గణనీయంబగు భాషలందు తెలుగున్ గాంచంగ మేల్మేలు.. తాన్ విన సొంపై , ప్రకటించు భావ సరళిన్ దృప్తిన్, విశేషించి పల్ ఘన కావ్యామృత సంవిధాన మహిమల్ గాంచంగ నాంధ్రామృతం బను యీ బ్లాగును గొల్పి యుంటి. కనుడీ ! ఆంధ్రామృతం బందుడీ ! .

4, ఫిబ్రవరి 2019, సోమవారం

నాసికా సాముద్రిక. శతావధాని సి.వి.సుబ్బన్న గారు.

జైశ్రీరామ్.
ఆర్యులారా!
శతావధాని సి.వి. సుబ్బన్న గారు అమ్మాయిల నాసికా సాముద్రికాన్ని ఇలా చెప్పారు. 
దీనికి సంబంధించి శాస్త్రప్రామాణికత చూపఁ గలిగినవారున్న ఇది ఒక అనుభవోక్తి మాత్రమే అని చెప్పకుండా నమ్మదగినదే ఆనుకొనవచ్చును.
సీ. నాసిక దీర్ఘమై భాసిల్లుచుండిన
మగువ తా గోరిన మగని బొందు,
నాసిక వట్రువై భాసిల్లు చుండిన
సతి యాధికారిక ప్రతిభ గొఱలు,
నాసిక శుకరీతి భాసిల్లు చుండిన
భామిని సుఖరీతి బరిఢవిల్లు.
నాసిక చప్పిడై భాసిల్లుచుండిన
వికటస్వభావయై సకియ బొగులు,
తే.గీ. ప్రాగుపార్జిత పుణ్య సౌభాగ్య యైన
లేమ నాసిక గంధపలి వలె వెలయు
నని చికిత్సదీర్చికొనిన యంతమాత్ర
జక్కదనమబ్బునేమొ ప్రశస్తి రాదు.
భావము.
పొడుగైన ముక్కున్న అమ్మాయి తను కోరుకున్న వాడిని పొందుతుంది. వట్రువు అంటే గుండ్రని ముక్కు ఉంటే వ్యవహారాలు బాగా చక్కబెడతారు. చిలుక ముక్కు ఉన్న అమ్మాయి సుఖ సౌఖ్యాలను పొందుతుంది.చప్పిడి ముక్కున్న అమ్మాయి హాస్య స్వభావంతో అందరితో స్నేహంగా ఉంటుంది.
సౌభాగ్యవతి అయిన స్త్రీ ముక్కు, సంపెంగ పువ్వులా ఉంటుందట. అలాగని శస్త్ర చికిత్స చేయించుకొని తాము కోరుకొను విధముగా ముక్కు రూపము మార్పించుకుంటే చూడడానికి బాగుంటుందేమో గాని ఫలితాలు మారవు.
రసజ్ఙభారతి సౌజన్యంతో.
జైహింద్.
Print this post

1 comments:

రాజేశ్వరి నేదునూరి చెప్పారు...

నమస్కారములు
నాసికా సాముద్రికాన్ని గురించి చక్కగా వివరించారు. ధన్య వాదములు

కామెంట్‌ను పోస్ట్ చేయండి

ఆంధ్రామృత బ్లాగ్ వీక్షకులకు ధన్యవాదములు.