గణనీయంబగు భాషలందు తెలుగున్ గాంచంగ మేల్మేలు.. తాన్ విన సొంపై , ప్రకటించు భావ సరళిన్ దృప్తిన్, విశేషించి పల్ ఘన కావ్యామృత సంవిధాన మహిమల్ గాంచంగ నాంధ్రామృతం బను యీ బ్లాగును గొల్పి యుంటి. కనుడీ ! ఆంధ్రామృతం బందుడీ ! .

1, మార్చి 2017, బుధవారం

కవయిత్రి పావులూరి సుప్రభ. ... శ్రీ వల్లభవఝలకవి మార్గములో రచించిన శ్రీకర, ఆర్జనా, మాదకశ్రీ, గతిమా గర్భ హితకరి వృత్తము . . .

జైశ్రీరామ్.
కవయిత్రి పావులూరి సుప్రభ
శ్రీకర, ఆర్జనా, మాదకశ్రీ, గతిమా గర్భ హితకరి వృత్తము 
హితకరి
వ్రాసెడి పద్యంబియ్యది శ్రమనీయదు, వాణి రాల్చెఁ , క్రన్నన నాకై
గాసిని నాకీ దేవిధిఁ ! గమనీయము సూడ రూపు! గంధము లొల్కున్‌
హాసములే జిందించెడు ! నమృతంబుగ మోదమిచ్చు! హాయినిఁ గూర్చున్‌
వాసియు నాకందించును! భ్రమ బాపుచు గుండెలోన ! భారతి వాక్కై
శ్రీకర
వ్రాసెడి పద్యంబియ్యది
గాసిని నాకీదేవిధి
హాసములే జిందించెడు
వాసియు నాకందించును
ఆర్జనా
వ్రాసెడి పద్యంబియ్యది శ్రమనీయదు
గాసిని నాకీదేవిధిఁ ! గమనీయము
హాసములే జిందించెడు ! నమృతంబుగ
వాసియు నాకందించును! భ్రమబాపుచు
మాదకశ్రీ
వ్రాసెడి పద్యంబియ్యది శ్రమనీయదు వాణి రాల్చె
గాసిని నాకీదేవిధిఁ ! గమనీయము సూడ రూపు!
హాసములే జిందించెడు! నమృతంబుగ మోదమిచ్చు!
వాసియు నాకందించును! భ్రమబాపుచు గుండెలోన
గతిమా
శ్రమనీయదు వాణిరాల్చెఁ
గమనీయము సూడ రూపు!
నమృతంబుగ మోదమిచ్చు
భ్రమబాపుచు గుండెలోన
సుప్రభ
2:20 PM
26-02-2017
వృత్తము --ఛందస్సు-- గణములు -- యతి/యతులు
హితకరి -- ఆకృతి -- భ,మ,న,జ,జ,ర,స,గ -- 1,9,18
శ్రీకర - అనుష్టుప్ - భ,మ,లల --యతిలేదు
ఆర్జనా -- అతిజగతీ - భ,మ,న,జ,ల ------- 1,9
మాదకశ్రీ - అత్యష్టీ -- భ,మ,న,జ,జ,గల ----- 1,9
గతిమా -- బృహతీ -- స,స,జ -- యతి లేదు
నేను నిన్న ప్రచురించిన" రక్షణీ,గతిమా,మహిత గర్భ నటకళా వృత్తము" నకు చింతా రామకృష్ణారావు గారి స్పందన జూచి, వారికి ధన్యవాదములు తెలిపి వారి టైమ్‌ లైన్‌ కు వెళ్ళి అక్కడ ప్రచురింపబడినవి చూస్తుండగా వారు పంచినది వల్లభ వఝల అప్పల నరసింహమూర్తిగారు వ్రాసిన" శ్రీకర,ఆర్జనా,మాదకశ్రీ గర్భ హితకరి వృత్తము" కనిపించినది. చదివి, నోట్ బుక్ లో నోట్ చేసికొని, చింతా వారిచ్చిన లింక్ ద్వారా ఆంధ్రామృతము బ్లాగ్‌ లోని వారి శివశతకము ను తెరిచి, చదువబోతుండగా హృదయములోనుండి వినిపించినది.."తరువాత చదువుకోవచ్చు,పద్యమిస్తాను" -- అని. ఏమిరాబోతున్నదో అని అనుకుంటుండగా.. "ఇప్పుడు వ్రాసికొన్నదే" .. అని వినిపించింది. మౌనముగా టైప్ చేయటము మొదలుబెట్టాను. అందిన/వ్రాయించిన పలుకులు పైన చూపిన పద్యము/పద్యములుగా వచ్చాయి.
వల్లభ వఝల వారు గర్భితము చేసిన శ్రీకర,ఆర్జనా, మాదకశ్రీ లకు తోడుగా, అదనముగా గతిమా వృత్తమును కూడ జొప్పించి ఆనందము గలిగించారు సర్ప్రైజ్ గిఫ్ట్ గా. :-)
తమ పోస్ట్/ పద్యములతో స్ఫూర్తి గలిగించిన చింతా వారికీ, వల్లభ వఝల వారికి ధన్యవాదశతములతో, అడుగకుండానే ఆదరముతో నాలుగవ వృత్తమును గూడ చేర్చి గర్భకవితను కానుకజేసిన అంబకు/సద్గురుమూర్తి కి సాదర ప్రణామాలతో..
జైహింద్.
Print this post

0 comments:

కామెంట్‌ను పోస్ట్ చేయండి

ఆంధ్రామృత బ్లాగ్ వీక్షకులకు ధన్యవాదములు.