రీహరిన్ దలచినన్ జేరున్ గదా పుణ్యముల్,

భూమాతన్ రహియించు పావనులకున్ మున్ గొల్పుమా శోభనల్,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౧౦౫.

 

శాII ఈ ‘మా` ప్రాసయె యేకప్రాస కనగా నిచ్ఛన్ గృతిన్ జేసితిన్,

శ్రీమాతృప్రభ మంగళంబనుచు నే చెన్నార నిన్ గొల్చుచున్

క్షేమంబందగ వ్రాసితిన్ జనని! రాశీభూత చైతన్యమా!

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౧౦౬.

 

శాII నీమాళిన్ గణియింపనో రచనలో, నిన్ భక్తితో చూపనో,

యేమాత్రంబును నమ్రతా సుగుణమేనిందున్ బ్రదర్శింపనో,

శ్రీమాతృప్రభఁ గాంచకుందునొ, కృపన్ శ్రీమాత మన్నింపుమా,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౧౦౭.

 

శాII శ్రీమన్మంగళరూపిణీ! జయమగున్ జింతింప తోపెల్లకున్,

శ్రీమన్మంగళమౌత దీనులకు, వాసిన్ గన్న స్త్రీ జాతికిన్,

శ్రీమన్మంగళమౌత నీకు, నిలపై శ్రీదేవి వెల్గొందుమా,

శ్రీమన్మంగళ భాగ్యదాయిని! మహా క్షీరాబ్ధి కన్యా! రమా! ౧౦౮.

స్వస్తి.

చింతా రామకృష్ణారావు కవి ఏక దిన విరచిత  రమాశతకము సమాప్తము.

 

 

కృతికర్త. 

చిత్రకవితాసమ్రాట్., కవికల్పభూజ., పద్యకవితాభిరామ,  చిత్రకవితా సహస్రఫణి,  

పుంభావ భారతీ , చింతా రామకృష్ణారావు.  భాషాప్రవీణ., P.O.L., M.A., 

విశ్రాంత ఆంధ్రోపన్యాసకుఁడు.

ఫ్లాట్ నెం. A 601. శిల్పాస్ ఆర్వీధర్మిష్ఠ... డీమార్టుకు ఎదురుగా.. మియాపూర్, హైదరాబాద్. 49.

తెలంగాణా. భారత దేశము. చరవాణి 8247384165 

నా రచనలు.

 1) అనంత ఛందము౨౨౦౦ కొఱకు శతకము.

 2) అశ్వధాటి సతీ శతకము.( ప్రాస నియమముతో, ప్రతీపాదమునా మూడు ప్రాసయతులతో ఒక్క రోజులో వ్రాసినది.)

 3) ఆంధ్ర సౌందర్యలహరి.

 4) ఆంధ్రామృతమ్,  పద్యవిపంచి, యువతరంగమ్. బ్లాగులలో అనేక స్వీయ రచనలు.

 5) కాళిదాసు కాళీ అశ్వధాటికి తెలుఁగు పద్యానువాదము.

 6) క్షీరాబ్ధిపుత్రీరమా! శతకము.

 7) చంపక భారతీ శతకము. (ఒక్క రోజులో వ్రాసినది.)

 8) నేరెళ్ళమాంబ సుప్రభాతమ్.(సంస్కృతంలో)

 9) పురుష సూక్త ఆంధ్ర పద్యానువాదము.

10) ప్రజ పద్య సీస గర్భిత ఆటవెలది కృష్ణ శతకము.

11) బాలభావన శతకము.

12) మూకపంచశతి పద్యానువాదము.

13) మేలిమిబంగారం మన సంస్కృతి. సంస్కృత సూక్తిశ్లోకములకు తెలుఁగు పద్యానువాదము.

14) రమాలలామ శతకము. (ఒక్క రోజులో వ్రాసినది.)

15) రాఘవా! శతకము.

