అమ్మా జగజ్జననీ!

శ్లోకము:-
యాదేవీ సర్వ భూతేషు
శక్తి రూపేణ సంస్థితః
నమస్తస్యై నమస్తస్యై
నమస్తస్యై నమో నమః.

పద్మనాభ:-

అమ్మా! సదా నీ మహా తేజమున్ నీ బృహద్ రూపమున్ గాంచ గాసాధ్యమౌనా

సమ్మాన్యతన్ నీదు సద్ రూపు వర్ణించు సద్ బుద్ధి మాకిచ్చి రక్షించు మమ్మా!

సమ్మౌనులే నీ లసద్ రూపు వర్ణించె, సాక్షాత్తు శ్రీ జ్ఞాన సంపన్నులైరే?

సమ్మోదమున్నాకు సద్ జ్ఞానమున్ గొల్పి, సాక్షాత్కరింపంగదే శంభు రాణీ!

తోటకము:-
మహిషాసురు డే గన మాన్యుడుగా
మహిమాన్విత! నిన్ గనె. మాన్యతతో.
మహిషాసుర మర్దిని ! మమ్ము గృపన్
మహిమన్ గని, పాపము మాపగదే!

శార్దూలము:-
దేవీ నీ మహనీయ భావ గరిమన్ దేదీప్యమనంబుగా
భావించున్ నిను సజ్జనాళి మదులన్. ప్రఖ్యాతమైనట్టి నీ
భావంబే మము గాచునమ్మ! కరుణన్ భాస్వంతమై మామదిన్
నీవే నిల్చిన చాలునమ్మ. యిలపై నీకన్న లేరెవ్వరున్.
చింతా రామ కృష్ణా రావు Print this post