శ్రీ వేంకటేశ్వర ప్రాచ్య కళాశాల, తిరుపతిలో సత్కృతి, నా ప్రతిస్పందన.

జైశ్రీరామ్.

ఆర్యులారా! తిరుపతి శ్రీ వేంకటేశ్వర ప్రాచ్య కళాశాల, తిరుపతి వారు 
అవ్యాజానురాగంతో నన్ను తే.29-01-2016 న  సన్మానించిరి. వారు చేసిన సత్కృతికి నా ప్రతిస్పందనను నేను అక్షర రూపమున వారికి  తెలియఁజేసితిని. 
ఈ కార్యక్రమమును ఏర్పాటు చేసి నాపై అమితమైన గౌరవమును నిలిపిన 
కళాశాల సంస్కృత శాఖాధ్యక్షులైన అవధాని డా.మాడుగుల అనిల్ కుమార్ గారికి, 
సహృదయులైన ఉపన్యాసక వర్గానికి, ఇతర ఆహుతులందరికీ 
నా నమోవాకములు.

వారి సన్మానమునకు నా ప్రతిస్పందన.

     శ్రీరస్తు     

శ్రీ వేంకటేశ్వర ప్రాచ్య కళాశాల, తిరుపతిలో అవ్యాజానురాగముతో నన్ను సత్కరించిన, విద్యార్థినీ విద్యార్థులకు ఆశీస్సులు తెలియఁ జేయుచు, 

అధ్యాపక బృందమునకు, 

మీ అభిమాన పాత్రుఁడు చింతా రామకృష్ణా రావు తెలియఁ జేసుకొనుచున్న 

కృతజ్ఞతాభివందనములు. 

పూజ్య మహోదయులారా! మీకందరికీ నా హృదయ పూర్వక నమస్సులు. 

మీ ఆదరాభిమానములకు కృతజ్ఞతలు.

శా. శ్రీవాణీ కరుణా కటాక్షములచే శ్రీవారి శ్రీ సన్నిధిన్

సేవా భాగ్యము, దర్శనంబు, గుణ సచ్ఛీలప్రభా మూర్తులన్, 

దైవాంశోద్భవ సంస్కృతాంధ్ర నిధులన్, దర్శించు భాగ్యంబు, నే

నీవేళం గని పొందుచుంటి. మహితన్ హేమాదృలీరందరున్. 1.

చ. అసదృశ పాండితీ గరిమనందరుబోధకులొప్పియుండి, స

ద్విషయ వివేచనాగరిమ వేల్పులతో సరి తూగుచుండియున్,

సుసర వచో విలాసమున శోభిలఁ జేసితిరయ్య నన్నుమీ

రసదృశ రీతితో, సుజన రంజన సత్కళ  మీ వశంబయెన్. 2.

"శ్రీచక్ర బంధ తేటగీత్య"వసాన  "చంపక" - "బహువిధ కంద" - "గీత"  గర్భ  సీసము.

గుణ గణనంబులో గణుతిఁ గొన్న నయోజ్వ - లక్రాంతి మీరు నాన్ డంబమలర.

గుణ గణులై మహిన్, వినయ గుంభన సద్బ - హువ్రీహి మీరవన్ హొయలు మీర,

ముని జనులైరి, సద్  ప్రణుతి పూజ్య నరాళి - కి బ్రహ్మ లైరి, సాకిరి సుజనుల.

ధన ఘనులైరి సత్ ప్రణవ వాగ్ధన సార్థ - క  బ్రౌణ్య  మీరెగా! జ్ఞానులార! 

శ్రీచక్ర బంధతేటగీతి. 

రమ్య రమణుని శ్రీపద రాజిపై న - నిలిపి చిత్తము శ్రీ దేవినే తలంచ

చిత్ర కవినంచు శ్రీభావ చిన్మనోజ్ఞు - రహిని జూచిరి నన్గాంచి ప్రాజ్ఞు లార. 3.

చ. ధనమును ఖర్చు చేసి బహుధా విలసత్కృత సత్కృతీ విధిన్

ఘనులు గణింపఁ జేసిరిల గౌరవమిచ్చుచు నాకు. మీ మహ

ద్వినుత విశేష సత్కృతికి వేల్పులు సాక్షిగ సంతసించితిన్.

వినయముతోడ తెల్పెదను, విజ్ఞులు మీకభివందనావళుల్. 4.

ఉ. మంగళ మౌత శ్రీహరికి. మంగళముల్ మన మంగ తల్లికిన్.

మంగళమౌత భారతికి, మంగళముల్ కవి పండితాళికిన్.

మంగళమౌత శిష్యులకు, మంగళముల్ పుర సత్ ప్రజాళికిన్,

మంగళమౌత మాడ్గులకు, మాన్య మహోదయులైన మీకునున్. 5. 

స్వస్తి.

భాగ్యనగరము.

తేదీ. ౨౯-౦౧-౨౦౧౬.

జైహింద్.

Print this post