16) రామకృష్ణ శతకము. (ఒక్క రోజులో వ్రాసినది.)

17) రుద్రమునకు తెలుగు భావము.

18) లలితా శ్రీచంద్రమౌళీశ్వర శతకము. (ఒక్క రోజులో వ్రాసినది.)

19) వసంతతిలక సూర్య శతకము.

20) విజయభావన శతకము.

21) వృద్ధబాలశిక్ష శతకము. (ఒక్క రోజులో వ్రాసినది.)

22) వేదస్తుతి, షోడశ చిత్రకవితలు. 

23) శ్రీ అవధానశతపత్రశతకము.

24) శ్రీచక్రబంధ అష్టలక్ష్మీ స్తోత్రము.

25) శ్రీచక్ర బంధ సప్తస్వర సర్వమంగళాష్టకము.

26) శ్రీచక్రబంధ మంగళాష్టకము.

27) శ్రీచక్రబంధ శ్రీరామ దశకము.

28) శ్రీమదాంధ్రభగవద్గీత చింతా(తనా)మృతం.

29) శ్రీమద్యాదాద్రి శ్రీనృసింహ శతకము.(అష్టోత్తరశత నృసింహనామాంచిత 118 ఛందో గర్భ చిత్ర సీసపద్య శతకము.)

30) శ్రీమన్నారాయణ శతకము.(ద్విత్వనకార ఏక ప్రాసతో)

31) శ్రీమన్నారాయణీయ పద్యానువాదము.

32) శ్రీయాజ్ఞవల్క్య శతకము. (ఒక్క రోజులో వ్రాసినది.)

33) శ్రీ లక్ష్మీ సహస్ర నామాంచిత సహస్రపద్యదళ పద్మము.

34) శ్రీలలితా సహస్ర నామాంచిత పద్యసహస్రదళపద్మము.

35) శ్రీవేణుగోప కంద గీత గర్భ చంపకోత్పల శతకము. (బంధచిత్రకృతి ఒకే శతకమున మూడు మకుటములతో మూడు శతకములు.) 

36) శ్రీ శిరిడీశ దేవ శతకము,(వారం రోజులలో వ్రాసినది.)

37) శ్రీ శివాష్టోత్తరశతపంచచామరావళి (శివశతకము.) (ఒక్క రోజులో వ్రాసినది.)

38) శ్రీ శివాష్టోత్తరశతనామాన్వితాష్టోత్తరశత విభిన్నవృత్త శివశతకము.

39) సుందర కాండ.(రామాన్వయముగా కందపద్యములు, సీతాన్వయముగా తేటగీతి పద్యములు, హనుమదన్వయముగా ఉత్పలమాలలుతో సుందరోత్పల  

     నక్షత్రమాల.)

40) సురగవి నవ రత్నమాలిక. (చిత్రకవితా ప్రసూనములు.)

41) సువర్ణమాలా స్తుతి. శంకరుల శ్లోకములకు పద్యానువాదము

42) స్వతంత్ర భారత వజ్రోత్సవము సందర్భముగా రకార ప్రాసతో అష్టోత్తర శత పాద ఉత్పలమాలిక. 

43) శ్రీరామ పట్టాభిషేకం. తేదీ. 10 - 3 -2025 మరియు 11 - 3 - 2025.తేదీల మధ్యవిరచితము.

44) శాంభవీ శతకము.(మధ్యాక్కర గర్భ చంపకోత్పలాలు.)( ఏకదిన విరచితము) 20 – 4 – 2025.

45) శ్రీ అరుణాచలేశ్వరాష్టోత్తరశతనామాంచిత పద్యపుష్పార్చన.(తే.08 - 8 - 2025.)

46) గణపతి అష్టోత్తరశతనామాన్విత పద్యావళి. శాంకరీ శతకము. (ఒక్కరోజులో వ్రాసినది) తే. 31 - 8 - 2025.

స్వస్తి.

జైహింద్.

 

Print this post