గురు పూర్ణిమ సందర్భముగా గురువులకు, శిష్యులకు శుభాకాంక్షలు.

శ్లో:- 

వ్యాసం వసిష్ఠ నప్తారమ్ -శక్తే: పౌత్రమ కల్మషమ్.

పరాశరాత్మజం వందే శుక తాతం తపో నిధిం!

క:- 

దివ్య వసిష్ఠ ప్రపౌత్రుఁడు,

భవ్యుండగు శక్తి పౌత్ర వరుఁడు నకలుషుం 

డవ్యయ పరాశరాత్మజుఁ

భవ్యుండగు శుకుని తండ్రి వ్యాసుం గొలుతున్.

శ్రీ సద్గురువైన దత్తుఁడే ప్రపెఅథమంగా గ్రుత్వమైన బాధ్యతను తననాశ్రయించినవారి పట్ల నిర్వహించి గురువు అనే పదానికి కారణంగా నిలిచాఁడు. ఆ కారణంగానే వారిని సద్గురుదత్త అని సంబోధించడం జరుగుతోంది.

అట్టి సద్గురుదత్త యొక్క ఆశీస్సులు ఆంధ్రామృత పాఠకులకు, యావజ్జీవాళికీ ఉండాలని కోరుకొంటున్నాను.

శ్లో:- 

''గు'' కారస్త్వంధకారత్వాత్‌,

''రు'' కారస్త న్నిరోధక:, 

అంధకార నిరోధత్వాత్‌ 

గురురిత్యభిధీయతే.

భావము:- 

శిష్యుని అజ్ఞానమను అంధకారమును తొలగించి జ్ఞానమనెడి జ్యోతిని ప్రకాశింప జేసేవాడు అని అర్థం.

అట్టి గురువుకు నమస్కరించేటప్పుడు చెప్పుకొన వలసిన శ్లోకము.

శ్లో:-

అజ్ఞాన తిమిరాంధస్య జ్ఞానాంజన శలాకయా

చక్షురున్మీలితం యేన తస్మై శ్రీ గురవే నమ:!

క:-

అజ్ఞానాంధముఁ బాపగ

సుజ్ఞానవరాంజనంబు గల్గు శలాకన్

ప్రజ్ఞన్ కంటికి పులిమెడి

విజ్ఞులు గురుదేవ! నుతులు. వేల్పులు తమరే.

భావము:- 

ఆశ్రయించిన శిష్యులకావహించిన అజ్ఞాన మనెడి గ్రుడ్డితనమును బాపుట కొఱకు తమకు గల సుజ్ఞానమనెడి కాటుకనలమిన పుల్లను అంతః చక్షువులకు పులిమి, తద్వారా విజ్ఞానమనే కాంతిని చూచెడి దృష్టిని కలిగించే ప్రజ్ఞాన్వితులు గురువులు. అట్టి గురువులయిన మీకు నమస్కరించెదను.

శ్లో:-

లక్ష్మీనాథ సమారం భాం-నాథయామున మధ్యమాం

అస్మదాచార్య పర్యంతాం- వందేగురు పరంపరాం.

క:-

లక్ష్మీ నాధుఁడు మొదలుగ

నూ, క్ష్మాజ సునాధయామునుఁడు మధ్యముగా,

సూక్ష్మజ్ఞుల మద్గురువుల

నీక్ష్మాస్థలి  నేడు కొలిచె దే కడు భక్తిన్.

భావము:-

లక్ష్మీ నాధుఁడు మొదలుగా మధ్యమ సునాధ యామునుఁడుతో పాటు నేటి సదసద్జ్ఞులగు గురు పరంపరకు భక్తితో నమస్కరించు చున్నాను.

పరమ పవిత్రమైన గురు పూర్ణిమ సందర్భంగా ఆంధ్రామృత పాఠకులకు, సద్గురువులకు శుభాభినందనలు తెలియ జేస్తున్నాను.

జైశ్రీరాం.

జైహింద్.

Print this post