గణనీయంబగు భాషలందు తెలుగున్ గాంచంగ మేల్మేలు.. తాన్ విన సొంపై , ప్రకటించు భావ సరళిన్ దృప్తిన్, విశేషించి పల్ ఘన కావ్యామృత సంవిధాన మహిమల్ గాంచంగ నాంధ్రామృతం బను యీ బ్లాగును గొల్పి యుంటి. కనుడీ ! ఆంధ్రామృతం బందుడీ ! .

14, జనవరి 2015, బుధవారం

సజ్జన పాఠక బాంధవాళికి శ్రీజయ మకర సంక్రాంతి శుభాకాంక్షలు.

జైశ్రీరామ్.
ఆర్యులారా! సజ్జన పాఠక బాంధవాళికి శ్రీజయ మకర సంక్రాంతి శుభాకాంక్షలు. 
చ:-మకరమునందు సూర్యుఁడు విమానప్రదేశమునందు కూడగా
సకల జగమ్ము పుణ్య పరిసంభవ కాలముగా గణించుచున్
ముకుళిత హస్తులై తలచి పూర్వుల నెన్నుచు బ్రాహ్మణాళిలో.
సకల పదార్థముల్ గొనగ చక్కగ నిత్రు భుజింప భక్తితో. 

ఉ:-పంట పొలాలలో విరగ పండిన పంటల లక్ష్మి బండ్లపై
నింటికి చేరి శోభిలగహేమ ప్రభా రమణీయ తేజసం
బంటిన రైతు బిడ్డ పరమాన్నము పంచును గాదెపూజ్యులై
యింటికి వచ్చు వారలకునెంతటి పుణ్య పునీత మూర్తియో!

ఉ:-బంగరు కాంతులీను పురి పాకలుమామిడి తోరణావళుల్
ముంగిట రంగవల్లుల నమోఘముగా విరచించు కన్యకల్
చొంగలు కార్చుచున్ కనెడి సోకుల రాయుల వేష భాషణల్
రంగుగ నద్దినట్టి చదరంగపు మ్రుగ్గుల మధ్య గొబ్బిళుల్,
జంగమ దేవరల్ కొలుపు చక్కని నాదములిచ్చు శంఖముల్
టింగరి వోలె చెట్లపయి డేకుచు నాడెడు కొమ్మ దాసరుల్
సాంగముగా హరిన్ కొలుచు సన్నుత శ్రీ హరి దాసరావళుల్
పింగళ వర్ణులౌ పగటి వేషపు గాండ్రునుపల్లె వాసులున్,
రంగుల వస్త్ర ధారణను రాజిలు ముంగిటి గంగిరెద్దులున్
హంగులకాశ చేసి వరహాలను జల్లెడి పెత్నదారులున్
నింగికినంటు యాశల మునింగియు నల్గెడి క్రొత్త యల్లుళున్
రంగులు పూసి బావలకు రాతిరి యక్కల దాచు చెల్లెళున్
బంగరు బావ గారనుచు వందలు గుంజెడి బావ మర్దులున్,
బెంగగ నుండు నప్పులిల పేరుకు పోవుచునున్న మామలున్.
భంగమునొంది జూదమున పళ్ళికలించెడి తోటి యల్లుళున్.
ఖంగని మ్రోగునట్టి గుడి గంటలుమండెడి భోగి మంటలున్,
నింగికి నంటు సంతసము నివ్వటిలే సరి క్రొత్త జంటలున్,
బంగరు పళ్ళెరంబులను పంటికి నోటికి నచ్చు వంటలున్,
రంగుల నీను పల్లెలును రమ్యత నొప్పెడి పట్టణంబులున్,
యింగిత మున్నసత్కవుల కెల్ల మనోజ్ఞ ము సంకురాత్రులౌన్.
జైహింద్
Print this post

2 comments:

అజ్ఞాత చెప్పారు...

విందగు తెల్గుపద్యముల వేడుకలన్నియుఁ జూపి, కమ్మఁగాఁ
మందికిఁ బంచినట్టిదిది, మాటల పాయసమెంత తీపి! యే
మందును మాదు భాగ్యమును? మాతకృపామయ వీక్షణంబుతో
నందినదీ ప్రసాదమని నామదినెంచుచు నంజలించెదన్ _/\/\/\_

_/\/\/\_

చింతా రామ కృష్ణా రావు. చెప్పారు...

అజ్ఞాతంబుగ నుండిమెచ్చుమిము, మీ యాంతర్యమున్ జూచితిన్.
సుజ్ఞానాంబుధి మీరలెన్నగ. మనశ్శోభాయమానంబు స
ద్విజ్ఞుల్ గాంచగ పద్యమల్లిన కవీ! పేరేమిటో తెల్పుడీ!
ప్రాజ్ఞుల్ మెచ్చగ మెల్గు మిమ్ము కనినన్ భాగ్యంబదే చూడగా.

వ్యాఖ్యను పోస్ట్ చెయ్యండి

ఆంధ్రామృత బ్లాగ్ వీక్షకులకు ధన్యవాదములు.