మేలిమి బంగారం మన సంస్కృతి 127.

జైశ్రీరామ్.
శ్లో:-
లాలనాత్ బహవో దోషాః  -  తాడనాత్ బహవో గుణాః.
తస్మాత్ పుత్రంచ శిష్యంచ  -  తాడయేత్ నతు లాలయేత్.
గీ:-
గారమును చేయ పెరుగును నేర వృత్తి.
తాడనముచేత పెరుగును ధర్మ వృత్తి.
కాన పుత్రుల, శిష్యులఁ ఘనులఁ జేయ
తాడనము చేత మలచుడు.ధన్యులగుడు.
భావము:-
పిల్లలను లాలించుట వలన అనేక దోషములు కలుగును. దండించుట వలన అనేక గుణములు కలుగును. కావున పిల్లలను శిక్షించ వలెనే కాని లాలించరాదు.
ఈనాడు మనము చూస్తున్నాము. పిల్లలను తల్లిదండ్రులు అతిగా ప్రేమిస్తున్నారు. అది తప్పక వాంఛనీయమే ఐతే ఆప్రేమ మితిమీరి అతిగా గారాబం చేస్తుండడంతో ఆ పిపిల్లల దౌష్టములను కూడా మంచిగానే భావిస్తున్నారు పాపం.
నిజంగా పిల్లలను ప్రేమించే తల్లిదండ్రులు వారి పిల్లల భవిష్యత్తును దృష్టిలో పెట్టుకొని వారు చక్కని క్రమ శిక్షణలో పెరిగే మార్గాన్నే అనుసరించాలి. వారిని క్రమ శిక్షణలో పెట్టుట కొఱకు  అవసరమైన పాళ్ళలో సామ - దాన - భేద - దండోపాయాలను ప్రయోగించాలి వారి మీద.
గారము చెయ్యాలి. తప్పేమీ కాదు. ఐతే అతిగా గారాబము చేయుట చేటు కలిగిస్తుందని మాత్రం మరచిపో కూడదు.యువత సమాజంలో ఈ నాడు  సమస్యాత్మకంగా తయారవడానికి కారణము వాళ్ళ తల్లిదండ్రుల పెంపకములోని లోపమేనని గ్రహించాలి.కావున పెద్దలారా! చెప్పండి బుద్ధి మీ పిల్లలకి. తల్లిదండ్రులారా! పెంచండి మీ పిల్లలను చక్కని క్రమశిక్షణనేర్పుతూ.
జైహింద్.

Print this post